मत्ती 5
5
1ओहाङःसैको ओउःच्युक् नाःतो मान्तालम् हुम्लाङ् वाङ्ओ च्यवःती येसु लयःकोः वाह्ओमयःकुस् स्यालुङ्हाङः लन्ह्आकाय्। 2स्यालुङ् लन्ह्ती ओहाङः च्युङःआक्तीको येसुइ लयःकुस् वाह्ओमयःकायः स्यान्ती तोआथास। 3ओउःइ स्यान्तोक्हाङः “लौ ल्हुङ्तुक् घ्युम्ओ मान्तालम् लोनेः आन चोङाय्तोलेः स्याव्नै ओउःमयः परमेस्वर्कोः राजी दोःनै। 4लीह्ती क्रेस्तो र्याःओलम्मा चोङाय्तोलेः स्याव्नै ओउःमयःकोः लीह्ओ ल्हुङ् लोनेः धोमाय्तो स्यान्नाः। 5काङ्तो नोःओलम्मा चोङाय्तोलेः स्याव्नै ओउःमयःपाय् ल्हाव्ह्दैबाङ्हाङः हुकुम् बयःओलेः स्याव्नै। 6खाले पेओ काम् जाङ्ह्सा झाक्ओलम्मा चोङाय्तोलेः स्याव्नै ओउःमयः झाक्ओपाय् लोनेः जुदालेः दोःनाः। 7अरुखेकायः योनःती योओलम्मा चोङाय्तोलेः स्याव्नै ओउःमयःखेकायः परमेस्वर्इलेः योनःती योनाःथास। 8ओउः पेतो छय्ङ्ओ ल्हुङ्तुक् नाःओलम्मा चोङाय्तो स्याव्नै ओउःमयःइ लोनेः परमेस्वर्कायः च्यवःनानी। 9काय्काय्ओलम्कायः ब्राङ्ताक्ओलम्मा चोङाय्तोलेः स्याव्नै। ओउःमयःकायः ‘परमेस्वर्कोः चोःलेः’ त लोनेः तोनानी। 10सुसु मान्ताकायः परमेस्वर्कोः काम् जाङ्ह्सा थेङा अरुइ लीह्सीःओ बयःनाःथास ओउः लीह्सीःओ गोरःओलम्मा लोनेः चोङाय्तोलेः स्याक्नै ओउःमयःपाय् परमेस्वर्कोः राजीहाङः याक्सा दोःनै। 11-12लौ ङाकोः काम् जाङ्ह्सा थेङा अरुइ नीङ्कायः माःती गाल्तुम्ती नोःमातेःनै नीङ्कायः लीह्सीःओ बयःमातेःनै। ओउःलो लेखा ओउः ङ्हासै मुओ परमेस्वर्कोः कुरा छ्यानःओमयःकायःमा लीह्सीःओ बयःआथास ओउःत झ्यान्ते आन चोङाय्ती मुन ओउःत जाङ्ह्झ्याङ्कायः लाङ्काहाङः नीङ्पाय् आन पेओतेः दोःतेःनै” त दाय्ह्ती येसुइ लयःकुस् वाह्ओमयःकायः तोआथास।
13“लौ छेः ल्याव्ह्आक्तीको क्यानः पेतो न्युम्तो स्याव्लेःनाः। ओउः छेःलो लेखालेः नीङ्इ इ ल्हाव्ह्दैबाङ्कोः मान्ताकुस् ल्याव्ह्ती पेतोलेः जाङ्ह्नु। छेःइपाय् क्यानः ल्हाम्ताक्उलु त खेःया अरु दोह्इ ल्हाम्ताक्सा स्याव्नाः र। ओउः ल्हाम्मालो छेःपाय् दोह्कायःमा स्याव्ल बाहीरताङ् ताआक्तीको ओउः छेःपाय् मान्ताइ साःहाङः झोतीलेः वाय्नानी।
