मत्ती 1
1
1येसु ख्रीस् त तोओ आब्राहाम्कोः प्लोमःदानेमा खेःतो दावुद् राजाकोः प्लोमःदानेमा खेःतो।
इहाङः येसुकोः होह्र् थेङ्ओ लेखती मुनाः। 2आब्राहाम्कोः गोय्चोः इसाक् खेःतो इसाक्कोः गोय्चोः याकुब् याकुब्कोः गोय्चोःलम् यहुदामा ओउःकोः हौचोङ्मा। 3यहुदाकोः गोय्चोःनीस् पेरेस् पुःचाः जरा ओउःनीस्कोः आमा तामार् त तोओ खेःतो। फेरी पेरेस्कोः गोय्चोः हेस्रोन् हेस्रोन्कोः अराम् 4अराम्कोः आमीनादाब् आमीनादाब्कोः नहस्योन् 5नहस्योन्कोः सल्मोन् सल्मोन्कोः बोआस् बोआस्कोः आमा राहाब् त तोओ खेःतो। बोआस्कोः गोय्चोः ओबेद् ओउःकोः आमा रुथ् त तोओ खेःतो। ओबेद्कोः गोय्चोः येसे खेःतो येसेकोः गोय्चोः दावुद् राजा।
6ओहाङःसैको दावुद्कोः गोय्चोः सुलेमान् खेःतो सुलेमान्कोः आमा ङ्हा उरीयाह् त तोओकोः बुधी खेःतो। 7सुलेमान्कोः गोय्चोः रेहोबोआम् खेःतो। रेहोबोआम्कोः अबीयाह् अबीयाह्कोः आसा 8आसाकोः यहोसाफात् यहोसाफात्कोः यहोराम् यहोराम्कोः उजीयाह् 9उजीयाह्कोः योथाम् योथाम्कोः आहास् आहास्कोः एजेकीयाह् 10एजेकीयाह्कोः मनासेह् मनासेह्कोः आमोन् आमोन्कोः योसीया। 11ओहाङःसैको यहुदीलम्कायः बाबीलोन् त तोओ देस्ताङ् लात्ती आलःओ बेलाहाङः योसीयाकोः गोय्चोः यकोनीयाह्मा ओउःकोः हौचोङ्मा दोःओ खेःइतो।
12ओहाङःसै ओउःमयः बाबीलोन्ताङ् आलःआक्तीको यकोनीयाह्कोः गोय्चोः सलथीएल् दोःओ खेःतो। सलथीएल्कोः गोय्चोः यरुबाबेल् खेःतो। 13यरुबाबेल्कोः अबीयुद् अबीयुद्कोः एलीआकीम् एलीआकीम्कोः आजोर् 14आजोर्कोः जदोक् जदोक्कोः आखीम् आखीम्कोः एलीयुद् 15एलीयुद्कोः एलीएजर् एलीएजर्कोः मथान् मथान्कोः याकुब् 16याकुब्कोः युसेफ्। युसेफ् त तोओपाय् मरीयम्कोः बुधा खेःतो। फेरी मरीयम् त तोओपाय् येसुकोः आमा खेःतो। येसुपाय् परमेस्वर्कःसै वाङ्सा खेःओ ख्रीस् त तोओ लेःआः। 17ओउःत खेःओ आब्राहाम्हाङःसै दावुद् मुच्युक्हाङः चौध होह्र्लेः। दावुद्हाङःसै बाबीलोन् देस्ताङ् लाती आलःनम् दीन्च्युक्हाङः अरु चौध होह्र् खेःतो। फेरी ओउःतोक्हाङःसै येसुकोः ओत्नम् दीन्च्युक्हाङः अरु चौध होह्र् खेःतो बा।
18ओहाङःसैको येसुकोः ओत्नम् दीन् गतलो दाय्ह्सा। ओउः मरीयम् त तोओकायः युसेफ्इ धयःती गम्ओ खेःतो। फेरी युसेफ्कुस् गलमा एनःधाङ्मालोहाङः मरीयम्कायः परमेस्वर्कोः ग्वालामःइ चोःतुक् स्याव्सा दोःताक्आथै। 19मरीयम्इपाय् “अरु सुलाङःकोः चोः लात्नौ” त चीःती युसेफ्पाय् गलमा पेतो हायःसा बोङःती “ओउःकः अरुलम् अह्र्ताक्सा परल” त म्हर्ती झ्यान्ते अरु मान्तालम्कायः चीःताक्मामाःत “लौ मरीयम्कायः फेनाङः” त दाय्ह्ती म्हर्आ 20ओउःकायः “फेनाङः” त म्हर्तोक्हाङः यात्चाक् परमेस्वर्कोः लाङ्कासै ल्होक्ओमयः युसेफ्कःताङ् माङःखाहाङः थाती वाङ्आ। थाती वाङ्ती “लौ नाङ् दावुद् राजाकोः प्लोमःदाने युसेफ्य नाङ्कोः धयःओ मरीयम् मोमःचोःकायः लयःकोः कीम्ताङ् वानःसा अह्र्तेःचानाः। परमेस्वर्कोः ग्वालामःइलेः ओउःकायः चोःतुक् स्याव्सा दोःताक्आथै बा। 21लोने मरीयम्इ गोय्चोःचोः ओत्लेःनौ। ओउः चोःपाय् लोनेः लयःकोः मान्तालम्कायः रेव्तो हायःओ फेताक्ती ओउःमयःकायः दल्ताक्नाःथास ओउःत खेःया नाङ्कोः गोय्चोःचोःकायः ‘येसु’ त मय्ङ्उ दा” त दाय्ह्ती युसेफ्कायः तोआकान्। 22इत स्याव्ओ कुरा उय्ह्ले यात्चाक् परमेस्वर्कोः कुरा छ्यानःओ मान्ता दाय्ह्आ 23“लौ यात्चाक् बुधाकः पाय्ह्मालो मोमःचोः चोःतुक् स्याव्ती गोय्चोःचोः दोःतो स्याव्नाः। ‘परमेस्वर् ङीकुस् मुनाःतय्ही’ त दाय्ह्ती ओउः चोःकायः एमानुएल् त मय्ङ्नानी” त दाय्ह्ती दाय्ह्ओ कुरा द्याह् ताप्तो स्याव्नाः। 24ओहाङःसैको युसेफ् माङःखासै लेआक्तीको ओउः ल्होक्ओमयःइ तोओ कुरा ङ्हाम्ती मरीयम्कायः लयःकोः कीम्ताङ् वानःआथै। 25लयःकोः कीम्ताङ् वानःथातो मरीयम्पाय् चोः ओत्धाङ्माःच्युक्कायःलेः ओउःकुस् एनःल। ओहाङःसैको गोय्चोःचोः दोःआक्तीको ओउः चोःकायः युसेफ्इ “येसु” त मय्ङ्आकान्।
वर्तमान में चयनित:
मत्ती 1: CDM93
हाइलाइट
शेयर
कॉपी
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
