सेगुम्पाक 10
10
कार्नेलियासङा पात्तुरुस काना
1काइसारिया साहारबे कार्नेलियास बाङ्ना एको याॽमि वाया॥ उङ् रोमि काङ्बाचिगा इटालिया बाङ्ना पाल्टानगा केप्टेन साया॥ 2उङ् धार्मोति याॽमि साया॥ उङ् नुङ् उपाङ्बेॽहा घाक याॽमिचि निङ्वाफुमा आदार चोक्खुबा न्साया॥ उङ् तुखिबे ङ्ङायाहा याॽमिचि उचुन्ना निङ्वाङा फाखुबा, न्हाङा लेन्लेन निङ्वाफुमानुङ् पार्थाना चोक्खुबा साया॥ 3इलेन लेॽनिगा सुम मोक्तुक्सानिङ् लोप्पि, उङा एको सेन्चि निसु॥ सेन्चिबे निङ्वाफुमागा एको वालोक्दुत उयुम्बे तायाहोङ् खाॽला लुना खेप्सु, “ओ कार्नेलियास!”
4कार्नेलियास किसिता न्हाङा उचुन सोसाङ् खाॽला लु, “आहाङ्बा लुयाङ्॥”
वालोक्दुतङा उङ् लु, “ङ्गा पार्थाना नुङ् न्दा तुखिसुम्बाचि दान पिचिघोङ् फातुचिघा चेॽया निङ्वाफुमाङा निसुक्सुहा॥ 5हाकु न्दा योप्पा साहारबे सिमोन पात्तुरुस कासे याॽमिचि पाक्सुचि॥ 6उङ् सामुन्दारागा उलाप्पे सिमोनगा पाङ्बे वान्ने, न्ना सिमोनङा ह्वारिक्का काम चोग्वाहा॥”
7खिङ् लुइहोङ् वालोक्दुत न्नाभाङ् ख्या, न्हाङ् कार्नेलियासङा हिप्पाङ् उका नोकोरचि नुङ् निङ्वाफुमागा आराधाना चोक्खुबा एको काङ्बा काचि॥ न्ना काङ्बा च्हेन कार्नेलियास तुखुबा उका सेवा चोक्खुबा याॽमि साया॥ 8उङा ङ्खाचि घाक चेॽया योक्मेतुचि, न्हाङा योप्पा साहारबे पात्तुरुस लाल्लासे पाक्सुचि॥
9हेक्साङ्ना लेन लेन्लुम लेक्सानिङ् ङ्खाचिङा योप्पा साहारगा उयुम्बे न्दासु॥ ङ्खिङ्बेला पात्तुरुस पार्थाना चोक्से पाङ्गा तोप्पारिक थाङा॥ 10उङ् पार्थाना चोक्मास्यानिङ् तुक्नुङ् साकङा स्यामासा, न्हाङा चाम्योङ्बा चामा मितुक्सा॥ ङ्खाॽनिङ्गो याॽमिचिङा चाम्योङ्बा न्निॽमास्यानिङ् पात्तुरुसका उनिङ्वा एकोहोरो लेक्साख्या॥ ङ्खिङ्बेला उङा आच्चाम्माहा चेॽया निसु॥ 11उङा वालोक होसाना न्हाङा न्नाभाङ् माडा फोॽमा ताम्दाङ्फुमाबे आॽनुङ्मास्याना निसु॥ न्ना फोॽमा ना उलापचिबे थुन्दामासा॥ 12न्नाबे ताम्दाङ्फुमाबेॽहा घाक खाले जिवातचि, फोक सोसाङ् खामबे लाम्खुबाचि, ताङ्खेङ्बे पेखुबा न्वाकुच्याकचि ङ्वाया॥ 13न्हाङ् पात्तुरुसङा खाॽलाना सेम्ला खेप्सु, “ओ पात्तुरुस पोगा, न्हाङ् ङ्खाचि सिसुचोचि॥”
14ङ्खाॽनिङ्गो पात्तुरुसङा पोलोवा पि, “मेन्ना हाङ्बा, का खाॽलाहा चामा मेलेङ्माहा आसुद्दा चाम्योङ्बा गो हेॽनिङ्चा न्जाक्सुङान्हा॥”
15न्हाङा फेरि खाॽलाना सेम्ला ताया, “निङ्वाफुमाङा सुद्दा चोगुहा चाम्योङ्बा न्दा आसुद्दाहा ङ्गायान॥”
16सुम्मा सोम्मा खाॽलामाङ् लेक्सा, न्हाङा न्ना फोॽमा तो वालोकपोटि लासाख्या॥
17उङा निसुहा खा चेॽयागा तुम्बिला इहा लोप्पिभोङ् मिॽमास्यानिङ् कार्नेलियासङा पाक्सुचिहा याॽमिचि सिमोनगा पाङ् योक्साङ् वालाम्बुङ्बे न्दायाब्या॥ 18न्हाङा ङ्खाचिङा माडा सेम्लाङा न्छिम्दु, “सिमोन बाङ्ना पात्तुरुस नाबे वान्नेॽनायेम मान्नायेम?”
