Qooccanchi Kitaaba 19
19
Soddo'm Baaxii'l Bikkina
1Waa'ik lamem asse'amaanim ee hiimom Soddoma affo'i ammanenne Loox beero'i goocanne afuuraa hee'ukko. Looxim ixxuwwa moo'ukkisam ixxuwwinne edameena ki'aa marukko; ixxuwwi illagennem uullanne heeshaa otossukko. 2Looxim «I moollanno'o ki'nnuwwina awwaadaanchi ihummi i mine aaggehe; ki'nnuwwi lokkom aanshaqqitakka'a i minenne gallehe; soodo daram ki'llakka'a ki'nnuwwi googo mattakkamo» yukko.
Ihukkaarem ixxuwwi dabatta'a ka nafaranne galloommo bagaan ihooyyo» yito'o. 3Ihukkaarem Loox ixxuwwa qoxxisaa uunxu bikkina maqirem ixxi mine aaggo'o. Looxim ixxi baxaano koyyina qorosho'o danaamisa gudissona ijaajukko; qorosho'im afaa lasage massaa uwwukkaare itto'o.
4Ihukkaarem ixxuwwi iinse'lleena illageen Soddo'm beero'onne yo'i goon hundim woraadiinsi ki'isaa lommannanne afeebe'e waatta'a Loox mine kibbito'o. 5#Gas 19:22-24Looxam weeshsha'a «Kabaxxaare ki mine gatteena waatto'i manni hannonnette? Ixxuwwa ni beyyo biira fisse; goon meentinne edamoo'isa neese ixxuwwinne edammeena hansoommo» yito'o.
6Ihukkaarem Loox ixxuwwa atoorasseena biira firaa mi'nneka gooca afa'llaachcha xufukko. 7Looxim «Iyyabbaayyuwwa! Kido'i jor luwwa baxxakkotte. 8Iina lam baajaam landi yo'o; ixxuwwa ki'nnuwwina fissaa uwwoommaare hassakko'isa issehe; ihukkaarem ku koyyi eese kutta'a waatto'oo manni ikko'i bikkina ixxuwwanne mat lichchom issitakkambee'isa» yaa uunxukko.
9Ihukkaarem ixxuwwi dabatta'a «Ki gagoomim waaraanchi ikkaa hee'llittuuyyi daanni ikkeena hassoolla; ka beyyiinsi laa'ihe! Laa'itbeelas ixxuwwanne issinoommi jolliinsi lonsinaa keesenne issinoommo» yito'o. Looxam afa'llaachcha gafe'lla'a u'llummi xufa iiqqeena issito'o. 10Ihukkaarem oo minenne hee'llo'i lamem koyyi mannim anga asse'lla'a Looxa hixixaa'lla'a mine aagissa'a u'llummi xufa xuffo'o. 11#2Adl 6:18Ee lasage u'llummi goocanne hee'llo'i mannika hoffaanniinsi ki'isaa lobaannonne afeebe'e moo'lleena xantambee'isa hundikam ille qooqisso'o.
Loox Soddomiinsi Gibaa Firukkisa
12Lamem manchim Looxina «Ka beero'onne hee'llam ki goo'n oosoo landaa ki oos balluwwaa mulli qarmannaa hundam qaqqissa'a ka beero'iinsi fittamisa isse. 13Ka beero'o neese bi'inseenatte; mashka'oomim ka minaadaphphek baaxiil lobakata lophphukkisa Waa'i moo'aakko; ee bikkina Soddoma bi'insona neese asse'aakko» yito'o.
14Ee lasage Loox ixxi miniinsi firaa ixxi landa xeehu manni mine maraa «Waa'i ka beero'o bi'iseenatte ihu bikkina qaqqissakka'a ka beyyiinsi fillehe» yukko. Ihukkaarem ixxuwwi naacamookkoka labissa'a innaannito'o.
15Uulli soodukkuuyyim Waa'i asse'amaan Looxina «Ka beero'inne maqire bi'llakkambee'isa ki meentichchoo kiikka lamem landaa amaddaa qaqqissaa ka beyyiinsi fire» yita'a gaaggaabisso'o. 16#2Phex 2:7Ihukkaarem Loox dasukkaare Waa'i ixxuwwina qishixxu bikkina oo manni ixxeka, ixxi meentichchokaa ixxi lamem landikaa anga amadda'a beero'iinsi tochchonne fissito'o. 17Tochchonne fissita'a lasage Waa'i asse'amaa'nnek mat «Ki'nnuwwi foore gatixxitakkeena qaqqissakka'a gibbehe; laso daba'llitakka'atim moo'llakkotte; ka cebbi beyyonnem ihuta'n uullitakkambee'isa duu'n kollonne gibbehe; oobeelas bi'llakkamo» yukko.
