मत्ती 8
8
1ओहाङःसैको येसु स्यालुङ्सै ग्ल्युङ्ह्आ। ग्ल्युङ्ह्तोक् बेलाहाङः नाःतो मान्तालम् ओउःकुस् वाह्आकाय्। 2ओहाङःसैको ग्ल्युङ्ह्आक्तीको यात्चाक् कोह्र् चाओ मान्ता येसुकायः बाःती स्यवलाङ् वाङ्आ। “लौ प्रभुय नाङ् ग्यातेःनाः त खेःया ङाकायः स्याक्ताक्सातेः खाय्तेःनाःची” त दाय्ह्ती येसुकायः काःहाल्ती तोआथै 3ओउःत काःहाल्ती तोआक्तीको येसुइ क्रुत् प्योती ओउः कोह्र् चाओ मान्ताकायः झाम्ह्ती दीन्ह्आकान्। क्रुत् दीन्ह्तोक्हाङः “लौ ग्यानाङः स्याक्तेःपाः” त दाय्ह्ती तोओ कुस्ब्रक्त ओउः मान्ता सेलः स्याव्आ। 4ओउःखेपाय् सेलः स्याव्आक्तीको “लौ ‘येसुइ स्याक्आलाङः’ त दाय्ह्ओ सुकायःमा छ्यानःतेःचौ। सुकायःमा छ्यानःमाःत पुरोहीत्कःताङ् रेन्ह्तो आल्ती ओउःकायः ह ‘लौ द्याह् ङापाय् सेलः स्याव्आलाङः’ त दाय्ह्ती लयःकोः आङ् छ्यानःआक्उ। ओहाङःसै आङ् छ्यानःआक्तीको मोसाइ गानाक्ती तोओ जवसाकायः मन्दीर्हाङः परमेस्वर्कायः वाः मेत्छ्याः सात्ती ओउःकायः ल्हाउ दा। एत हायःआक्तीको सबैइ नाङ्कायः ‘सेलः मुलेःनाः’ त चीःनानी” त येसुइ दाय्ह्ती तोआथै।
5ओउःत दाय्ह्ती तोआक्तीको ओहाङःसैको येसु कफर्नाहुम् त तोओ सहर्ताङ् दाह्ती वाङ्आकाय्। कफर्नाहुम् वाङ्आक्तीको यात्चाक् रोमी देस्कोः सीपाही हाकीम् येसुकःताङ् काःहाल्ती तेलाङ् वाङ्आ। 6“लौ प्रभुय ङाकोः काम् जाङ्ह्ओ नोकरी आन जीक्ती झ्यान्ते साङ्ह्सा जुगाङ् खाय्माःत कीम्हाङः एङ्तीलेः मुनाः” त दाय्ह्ती येसुकायः तोआकान् 7“लौ उया ङा ओउःकायः स्याक्ताक्लाङ् वाङ्नाङः” त दाय्ह्ती येसु त्याङ्तो 8“खेःल प्रभुय ङा इच्युक् मीचोःआ मान्ता लेःआः ङ नाङ् ङाकोः कीम्ताङ् वाङ्सा खेःहाङ्ल। बुरु नाङ् इहाङः मुओहाङःसैलेः गानाक्ती तोचाक्ची दा ओहाङःसै ङाकोः नोकरी स्याक्लेःनाः। 9ङासै ताङ्ह्ओ आधीकारीइ गानाक्ती तोओ कुरा ङाखेइ जाङ्ह्सा खेःनाङः फेरी ङाकोः सीपाहीलम्खेइमा ङाइ गानाक्ती तोओ कुरालेः जाङ्ह्सा खेःनै। यात्चाक्कायः ‘आल्अ’ त दाय्ह्ती तोओ कुस्ब्रक्त ओउःपाय् आल्लेःनाः अरुकायः ‘वाङ्अ’ त दाय्ह्ती तोओ कुस्ब्रक्त ओउःपाय् वाङ्लेःनाः। नोकरीकायः ‘इत हायःउ’ त दाय्ह्ती तोआक्तीको ओउःइपाय् ओउःतलेः हायःनौ बा। इलो लेखा ङाकोः नोकरी स्याक्ताक्साकायः तोचाक्ची दा ओहाङःसैको तोआक्तीको स्याक्लेःनाः” त दाय्ह्ती ओउः हाकीम्इ तोआथै। 10ओउः हाकीम्इ तोओ कुरा येसुइ ग्याङ्ह्तीलेः सायःआकान्। “दोङ्सीलेः इ रोमी देस्कोः मान्ताइ ङाकायः आन ङ्हाम्नाःताङः बा ओउःच्युक् ङ्हाम्ओ मान्ता इस्राएल् देस्कोः यहुदी मान्तालम्कःगन ङाइ गलमा क्रुस्धाङ्ल” त दाय्ह्ती येसुइ ओउःकुस् वाह्ओलम्कायः तोआकान्। 