Mǒhtûlû̌hǎhtûsa 7
7
Shidû̌htò̌ awi̤akè̌
1Dě Cǒmara tûjûpwa̤ hî̌ Nǒa, “Kaǎnṳ nahǐphû̌phòphû̌ dě nṳmò̌ sǒkhlidû̌kûnu nî̌꤮. Dě kòyò htǒotuhtu aklanu he kè̌shǐ na ta na mî̌ kòcǒkòtè̤ tapwa̤ hǒ. 2Ta̤phû̌ta̤li̤ lǒ̤꤮ bò htě amṳ̂plî toǒnu pṳ̂nṳ sûkhû̌ amo̤ susǒtado ta apha susǒ tado nî̌. Dě ta̤phû̌ta̤li̤ htě a mṳ̂plî kû̌kò tò̤ dě a gwa lṳhtò̌ ta Cǒmara tò̤ toǒnu, pṳ̂nṳ a tacǎ mî̌ tûphû̌, amo̤ tado ta apha tado pwǎ nî̌. 3Dě htû̌tî̤pî̤ khli pṳ̂̌꤮ tacǎnu, pṳ̂nṳ a tacǎ mî̌ susǒtûphû̌, tacǎ mî̌ susǒtûphû̌, dě pṳ̂nṳ amo̤ tabǎ apha tabǎ pṳ̂̌꤮ tacǎ nî̌. Ma̤pûhǐ asî phû̌phǎhtò̌dû̌ sělěhè hǎkhû̌teběbò ayanu, ma̤ hǐnu nî̌. 4Ma̤tè̤hî̌dě susǒti̤ni̤ behtò̌ pěnu, he nojulò̤yî̤ khwè̌ lṳmṳkhǐkhǐ lṳmṳshasha ani̤ li̤shi, asa li̤shi pě. Kòyòhǎkhû̌phû̌ ta ta̤phû̌ta̤li̤ lǒ̤꤮ bò htě he bǒlò̤ yǎ hǎkhû̌ bǎotoǒnu he ma̤sikèbò asî pě.” 5Dě Nǒa ma̤bò pwǐ꤮ Cǒmara tûjûpwa̤ hî̌lò̤ nû̌ûnu toǒ.
6Bǎ shidû̌htò̌ hǎkhû̌bǎo akhanu, Nǒa něǒ aya̤susǒ hǒ. #Mǒhtûlû̌hǎhtûsa 5:32 7Ma̤pûhǐ Nǒa, ama, aphû̌makhû ta adè̌ sîtoǒ lû̌htò̌ ta shidû̌ htǒonu dě asî nṳ lǒkho sǒkhlidû̌ kû. #Matěo 24:38-39; Lǔka 17:27 8Ta̤phû̌ta̤li̤ adû̌dû̌ apî̌tî̌tî̌ ta htû̌phû̌yṳphû̌ lǒ̤꤮ bò toǒnu a mṳ̂plî bǎbǎ, a mṳ̂plî tò̤ bǎbǎ, htě a ǒ lǒkho hǎkhû̌ bǎoteběbònu, 9Amo̤ tabǎ apha tabǎ asî nṳ sûkhû̌bò lǒkho nû̌û sǒkhlidû̌kû pwǐ Cǒmaradû̌ mǎnǎ Nǒanu. 10Susǒti̤ni̤ behtò̌ dě shidû̌htò̌bǐkè hǎkhû̌ hǒ.
11Bǎ Nǒa něbehtò̌ ya̤susǒ, ginǐ̤la tala, shǐsusǒnu ti̤ni̤ akha, bò shihtǎpo̤ hǎla̤nu toǒ a shǐhǎhtò̌bò. Shitakha dě mǒkhû̌nu toǒ bǎbǎ a mo sǒsǒta takha lṳ̂monu #Petru ginǐ̤bǎ tabǎ 3:6 12Htodě khwè̌julò̤ lṳmṳkhǐkhǐ lṳmṳshasha dě a ju ani̤ li̤shi.
