Maraka 8
8
Yesu wɔ nufinŋ wɔri bi ki shuru waa pyiiraŋ tɛ
(Matiyu 15.32–39)
1Jibi tɔri, konaŋ ki a rakɔli wuru-i ǹʼmwɔɔnna Yesu kankanfan sɛbɛ. Nufinŋ wuru konaŋ ki gbɛ kì. Yesu i awɔ kalindaŋ kiri dɔri, ntiŋ i ǹʼbi kí tɛ tu : 2« Koŋ kari makwulu i míŋ pa-a, sabu kí sunŋ byantɔnŋ ki i míŋ fan kaa, nufinŋ dantenŋ kí gbɛ kì. 3A míŋ kí nufinŋ nubali kiri bosaara, kí faan ki a kɔ saa ki fan, sabu ǹʼbɛɛ ri tamaŋ nari-i haali. »
4Ntiŋ wɔ kalindaŋ kiri i ntiŋ nupwulu tu : « Yibɛɛ ra nufinŋ kila da, yi ka konaŋ ka bataa pyii ka jaŋ ka faninmwuŋ kwumaŋ? »
5Yesu i kí ranɔri tu : « Bwuru ŋuŋ jinŋ ábɛɛ gbɛ? »
Kí i ntiŋ nupwulu tu : « Jɔnpɔni. »
6Ntiŋ tu konaŋ ki sɔɔ sɔɔ ta fwuniŋ sun. Ntiŋ i niŋ bwuru ŋuŋ jɔnpɔni ki shi, ntiŋ i baraka bi Kirinŋ tɛ. Niŋ kɔɔtɛ, ntiŋ i yìrì rucɛn cɛn, ntiŋ i yìrì wɔri awɔ kalindaŋ kiri tɛ, tu kí yìrì lu konaŋ ki tɛ. Kalindaŋ kiri i yìrì lu konaŋ ki tɛ. 7Yɛrinŋ daŋ pyaanŋ dama i ji wuru kí gbɛ nmaŋ sɛbɛ, Yesu i baraka bi Kirinŋ tɛ nini bira, ntiŋ i ǹʼbi kalindaŋ kiri tɛ, tu kí niŋ lu konaŋ ki tɛ sɛbɛ.
8Konaŋ ki bataa i nuŋ nu, kí i pyii. Kalindaŋ kiri i ǹʼpyɛ tumaan ki rakɔli, kí i shɛɛrinŋ jɔnpɔni faa. 9Niŋ nufinŋ ki nutɔnŋ ki wuru koŋ waa pyiiraŋ (4.000) bishi. Niŋ kɔɔtɛ, Yesu i konaŋ ki bosaara. 10Mìŋ manaanŋ tenŋ ki ru, ntiŋ fa awɔ kalindaŋ kiri i de buŋ bɛɛ ru, kí i ta Dalimanuta sɔɔta ki ru.
Farinsiyɛnŋ kiri tu Yesu taanmashɛ ji arì wu
(Matiyu 16.1–4)
11 Farinsiyɛnŋ kiri i na Yesu maŋ ki ru, kí i arì bo ntiŋ sɔsɔ sun. Kí wuru ǹʼtɛ arì i ntiŋ sunsunu shɛɛli. Kí tu ntiŋ taanmashɛ ji arì wu, ŋì i po Kirinŋ gbɛ. 12Yesu i si faan, ntiŋ i ǹʼbi tu : « Nfɛnŋ ncin-a jiintɔnŋ ki i taanmashɛ ri ceeli-li? Míŋ a ǹʼbi ábɛɛ tɛ, ńʼtu taanmashɛ dantenŋ a ji kí wu kì. »
13Niŋ kɔɔtɛ, ntiŋ i a san kí ra, ntiŋ i a pwulu de buŋ ki ru, ntiŋ i tiri baa ki kɛlinŋ tɔri tɛ.
