Mataio 4
4
1Ege Iesu ais abele sumez ge abele Lamar de, iaueakai diabolo abi mirem.
2Iesu baueru foate gaire gerger a foate gaire ki, E keubu uererege.
3E toabukilu abele le mirem, kega, Ese mama Ade ra Uerem, ma detager gaire baker a depegire leuer ise.
4E etkalu, kega, Emetu detarare, Nole leuer tepteb le eded, epe Ade ra mer uridili etomeret abi telam.
5Ege diabolo ko egaredelu Iesu abele zogo uteb, E ekueilu abele zogo meta tot ge,
6E abi detager abim, Ese mama Ade ra Uerem, ma eupemar a ekueilu sepge, abelelam emetu detarare, E abi mer tigri abara angela giz uiaba mari egared uiaba taglam, nole mara teter itur nerute baker ge.
7Iesu abi detager abim, Emetu detarare, kega, Ma nole mirem abele Opole mara Ade.
8Ege diabolo ko ais abim abele au pereper paserem, E abi etomeret abim gesep baselaia uridili, gako uiaba debe lu giz;
9Ege E abi detager abim, Kaka mari nakuar marim gaire lu uridili, ese mama kari erkepsam a esorgiru.
10Iesu abi detager abim, Ma adem bakeam Satana, abelelam emetu detarare, Mama abi esorgiru abele Opole mara Ade, E tepeteb mama abi memeg le.
11Ege diabolo abi dikaer, dasmer, epe angela tabarki abi memeg le giz abim.
12Iesu asoli Ioane asirikilu abele au dubare meta, epe E bakeamulu Galilaiem.
13Eabi dikaer Nazareta, E bakeamulu a emerilu Kapernaumge maike gur tauer ge, abele Sebulona a Nafatali ra nener.
14Iaueakai bakedida abele mer Isaia perofeta, kega,
15Abele ged Sebulona, gako abele ged Nafatali, abele gab abele gur ge Ioridano apek, Galilaia nogle giz ra ged;
16Abele le giz emerilu kupikupi ge uiaba erdali abele au be; uiaba le giz emerilu abele ged gako abele eud mar, uiaba erdali abele be batoamerti.
17Abele kerker Iesu ditimeda ko marau, kega, Uaba obazgeda; abelelam kotor baselaia maike.
18Iesu ekasereder maike abele Galilaia gur ge, E abi erdali neisi le, Simona abara nei Peteru, gako Anederea abara keimer, uiaba net bataueret abele gur ge; abelelam ui darali umele larem.
19E uiabi detager, Ua kari narmili, kaka uaba depegimelu le asaperem.
20Ui darali dikaerei uiaba net a abi irmilei.
21E dikaer abele uteb, E ko erdali nerute neisi le Iakobo Zebedaio ra uerem, gako Ioane abara keimer, abele nar ge gako uiaba aba Sebedaio, uiaba ko euer uiaba net atoatelam; E uiabi darabgeri neisi le.
22Uiaba sobkak dikaerei abele nar gako uiaba aba, a abi irmili.
23Ege Iesu deraueilu Galilaia uridili, E uiabi ereuerem uiaba sunago giz, E natomertare debe mer abele baselaia ge, a idigiri gim le giz gako asiasi gim abele ged uridili.
24Ege abara mer esauer a aserare Suria uridili; epe uiaba taraisare abim gim le giz uridili a gaire tonar gim; gako uader le asiasi demoni giz uiabi dedkoli, a uader le paim gim gako le giz ibibi; E uiaba uridili nadgiri.
25Ege le lakub abi irmilare, gaire le Galilaialam, a Dekapolelam, a Ierusalemalam, a Iudaialam, a Ioridano apek.
वर्तमान में चयनित:
Mataio 4: ulk1902
हाइलाइट
शेयर
कॉपी
Want to have your highlights saved across all your devices? Sign up or sign in
Published by the British and Foreign Bible Society in 1902.