19पात्तुरुसङा सेन्चिगा तुम्बिला इना लोप्पिभोङ् उनिङ्वाबे मिॽमास्यानिङ् पाबित्तारा आत्माङा लु, “सिमोन, सुम्भाङ् याॽमिचिङा न्दा ङ्योक्मान्सिम्मेकाना॥ 20पोगाघोङ् मो ख्या, न्हाङा ङ्खाचिनुङ् आप्ठेरो मेयेॽले ख्या, इजाङ्बाङ्निङ् ङ्खाचि का पाक्सुङ्चिङ्हा ओम॥”
21पात्तुरुस मो उक्साहोङ् ङ्खाचि लुचि, “न्निङ्दा योगुम्गाना याॽमि काङान॥ न्निङ्दा इहा कामबे ताइघा?”
22ङ्खाचिङा उङ् पोलोवा म्बि, “केप्टेन कार्नेलियास धार्मोति नुङ् निङ्वाफुमागा आदार चोक्खुबा याॽमि ओम॥ उङ् याहुदि याॽमिचिङा चा तुक्नुङ् आदार न्जोग्वा॥ इलेन निङ्वाफुमाङा पाक्सुना एको पाबित्तारा वालोक्दुत उपाङ्बे तायाहोङ् ‘पात्तुरुस बाङ्ना याॽमि काॽमेतुचिघोङ् ओचेॽया खेप्सु’ भोङ् आग्गे पिक्सु, न्हाङामाङ् उङा कानिङ् न्दा लाल्लासे पाक्सामाहा॥” 23खा चेॽया खेप्सुहोङ् पात्तुरुसङा ङ्खाचि पाहोङ्बे काहेतुचि, न्हाङ् उचुन तुसुचि॥ न्ना सेॽनि उङ्चि न्नाबेॽमाङ् ङ्वाया॥
पात्तुरुस कार्नेलियासका उपाङ्बे
हेक्साङ्ना लेन भेनिक पात्तुरुस पोगाहोङ् ङ्खाचिनुङ् ङ्ख्या॥ उङ्नुङ् योप्पाबेॽहा एकोहिप्पाङ् बिस्वासिचि चा ङ्ख्या॥ 24न्नागा हेक्साङ्ना लेन उङ्चि काइसारियाबे न्दायाब्या॥ ङ्खिङ्बेला कार्नेलियासङा च्हेन उका आफान्ताचि, पाङ्निवाकचि नुङ् उकाम्निभाकचि छुप्सुचिहोङ् पात्तुरुसका लाम्बु सोनेसुक्सा॥ 25पात्तुरुस पाहोङ्बे उहेक्सासानिङ् कार्नेलियासङा तुप्सु न्हाङ् उलाङ्बे फोप फोप्ताहोङ् सेमेतु॥ 26ङ्खाॽनिङ्गो पात्तुरुसङा पोगुहोङ् खाॽला लु, “पोगा, का चा याॽमिङान माङ् बा॥”
27पात्तुरुस कार्नेलियासनुङ् साला लेन्साङ् पाहोङ्बे उया॥ न्नाबे उङा प्याक याॽमिचि न्छुप्साहोङ् ङ्युङामासाहा निसुचि॥ 28न्हाङा पात्तुरुसङा ङ्खाचि लुचि, “कानिङ् याहुदि याॽमिचि हेकोहा जातिगा याॽमिचिनुङ् सोरि वामा, उङ्चिनुङ् तुप्मा, उङ्चिगा पाङ्बे खेॽमा आनिङ्गा धार्माङा म्बिमेन्हा बाङ्ना चेॽया न्निङ्दा उचुन माङ् था वान्ने॥ ङ्खाॽनिङ्गो निङ्वाफुमाङा का हाकु हेॽनाचा याॽमि आपाबित्तारा म्मितुन भोङ् सोॽमेतामाङ्॥ 29न्हाङामाङ् न्दा पाक्सुचिघा याॽमिचिनुङ् इच्चा मेङ्गाले का नाबे तायामाङ्ना॥ हाकु काया, का नाबे इजाङ् कायाङ्गाना?”
