सेगुम्पाक 13
13
बार्नाबास नुङ् साउल न्सेगुचिहा
1एन्टिओखिया साहारबेॽना छुम्वाङ्बे निङ्वाफुमाभाङ् चेक्खुबाचि नुङ् चिन्खुबा याॽमिचि माङ्फा ङ्वाया॥ ङ्खाचि बार्नाबास, माखुरुक्पा बाङ्ना सिमियोन, कुरेनिबेॽना लुकियास, हाङ् हेरोदनुङ् वायाहोङ् पुसाना मानेन नुङ् साउल न्साया॥ 2इलेन ङ्खाचि उपाबास ङ्युङाहोङ् हाङ्बागा आराधाना न्जोक्मान्स्यानिङ् पाबित्तारा आत्माङा ङ्खाचि खाॽला लुचि, “खेप्सानुम, बार्नाबास नुङ् साउल का हेखा कामगा लागि सेगुक्सुङ्चिङ्, ङ्खा कामगा लागि फोक्सानुम्चिम॥” 3न्हाङा फेरि ङ्खाचि उपाबास ङ्युङाहोङ् ङ्खा हिप्पाङ् छोङ्बे उङ्चि मुक युङ्साङ् पार्थाना न्जोक्तुबिचि न्हाङ् ङ्खाचि ङ्खा कामबे म्बाक्सुचि॥
बार्नाबास नुङ् साउल साइपारास टापुबे
4बार्नाबास नुङ् साउल पाबित्तारा आत्माङा पाक्सुचिहोङ् एन्टिओखियाभाङ् सिलुकिया साहारबे ख्याचि॥ न्नाभाङ् ङ्खाचि होङ्गाॽवाबे थाङाचिहोङ् साइपारास पोटि ख्याचि॥ 5न्हाङा साइपारास टापुगा सालामिस बाङ्ना साहारबे तासाचुहोङ् याहुदि छुम्पाङ्चिबे निङ्वाफुमागा चेॽया पार्चार चोक्मा तारोक्ताचु॥ ङ्खा कामबे फाॽमागा उङ्चिङा मार्कुस बाङ्ना युहान्ना चा सोरि खेतामासाचु॥
6उङ्चि साइपारास टापुभाङ् लाम्साङ् पाफोस बाङ्ना साहारबे तायाचि॥ न्नाबे उङ्चिङा एको बार येसु बाङ्ना याहुदि जादुवाल तुप्साचु॥ न्नाङा “कामाङ् निङ्वाफुमाभाङ् चेक्खुबाङान” भोङ् कायाघोन्दा॥ 7साइपारास टापुबेॽना माडा-खाङ्खाङ्बा सार्गियास पाउलुस न्ना जादुवालगा उकाम्निभाक साया॥ सार्गियास पाउलुस च्हेन बुद्दिमानि याॽमि साया॥ न्हाङा उङा निङ्वाफुमागा चेॽया खेम्मा मितुहोङ् बार्नाबास नुङ् साउल कासे पाक्सुचि॥ 8ङ्खाॽनिङ्गो एलुमास जादुवालङा (गिरिक चेॽयाबे एलुमास बाङ्ना जादुवाल ओम) सार्गियास पाउलुसका बिस्वास लेप्निमेॽमागा ङ्खाचि बिरोध चोगुचि॥ 9न्हाङा साउल (न्नागा उनिङ् पावाल चा ओम) पाबित्तारा आत्मागा साक्तिङा इप्तुहोङ् न्ना एलुमास चि सोसाङ् खाॽला लु, 10“न्दा घाक उचुन्हा चेॽयागा सात्तुर, लेम्चाखुबा नुङ् इसिॽहा काम चोक्खुबा दियाबालासका उच्या! न्दा हाङ्बागा जेप्पाना लाम्बुगा बिरुद्दाबे चेक्मा हेॽनिङ्चा न्लेप्तिॽवागान्ना? 