မာကု 10
10
လော်င်ဘည်ဘာည်းလည်ဆာတ် အူပီးအူမေဲန်း
မတဲ ၁၉း၁-၁၂၊ လုကာ ၁၆း၁၈
1ႎါည်းဒီး စံဝ်ယေဆု စီလည်လေႈဟာဝ်း ဒအရာပ်ဒီး စီလေဲပ်ဟာဝ်း ပါ့်အရာပ်ယုဒ စီခလောႈဟာဝ်း ညျှာဒလလေဲင်းအေဲမ်းယော်ဒန်။ တူအီးကဲမာ် စီဟည်ဒေဲႈဇူးဘိုး ပါ့်ဒီဂေါ်ည်းအန်းစံဝ်။ ယာမ်းဇေဲန်း တောႇတာ်ဘည်ဘာည်းကျင်းရေဲန်းအန်းစံဝ်တော်န်းဘော်က်၊ အန်းစီပနံဝ်းဒဲႈလာ် တာ့်တူအီးကဲဒီး။
2ဘိူန်ဇေဲန်း ဖာရိဆဲကဲစီဒေဲႈဇူး ပါ့်အန်းစံဝ် စီစာမ်းလာ်မှောႇတိူဝ်ႈ “အီးမာည်းအူချှေႈဒီး အန်းနံင်ဘိူန်းလာ် ကကာ်ႈဆာတ်ႎီုန် ပီးအန်း။”
3အန်းစံဝ် စီႎီးမှောႇကဲ ဒါ်ႈ “ဘာည်းမှေဲမောဆေ ကလာင်းဒါ်ႈအူန်း လော်င်ကကာ်ႈဆာတ်ႎီုန်ဒီး။”
4ကဲစီႎီးဒါ်ႈ “မောဆေဟည်ဒါ်ႈအူန်း အီးမာည်းဒီး ဆာ်အန်းဆီင်ႎီုန်ပီးအန်း၊ အန်းလိုကိက် ဘေဲႇဆာတ်ကကာ်ႈ စီဘိူန်းလာ်ႎီုန် ပီးအန်း။”
5စံဝ်ယေဆုစီႎီးဒါ်ႈတာ့်ကဲ “ဂေါႇပဲမိုႈ တူအီးကလာင်းဒည်းဒီး၊ မောဆေစီ ဒဲႈအူန်းကျောႈပိင်ညာပ်ဘာည်းဇေဲန်း။ 6ဘည်ဘာည်းမာ် ဆီုင်ခည်တဇူႈ ကီုင်းကတာည်းကံမ်ဖာနီး၊ စံဝ်ဖြား ဖာန်ပ္လေႈအူန်း တူအီး အီးမာည်းကာည်းအီးပဲန့်။ 7ဂေါႇမိုႈဘာည်းဇေဲန်းဒီး အီးမာည်းစီကတူႈကကာ်ႈ ဒကူန်းမားအန်း စီဂေါ်ည်းတံန်တောႇ တာ့်အီးပဲန့်အန်း။ 8ကာည်းဒီး ကာည်းစီနံင်လိုမိုႈပေါႇ တိုးအူပိုင်း နောႈအူဒီ။ ဂေါႇမိုႈဘာည်းဇေဲန်း တူအီးအူပီးအူမေဲန်းဒါ်ႈအီး ကာည်းအာဝ်မိုႈမ အယ်ချှေႈ၊ ကာည်းမိုႈလိူည် အူချှေႈဟာ့်။ 9ပံင်ကမ်းကစုကကီုက်အူန်းစံဝ်ဖြားဒီး၊ တူအီးအာဝ်ဘိူန်းမ ကမ်းကကာ်ႈ။”