18Ihukkaarem Loox «I moollanno'o, neese ee'isa issitakkotte. 19An ki'nnuwwina awwaadaanchi ki'nnuwwi illagenne nuura siidummi bikkina ki'nnuwwi eese gatissakkeena lobakat hara'mmato issitakko'ookko; ihukkaarem ku bichchi eesenne afoohaare lehoommo yaa baddummi bikkina ee duu'n kolli gibaa xoreena xanoommoyyo. 20An qaqqisaa gibaa xoreena xanoommi mat hoffi beero'i abbisonne yookko; ee bikkina gibaa ee beero'o maroommisa issehe; ki'nnuwwi moo'llakkamisam oo beero'i hoffane; eekke'e marumta'n i foor bichchiinsi gatookko» yukko.
21Waa'i asse'amaanchim «Erane, at yittisam ihona; ee at yitoo beero'o an bi'isoommoyyo. 22Qaqissaa gibbaa xore; ee beero'o afeebe'e an maham issoommoyyo» yukko. Loox ee beero'o hoffane yaa hee'u bikkina ee beero'ik summi «Xoo'aara» yamamukko.
Soddomii Gamorii Bi'ukkisa
23Loox Xoo'aara afukkisam eelliinchi firukko. 24#Mat 10:15; 11:23,24; Luq 10:12; 17:29; 2Phex 2:6; Yih 1:7Waa'im Soddo'm beero'onnee Gamo'l beero'onnee giiraa aphphoo kinaa iimaniinsi ixxi beyyiinsi ga'nnisukko. 25Ee'isinne ee beero'uwwa, ee beero'i hegeegonne yoo cebbi beyyuwwa, ee beyyonne hee'llam minaadabaa uullanne mutu luwwaa hundam bi'isukko. 26#Luq 17:32Ihukkaarem Loox meentichcho, laso moo'llo'i bikkina sooqixxi utub ikka'a gatto'o.
27Abrihaam la'm balla soodaraar daram ki'aa illageen Waa'i illagenne uullaa hee'u beyyo marukko. 28Ixxim Soddomma, Gamoraa cebbi uullaa hundam aad moo'u ammanenne lob midachchiinsi firoo wirii'llisa kee'mmaalli wiriir ee beyyiinsi firukkuuyyi moo'ukko. 29Loox hee'am hee'u lete'i uulli beero'uwwa Waa'i bi'isu ammane Abrihaama sawwaa Looxa bichchiinsi gatisukko.
Moo'aaphphekii Amoo'n Mannii Qaranto'isa
30Loox Xoo'aaranne afuureena baddu bikkina ixxi lamem landam amadaa duunanne firaa daawwa'i woronne afuurukko. 31Mat balla lob landichcho is aayyana «Niyyanni lomma'nnaakko; ooso qalloommisina neese massoo goon ni kululleetanne bee'e. 32Ee bikkina waare; niyyannina woyi'n diqaasa aginsaa dimboohaare ixxenne maqire iinse'nnona; ixxeensim ooso qallona» yito'o. 33Ee hiimom annina woyi'n diqaasa agissa'a dimbisso'o; lob landichchom waatta'a anninne maqire iinse'llo'o; ihukkaarem ixxi ise waatta'a iinse'llo'isaa ki'llo'isaa la'ukkoyyo.
34La'm balla odim oo lob landichcho hoffi is aayyana «Hii'mmo'o an iyyanninne maqirem iinse'aammo; atim ixxenne maqire iinse'lleena xantoo'isina odim kaballi maaro'o niyyannina woyi'n diqaasa aginsona; ee lasage lamim niyyanniinsi ooso qalleena xannoommoo» yito'o. 35Ee bikkina ee hiimo odim annina woyi'n diqaasa agissa'a dimbissa'a hoffotem matta'a anninne maqire iinse'llo'o. Looxim ise iinse'llo'isaa ki'llo'isaa la'ukkoyyi hee'ukko. 36Looxik lamem landim ee'isa ihimminne ixxuwwi annina lamfoolluwwi ikko'o. 37Lobotem goonchi beeto qatto'o; summam Moo'aaba#19:37 Ibro'isinne Moo'aaba yimmi iyyanni beeto yimma. yita'a weeshsho'o; ixxim kaballi afeebe'e Moo'aaphphi minaadabina lobanna. 38Ee'isam hoffotem goonchi beeto qatto'o; summam Beeni'amii#19:38 Ibro'isinne Beeni'amii yimmi i moolli beeto yimma. yita'a weeshsho'o; ixxim kaballi afeebe'em Amoo'n minaadabina lobanna.
वर्तमान में चयनित:
Qooccanchi Kitaaba 19: KeesKita
हाइलाइट
शेयर
कॉपी
Want to have your highlights saved across all your devices? Sign up or sign in
