Luka 14

Jesu kuboesa mundu mkongo

1Nao ijua imoju lya Sabato, ilyi Jesu eghendile kulya kele nyumba ya mubwaa mumoju wa Wafarisayo, nawo weluo wekemzighana. 2Na alye hambiri yake koluo na mundu eluo na ukongo ghovimba. 3Nao Jesu kawauza walimu wa Sheria na Wafarisayo, “Ni hachi kuboesa ijua lya Sabato ango ije?” 4Ela wo wakanyamala. Nao Jesu kamuboesa ulya mundu na kamuza aghende ngila zake. 5Nao kawauza, “Nani kwenyu ewo na mchungu ango ng'ombe na ipotoke kele kina, seifunyagha iyo ngelo yenyi ijua lya Sabato?” 6Nawo siwadimile kutumbulila agha.

Kukuseleza na kukala na ishima

7Nao Jesu aghenda aona selyi walye wakaribisho wasaghula malalo gha ishima, kawaghorera ikataniso walye wawaliko, kawauza. 8“Ngera wawaliko ni mundungi harusini swakalile kifumbi cha ishima, eri sejeja mundu wa ishima kukuchumba, 9na mundu ulya amwalike inyose ejeja na kukuza, ‘Mwingile uyu mundu akale aha.’ Newe ujeuka kuusa ulalo ghwa isi kwa waya. 10Ela ilyi wawaliko ghenda ukale andu kwa isi, eri ulya amuwalike keja aghore, mgheni wangu, ghenda andu kwa ighulu; niko uhawogho ishima ni walye wandu wose wekalagha newe mezeni. 11Kwani kila mundu ekujosagha ujeselezo, naye ekuselezagha ujejoso.”

12Nao Jesu kamuza ulya emukaribishe naese, “Ngelo udeagha kilalilo cha msenya ango cha kiro, swawawalike wagheni wako ango wana wakwenyu ango kichuku chako ango wazuri, eri nawose wakuwalike na wakulipe. 13Ela ngelo udeagha karamu wakaribishe wakiwa, siwedimagha kughenda, washoghori na vifondo. 14Nawe ujebarikio, kwa kukala siwedimagha kukulipa ela ujelipo ngelo ya kuzuka kwa wahachi.”

Ikataniso lya karamu mbwaa

(Matayo 22:1-10)

15Nao mumoju wa wandu wekalanye mezeni asikila agha kaghora, “Baha uyu mundu ejelya mkate kele Uzuri ghwa Mlungu.”

16Ela Jesu kamuza, “Mundu mumoju odeile karamu mbwaa na kakaribisha wandu wengi. 17Nao ngelo ya karamu, ighenda ifika katuma mtumishi wake kuuza wandu wawaliko, ‘Njuuni kwani vose vaiko kirani!’ 18Ela wose mumoju mumoju wakafunya vizighiriro vawe. Wa hambiri kaghora, ‘Nanaghulile mbuwa, ni suti nighende niione, nakulomba unifwile waya.’ 19Na mzima kaghora, ‘Nanaghulile ng'ombe mbili mbili mandu masanu, nemi nanashaile nighende nizione, Nakulomba unifwile waya.’ 20Na mzima kaghora, ‘Nanalole muke na kwa hung'u sidimagha kuja!’ 21Nao mtumishi auya kamghorera bwana wake agha. Naye bwana wa nyumba kawasilo na kumuza, ‘Ghenda shoshoa ngila mbwaa na njache za muzi, na uwalete wakiwa, siwedimagha kughenda, na vifondo na washoghori!’ 22Nao mtumishi kamuza, ‘Bwana agha waghora ghamalila kudeo na sena kwanatulagha ulalo.’ 23Nao ulya bwana kamuza mtumishi, ‘Ghenda ngileni mbwaa na njache na uwafunganyizile wandu kuja, eri nyumba yangu ijule. 24Kwani fulo namuza, sikwesi ungi wa awa wawaliko etowagha karamu yangu.’”

Zoghori yekala mwirimi

(Matayo 10:37-38)

25Nao ilyi makoghano mabwaa gheluo ghekeirimana na Jesu kawaghalukila na kuwauza, 26“Ngera mundungi eja kwangu na semumenyagha tatie na mee, na mkwake na wana wake, na wana wakwawe wa kialume na wa kiwake, na hata iye mwenyi, sedimagha kukala mwirimi wangu. 27Uyu wose setwalagha msalaba ghwake na kuniirima, sedimagha kukala mwirimi wangu. 28Kwani nani kwenyu, ngelo ashaya kuwaghala mnara sekalagha kitembo na kudea mtalo ngera uwo na pesa ziketi zemalila. 29Eri sejedyowa msingi, nao ima alemo ni kumalila na wandu wemuonagha wamuseke. 30Wekeghamba, ‘Mundu uyu wanadyowile kuwaghala msingi na kalemo ni kumalila.’

31“Ango ni mzuri muni eghendagha kulwana uteni na mzuri mumbawe sekalagha kitembo jako na kuririkanya ngera iye na askari elfu ikumi udimagha kulwana na mzuri ewo na askari elfu mirongo mili? 32Naye ngera sedimagha, ujetuma wanguchi kwa ulya mzuri ngelo ewo kulele kemlomba wakale na sere. 33Niko kwenyi, kwa uyo wose sekanagha vose ewo navo, sedimagha kukala mwirimi wangu.

Kisherere sichesingagha

(Matayo 5:13; Marko 9:50)

34“Kisherere ni chaloli, ela ilyi chasowa musingo ghwake chilungogho ije hata chisinge? 35Sichifwanagha kindu chingi kwa msanga hata kwa dungasi; wandu wechitaghagha noko. Uyu ewo na masikilo ghesikila asikile!”

वर्तमान में चयनित:

Luka 14: SAGALLANT

हाइलाइट

कॉपी