11“दोङ्सी दाय्ह्भनाङ् दाह्न्याम्सैमा ब्लक्न्याम्सैमा नाःतो अरु जात्कोः मान्तालम् वाङ्ती आब्राहाम् इसाक् याकुब्कुस् परमेस्वर्कोः राजीहाङः मुसा दोःनै। 12ओउःमयःखे दोःनै ओउः राजीकोः प्रजा त तोओ इस्राएली मान्तालम् परमेस्वर्कोः राजीसै क्लाःती ल्होक्ओलेः स्याव्नै। ल्होक्तोक्हाङः ओउःमयः लीह्ती आन र्याःनै” त दाय्ह्ती येसुइ तोआकान्। 13एत तोआक्तीको ओउः सीपाहीकःताङ् ल्हेःती “लौ आल्अ दा। गतलो नाङ्इ ङ्हाम्तेःआकान् ओउःतलेः स्याव्पाः” त दाय्ह्ती येसुइ तोथातो ओउः बेलाहाङःसैपाय् ओउः सीपाहीकोः नोकरी सेलः स्याव्आ।
14ओउः सीपाहीकोः नोकरी सेलः स्याव्आ ओहाङःसैको येसु सीमोन् पत्रुस्त तोओकोः कीम्ताङ् दाह्ती वाङ्आकाय्। ओहाङः दाह्ती वाङ्तोक्हाङः येसुइ पत्रुस्कोः आय् अय्ती जीक्ती मुओ च्यवःआकान्। 15च्यवःआक्तीको ओउःकायः क्रुत्इ दीन्ह्ती येसुइ ओउः मोमःचोःकायः स्याक्ताक्आकान्। स्याक्ताक्आक्तीको ओउःकोः अय्ओ समःओ त झ्यान्ते पत्रुस्कोः आय्इ चीङ्ती ओउःकायः दोल्कावःती बयःआथै। 16ओहाङःसैको जेःती भ्याआक्तीको न्याम् ब्लक्ओ बेलाहाङः येसुकःताङ् नाःतो लान्इ ङायःओलम्कायः वानःआकानी। ओउःकःताङ् वानःआक्तीको येसुइ लान्कायः तोती ल्हेस्नी वाय्माआकान् सबै जीक्ओलम्कायः स्याक्ताक्माआकान्। 17ओउःत हायःती उय्ह्लेकोः परमेस्वर्कोः कुरा छ्यानःओ एसायाइ तोओ कुरापाय् ताप्ताक्आकान् “लौ ओउःइपाय् ङीकोः जीक्ओलम् लयःलेः ल्हाङःती लात्ती आलःती वाय्बत्आताङी” त दाय्ह्ती दाय्ह्ओ येसुइ ताप्ताक्आकान्।
18ओहाङःसैको येसुकःताङ् नाःतो मान्तालम् हुम्लाङ् वाङ्आकाय्। नाःतो हुम्लाङ् वाङ्ती झ्यान्ते “लौ दुम्हान्कोः तीः उःसै त्यात्लाङ् आल्इ” त दाय्ह्ती येसुइ लयःकुस् वाह्ओमयःकायः तोआकान्। 19ओउःत तोतोक्हाङः यात्चाक् धर्मा स्यान्ओमयः येसुकःताङ् वाङ्ती “लौ गुरुय गाःहाङःलो नाङ् आल्तेःचाः ओहाङःपाय् ङामा गुल्ह्ती वाङ्नाङः” त दाय्ह्ती ओउः मान्ता दाय्ह्आ। 20“लौ स्याल्खेकायः एनःसा ल्हाङ्मा मुनाः वाःखेकायः न्यास्सा छ्युत्मा मुनाः। ङा मान्ताकोः चोः त तोओखेकायः लयःकोः एनःसा कीम्पाय् दोह्मा नाःङल” त दाय्ह्ती येसु त्याङ्आ। 21ओहाङःसै यात्चाक् अरु येसुकुस् वाह्ती मुओ मान्ता वाङ्ती “लौ प्रभुय ङाकोः आपा सीती पाम्ह्आक्तीको नाङ्कुस् वाह्सा दोःपाङः” त दाय्ह्ती येसुकः तेतो 22“लौ ङाकुस् द्याह् वाङ्अ दा। सीसा खेःओ मान्तालम्इ लयःकोः सीओकायः पाम्ह्ती वाय्पानी” त येसु दाय्ह्ती त्याङ्आ।