14नीङ्पाय् इ ल्हाव्ह्दैबाङ्कायः थोङ्ताक्सा खेःतेःइतो। स्यालुङ्कोः च्योःहाङः मुओ सहर्कायः नुस्ती च्यवःताक्माःत गम्सा सुइमा खाय्नीली याह्दीङ्हाङः गलमा थोङ्लेःनाः। ओउःलो लेखा नीङ्पाय् सबैकायः थोङ्ताक्ती मुन। 15बत्ती हवःआक्तीको सुइमा पाथीइ कोमःती खुप्ती गम्नीली। हवःआक्तीको यास्ओ थाव्हाङः गम्ती कीम् जुदालेः थोङ्ताक्नानी। 16नीङ्इमा ओउःतलेः परमेस्वर्कोः काम् पेतो जाङ्ह्ती सबै मान्ताकायः छ्यानःती थोङ्ताक्नु दा। ओहाङःसैको नीङ्कोः पेओ काम् च्यवःती अरुइ नीङ्कोः परमेस्वर् आपाकायः ‘ओजायःत पेओलेः’ त दाय्ह्ती ताङ्ह्ताक्नानी।
17ङाकायःपाय् ‘मोसाइ बयःओ ऐन्मा परमेस्वर्कोः कुरा छ्यानःओमयःइ तोओ कुरामा वाय्लाङ् वाङ्ओ’ ततेः ताःतेःचानी ङा वाय्साकायः वाङ्ओ खेःबाय्ल ओउःमयःकोः कुरा ताप्ताक्साकायः तोलाङ् वाङ्ओआः ङ। 18दोङ्सी दाय्ह्भनाङ् फेल्बाङ् ल्हाव्ह्दैबाङ् वाय्धाङ्माःखाहाङःपाय् ऐन्कोः कुरा जुगाङ् दप्धाङ्मालोहाङः ओउः ऐन्कोः कुरापाय् मीओ कुरामा ताङ्ह्ओ कुरामा दोह्मा जुदालेः वाय्मालो मुलेःनाः बा। 19सुसुखेइ ऐन्कोः मीमीओ कुरामा लयः जाङ्ह्सा ग्यामाःत अरुकायःमा ‘लौ ओउः कुरा जाङ्ह्सा परल’ त दाय्ह्ती स्यान्चानी ओउःलेः परमेस्वर्कोः राजीहाङः अरुसै मीतो स्याव्नै। सुसुखेइ ऐन्कोः कुरा जाङ्ह्ती अरुकायः ‘लौ इ कुरा जाङ्ह्नु दा’ त दाय्ह्ती स्यान्चानी ओउःलेः परमेस्वर्कोः राजीहाङः ताङ्ह्तो स्याव्नै। 20दोङ्सीलेः ओउः ऐन् स्यान्ओमयःसैमा फरीसीलम्सैमा नीङ्खे परमेस्वर्कोः काम् पेतो जाङ्ह्सा खेःतो ओउःमयःसै पेतो जाङ्ह्तेःनीली त खेःया नीङ् परमेस्वर्कोः राजीहाङः मुसा दोःतेःइली।
21उय्ह्लेकोः आखरःहाङः ‘लौ मान्ताकायः सात्सा स्याव्ल। अरुकायः सात्ओ मान्तापाय् न्युम्ह्तो स्याव्नाः’ त दाय्ह्ओ खेःतो ओउः कुराखे नीङ्इ चीःतेःनानी। 22‘लौ सुसु लयःकोः मान्ताकःताङ् ल्हुङ् ह जीक्ती मुचनै ओउःमा न्युम्ह्तोलेः स्याव्नाः’ त दाय्ह्ती ङाखेइ तोनेःनाङ्स बा। फेरी सुसुइ लयःकोः मान्ताकायः ‘वाःतकलङ्’ त दाय्ह्ती तोचानी ओउःकायःलेः सभाकोः मान्तालम्इ न्युम्ह्ताक्सा स्याव्नाः। सुसुइ लयःकोः मान्ताकायः ‘लौ नाङ्कायः परमेस्वर्इ स्राप्तेःनाः’ त दाय्ह्ती तोचानी ओउःलेः नरककोः म्हेःहाङः सीलाङ् आल्खेःनै। 23ओउःत खेःओ यहुदीकोः जवओ जाङ्ह्ती परमेस्वर्कोः मन्दीर्हाङः थोक् ल्हातोक् बेलाहाङः नाङ्कोः लयःकोः मान्ताकुस् ब्राङ्तेःइली त खेःया ओउः थोक् ल्हाधाङ्माखाहाङःपाय् ओउः मान्ताकःताङ् आल्ती ब्राङ्आक्काय्पाःच। 24ब्राङ्काय्आक्तीको ह द्यान्ह्ती ओउः थोक् परमेस्वर्कायः ल्हानु। 25नाङ्कुस् काय्काय्ओ मुत्ध जाङ्ह्ओ मान्ताकः रेन्ह्तोलेः ब्राङ्काय्ज उया ब्राङ्काय्तेःजल त खेःया ओउःइ नाङ्कायः अदालात्ताङ् दाक्ती थुनताक्तेःनाः। 26थुनआक्तीको दोङ्सी दाय्ह्भनाङ् ओउः दन्दकोः पैसा जुगाङ् पाय्क्आताःमातो नाङ् पाय्ह्सा दोःतेःल बा।
