Luka 21

Sadaka ya muke afwililo ni mlume

(Marko 12:41-44)

1Nao Jesu kazighana selyi wazuri weluo wekepotola manosi ghawe kele isanduku lya sadaka ya Hekalu, 2nao kamwona muke mumoju afwililo ni mulume wake kepotola vibelele vili. 3Kaghora “Fulo namuza, uyu muke mkiwa afwililo ni mlume wake wapotola vingi kuchumba wose wapotola. 4Kwani wose wafunya kwa ungi ghwawe, ela uyu kwa ukiwa ghwake wafunya vose eluo navo vemwika akale moyo.”

Jesu kuhelea ighulu ya kuombororo Hekalu

(Matayo 24:1-2; Marko 13:1-2)

5Nao ilyi wandu wamoju weluo wekehelea ighulu ya Hekalu na mawe ghake ghaloli na vilambo vefunyila sadaka, Jesu kaghora, 6“Ivi vindu vose muvionagha, kukujagha ngelo sikosighogho iwe lyingi ighulu ya mumbawe silyeombororogho.”

Masirimi na matiriro

(Matayo 24:3-4; Marko 13:3-13)

7Nao wakamkotela, “Mwalimu agha ghekalagha nini? Na alama yake ikalagha ni kimuni ya kuja kwake?”

8Jesu kawauza “Kulindeni simwalongozo kisha. Kwani wengi wekujagha kwa izina lyangu, wekeghamba, ‘Imi niye!’ na ‘Ngelo yafika!’ Simwawairime. 9Na ilyi mwasikila uvoro ghwa uta na msukosuko simwaturukie, kwani agha ni suti ghakale jako, ela kudua kwenyi kwanakaile.”

10Naye kawauza, “Mbari ijeuka ighulu ya mbari na uzuri ighulu ya uzuri.” 11Kujekala na misukosuko mibwaa ya isanga na njala na makongo ghehawilana andu kungi na kujekala na vindu veturusa na alama mbwaa kufuma mlunguni. 12Ela hambiri ya agha ghose wejemwata na kumtirira, wekemughenza kele sinagogi na kungizo kifungoni, na mjeghenzo kwa wazuri na wabwaa kwa undu ghwa izina lyangu. 13Iyi ijekala ni ngelo yenyu yeshuhudia. 14Kwa hung'u mangiseni ngolo zenyu, na simwaririkanye selyi mujetumbulila, 15kwani nijemhawa malagho gheghora na akili, hata ungi wa wamaiza wenyu siwedimagha kughasima ango kughaghalula. 16Mjefunyo kwa wamaiza ni wavali wenyu, wana wakwenyu, vichuku venyu na wagheni wenyu na wamoju wenyu mujeulagho. 17Nenyo mjemenyo ni wandu wose kwa undu ghwa izina lyangu. 18Ela hata sisiri ya ungi wenyu chongo siilaghayagha. 19Kwa kurumaghia kwenyu mjekukiza.

Jesu kughora ighulu ya kuhakilo Jerusalemu

(Matayo 24:15-21; Marko 13:14-19)

20“Ela ilyi mwaona Jerusalemu yamaro ni askari, manyeni kamba kuhakilo kwake kwafika avui. 21Aho walye weo Judea wakimbile mghondini, na walye weo kele muzi wafume; na walye weo shighati mbweni, siwangile kele muzi. 22Kwani agha ni majua gha makwito kukatisa ghose gha mawandiko gha kuela. 23Ni bugha kwawe walye weo na vifu na walye wemamisagha majua agho! Kwani kujekala na wasi mubwaa isangeni, na hare ya Mlungu ighulu ya wandu awa. 24Wamoju weulaghogho kwa lufu, na wamoju wetwalogho wasunyi kele masanga gha mbari nzima; na Jerusalemu ijelatilo ni mbari nzima, hata ngelo ya mbari nzima ikatile.

Kuja kwa Mwana wa Mdamu

(Matayo 24:29-31; Marko 13:24-27)

25“Nao kujekala na alama kele ijua na mwezi na ndonde. Na kele urumengu wandu wa mbari nyingi wejekala na wasi. Siwemanyagha koghaluka kwa kuruma kwa mivomivo na bahari. 26Wandu wejesheha kwa wogha ghoghelela ghalye ghose ghekujagha urumenguni; kwani ndighi za mlunguni zijesheghesheka. 27Nao aho niko wejemwona Mwana wa Mdamu keja kele iwengu na ndighi na ubwaa. 28Nao ilyi mwaona malagho agha ghadyowa kudeika, kaleni kimusi na munule vongo venyu, kwa kukala ukizi ghwenyu ghuo avui.”

Ifundiso kufuma kwa mtini

(Matayo 24:32-35; Marko 13:28-31)

29Nao Jesu kawaghorera ikataniso ilyi, “Loleni mtini na miti yose. 30Mkaiona yadyowa kudyaila, mwamanya kamba vuli yafika avui. 31Ni hung'u kwenyi ilyi mwaona kamba malagho agha ghadyowa kukala, manyeni kamba Uzuri ghwa Mlungu ghwafika avui. 32Fulo namuza, kivali ichi sichiitagha kungi hata agha ghose ghakala. 33Mlunguni na isanga viduwagha, ela malagho ghangu sigheduwagha lyingi.

Yanafweni kulinda

34“Ela kulindeni, ngolo zenyu sizajulo ni lwafuo na unarui na malagho gha umana ughu; hata mudoko ni lyilya Ijua Ibwaa kisha simomanyagha sa mtegho. 35Kwani lyiwajilagha wandu wose kele urumengu. 36Ela lindeni ngelo zose, mkelomba kamba mpate ndighi zeita wasi ghose ghujeja, na kumanga kimusi hambiri ya Mwana wa Mdamu.”

37Naye Jesu oluo kefundisa wandu Hekaluni kila ijua, ela nakiro kafuma kaghenda kulala kele mghondi ghwa Mizeituni. 38Na ikesho kiro wandu wose wakamjila Hekaluni kumsikizila.

वर्तमान में चयनित:

Luka 21: SAGALLANT

हाइलाइट

कॉपी