30कार्नेलियासङा लु, “ना लेन ओन्दाङ्हा चेॽया ओम॥ लेनगा सुम मोक्तुनिङ् लोप्पि का पाङ्बे पार्थाना चोक्मास्याङ्, ङ्खिङ्बेला फुहा तेक वाखुबा एको याॽमि आका ओन्दाङ् येबाहोङ् 31का लुयाङ्, ‘ओ कार्नेलियास, ङ्गा पार्थाना नुङ् न्दा तुखिसुम्बाचि दान पिचिघोङ् फातुचिघा चेॽया निङ्वाफुमाङा निसुक्सुहा॥ 32हाकु न्दा योप्पा साहारबे सिमोन पात्तुरुस कासे याॽमिचि पाक्सुचि॥ उङ् सामुन्दारागा उलाप्पे पाङ् वाखुबा सिमोनगा पाङ्बे वान्ने, न्ना सिमोनङा ह्वारिक्का काम चोग्वाहा॥’ 33न्हाङामाङ् का खाचि सोलोक पाक्सुङ्चिङ्हा ओम॥ न्हाङा न्दा चा आचेॽया खेप्सुघोङ् तायामागा, हाकु हाङ्बाङा न्दा इलुॽमाना आग्गे पियामागा ङ्खा चेॽया खेम्मागा कानिङ् घाक निङ्वाफुमागा ओन्दाङ् छुप्सिमिङ्हा॥”
पात्तुरुसङा नुसाला खेम्मेतुचिहा
34खा चेॽया खेप्सुहोङ् पात्तुरुसङा चेक्मा तारोक्तु, “जेप्पा निङ्वाफुमाङा कानिङ् इसा चा तो-मो न्सोमेन्हा#ब्यावास्था १०:१७ बाङ्ना चेॽया हाकु का था तोक्तुङ्हा॥ 35याॽमिचि हेॽना जातका न्सानि, उङ् आदार चोक्खुबा नुङ् उका उनिङ्वा लोॽवा काम चोक्खुबा घाक याॽमिचि निङ्वाफुमाङा उसाप थाक्त्वाचिहा बाङ्ना चेॽया जेप्पा ओम॥ 36न्निङ्दा था वान्ने येसु घाक्का हाङ्बा ओम॥ निङ्वाफुमाङा उङ्भाङ् घाक हाङ्हाङ् पिॽमाना नुसाला इजिरेलिचिगाबे पाक्सु॥ 37युहान्नाङा बाप्तिस्मागा उतुम्बे खेम्मेतुचिना नाहाङ्तो गालिल लिङ्खामभाङ् तारोक्ताहोङ् घाक याहुदिया खाम्युकपे लेक्साहा घाक चेॽयागा उतुम्बे न्निङ्दा था वान्ने॥ 38निङ्वाफुमाङा नासारातपेॽना येसु पाबित्तारा आत्मा नुङ् साक्तिङा आभिसेक चोगु, न्हाङ् उङ् उचुन्हा काम चोक्साङ् दियाबालासङा तुखि पिचिहा तुखाबाङ्चि नुमेसाङ् लामा, इजाङ्बाङ्निङ् निङ्वाफुमा उङ्नुङ् वाया॥