11हाकु सो, हाङ्बागा दान्डा न्दा छोङ्बे आयामा, न्हाङ् हाकु न्दा एहिलेन सोम्मा नामगा ओम्ना चा मेनिखुबा लेङ्मेकाना!” ङ्खिङ्बेलामाङ् एलुमासका उमिकपे कुइम खिम्फुरुम्माङा एप्तुना लोॽवा एता, न्हाङ् मिक मेनिखुबा लेक्सा॥ न्हाङ् याॽमिचिङा मुकपे लाप्होङ् तिक्नि भोङ् सोप्सोप सिप्सिप चोक्मा तारोक्तु॥ 12खा चेॽया निसुहोङ् माडा-खाङ्खाङ्बा सार्गियास पाउलुसङा येसुबे बिस्वास चोगु, इजाङ्बाङ्निङ् हाङ्बागा चेॽयाबे उङ् आच्चाम्मा एतामासा॥
पावाल नुङ् बार्नाबास एन्टिओखिया साहारबे
13पावाल नुङ् उकाम्निभाकचि पाफोस साहारभाङ् होङ्गाॽवाबे न्थाङाहोङ् पाम्फिलिया लिङ्खामगा पार्गा साहारबे न्दासु॥ न्नाभाङ् मार्कुस बाङ्ना युहान्नाङा पावाल नुङ् बार्नाबास नाओचिहोङ् यारुसालेमबे लासा॥ 14पावाल नुङ् बार्नाबास च्हेन पार्गाभाङ् पिसिदिया लिङ्खामगा एन्टिओखिया साहारबे ख्याचि॥ न्हाङ् आराम चोक्माना लेनबे याहुदि छुम्पाङ्बे ख्याचिहोङ् युङाचि॥ 15मोसाङा पिचिहा ब्यावास्था नुङ् निङ्वाफुमाभाङ् चेक्खुबाचिङा न्छेप्तुना छेप्ताप पोढान्जोगिचिहोङ्, याहुदि छुम्पाङ्बेॽहा तायेन्राङ्बाचिङा पावाल नुङ् बार्नाबास खाॽलाना सालेन ङ्हाक्तुचि, “ओ काम्निभाकचि, न्जिङ्दानुङ् याॽमिचि आर्ति पिॽमाहा चेॽया वेॽहाभोङ् लुया॥”
16खा खेप्सुहोङ् पावाल चेङ् पोगा, न्हाङ् उमुक्का चालङा स्वाक वायानि लुचिहोङ् चेक्मा तारोक्तु, “ओ इजिरेलि आफुआनुन्छा आनाआनुन्छाचि नुङ् निङ्वाफुमागा आदार चोक्खुबा हेकोहा जातिगा याॽमिचि, आचेॽया खेप्सानुम! 17इजिरेलिचिगा निङ्वाफुमाङा एङ्गा पुर्खा सेगुचि, न्हाङ् ङ्खाचि मिस्रा खाम्युकपे ङ्वायानिङ् ङ्खाचि माडा जाति चोगुचि॥ उका माडा साक्तिङा न्ना खाम्युकपाहाङ् लोन्दुचि॥#पारास्थान १:७; १२:५१ 18न्हाङ् ङ्खाचि इसा चा मेॽनिङ्ना सुन्नेना ठोङ्बे ङ्वायानिङ् नाखेङ् फिम्बिलिङ् सोम्मा उङा सोचि॥#निप १४:३४; ब्यावास्था १:३१ 19न्हाङ् उङा कानान खाम्युकपेॽहा ला जातिचि नास चोगुचिहोङ् न्ना खाम्युक एङ्गा पुर्खाचि पिचि॥#ब्यावास्था ७:१; याहोसु १४:१
20“ङ्खिङ्बेला सोम्मा ना होम्बोक फाखेङ् फिम्बिलिङ्हिङ् लेक्साब्यामासा॥ न्हाङा निङ्वाफुमाङा ङ्खाचिगा उलुम्बे निरिक्राङ्बाचि पाक्सुचि॥#निरिक २:१६; १ सामुएल ३:२० ङ्खा निरिक्राङ्बाचिङा निङ्वाफुमाभाङ् चेक्खुबा सामुएल मेन्दाले सोम्मा पालो-पालो निरिक चोक्माहा काम न्जोगु॥ 21न्हाङा एङ्गा पा-पुम्चिङा कानिङ् हाङ् चाहाचोङ्मेॽनाभोङ् ङ्गाया॥ न्हाङा निङ्वाफुमाङा बेन्यामिन छोङ्गा किसका उच्या साउल हाङ् चोक्तुबिचि॥ उङा नाखेङ् फिम्बिलिङ् सोम्मा राज्या चोगु॥#१ सामुएल ८:५; १०:२१ 22न्हाङ् निङ्वाफुमाङा उङ् हाङ्युक्थामभाङ् लोन्धाक्सुहोङ् दाउद हाङ् चोगु॥ दाउदका उतुम्बे निङ्वाफुमाङा खाॽला काया, ‘यिसाइगा उच्या दाउद आनिङ्वाङा चोना याॽमि तुप्सुक्सुङ्॥ उङा का मितुङाहा घाक काम पुरा चोग्वाहा॥’#१ सामुएल १३:१४; १६:१२; छेम ८९:२०
23“निङ्वाफुमाङा बाचा चोगाना लोॽवामाङ् इजिरेलिचिगा लागि न्ना दाउदका छोङ्भाङ् एको पाप पाहाङ् फोङ्खुबा पाक्सु, न्ना येसुमाङ् ओम॥ 24येसुङा उका काम तारोक्मा हाक्निङ् ओन्दाङ् युहान्ना ताया॥ उङा इजिरेलबेॽहा घाक याॽमिचि न्निङ्गा पाप पाहाङ् पास्चाताप चोगिघोङ् बाप्तिस्मा लियाचोगानुम लुसाङ् पार्चार चोगुचि॥#मार्कुस १:४; लुका ३:३ 25युहान्नाङा उकाम मेन्माना बेलाक्पे याॽमिचि खाॽला लुक्साचि, ‘न्निङ्दा का पाप पाहाङ् फोङ्खुबा ओम्ङान मितिॽवाघायि? का गो मेॽङान्ना, ङ्खाॽनिङ्गो का हाक्निङ् हेक्साङ् एको तामे, का गो उका उलाङ्खोप्का उनाम्चि फुङ्मा चा न्थेन्सिमेॽङान्ना॥’#मात्ति ३:११; मार्कुस १:७; लुका ३:१६; युहान्ना १:२०,२७
26“ओ आब्राहामगा सान्तानचि नुङ् निङ्वाफुमाबे किसिखुबा हेकोहा जातिगा याॽमिचि, मुक्ति तोक्माहा सालेन निङ्वाफुमाङा कानिङ् घाक्का लागिमाङ् कानिङ्बे पाक्सुक्सुहा ओम॥ 27ङ्खाॽनिङ्गो यारुसालेमबेॽहा याॽमिचि नुङ् उङ्चिगा तायेन्राङ्बाचिङा येसु चिनान्दोक्तुनिन॥ उङ्चिङा निङ्वाफुमाभाङ् चेक्खुबाचिङा धार्मासाप्लाबे न्छेप्तुहा चेॽया साधाइ आराम चोक्माना लेनबे पोढा न्जोगु, ङ्खोङ्चा ङ्ङासुनिन॥ न्हाङा उङ्चिङा येसु सिमाना दान्डा म्बिहोङ् धार्मासाप्लाबे उका उतुम्बे छेप्ताहा चेॽया पुरा न्जोगु॥ 28उङा दान्डा पिॽमाहोङ् सिमा लाइक्हा इहाचा इसिॽहा काम न्जोगुक्सान, ङ्खोङ्चा सिमाना भोङ् माडा-खाङ्खाङ्बा पिलातासनुङ् उङ्चि मुक म्फाक्तुचि॥#मात्ति २७:२२-२३; मार्कुस १५:१३-१४; लुका २३:२१-२३; युहान्ना १९:१५
29“खाॽला धार्मासाप्लाबे उका उतुम्बे छेप्ताहा घाक चेॽया उङ्चिङा पुरा न्जोगु, न्हाङ् कुरुसभाङ् ङ्ङाएन्दुहोङ्#१३:२९ ङ्योगेन्दुहोङ् सियापाङ्बे ङ्युक्सु॥#मात्ति २७:५७-६१; मार्कुस १५:४२-४७; लुका २३:५०-५६; युहान्ना १९:३८-४२ 30ङ्खाॽनिङ्गो निङ्वाफुमाङा येसु स्यानाभाङ् हिङ्गिलिक लेङ्मेतु, 31न्हाङ् प्याक लेन सोम्मा उङ्नुङ् गालिलभाङ् यारुसालेमबे ताखुबाचिगाबे ओतामासा॥ ङ्खाचि लोप इजिरेलबेॽहा याॽमिचिगा लागि साचि ङ्वान्नेहा॥#सेगुम्पाक १:३
