Maacho 8

Jiso wɔnchɛ wi wu chigɔŋ chi nɔŋa

(Mak 1:40-45; Luk 5:12-16)

1Jiso tɛ̀ dza li ŋkumɛ-ɛ bɔɔ, kintutu ki bɛniiŋ lɛ kinɔŋa banchɛ ki biki wu. 2Fi se ka le wi wumu wu tɛ̀ gendi bɛ chigɔŋ chi nɔŋa, tɛ̀ dza bɛ toŋ núŋ Jiso limfwe tee li wuu le, “Taa, nuuŋ ɔ wɔnchɛ mi ni ŋ'wuuti, ɔɔ kɔŋgisi lɔɔ.” 3Jiso dza nɛɛki kibɛnɛ, koŋ li wuu, tee le, “Ŋkɔŋgisɔɔ, tɛmi ɔ ni ɔ wuuti.” Mfwaa mumkpaŋ, chigɔŋ chi nɔŋa chilu biee chi ma li wuu bwiŋ, to waaŋ. 4Jiso se chiinsɛ li wuu le, “Bichɛ, kiiŋ ɔ ni tee li wi-i kɛ. Si fi nuuŋ ni, gɛnɛ ɔ doonchɛ yi ya nuuŋ li te muntofi-i, ɔ nyɛ nya yi Mɔɔsɛ tɛ̀ tee le wi kɛmi le nyɛ, le doonchɛ li bɛniiŋ li le wu tɛmɔɔ li chigɔŋ chini wu to waaŋ.”

Jiso wɔnchɛ ŋwaŋ wu nimɛ wu te kikoo ki bɛniiŋ bɛ nchi-i

(Luk 7:1-10)

5Jiso dza gɛɛŋ lɛ li kitoŋ ki Kapanu-uŋ, te kikoo wu bɛniiŋ bɛ nchi-i wumu bɛ ŋɛŋ wu suŋgi bɔ li wuu tiiti le, 6“Taa, ŋwanɛŋ wu nimɛ gimɔɔ li yih ɛ ŋgwɛ kɔɔ wu.” 7Jiso tee li wuu le, “Ŋgii mbɛ ŋ'wɔnchɛ wu.” 8Se nuuŋ le, te kikoo wu bɛniiŋ bɛ nchi-i wulu tuu li Jiso le, “Taa, mɛɛŋɔ ki kɔchɛ kɛ wi wu ɔ nuuŋ ɔ bɛ li wuu yi kɛ. Yɔrɛ nɛɛ nuuŋ jɛ kwaa, ŋwanɛŋ wu nimɛ tɛmi. 9Mi ŋ'we tɛ lɛ buŋga bu wi wumu lɛkwiiŋ, bɛniiŋ bɛ nchi-i nuuŋ tɛ lɛ mi-i lɛkwiiŋ. Mbɛɛ ɛ mi ntee li wumu le, ‘Ɔ giiŋgi,’ mwɛ gɛɛŋ, ɛ mi ntuu mi ntee li wumu le, ‘Bɛ,’ mwɛ bɛ. Ɛ mi ntee tɛ li mfwa wɛ-ɛŋ le, ‘Fɛrɛ fini,’ fɛ nɛɛ tɛ lɛ.” 10Le Jiso woo fiee fi wu tee, wa tɛ wu. Kweeŋ li bɛniiŋ bɛ tɛ̀ biki wu baa le, “Ntee beŋ chɛɛŋ le, mɛɛŋɔ saa ki ŋɛŋ mɔɔ nuuŋ wi mumkpaŋ wu Isɛlɛɛ wu gɛɛ ŋwaani yini shéŋ li mi-i ni kɛ. 11Ntee beŋ le, bɛniiŋ ŋge gii naa be dza bimbe bichu mbɛɛchɛ lɛ jobɛ tɛti ŋgɛnu mbochu lɛ chi sechi, be ni be bɛɛ be shiiti be jii biee bɛ bɛ chaa bɛnɛ, Abrahaŋ, Adzi mɔɔ Yakɔ li kwɛɛŋ wu Nyɔ-ɔ wu liboo li, 12se nuuŋ le, bɔɔŋ bɛ li kwɛɛŋ wulu kibɛɛ bɛ gii bɛ lɔŋ be li kijibɛ-ɛ lɛkuuŋ fɛ be gii be ni be dii be jii ŋgesi.” 13Si Jiso tɛ̀ yɔ lɛ, biee tee li te kikoo wu bɛniiŋ bɛ nchi-i wɛ le, “Nuuŋ ɔ gɛɛŋ fio, si ɔ bee ɔ gɛɛ shéŋ li mi-i ni, fi ka nɛɛ bɛ wɛ lɛ.” Le tee lɛ, ŋwaŋ wu nimɛ wu te kikoo wu bɛniiŋ bɛ nchi-i wulu biee tɛmi nɛɛ li mfi wulu-u.

