Matiu 2

Tamitema so lavulavu me'a nopaxa mine'e so imaisou keakea Iesua

1Ioxe, Malia mivo'onu Iesua no xale lia ne Iutea no tuala ne Peteliemu no mine Eloti muxolu kingisio. Ane mivo'onu la tamitema se'i so lavulavu me'a no anu xale lia no Isiti loxo aso uxali. Me'a nopaxa ne mine'e xo laso mixali ne Ielusalemo. 2Mixali la mitalitali'i lexe, “Keakea e so kingi noxi'a Taiuta a uxolu ne'ei? Nexi texolu no tualasixe no aso uxali la temaisou taoto vile so musosovosou laso tene'e so taitinu ualasou.”

3Xe Kingi Eloti mulomusou tali'i noxi'a la anu mukuluke la tanulili. Mo tamitema ne Ielusalemo ane'i tane'ilili kalumo. 4Laso Kingi Eloti mu'avali'a tatiatila noxi'a tapilisiti oli'a tatisa so lavuloto noxi'a Taiuta. Ane'i mine'e mipita mo anu mutali'isi'a aloxo 'o, “Tapolopeti mipala'anixu tatei lexe anu ane so Kalaisiti uxali no tuala aneva?” 5La ane'i mikolinu lexe, “Anu uxali no xale lia ne Iutea no tuala ne Peteliemu. Xo polopeti mukaukavunu aloxo 'o, 6'Ia nini Peteliemuo no xale lia ne Iuta, nini ualasine kitua no taine'i tuatuala uasi. Xo ane'i tamitemasou tuatuala se'i itulutulu tatiatila, ia Itema vile so usaxila'a tamitemaxeli Ta'isilaeli molu noxinesi.'”

7Ioxe, Eloti mulomusou vaikala anene la mu'avali'a tamitema so lavulavu e so tuala no aso uxali. Xe ane'i mixali noxou la mumunumunu noxi'a mo mutali'isi'a so voxo aneva u'isalili e taoto muxali. 8La anu mupalusi'a so ilai ne Peteliemu mo muvikala lexe, “Ngingi ngalai ngakamulinu keakea ne laixe. Loxo ngaxalisou la ngalivu ngane'e nga'aloxeli mo so eni kalumo alai a'itinu ualasou.”

9Ioxe, ane'i milomusou vaikala noxou mukalu la ane'i milutu milai. Milutu la mimaisou taoto e mimaisou no tualasi'a la anu a mu'uli laxune'ila. Mu'uli laxune'i xo la mulai mutalo teitexi no apu e molomolo muxolu no anu. 10Mimaisou taoto axone la opone'i ne mu'osa'osa manina.

11Xe mixali la mi'unalai no tani ne la mimaisou keakea olie nenu Malia mixoxolu. Mimaisou la milalusi no laxunu so imaxa'u mama'u mo i'itinu ualasou. Xe mino'u mimi se'i mune'e la mixavulalanu so milosou. Mimi lailaixe ne anu koli xe ueli ane tuma'u lailaixe xe mi e ta'elaxu so tuma'u laixe. 12Milosou mukalu xe ili'i loxo miai la Mosinge mupela'a no anu ai saxi lexe ane'i ilivu ilai noxou Elotila uasi. Laso ane'i mipolo no vote'i vile so ilivu no tualasi'a.

Iosepu olie semau xe kekea mi'ume milai ne Isipi

13Xe ili'i la tamitema so lavulavu milai mukalu, xe Iosepu muxoxolu xo xe muai musaxi. Muai musaxi la angelou Tatananenge mupa noxou la muvikalanu lexe, “Nalutu mo nano'a molomolo olie nenu mo nga'ume ngalai ne Isipi. Mo ngalai ngaxolu ne xo xe ili'i la eni a'avalinela. Xo Eloti ukakamulinu molomolo ne so uvau usoli.”

14Ioxe, Iosepu mu'avuti mutulu no olovoxo nesi ka muno'a molomolo olie nenu la milutu milai ne Isipi avile. 15La ane'i milai mixolu ne Isipi xo mo Eloti musoli mukalu. La mi ne mumulinu Tatananenge vaikalou e polopeti mukaukavunu tatei lexe, “Eni e'avalou alixeli muuatu no xale lia ne Isipi.”

Eloti mupalusi'a tavoiou so mive'a tamolomolo misoisoli

16No voxo ane Eloti mulavu lexe ane'i tamitema so lavulavu no xale lia loxo no aso uxali mikalavoinu mo mipolo no vote'i vile, la oponu ialuxu manina. Oponu ialuxu la mupalusi'a tavoiou se'i milai no tuala ne Peteliemu xe tuatuala ane no pa'upa'umolu. Mupalusi'a so ive'ave'a tamolomolo tamulu ane takeakeasi mo utelai uxali noxi'a ane tau iexa'a tatamei. Eloti musosovosi'a tamolomolo axone xo anu tei la mutali'isi'a tamitema so lavulavu lexe taoto muxali no voxo aneva manina. Laso tamitemaou mimulinu vaiakalaou mo mive'ave'a tamolomolo. 17Mi anene nene'axu vaikalaou Tatananenge e polopetiou Ielemaia mukaukavunu tatei lexe, 18“Tamitema ilomusou tama mo lexe so tama toxoxu uxali no tuala ne Lama. Leseli itatamasi'a ta'ilie mo evile umomomo so umamatolane uasi, xo ane'i mikalu avile.”

Iosepu olie semau xe molomolo milivu mine'e Nasaleti

19Ioxe, Iosepuena mixoxolu ne Isipi xo xe Eloti musoli mukalui laso angelou Tatananenge mupa noxou Iosepu no anu ai saxi. 20La angelo muvikalanu aloxo 'o, “Ngingi ngoli'a molomolo olie nenu nga'avuti mo ngalivu ngalai no xale lia ne Isilaeli. Xo ane'i tamitema e mi'oxo lexe ivau molomolo a misoisoli mukalu.” 21Laso Iosepu mu'avuti la oli'a molomolo mo nenu milivu milai no xale lia ne Isilaeli. 22Ia Iosepu mulomu lexe Eloti olu Alekelausi muno'u tanixu mo ukingi ne Iutea laso anu u'ume so ulivu ulai ne. Mo Mosinge mupamuxanu Iosepu no anu ai saxi vile sila mulai no xale lia ne Xalili. 23Ane'i milai no xale lia ne la mixolu no tuala ilemolu lexe Nasaleti. Mixolu ne laso muxalixu nene'axu vaikalaou Tatananenge ane polopeti vile mukaukavunu tatei lexe, “Ane'i imoxo'u lexe itema so Nasaleti.”

वर्तमान में चयनित:

Matiu 2: ATA

हाइलाइट

कॉपी