23ओहाङःसैको येसुमा ओउःकुस् वाह्ओमयःमा दोङ्गाहाङः लन्ह्ती तीःहाङः वाह्आकाय्। ओउः ताङ्ह्ओ दुम्हान्कोः उःसै आल्ती 24ओहाङःसैको आल्तोक्हाङः जोक्तो गाय्ध वाङ्ती मारुःइ तीः आन ल्यङःकर्ताक्ती ओउः दोङ्गाहाङः तीः पोक्ती वाङ्तो स्याव्आ। येसुपाय् म्होतय्क्त एनःबुस्तीलेः एनःती मुओ खेःतो। 25येसु एनःती मुओ झ्यान्ते ओउः अरु दोङ्गाहाङः मुओलम् येसुकःताङ् वाङ्ती “अ प्रभुय ङीकायः दल्ताक्ताङःस। ङीजा ज्युप्ती सीखेःनाःतय्ही बा” त दाय्ह्ती ओउःकायः म्हाङ्आथै। 26येसुपाय् च्योक्ती “लौ नीङ्इ दोह् हायःतीतेः ङाकायःतेः पेतो ङ्हाम्माःत इतलेः रैतेःनै नीङ् ङ्हाम्चोःचाक्तेः इ” त दाय्ह्ती येसुइ तोती ओहाङःसै चीङ्ती ओउः मारुःकायःमा तीःकायःमा गानाक्ती तोआकान्। तीः मारुःकायः गानाक्ती तोआक्तीको आन पेतो एवेङ्त स्याव्आ 27एत च्यवःती ओउः दोङ्गाहाङः मुओलम् “लौ इजा गत ताङ्ह्ओ मान्तालो ती। ओउःइ गानाक्ती तोओ कुरा मारुःकायःमा तीःकायःमा ग्याताक्नौ बा” त दाय्ह्ती ओउःमयः आन ग्याङ्ह्तीलेः लयःमयःकुस् नोःकाय्आकाय्।
28ओहाङःसैको ओउः गालील दुम्हान्कोः उःसै मुओ गेरासेने त तोओ देस्ताङ् दाह्आकाय्। ओहाङः दाह्आक्तीको नीस्चाक् लान्इ ङायःओ मान्ता तेस्राङ्सै ग्ल्युङ्ह्ती येसुकःताङ् क्रुस्लाङ् वाङ्आकाच। ओउः नीस्चाक्पाय् आन रैसीःओ खेःचतो ओउःत खेःओ द्याङ्तो मुओ ल्याम्हाङः सुमा वाह्सा ग्याआक्इली। 29ओहाङःसैको ओउःनीस् येसुकःताङ् क्रुस्लाङ् वाङ्ती “लौ नाङ् परमेस्वर्कोः चोः लेःतेःआः बा। नीचीकायः नाङ् दोह् हायःलाङ् वाङ्तेःआ। नीचीकायः न्युम्ह्ताक्लाङ् वाङ्ओतेःया” त दाय्ह्ती येसुकायः व्हत्आक्चु। 30ओउःत व्हत्तोक्हाङः लोक्तोसै नाःतो प्याक् ह्राम्ती मुओ खेःतो 31ओउःत झ्यान्ते ओउः लान्लम् येसुकः तेती “लौ ङीकायः ल्हेस्तेःनाःताङी त खेःया ओउः प्याक्लम्कःहाङः आल्सा ताक्ताङी दा” त दाय्ह्ती तोआथै 32“लौ उया ओउःकायः ङायःलाङ् आल्न” त दाय्ह्ती येसुइ तोआकान्। ओउःत तोआक्तीको ओउः लान्लम्पाय् ओउः मान्तानीस्कःसै ग्ल्युङ्ह्ती ओउः ह्राम्ती मुओ प्याक्लम्कायः ङायःआकानी। ङायःआक्तीको सबै प्याक्लम् ब्रःती वारताङ् जोक्तो तन्ती आल्ती तोन्ती तोन्ती दुम्हान्कोः तीःहाङः ज्युप्तीलेः सीजेःआकाय्। 33ओहाङःसैको प्याक्लम् सबै तीःहाङः ज्युप्ती सीओ च्यवःती ओउः प्याक्कायः ह्रामःओ मान्तालम् सहर्ताङ् क्रव्ती दाह्आक्तीको ओउःमयःइ मेस्लो च्यवःओ कुरा सबैकायः ल्हाक्ती तोआकानी। “ओउः नीस्चाक्कःसै लान्लम् ल्हेस्आकान्” त दाय्ह्ती छ्यानःनीतो 34ओउःमयःइ छ्यानःओ कुरा सायःआक्तीको सहर्कोः मान्तालम् सबै येसुकायः क्रुस्लाङ् ग्ल्युङ्ह्आकाय्। क्रुस्आक्तीको “लौ ङीकोः देस्सै आल्अ दा” त दाय्ह्ती ओउःकः आन तेआकाय्।
वर्तमान में चयनित:
मत्ती 8: CDM93
हाइलाइट
शेयर
कॉपी
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