13Nǒa ta aphû̌makhû sò̌su mî̌ Shemǎ, Hamǎ, Ya̤phè̌ ta Nǒa ama ta adè̌ sò̌su nṳ lǒkho sǒkhlidû̌kû bǎ khwè̌julò̤nu ti̤ni̤ hǒ. 14Bò꤮ ta̤phû̌ta̤li̤ mi̤klanu toǒ ta ta̤phû̌ta̤li̤ htě kòbǔǐ a hǐphònu toǒ ta bò꤮ ta̤phû̌ta̤li̤ htě adû̌dû̌ apî̌tî̌tî̌nu toǒ ta ta̤phû̌ta̤li̤ htě a wi̤ dě mǒla̤nu toǒnu, a nṳǒ dǒkû̌bò ta asî. 15Ta̤bǒlò̤ lǒ̤bò htě asò̌phlǒ htûpwa̤ toǒnu, amo̤ tado apha tado, tûphû̌ hto tûphû̌ a nṳplǒkû̌ lǒkho ta Nǒa sǒkhlidû̌kû. #Mǒhtûlû̌hǎhtûsa 6:19, 7:9 16Ta̤phû̌ta̤li̤ tacǎ꤮ ta tacǎ, amo̤ ta apha nṳ sûkhû̌ lǒkho nû̌û sǒkhlidû̌kû pwǐ Cǒmaradû̌ mǎnǎ Nǒanu, htodě Cǒmara tûjûpwa̤ ma̤bǐkè takha.
17Khwè̌ju hèyî̤ ani̤li̤shi dě shidû̌htò̌ ta dû̌htò̌ hǎkhû̌bǎo a jo gojohtò̌kè sǒkhlidû̌htǒo shikhû̌ dě sǒkhlidû̌ ǒgojohtò̌yî̤khlokè ta hǎkhû̌. 18Shi dû̌htò̌ ta dû̌htò̌ hǎkhû̌htǒo dě sǒkhlidû̌ lo̤cû̌ shikhû̌. 19Shidû̌htò̌ yo̤ mè̤mè̤̌ akhû̌akhî, a plû̌bǐbò kholodû̌kholohtû to̤dě mǒla̤nu toǒ. 20Shidû̌htò̌ ta dû̌htò̌ dě a dû̌htò̌tûlû̌kè kholonu toǒ shǐyè̤̌ pla̤. 21Htû̌phû̌yṳphû̌ toǒ bǎbǎ, ta̤phû̌ta̤li̤ a bî̌ htě kò bǔǐ nû̌û hǐnu toǒ bǎbǎ, ta̤mi̤ta̤mò̤ htě aplò̤nu toǒ bǎbǎ, kòyòhǎkhû̌phû̌ bǎbǎ, ta̤ lǒ̤꤮ bò htě a ta̤htûpwa̤ gugwè dě hǎkhû̌ htǒo toǒnu a sikèbò. 22Ta̤bǒlò̤ lǒ̤꤮ bò htě ata̤htûpwa̤ ǒbò dě hǎkhû̌ htǒotoǒnu, a sikèbò. 23Ta̤ lǒ̤꤮ bò htě a ǒ htûpwa̤ gugwè dě hǎkhû̌ htǒotoǒnu a sikèbò hǒ, kòyòhǎkhû̌phû̌ bǎbǎ, bò꤮ ta̤phû̌ta̤li̤ htě a ǒ mi̤klanu toǒ bǎbǎ, bò꤮ ta̤phû̌ta̤li̤ htě kò bǔǐ hǐnu toǒ bǎbǎ, htû̌phû̌yṳphû̌ wi̤ dě mǒla̤ sîtoǒ bǎbǎ Cǒmara tûjûpwa̤ ma̤sikèbò hǒ. A ǒ htûpwa̤kè pwǎpǒ̤ Nǒa ta kòyò htě a ǒ kû̌ ta anu toǒ pwǎ. #Petru awǐlǒ tabǎ 3:20; Petru ginǐ̤bǎ tabǎ 2:5 24Shidû̌ bǎ hǎkhû̌ htǒonu ayî̤ mṳni̤ ta̤ya̤ ta yè̤shi.
वर्तमान में चयनित:
Mǒhtûlû̌hǎhtûsa 7: KRC
हाइलाइट
शेयर
कॉपी
Want to have your highlights saved across all your devices? Sign up or sign in
Wycliffe USA