10ႎါည်းဒီး ဘိူဝ်မိုႈလိူည်ကဲ ဂေါ်ည်းခေဲင်းခလေဲပ်၊ တပဲအန်းကဲမာ် စီႎီးမှောႇလော်င်ဒီး ဘိုးအူဘော်က်။ 11ဘိူန်ဇေဲန်း အန်းစံဝ် စီဒါ်ႈ “ချှေႈမှေဲ့ ဆာ်အန်းကကာ်ႈႎီုန်ဖာ်ႈ ပီးအန်း၊ ဆာ်အန်းႎီးလာည်းဘိုး အီးပဲန့်ချှေႈဟည်း၊ အီးမိုႈချှေႈဒီး ဟည်မိုႈပေါႇ အန်းဟည်ကလူည်ႇ တာ့်ပီးအန်းဟာ့်။ 12တံန်နှေးတာ့်ဘာည်းဇေဲန်း ပီးအန်းမာ် ဆာ်အန်းကကာ်ႈႎီုန်ဖာ်ႈ မေဲန်းအန်း၊ စီႎီးလာည်းဘိုး အီးမာည်းချှေႈဟည်း၊ အီးပဲန့်ဒီးမာ် အန်းဟည်ကလူည်ႇ တာ့်မေဲန်းအန်းဟာ့်။”
စံဝ်ယေဆု ဒဲႈမင်ကလာချှီႇ တာ့်ကော်န်းဒဲ့ကဲ
မတဲ ၁၉း၁၃-၁၅၊ လုကာ ၁၈း၁၅-၁၇
13မေဲႈလာ်အူဆငည်း တူအီးကလံက်ကဲ စီယိုင်းကော်န်းဒဲ့ကဲ ဒေဲႈဇူးပါ့်စံဝ်ယေဆု နှာင်းအန်းစံဝ် တေဲႈတည်းအန်း တာင်တေဲင်းကော်န်းဒဲ့ကဲဒီး ဒဲႈမင်ကလာချှီႇ။ ဘည်ဘာည်းမာ် တပဲစံဝ်ကဲ ဆံမ်ဇာဝ်း တာ့်ကဲ။ 14ဘိူဝ်ယေဲဝ်း စံဝ်ယေဆု တာ့်ဘည်ဘာည်းကဲ၊ အန်းစီဆီင်ဇာဝ်းဖာ်ႈ စီဒါ်ႈ “ခူချဲကော်န်းဒဲ့ ကဲဒီး။ ဒဲႈကဲ ဒေဲႈပါ့်အံဝ်း။ ဆီမ်ဘာည်းဆံမ်ဒါ်ႈလာ်ဘာည်းဇေဲန်း ကီုင်းစံဝ်ဖြား မိုႈ စာတူအီးဘာည်းကဲကဲနီးဟာ့်။ 15အံဝ်းနံင်ဒါ်ႈ အီးမိုႈအီးမှာန်အန်း၊ ချှေႈမှေဲ့မာ် ဆာ်ကဲအာဝ်ရံပ်လာည်း ကီုင်းစံဝ်ဖြား ဘာည်းကော်န်းဒဲ့၊ ချှေႈဒီး နံင်အာဝ်ဘိူန်းမ လေဲပ်ခေဲင်း ကီုင်းစံဝ်ဖြား။” 16ႎါည်းဒီး အန်းစံဝ်စီဂျာ်ႇ ဇိုက်လာ်ကော်န်းဒဲ့ကဲ စီတာင်တည်းအန်းတေဲင်းကဲ ဒဲႈမင်ကလာချှီႇ တာ့်ကော်န်းဒဲ့ကဲဒီး။
စံဝ်ယေဆု ပနံဝ်းဒဲႈ ဘည်ဘာည်း စာနံင်လေဲပ်တာ့်ကီုင်းစံဝ်ဖြား
မတဲ ၁၉း၁၆-၃၀၊ လုကာ ၁၈း၁၈-၃၀
17စံဝ်ယေဆု ကော်လည်လေႈဘိုးအီုန်ဒါ်န်း စီမေဲႈလာ် တူအီးအူချှေႈ တဘုဒေဲႈဇူးပါ့်အန်းစံဝ်။ အန်း စီအံက်ဆကျူႇ လအာည်ႇအန်းစံဝ် မှောႇဒါ်ႈ “အိူဝ် ဆြာအီးပေန်အီးပဲန်း၊ နှာင်းအံဝ်း ကံပ်ဘိူန်းအဆာက်အီမ်းဆေ ဆီအံဝ်းနံင်လိုရေဲန်း။”