Farinsiyɛnŋ kiri fa Ɛrɔdi wɔ lenfe ki
(Matiyu 16.5–12)
14Kalindaŋ kiri ɲakili fɔni wuru nufinŋ shi. Nufinŋ dantenŋ wuru kí gbɛ buŋ ki ru bwuru ŋuŋ tenŋ pe kɔɔtɛ kì. 15Yesu i ǹʼbi furu awɔ kalindaŋ kiri tɛ tu : « Á á yɛri paka tɔ Farinsiyɛnŋ kiri fa Ɛrɔdi wɔ bwuru tuutuufinŋ ki kɛlina. »
16Kalindaŋ kiri tu arìmaŋ tɛ : « Ntiŋ i niŋ bi-a, sabu bwuru yibɛɛ gbɛ kì. » 17Yesu i kí bi wulu ki tɔ, ntiŋ tu kí tɛ : « Nfɛnŋ na, ábɛɛ i ǹʼmiiri-ri tu ábɛɛ bwuru shi kì, tu ninki ncin-a tu míŋ ka bi-ri? Hali jiŋ, ábɛɛ ɲakili kila, á i so mɔ́ɔ́n bi kiri ɲaantɔ-i sun kì wa? Ábɛɛ ɲakili kiri kpirimaan ni yɛ wa? 18Ɲaninaŋ ni i ábɛɛ ra, yìrì maannaja-a kì wa? Tɔɔn ni i ábɛɛ ra, yìrì wulu lama-a kì wa? Ábɛɛ ɲakili tu-a bi tɛ kì wa?#Tɔnpa ki 5.21; Esekiyɛli 12.2. 19Míŋ bwuru ŋuŋ taanŋ ki rucɛn wɔri-i koŋ waa taanŋ (5.000) ki tɛ waarinŋ wɔ̀ ru, ábɛɛ shɛɛrinŋ jinŋ faa bwuru bwulu pyɛ tumaan ki ra? »
Kí i ntiŋ nupwulu tu : « Shɛɛrinŋ bwununfuuli. »
20« Míŋ bwuru ŋuŋ jɔnpɔni ki rucɛn wɔri-i koŋ waa pyiiraŋ (4.000) ki tɛ waarinŋ wɔ̀ ru, ábɛɛ shɛɛrinŋ jinŋ faa bwuru bwulu pyɛ tumaan ki ra? »
Kí tu : « Jɔnpɔni. »#Maraka 6.41–44; 8.6–9.
21Yesu tu kí tɛ : « Ábɛɛ dumiŋ ɲakili kila-i sun kì wa? »
Yesu ɲaanfwuu bɛɛ kene-i Bɛtisayida ɲaan wɔ̀ tɛ
22Yesu fa awɔ kalindaŋ kiri i ta Bɛtisayida kili ki ra. Kí i ta ɲaanfwuu bɛɛ wu Yesu tɛ. Kí i Yesu rafɛ tu ntiŋ a gbɛ bili niŋ ɲaanfwuu ki sun, tu ntiŋ i ntiŋ kene.
23Yesu i ɲaanfwuu ki pa a gbɛ sun, ntiŋ i tiri wú wu kili ki kɔɔtɛ. Ntiŋ i a lɛju bo wú ɲaninaŋ kiri sun, ntiŋ a gbɛ bili wú sun, ntiŋ i wú ranɔri tu : « Miŋ i finŋ bɛɛ ja-a wa? »
24Ɲaanfwuu ki tu : « Míŋ i konaŋ kiri ja-a miŋ tu jirinŋ ni tiri de-a. »
25Yesu i a gbɛ kiri bili wú ɲaninaŋ kiri sun sɛbɛ, wú i yìrì rawwulu, wú i kene, wú i maannajaka shɔ. 26Yesu i wú bo tiri awɔ mani nu, ntiŋ i ǹʼbi wú tɛ tu : « Fa de kili ki ru kì. »
Pyɛɛri tu Yesu Kirinŋ Ɲaannakonshimaan ki i
(Matiyu 16.13–20; Luki 9.18–21)
27Yesu fa awɔ kalindaŋ kiri i ta Filipu wɔ Sensare tonfan kili kiri ra. Ŋì i kí tu saa ki fan, ntiŋ i kalindaŋ kiri ranɔri tu : « Míŋ nkɛnŋ konaŋ kiri ɲaanna? »
28Kalindaŋ kiri i ntiŋ nupwulu tu : « Ǹʼbɛɛ ri i ǹʼbi-a tu ábɛɛ Wutɔnŋ Yuhana, ǹʼtɔri ri gbɛ, ábɛɛ i Eli#8.28 Eli : ǹʼbɛɛ ri tu Iliya. i, ǹʼtɔri ri i ǹʼbi-ri tu ábɛɛ Kirinŋ wɔ cintɔnŋ ki bɛɛ ɛ. »
29Yesu i kí ranɔri : « Ábɛɛ ji, ábɛɛ ɲaanna, míŋ nkɛnŋ? »
Pyɛɛri i ntiŋ nupwulu :
« Ábɛɛ i Kirinŋ Ɲaannakonshimaan#8.29 Kirisa wulu yɛ. ki i. »
30Yesu i ǹʼbi furu awɔ kalindaŋ kiri tɛ, tu kí fa niŋ bi koŋ tɛ kì.