32“हाकु निङ्वाफुमाङा एङ्गा पुर्खाचि पिचिहा बाचागा उतुम्बे नुसाला खेम्मेॽमागा कान्चिङ् न्निङ्गाबे तायामाङ्चिङ्हा॥ 33निङ्वाफुमाङा येसु स्यानाभाङ् हिङ्गिलिक लेङ्मेतुहोङ् कानिङ् उङ्चिगा सान्तानगा लागिमाङ् खा चेॽया पुरा चोक्ताब्याहा ओम॥ खा चेॽयागा उतुम्बे छेमगा छेप्तापका हिच आध्यायाबे खाॽला छेप्तामा,
‘न्दा आका आच्यागान,
हेन्ना लेन का न्दा तोङ्नुङ्नेन्ना॥’#छेम २:७
34“उङ् हेॽनिङ्चा सिमा पोरामेन्जोक्मानुङ्गा हिङ्गिलिक लेङ्माना चेॽयागा उतुम्बे च्हेन निङ्वाफुमा खाॽला कायामा,
‘का दाउदनुङ् बाचा चोगाङ्ना पाबित्तारा
नुङ् जेप्पाना आसिक न्निङ्दाबे पाक्स्वाङ्ना॥’#यासाइया ५५:३
35“न्हाङा छेमगा छेप्तापका हेकोना ठोङ्बे खाॽला चा छेप्तामा,
‘न्दा ङ्गा पाबित्तारा सेवाकका सालुङ्
किन्दिॽमा म्बिवागान्ना॥’#छेम १६:१०
36“खा चेॽया दाउदङा उका उतुम्बे चेक्तुहा मेन्ना, इजाङ्बाङ्निङ् उङा हिङानुङ् सोम्मा निङ्वाफुमागा सेवा चोगु, न्हाङ् उङ् स्या न्हाङा एङ्गा पुर्खाचिनुङ् ङ्हुम्दुहोङ्, किन्दाख्या॥ 37ङ्खाॽनिङ्गो निङ्वाफुमाङा येसु स्यानाभाङ् हिङ्गिलिक लेङ्मेतु न्हाङ् उका सालुङ् ङ्गिन्दाख्यान॥
38“न्हाङामाङ् आफुआनुन्छा आनाआनुन्छाचि, खेप्सानुम, ना येसुङा से पाप छेमा पिॽमायामेहा! खा चेॽयामाङ् न्निङ्दा खेम्मेॽमेनेनिन्हा॥ 39न्निङ्दा उङ्बे बिस्वास चोक्खुबाचि घाक उङामाङ् घाक पाप पाहाङ् फोक्सिमिघा, ङ्खाॽनिङ्गो खा काम मोसागा ब्यावास्थाङा पुरा चोक्मा ङ्यासुन॥ 40न्हाङामाङ् न्निङ्दा थाङ्थाङ् वायानि, मानुङ् निङ्वाफुमाभाङ् चेक्खुबाचिङा न्छेप्तुहा खा चेॽया न्निङ्दाबे आमेहा,
41‘ओ खिजे चाखुबाचि, सोयानुम्घोङ् आच्चाम्मा एतानि, न्हाङ् नास लेक्साख्यानि! इजाङ्बाङ्निङ् का न्निङ्गा लेनचिबे एको खाॽलाना काम चोग्वाङ्, न्ना कामगा उतुम्बे याॽमिचिङा योक्मेॽतिइवागा होङ्चा न्निङ्दा बिस्वास न्जोग्वाम्गान्हा॥’”#हाबाकुक १:५
