Johana 13

Jesu kuoghesha wairimi wake maghulu

1Nao hambiri ya karamu ya Pasaka, Jesu kemanya kamba saa yake yefuma urumenguni aghende kwa Aba yafika. Naye owashaile wandu wake weo urumenguni, kawashaya hata kudua.

2Nao ngelo ya chakulya cha hafukeni, Shetani oluo angila kele ngolo ya Juda mwana wa Simoni Iskariote kamba amfunye. 3Naye Jesu oluo kemanya kamba wanahawilo vindu vose ni Aba, na kamba wanajile kufuma kwa Mlungu, na ughendagha kwa Mlungu. 4Nao kauka alye mezeni kafunya nguo za ighulu na kakurighirira taulo chunu. 5Nao kangiza meji kele bakuli, kadyowa kuwaoghesha wairimi wake maghulu, na kuwaomesa na ilya taulo yeluo chunu. 6Aghenda amfikila Simoni Petro; Petro kamuza, “Bwana ondenioghesha maghulu?” 7Jesu kamtumbulila, “Selyi nideagha sumanyagha indakwenyi, ela ujemanya ko nyuma.” 8Petro kamuza, “Sudimagha kunioghesha maghulu ghangu lyingi.” Jesu kamutumbulila, “Ngera sekuogheshagha, suwesi ifungu lyingi kwangu.” 9Simoni Petro kamuza, “Bwana, suniogheshagha maghulu ghenyi anduangi, ela uniogheshe mikonu na chongo navose!” 10Jesu kamuza, “Uyu amalila kuogha saoghagha sena, ela wanaoghesha maghulu ghenyi, naye waela wose. Nanyose mwaela, ela si inyose kungi.” 11(Kwani omumanyile uyu emufunyagha niko kaghora, “Simuelile inyose kungi.”)

12Naye amalila kuwaoghesha maghulu ghawe, kangiza nguo zake za ighulu, kawuya ulaloni kwake mezeni. Nao kawauza, “Ado mwamanya agha namdeila? 13Inyo mwaniita Mwalimu na Bwana, na mwaghora fulo, kwani Nimi mwenyi. 14Ndamu ikakala imi, nio Bwana na Mwalimu, namuoghesha maghulu, na inyo nanyose ni suti muogheshane maghulu. 15Kwa kukala namhawa mfwano eri muirime selyi kwenyi nadea kwenyu. 16Fulo kwenyi, namuza, Mtumishi si mubwaa ungi kumuisa bwana wake; hata uyu atumilo si mubwaa ungi kumwisa uyu amutumile. 17Ngera mwamanya agha, mubarikio ilyi mwaghadea.

18“Sighoragha ighulu yenyu inyose kungi. Nanaweni awa niwasaghule. Ela eri Mawandiko gha Kuela ghakatile, gheghambagha, ‘Uyu elyighagha chakulya changu wanighaluka kunidea laghelaghe.’ 19Namughorera agha hambiri sighedeike, eri ghakakala ghadeika, mudumuse kamba Imi Nimi. 20Fulo kwenyi, namuza uwo wose emuhokeragha uyu namtuma; wanihokera imi; na uwo wose anihokera imi, wamhokera uyu anitumile.”

Jesu kughora gha kufunyo kwake

(Matayo 26:20-25; Marko 14:17-21; Luka 22:21-23)

21Nao Jesu aghora hung'u, kahariso ni ngolo, kaghamba, “Fulo kwenyi namuza, mumoju wenyu unifunyagha.” 22Nawo wairimi wakalolana wekeshinika, kwani siwemanyile nani wawe eluo kemughora. 23Naye mwirimi mumoju eshailo ni Jesu okalile kavui na Jesu. 24Simoni Petro kamkunyira kamuza, “Mkotele nani emughoragha.” 25Nao ulya mwirimi kamsughutila Jesu kavui kamuza, “Bwana nani?” 26Jesu kamtumbulila, “Ni uyu nimvililagha kibelele cha mkate na kumhawa.” Kwa hung'u kausa kibelele cha mkate kavilila na kumhawa Juda mwana wa Simoni Iskariote. 27Nao Juda aghenda alya mkate, Shetani kamungila. Jesu kamuza, “Agha ushaile kudea, dea shoshowa.” 28Sikowesi mundungi wa walye weluo mezeni amanyile ichi amughorere. 29Wamoju wakaririkanya kamba kwa kukala Juda oluo na mfuko ghwa pesa, Jesu oluo kemuza aghende aghule vindu va karamu ango awahawe wakiwa kindu. 30Naye Juda awata kibelele cha mkate kafuma shighati, nako koluo nakiro.

Mlomu mwishi

31Naye Juda aghenda afuma, Jesu kaghora, “Ndamu Mwana wa Mdamu waliko, na amweni kwake Mlungu waliko. 32Na ngera Mlungu aliko amweni kwake, Mlungu naese umlikagha iye amweni kwake naye umulikagha indakwenyi.

33“Wanake wangu, nio nenyo kwa ngelo njache. Na mjenihada; na selyi kwenyi niwauzile vilongozi wa Wayahudi niko kwenyi nimuuzagha inyo. ‘Andu nighendagha, inyo simudimagha kuja.’ 34Ndamu ndemhawa mlomu mwishi, mushayane inyo wenyi kwa inyo wenyi; selyi imi nemushaile nanyose mushayane. 35Ilyi mwashayana inyo wenyi, wandu wose wejemanya kamba ninyo wairimi wangu.”

Jesu kutondola ighulu ya Petro kumkana

(Matayo 26:31-35; Marko 14:27-31; Luka 22:31-34)

36Simoni Petro kamkotela, “Bwana ughendagha hiyo?” Jesu kamtumbulila, “Andu nighendagha sudimagha kuniirima indakwenyi, ela ujeniirima konyuma.” 37Petro kamuza, “Kudani sedimagha kukuirima indakwenyi? Imi nio tayari kufwa kwa undu ghwako.” 38Jesu kamtumbulila, “Wadima kufwa kwa undu ghwangu? Fulo kwenyi, nakuza, jongole siitetagha sonikanile mandu matatu.”

वर्तमान में चयनित:

Johana 13: SAGALLANT

हाइलाइट

कॉपी