27लौ उय्ह्लेकोः आखरःहाङःमा अरुकोः बुधीकुस् एनःती जार् जाङ्ह्सा स्याव्ल त लेखओ मुनाः एत नीङ्इ चीःतेःनानी। 28दोङ्सीलेः ‘सुसुइ पेमालो ल्हुङ्तुक् म्हर्ती मोमःचोःकायः आन योती ओउःइमा जार् जाङ्ह्नानी बा’ त दाय्ह्ओ ङाखेइ तोनेःनाङ्स बा। 29लौ नाङ्कोः मीक्इ नाङ्कायः रेव्तो जाङ्ह्ताक्तेःचाः त खेःया ओउः मीक्पाय् त्युत्ती वाय्सा पेनाः। दोह् हायःती दाय्ह्सा नाङ् दोम्क्रुत्मा मीक्मा वेन्ह्माःत गोबाङ् ताती वाय्ओसै यात्ज्योः मीक् ह वेन्ह्ती वाय्आक्तीको दल्तो मुसा पेलेःनाः बा। 30फेरी नाङ्कोः ङोय् क्रुत्इ रेव्तो जाङ्ह्ताक्तेःचाः त खेःया ओउः क्रुत् तात्ती वाय्सा पेनाः दोह् हायःती दाय्ह्सा नाङ् आङ्कोः दोह्मा वाय्मामाःत मुती गोबाङ्ताङ् ताती वाय्ओसै यात्ज्योः क्रुत् दोम् नाःमामाःत दल्तो मुसा पेलेःनाः बा। 31ओहाङःसैको आखरःहाङःमा ‘लौ नाङ्कोः बुधीकायः फेसाकायः कागत् लेखआक्तीको फेपाःथै’ त दाय्ह्ती उय्ह्ले लेखओ खेःतो। ओउःतलेः आखरःहाङः तोती मुलेःनाः 32ङाखेइ बुधीइ अरु गोय्चोःकुस् एनःती वाह्आक्तीको ह ओउःकायः फेसा स्याव्नाः। अरु हायःओकायः यात्चाक्इ बुधीकायः फेआथै त खेःया ओउः बुधाइ बुधीकायः जार्लो जाङ्ह्ताक्नाःथै। फेरी ‘सुइ ओउः फेओ मोमःचोःकायः वानःचाःथै ओउःइमा जार्लो लेखा जाङ्ह्मानौ’ त दाय्ह्ती तोनेःनाङ्स।
33फेरी आखरःहाङःमा ‘नाङ्कोः कीरीया जेःती तोओ कुरा फेमाःत परमेस्वर्कायः जाङ्ह्उ दा’ त दाय्ह्ओ लेखती मुनाः 34ङाखेइ ‘लौ कीरीया जेःसा जेःलाम्’ त तोनेःनाङ्स। लाङ्काकोः मय्ङ्मा फेह्ती कीरीया जेःलाम् दोह् हायःती दाय्ह्सा लाङ्कापाय् परमेस्वर्कोः च्युङःओ थाव् लेःआः ओउःत झ्यान्ते कीरीया जेःती फेह्सा स्याव्ल। 35फेरी ल्हाव्ह्दैबाङ्कोः मय्ङ्मा कीरीया जेःती फेह्लाम् ओउःपाय् परमेस्वर्कोः दोम् न्यास्ती मुओ थाव् लेःआः बा। यरुसालेम् सहर्कोः मय्ङ्मा कीरीया जेःती फेह्लाम् ओउःपाय् सबै राजाकोः राजा परमेस्वर्कोः मुल् सहर् लेःआः। 36फेरी नाङ्कोः लयःकोः तालाङ् चुम्ती कीरीया जेःलाम्। नाङ्इ यातैज्योः म्याङ्ला गाल्ताक्सा भाम्ताक्सा खाय्तेःउलु। 37लौ दोह् काम् खेःयामा जाङ्ह्सा ग्यातेःनाः ओउःकायः ‘लौ ङाइ जाङ्ह्नाङः’ त तोती गम्सा ह स्याव्नाः दोह् खेःयामा नाङ्इ जाङ्ह्सा ग्यातेःल ओउःकायः ‘खेःल जाङ्ह्ङल’ त दाय्ह्ती त्याङ्अ नाङ्इ अरु चाङःती तोया रेव्तो लेःआः।
