Luka 19

Jesu na Zakayo

1Nao Jesu kangila Jeriko, naye ilyi eluo keita, 2alyenyi koluo na mundu mumoju aitogho Zakayo, Naye woluo ni mubwaa wa wafunyi kodi, na oluo mzuri. 3Naye oshaile kumwona Jesu nani, ela sadimile, kwa undu ghwa makoghano kwa kukala oluo mvui. 4Kwa hung'u kakimbila hambiri, kajoka kele mkuyu eri amwone, kwani oluo uitilagha ilya ngila. 5Nao Jesu afika andu alye, kalola noko ighulu na kamuza, “Zakayo, jika shoshoa, kwani lelo ni suti nikale kele nyumba yako.”

6Zakayo kajika shoshoa, kamhokera kwa kuboelo. 7Nao wandu wose waghenda waona wakazughunuka wekeghamba, “Waghenda kukala mugheni wa mundu wa kaung'a.”

8Nao Zakayo kakala kimusi kamuza Jesu, “Bwana, zighana nusu ya mali yangu naihawa wakiwa, na ngera nimkalilile mundungi na kindu chingi nimuujilagha mandu mane.”

9Nao Jesu kamuza, “Ukizi ghwaijila nyumba iyi lelo, kwani uyu naese ni mwana wa Abrahamu. 10Kwani Mwana wa Mdamu wojile kuhada na kukiza ichi chilaghaye.”

Ikataniso lya pesa

(Matayo 25:14-30)

11Nao ilyi weluo wekesikizila ghore izi. Jesu kajuzila kuwaghorera ikataniso, (kwa kukala oluo kavui na Jerusalemu na wandu weluo wekeririkanya kamba Uzuri ghwa Mlungu ghuoneka shoshoa ng'ori.) 12Kwa hung'u kawauza, “Mundu mumoju mubwaa otambile isanga lya kulele kupata uzuri ghotawala nao ima auye. 13Ela hambiri seghendile, kawapang'a watumishi wake ikumi, kawahawa kila mumoju ifungu lya pesa na kawauza, chumeni nazo ngelo niseo aha. 14Ela wandu wa isanga wemumenyile, nawo wakatuma wanguchi nyuma yake kughamba, ‘Sitishaile uyu mundu akale mzuri wetu.’

15“Nao aghenda auya apata uzuri, kaghamba walye watumishi awahawile pesa wapang'o, eri amanye nini wapatile kele kudea biashara. 16Ulya wa hambiri keja, kamuza, ‘Bwana, ifungu lya pesa zako lyanapatile faida mandu ikumi.’ 17Naye kamuza, ‘Ni kirani uwe mtumishi waloli, kwa kukala oluo mudumusiliki kwa machache, ukalagha mubwaa wa mizi ikumi.’ 18Na wa kaili keja kamuza, ‘Bwana, ifungu lya pesa zako lyanapatile faida mandu masanu.’ 19Naye kamuza, ‘Nawe ukalagha ighulu ya mizi misanu.’

20“Nao keja mzima kamuza, ‘Bwana, ifungu lya pesa yako silyi; nelyivisile kele kitambaa, 21kwani nanakuoghile, kwa kukala wanabile, wanausagha ichi soikile, na wanakwashagha ichi sowandile.’ 22Nao kamuza, ‘Nikutaghanyagha kwa mlomu ghwako ghwenyi, uwe mtumishi wa laghelaghe! Wanamanyile kamba imi nimi mundu abile, nanausagha icho seikile na nanakwashagha icho sewandile? 23Kudani ndamu soikile pesa yangu benki, na ngelo neja niipate ngila mojori na faida yake.’

24“Nao kawauza awa wekezanye kimusi naye, ‘Msokeni ifungu lya pesa ewo nazo na mumuhawe ewo na mafungu gha pesa ikumi.’ 25Nawo wakamuza, ‘Bwana uwo na mafungu gha pesa ikumi.’ 26Naye kawauza, ‘Uyu mundu ewo nacho ujejuzilo, ela uyu mundu sewesi, ujesoko hata ichi ewo nacho. 27Ela walye wamaiza wangu walye weluo siweshaile niwatawale, waleteni aha muwaulaghe hambiri yangu!’”

Jesu kungila Jerusalemu na izumo

(Matayo 21:1-11; Marko 11:1-11; Johana 12:12-19)

28Nao Jesu aghenda aghora hung'u, kawakayaila hambiri kughenda Jerusalemu. 29Naye aghenda afika kavui na Bethfage na Bethania, kele mghondi ghwa Mizeituni, katuma wairimi wake waili, 30kewauza, “Ghendeni hata muzi ghuo hambiri, na mukengila mjeona mwana wa punda afungilo, lyingi sejokilo ni mundungi; mfunguleni muniletele. 31Ilyi mundungi amukotela, ‘Kudani mumufungulagha?’ Muuzeni, ‘Bwana wanamushaile.’”

32Nao walye wetumilo wakaghenda na wakamdoka selyi kwenyi awauzile. 33Nao ilyi weluo wekemufungula mwana punda, mundu wa punda kawauza, “Kudani mumufungulagha mwana wa punda?” 34Nawo wakamuza “Bwana wanamshaile.” 35Nao wakamleta mwana punda kwa Jesu. Nao wakawala nguo zawe ighulu ya mwana wa punda na kumjosa Jesu ighulu yake. 36Nao ilyi Jesu eluo keghenda ighulu ya punda wandu wakawala nguo zawe ngileni.

37Nao aghenda afika avui na Jerusalemu kele lughongo lwa Mizeituni, makoghano ghose gha wairimi wakadyowa kuboelo na kumkasa Mlungu kwa lwaka lubwaa kwa undu ghwa malagho ghose mabwaa waghaonile. 38Wekeghamba, “Wabarikio Mzuri ekujagha kwa izina lya Bwana. Sere mlunguni na ubwaa kwa Mlungu!” 39Nao wamoju wa Wafarisayo weluo kele makoghano wakamuza, “Mwalimu, wanyamaze wairimi wako.” 40Jesu kawatumbulila, “Fulo nendemuza, ilyi awa wanyamala, mawe gheghoragha na lwaka lubwaa.”

Jesu kulilila Jerusalemu

41Nao Jesu aghenda afika avui na kughuona muzi, kaghulilila 42keghamba, “Baha ngera omanyile ijua lya lelo malagho ghaletagha sere! Ela ndamu ghaviso mesoni kwako. 43Kwani majua ghekujagha, wamaiza wako wekurighagha na kukumara gasi zose. 44Na wekuhaitisagha ngila mojori na wana wako weo amweni, nawo siwesighagha iwe lyingi ighulu ya mumbawe, kwa kukala sumanyile ngelo Mlungu ejile kukukiza.”

Jesu kughenda Hekaluni

(Matayo 21:12-17; Marko 11:15-19; Johana 2:13-22)

45Nao Jesu kangila Hekaluni, kadyowa kuwafunya shighati walye weluo wekedea biashara, 46kewauza, “Yanawandiko, ‘Nyumba yangu ikalagha nyumba yelomba,’ ela mwaidea kukala mbanga ya wavekuri.”

47Naye kila ijua oluo kefundisa Hekaluni. Nawo wakohani wabwaa na walimu wa Sheria na vilongozi va wandu wakahada ngila yemuulagha. 48Ela siwapatile ngila ingi yedea, kwani wandu wose weluo wekemusikizila.

वर्तमान में चयनित:

Luka 19: SAGALLANT

हाइलाइट

कॉपी