Jiso wɔnchɛ bɛniiŋ bɛ chigɔ-ɔŋ ŋge

(Mak 1:29-34; Luk 4:38-41)

14Jiso tɛ̀ dza gɛɛŋ lɛ li Pita yih, ŋɛŋ si mwɛsɛ Pita gimi gendi bɛ kiŋkɛŋkɛ. 15Jiso koŋ li kibɛnɛ kee li, kiŋkɛŋkɛ kilu se biee ki chikɛ, dza we bichɛ fiee Jiso ji.

16Le ni nuuŋ lɛ fɛmfo-o, bɛniiŋ bɛɛ bɛ bɛniiŋ ŋge bɛ bɔɔŋ bɛ kiŋkundi-i tɛ̀ gii be ŋwɛki bɛ be lɛ Jiso-o. Bɛchi buushi fiana yi tii yilu nuuŋ nɛɛ bɛ jɛ yi lɛwa kwaa. Se wɔnchi bɛniiŋ bɛchu bɛ tɛ̀ gendi. 17Fi bɛ fi kɔchɛ si ntomfɔŋ wu Nyɔ wu Ɛsaya tɛ̀ saa wu tee le, “Wu tsaakɔɔ bɛ ntɔnyɛ bɛsɛŋ, wu too chigɔŋ chisɛŋ.”

Bɛŋgɛ bɛ wi wu biki Jiso-o

(Luk 9:57-62)

18Le Jiso tuu ŋɛŋ si kintutu ki bɛniiŋ lɛ kinɔŋa banchɛ li wuu lichiŋ, tee li bɔɔŋ bee bɛ kintutu-u le, “Tɛ lenchi libɛ chini tɛ gɛɛŋ luwiŋ lɔɔ.” 19Wi wumu wu tɛ̀ tiifi bɛnchi bɛ Nyɔ-ɔ biee kiiŋgi tee li Jiso le, “Wi wu ntiifɛ, ŋgii ni mbiki wɛ mɔɔ ɔ giiŋgi fɛŋ le.” 20Jiso tuu li wuu le, “Bijinu kɛmi ntuuŋ yi bi, muniiŋ mu jiindi liwe kɛmi yíh yi mu, se nuuŋ le, Ŋwanɛwi kɛmi yɛ mɔɔ fɛ nuuŋ gɛɛ kikoo kee fe kɛ.” 21Wi we wu kintutu wumu tuu tee li wuu le, “Taa, gɛɛ mi nsaa ŋgɛɛŋ ndiiyɛ taa kwɛ nse ni mbiki wɛ.” 22Jiso se tuu li wuu le, “Ɔ biki mi, gɛɛ biŋkwi ni bi diyi biŋkwi bi bee bi kwiyɛ.”