39“न्हाङा उङा यारुसालेम नुङ् घाक याहुदिया खाम्युकपे चोगुहा ङ्खा घाक कामगा साचि कानिङ् वेतिङ्हा॥ उङ् याहुदिचिङा कुरुसपे न्छुसि॥ 40ङ्खाॽनिङ्गो सुम्ना लेन निङ्वाफुमाङा उङ् स्यानाभाङ् हिङ्गिलिक लेङ्मेतु, न्हाङ् याॽमिचिङा उङ् निमा न्दोक्तु॥ 41उङ् घाक याॽमिचिगाबे को ङ्ओतान, ङ्खाॽनिङ्गो कानिङ् निङ्वाफुमाङा उका गाबाहि पिॽमागा सेगाहाचिगाबे ओता॥ कानिङ् उङ् हिङ्गिलिक लेक्साब्याहोङ् उङ्नुङ् चाम्ङा, उङुम्ङा॥ 42उङा कानिङ् घाक याॽमिचि नुसाला खेम्मेॽमाना, न्हाङा निङ्वाफुमाङा उङ्माङ् न्स्याहा नुङ् हिङ्गिलिक्हा घाक याॽमिचिगा निरिक चोक्मागा सेगुना ओम बाङ्ना चेॽयागा गाबाहि पियानुम्चिमभोङ् आग्गे पियामाहा॥ 43निङ्वाफुमाभाङ् चेक्खुबाचि घाकङा उका उतुम्बे खाॽला ङ्गायामा, ‘येसुबे बिस्वास चोक्खुबा घाकङा उका उनिङ्बे पाप छेमा न्दोक्त्वाना॥’”
हेकोहा जातिगा याॽमिचिङा पाबित्तारा आत्मा न्दोक्तुना
44पात्तुरुसङा खा चेॽया चेक्मास्यानिङ् नुसाला खेम्खुबाचि घाक छोङ्बे पाबित्तारा आत्मा उक्सा॥ 45खाॽला हेकोहा-हेकोहा जातिगा याॽमिचिङा चा पाबित्तारा आत्मा न्दोक्तुना चेॽया न्निसुहोङ् पात्तुरुस नुङ् योप्पाभाङ् ताखुबा याहुदि बिस्वासिचि चा आच्चाम्मा ङ्ङेता॥
46इजाङ्बाङ्निङ् ङ्खाचिङा हेकोहा-हेकोहा चेॽयाबे चेक्साङ् निङ्वाफुमागा पार्साम्सा न्जोक्मास्याहा ङ्खेप्सुचि॥ पात्तुरुसङा ङ्खाचि लुचि, 47“कानिङ् लोॽवा खा याॽमिचिङा चा पाबित्तारा आत्मा न्दोक्तुक्सुना! हाकु खा याॽमिचि माङ्च्वागा बाप्तिस्मा लेङ्मागा लागि इङा ओन्द्वाचिहा?” 48न्हाङामाङ् पात्तुरुसङा खा याॽमिचि येसुगा उनिङ्बे बाप्तिस्मा पियानुम्चिमभोङ् आग्गे पिचि॥ न्हाङा ङ्खाचिङा पात्तुरुस एहिलेन कानिङ्नुङ् वायाभोङ् उङ्चि मुक म्फाक्तुचि॥
वर्तमान में चयनित:
सेगुम्पाक 10: YAKH
हाइलाइट
शेयर
कॉपी
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