Yesu i a beŋ ki fa a ŋmɛni ki jɛnbi-a
(Matiyu 16.21–28; Luki 9.22–27)
31Niŋ kɔɔtɛ, Yesu i ǹʼbi awɔ kalindaŋ kiri tɛ sɛbɛ tu : « Koŋ Danshuru ki kakan-i ŋì i cɔɔri ǹʼmwɔɔnna. Yawutu cɛɛnni kiri fa Kirinŋ tɛ sarakawɔrɔtɔnŋ kiri ŋununtiŋ kiri fa sariya kalimɔɔ kiri i na arì kaan ǹʼtɛ. Ŋì i kilɛn. Ǹʼkilɛn ki sunŋ byantɔnŋ ki, ŋì i ŋmɛni. »
32Ntiŋ i niŋ wulu ki bi kí tɛ, ntiŋ i ǹʼfɔɔ. Niŋ na, Pyɛɛri i ta ntiŋ wu kɛlinsun, niŋ i ta jɛbi-ri ntiŋ gbɛ.
33Nka Yesu i a ɲaannupwulu, ntiŋ i awɔ kalindaŋ pyɛ kiri shɛɛli, ntiŋ i jɛbi Pyɛɛri gbɛ tu : « Nʼsan ńʼtɔntɛ shitaanni, sabu mɔɔn bi jaka ɲaan ki fa Kirinŋ wɔ ki tenŋ i kì, miŋ i nʼwɔ bi kiri ja-a konanmini wɔ jaka ɲaan tɛ. »
34Niŋ kɔɔtɛ, Yesu i awɔ kalindaŋ kiri fa konaŋ ki bataa dɔri, ntiŋ tu kí tɛ tu : « Konwɔtiŋ ji ǹʼtɛ a i ǹʼpa míŋ cɛfan, ntiŋ fa a miiri a yɛri ki bira kì, nka ntiŋ a kaan a yɛri ki tɛ, ntiŋ i a kpinkpisuu#8.34 kpinkpisuu ki shi : Niŋ kɔri ki i tu kalindaŋ kiri kakan kí i arì tu kí i yɛlinŋ mwɔɔnna pa arì ra Yesu cɛfan tiri ki ru, hali fɔ ŋì i ta so beŋ ki sun. Yesu yɛri ki a na kilɛn ninkunŋ kɔɔtɛ. ki shi, ntiŋ i ǹʼpa míŋ cɛfan. 35Konwɔtiŋ i ǹʼtɛ a i a yɛri ɲinita ki mwu, nintiŋ a bɔni ǹʼnu. Nka nwɔ̀tiŋ bɔni a ɲinita ki ru míŋ bira, niŋ fa Kirinŋ wɔ Wulujii ki bira, ntiŋ a a ɲinita ki mwu. 36Juniɲa ki ru finŋ bataa kilamaan na nfɛnŋ shɔ konanmini sun, a ntiŋ bɔni a ɲinita ki ru? 37Konanmini na so nfɛnŋ wɔri-i Kirinŋ tɛ, nwɔ̀ a ntiŋ ɲini ki sa po? 38A nwɔ̀tiŋ ɲaankwun míŋ fa ńʼwɔ wulu ki wu, nankulinŋ kiri fa bijɛmatɔnŋ kiri kanfɛ, Koŋ Danshuru ki na na waarinŋ wɔ̀ ru, a tiŋ ki nɔɔri ki fa mɛlɛkɛn wɔlinŋ kiri wu, ntiŋ a na ɲaankwun nintiŋ wu. »
वर्तमान में चयनित:
Maraka 8: JOB
हाइलाइट
शेयर
कॉपी
Want to have your highlights saved across all your devices? Sign up or sign in
© Wycliffe Bible Translators, Inc.