42पावाल नुङ् बार्नाबास याहुदि छुम्पाङ्भाङ् लोन्दाख्याचिनिङ् याॽमिचिङा हेकोना आराम चोक्माना लेनबे चा तायाचिघोङ् खा चेॽयागा उतुम्बे कानिङ् खेम्मेता भोङ् उङ्चि मुक म्फाक्तुचि॥ 43सेवा मेन्दाहोङ् याहुदि नुङ् याहुदि धार्मा मानाचोक्खुबा प्याक याॽमिचि पावाल नुङ् बार्नाबासका हेक्साङ् लान्जोगा॥ न्हाङा पावाल नुङ् बार्नाबासङा ङ्खाचिनुङ् चेक्साङ् “निङ्वाफुमागा आनुगाराहाबे साधाइ वायानियो” लुयाचुचि॥
44हेकोना आराम चोक्माना लेन न्ना साहारबेॽहा प्याक लोॽवा याॽमिचि नुसाला खेम्से न्दाया॥ 45ङ्खाॽनिङ्गो याहुदिचिङा ङ्खिङाहा याॽमिचि न्छुप्साहा न्निसुचिहोङ् उङ्चि नाहेन्दा, न्हाङा ङ्खाचिङा पावालगा बिरुद्दाबे चेक्साङ् उङ् इसिॽनुङ् न्लु॥
46ङ्खाॽनिङ्गो पावाल नुङ् बार्नाबासङा मेङ्गिसिॽले खाॽला लुयाचुचि, “निङ्वाफुमागा नुसाला गो घाक हाक्निङ् ओन्दाङ् न्निङ्दा याहुदिचिगा लागिमाङ् साया, ङ्खाॽनिङ्गो न्निङ्दा खेम्मा ङ्गाक्सिगान्होङ् हेॽनिङ्चा मेन्सिमाना हिङ्लुङ् तोक्मा आयोग्या लेक्सिमिगा॥ न्हाङामाङ् हाकु कान्चिङ् हेकोहा जातिगा याॽमिचिगाबे खेमेङ्चिङ्हा॥ 47इजाङ्बाङ्निङ् हाङ्बाङा कानिङ् खाॽलाना आग्गे पियामा,
‘ताम्दाङ्फुमागा योना उलाप सोम्माहा याॽमिचिङा मुक्ति न्दोक्तुनिभोङ्
का न्निङ्दा हेकोहा जातिगा याॽमिचिगा उलुम्बे जोति लेङ्मागा सेङ्नुङ्नेनिन्हा॥’”#यासाइया ४२:६; ४९:६
48खा चेॽया ङ्खेप्सुहोङ् हेकोहा जातिगा याॽमिचिङा चोन्सिसाङ् निङ्वाफुमाङा पिचिहा नुसालागा लागि उङ् नुनिङ्वा म्बि॥ न्हाङ् हेॽनिङ्चा मेन्सिमाना हिङ्लुङ् तोक्मागा लागि निङ्वाफुमाङा सेगुचिहा घाकङा येसुबे बिस्वास न्जोगु॥
49निङ्वाफुमागा चेॽया न्ना लिङ्खाम घाकपे हिसा॥ 50ङ्खाॽनिङ्गो याहुदिचिङा निङ्वाफुमागा भाक्ति चोक्खुमा नुङ् उङ्चिङा आदार न्जोगुचिहा मामु याॽमिचि न्हाङ् न्ना साहारगा खाङ्खाङ्बाचि पावाल नुङ् बार्नाबासका बिरुद्दाबे म्बोगुचि॥ न्हाङा ङ्खाचिङा पावाल नुङ् बार्नाबास न्ना लिङ्खामभाङ् न्लोन्धाक्सुचि॥ 51ङ्खाॽनिङ्गो पावाल नुङ् बार्नाबासङा च्हेन उङ्चिगा लाङ्बेॽहा धुलो ङ्खाचिगा बिरुद्दाबे आप्साॽयाचुहोङ् आइकोनियान बाङ्ना साहारबे ख्याचि॥#मात्ति १०:१४; मार्कुस ६:११; लुका ९:५; १०:११ 52ङ्खाचिङा नाॽयाचुचिहा हाङ्बागा चेलाचि च्हेन पाबित्तारा आत्मागा साक्तिङा इप्तुचिहोङ् न्जोन्दास्या॥
वर्तमान में चयनित:
सेगुम्पाक 13: YAKH
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
