Mabandela 1
1
1O mabandela Nyambe azalisi likolo na nce. 2Nc’eliki bulunganu mpe mpamba; mpe liti liliki o likolo li mai ma ntongu: mpe Molimo mombe Nyambe monyengani yule‐yule o likolo li mai.
3Nyambe alobi ete, “Ncengi se lizalaka:” mpe ncengi lizali. 4Nyambe aboni ncengi, ete lizali lilamu: mpe Nyambe akakoli ncengi na liti.
5Nyambe atomisi ncengi lina Busa, mpe liti atomisi lina Mokolo. Eliki mpokwa mp’eliki ntongo, busa boko.
6Nyambe alobi ete, “Etando s’ezalak’o ntantei e mai, mpe s’ekakolaka mai na mai.” 7Nyambe akeli etando, mpe akakoli mai maliki soke n’etando na mai maliki ka n’etando: mp’ezali bongo. 8Nyambe atomisi etando lina Likolo. Eliki mpokwa mp’eliki ntongo, busa bo mabale.
9Nyambe alobi ete, “Mai manga soke na likolo se mabunganak’o nongo yoko, mpe mokondo mobonono:” mp’ezali bongo. 10Nyambe atomisi mokondo lina Nce; mpe bobungani bo mai abotomisi lina Mabeke: mpe Nyambe aboni et’ezali bolamu.
11Nyambe alobi ete, “Nce s’emenisaka masongu, na biyembu bikobota mimboto, na miete mi mbolo mikobota mbolo lolenge‐lolenge, li nga mimboto mi ming’o mioi mi lingo, o nce:” mp’ezali bongo. 12Nc’emenisi masongu, na biyembu bikobota mimboto lolenge‐lolenge, mpe miete mikobota mbolo, li nga mimboto mi ming’o mioi mi lingo lolenge‐lolenge: mpe Nyambe aboni et’ezali bolamu. 13Eliki mpokwa mp’eliki ntongo, busa bo masato.
14Nyambe alobi ete, “Bicengi se bizalak’o etando e likolo nokakola busa na mokolo; mpe bizalaka na ntin’e bilembo, na bileko, na misa, na mibu: 15mpe bizalaka bicengi o likolo nocengele nce:” mp’ezali bongo. 16Nyambe akeli bicengi bibale bine; ecengi yoko ebali bone ekonga busa, mp’ecengi esiso mw’ene ekonga mokolo: mpe na mioto. 17Nyambe abitiki o etando e likolo bicengeleke nce, 18mpe bikongaka busa na mokolo, mpe bikakolaka ncengi na liti: mpe Nyambe aboni et’ezali bolamu. 19Eliki mpokwa mp’eliki ntongo, busa bo manei.
20Nyambe alobi ete, “Mai se manyala na bizalibwi biyike bi bomoi mpe mileke miyumbwaka ka na nce o nc’ etando e likolo.” 21Nyambe azalisi bibwele bine bisanda bi libeke, mpe bizalibwi binco bi bomoi bikotambola, binyalangani o mai biyike, lolenge‐lolenge, mpe na mileke minco mikoyumbwa lolenge‐lolenge: mpe Nyambe aboni et’ezali bolamu.
22Nyambe abiyeyi, Yeye ’te, “Bobotanaka, mpe boyunaka, mpe bonyalisaka mai ma mabeke, mpe tika mileke miyunak’o nce.” 23Eliki mpokwa mp’eliki ntongo, busa bo matano.
24Nyambe alobi ete, “Nce s’ebota bizalibwi bi bomoi lolenge‐lolenge, bibwa, mpe binangananga, mpe bibwele bi nce lolenge‐lolenge:” mp’ezali bongo. 25Nyambe akeli bibwele bi nce lolenge‐lolenge, mpe bibwa lolenge‐lolenge, mpe binangananga binco bikotambol’o masotu lolenge‐lolenge: Nyambe aboni et’ezali bolamu.
26Nyambe alobi ete, “Batika lokela bat’o lililingi li Biso, o boyuli bo Biso: mpe batika bango bakongaka ka na ncu li libeke, mpe na mileke mi likolo, mpe na bibwa, mpe na binco bi nce, mpe na binangananga binco bikonang’o nce.”
27Nyambe azalisi bat’o lililingi li Yeye Mome, o lililingi limbe Nyambe Yeye abazalisi; bwele na mwene Yeye abazalisi. 28Nyambe abayeyi, mpe Nyambe abalobeli ete, “Bobotanaka, mpe boyunaka, bonyalisaka nce, boingendoloko; mpe bokongaka ka na ncu li libeke, mpe na mileke mi likolo, mpe na biloko binco bi bomoi bikotambolak’o nce.”
29Nyambe alobi ete, “Bakeka! nasobope biyembu binco bikobota mimboto, bing’o nc’enco, mpe na miete minco, mi nga mbolo li miete sub’o mingo likobota mimboto; 30bingo bikozal’ombe bino boli bo le: mpe ombe bibwele binco bi nce, mpe ombe mileke minco mi likolo, mpe ombe binangananga binco bikotambol’o nce, binga na bomoi, nasope biyembu bibesu binco boli ombe bingo:” mp’ezali bongo.
31Nyambe aboni biloko binco bi keli Yeye, mpe, bakeka, bizali bolamu be. Eliki mpokwa mp’eliki ntongo, busa bo motoba.
वर्तमान में चयनित:
Mabandela 1: BANGI
हाइलाइट
शेयर
कॉपी
Want to have your highlights saved across all your devices? Sign up or sign in
Published by the Baptist Missionary Society 1905-1916.