Jiso waŋ mfiee

(Mak 4:35-41; Luk 8:22-25)

23Jiso gɛɛŋ lɛ lɛ ŋgo-o, bɔɔŋ bee bɛ kintutu-u biee tɛ wu le. 24Fi ka le, mfiee yi tɛɛmi yimi tɛ̀ taa yi dza yi bɛchi lɛ libɛ chilu-u yi nduŋgi dzɔɔ yɛki, yi leki le yi yisɛ lɛ ŋgo wulu. Si fi tɛ̀ kɛti lɛ, Jiso tɛ̀ liiti fiee. 25Bɔɔŋ bee bɛ kintutu-u se gɛɛŋ be kaaŋgi wu be tee le, “Taa, fi bee, tɛ kwii baa.” 26Se kaaŋgi tee li bee le, “Hooo bɛniiŋ bɛ kimbeenchɛ-ɛ ki sendɛ-ɛ. Nɛ chɛndi la?” Le tee lɛ, se dza we waŋ mfiee yilu mɔɔ dzɔɔ yi nyɔŋa yɛ, se yi chikɛ ni nshiiŋŋ. 27Bimfimu wondɛ bɛniiŋ bɛlu ni katara. Be tee le, “Ŋwaani wuni wi nuuŋ wi wu la wu mfiee mɔɔ dzɔɔ wuki li wuu ni?”

Jiso buu bɔɔŋ bɛ kiŋkundi-i li bɛniiŋ bɛfɛ bwiŋ

(Mak 5:1-20; Luk 8:26-39)

28Jiso lenchi bo kimbɛ ki bɛniiŋ bɛ Gadalaŋ.#8:28 Biŋwaati bi fichi bimu teenyi le, “Gadalaŋ, bimu le Gɛlgɛsɛŋ.” Bikɛ bɛ bɛniiŋ bɛfɛ ɛ bɔɔŋ bɛ kiŋkundi-i tɛ̀ ŋwɛki bɛ be. Bɛniiŋ bɛlu tɛ̀ bo lɛ dzíŋ yí bɛ diyi bɛniiŋ le, be bɛndi yi ŋge si nuuŋ wi tɛ mɔɔ ka lɛ dze yilu-u kɛ. 29Fi se ka le, be tɛ̀ tuu be bɛchi be wɛndi lɛwe ŋge be tiiti le, “Ŋwanɛ Nyɔ, ɔ wɛki la li bee li? Ɔ bɛɛ le ɔ nyɛ bee ŋgɛ mfi mɛɛŋ saa ki kɔchɛ kɛ ni?” 30Ɛ kintutu ki dzíiŋ lɛ kimu tɛ̀ jii biee fe fɛchiŋ ŋgɔŋgɔmɔɔ ki. 31Bɔɔŋ bɛ kiŋkundi-i bɛlu se lɛkɛ Jiso le, “Mintemii, ɔɔ buu bee, ɔ tuumi bee tɛ gɛɛŋ tɛ lɛ li dzíiŋ yɛɛ.” 32Jiso se tee li bee le, “Gɛnɛ yɛɛŋ lɛ.” Be se bo, be gɛɛŋ be lɛ li dzíiŋ yilu. Fi se ka le kintutu ki dzíiŋ lɛ kilu kichu tɛ̀ bɔɔ li mbɛmɛ wu ŋkumɛ-ɛ ki seri, ki shee lɛ libɛ chilu ki kwiyɛ li dzɔɔ. 33Bɛniiŋ bɛ tɛ̀ kiichi dzíiŋ yilu baa kifi be gɛɛŋ li bintsii li, be tiiti fiee fichu fi ka bɛ bɛniiŋ bɛ bɔɔŋ bɛ kiŋkundi-i tɛ̀ nuuŋ li bee baa. 34Fi se ka le kitoŋ kilu kichu tɛ̀ tuu ki bo ki bɛ le ki chiiŋ Jiso. Si be tɛ̀ bɛ be ŋɛŋ wu lɛ, be sooŋ bɔ li Jiso le dza fɛ kintsii ki bee.

वर्तमान में चयनित:

Maacho 8: asj

हाइलाइट

कॉपी