38उय्ह्लेकोः आखरःहाङःमा ‘सुसुइ अरुखेकोः मीक् वाय्चौ ओउःखेकायःमा ओउःकोः मीक्मा वाय्बत्पाःथै फेरी सुसुइ अरुखेकोः सय्क् वाय्चौ ओउःखेकायःमा ओउःकोः सय्क् वाय्बत्पाःथै’ त दाय्ह्ती लेखओ खेःतो 39ङाइ तोओपाय् थेथे लेःआः बा ‘अरुकायः न्युम्ह्ताक्ओ पाय्क्लाम्। अरुइ नाङ्कायः ङोय् ग्वेर्हाङः यात् प्र्याक् घान्तेःचाः त खेःया अरुकोः ग्वेर्मा घान्साकायः ओउःकःताङ् तालाङ् हीलःन’ त दाय्ह्ती तोनेःनाङ्स 40अरुइ नाङ्कः मुत्ध जाङ्ह्ती नाङ्कोः स्याः आलःबत्तेःनाः त खेःया ओउःकायः नाङ्कोः अरु स्याःमा बयःउ दा। 41फेरी ताङ्ह्ओ मान्ताइ नाङ्कायः यात् कीलोमीतर्च्युक्कायः भारी लात्ताक्तेःचाःया ओउःकायः नीस् कीलोमीतर्च्युक्कायः भारी लात्उ। 42दोह्लो अरुपाय् नाङ्कः तेचै ओउःलेः बयःउ दा। ओउः तेलाङ् वाङ्ओ मान्ताकायः छ्योक्ती ल्होक्लाम्।
43फेरी ‘लयःकुस् ब्रेङःकाय्ती याक्ओ मान्तालम्खेकायः राप्उसु नाङ्कायः पेमालो हायःओलम्खेकायः राप्लाम्’ त दाय्ह्ती तोओ नीङ्इ सायःझुङ्तेःआकानी 44‘लौ नाङ्कायः पेमालो हायःओलम्कायःमा राप्नु’ त ङाइ द्याह् तोनेःनाङ्स। सुसुइ नीङ्कायः लीह्सीःओ बयःतेःचनै ओउःकायः ‘लौ इकायःपाय् पेतो स्याव्ताक्उ दा’ त दाय्ह्ती परमेस्वर्कः तेती तोनु दा। 45ओहाङःसैको नीङ्पाय् परमेस्वर् आपाकोः चोःलम्लेःतेः स्याव्तेःनै। ओउःइपाय् पेओ मान्ताकःहाङःमा पेमालो मान्ताकःहाङःमा घार्तोलेः न्याम्मा थोङ्ताक्नौ तीःमा घार्तोलेः वाताक्नौ बा। 46लौ रेव्ओ काम् जाङ्ह्ओ मान्तालम्इलेः लयःकुस् ब्राङ्ओमयःकायः राप्आनानी नीङ्इपाय् लयःकुस् ब्राङ्ओमयःकायः ह राप्तेःचानी त खेःया नीङ् रेव्ओ मान्तासै पेओ जाङ्ह्तेःनीली इत जाङ्ह्झ्याङ्कोः दोह् स्याव्नाः र। खेःल नीङ्इ सबै मान्ताकायः राप्सा खेःतो। फेरी परमेस्वर्कायः तय्ह्मालोलम्इमा लयःकोः मान्तालम्कायः स्यवनानी। 47नीङ्इ लयःकोः मान्तालम्कायः ह स्यवतेःचानी त खेःया परमेस्वर्कायः तय्ह्मालोलम्सै पेओ जाङ्ह्तेःनीली इत हायःओ दोह् पेओ काम् खेःचाः र। 48नीङ्खेइपाय् नीङ्कोः परमेस्वर् आपालो लेखालेः जुगाङ् पेओ नीङ्ओ काम् जाङ्ह्सालेः खेःतो बा।
वर्तमान में चयनित:
मत्ती 5: CDM93
हाइलाइट
शेयर
कॉपी
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