18စံဝ်ယေဆုစီႎီးဒါ်ႈ “ဆီမ်ဘာည်း မည်းဆံမ်ဒါ်ႈတာ့်အံဝ်း ဆြာအီးပေန်အီးပဲန်း၊ ဘိူန်ဒ စံဝ်ဖြားအူပါး အာဝ်မေဲႈမ အန်းအီးပေန်အီးပဲန်း။ 19မည်းနာ်ႇအူန်း အာဝ်မိုႈဟီုဝ် ဆိန်ပိင်ညာပ် အီးဒါ်ႈ ‘ခူပတတ်ယာမ်းအီး၊ ခူကလူည်ႇတာ့် အီုင်ဟိုမ်းအီး၊ ခူဘျား လအီး၊ ခူကလာင်းအီးဘူမိုႈဘူမှာန်၊ ခူမှာပ် လအီး၊ ရိုဆေကူန်းမား’။”
20ချှေႈဒီး စီႎီးဒါ်ႈ “ဆြာ၊ အီးမိုႈဆိန်ပိင်ညာပ်ကဲဒီး ပါ်ပည်မေဲႈ အံဝ်းဟည်ကျာင်းတောႇဒေဲႈဟော်ည်ႇ ဆီုင်ခည်ဒဲ့အံဝ်း။”
21စံဝ်ယေဆု စီႎီးတိူဝ်ႈချှေႈဒီး စီမေဲႈနောႈကမေဲႈတာ့်အန်း စီဒါ်ႈ “မည်းဆီုင်ဂီလိုရေဲန်းဘိုးအူမျိုး။ မည်စီ ႎီးဖာ်ႈ ယံင်းဒို့ ဂျိုးအုက်စာမည်း ပါ်ပည်မေဲႈ စီဟာဝ်းကဆာင်းဒဲႈ တာ့်တူအီးကဲ အီးဖ္လာန်း၊ ဆာ်ဘာည်းဇေဲန်း မည်းစီနံင်ႎီးဘိူန်း ဂျိုးအုက်စာပါ့်ပ္လါ်န်းနာ်ႏ။ ဟာဝ်းရေဲန်းဟော်ည်ႇဖာ်ႈဘာည်းဇေဲန်း စီတောႇဒေဲႈလဘာ်န်းအံဝ်းနာ်ႏ။” 22ချှေႈဒီးမာ် ဘိူဝ်ယေဲဝ်းတညာဝ်း အန်းတာ် ကျောႈအန်းစံဝ်ဘာည်းဇေဲန်း ငါည်းအန်းမာ်ဟည်တေဲပ်ဖာ်ႈ စီငံဝ်လည်လေႈဒဲဝ်းဟာဝ်းဒဒီး၊ ဂေါႇအန်းမိုႈ ချှေႈအီးမေဲႈ ဂျိုးအုက်စာဂီုန်း။
23ဘိူန်ဇေဲန်း အန်းစံဝ် စီကႎီင် ႎီးတိူဝ်ႈပါ့်တပဲအန်းကဲ စီဒါ်ႈလာ် “ကဲအီးမေဲႈ ဂျိုးအုက်စာဂီုန်း စာနံင်လေဲပ် တာ့်ကီုင်းစံဝ်ဖြား အန်းဒည်းပေါႇအခည်း။”
24တပဲအန်းစံဝ်ကဲမာ် ဘိူဝ်ယေဲဝ်းတညာဝ်းကဲတာ် ကျောႈအန်းစံဝ်ဘာည်းဇေဲန်း၊ ကဲမာ် အာမ်းငါ်ႇဒို့ပေါႇ။ အန်းစံဝ် စီႎီးဒါ်ႈဘိုး “ကော်န်းအံဝ်းပဲ အိူည်၊ စာနံင်လေဲပ် တာ့်ကီုင်းစံဝ်ဖြား အန်းဒည်းပေါႇအခည်း။ 25ကလာအိုက် မူႇခလောႈလေဲပ် တီင်ကတဲဝ်း ဘံင်လတ် ဆီုင်အီုင်ဟိူည်းအူန်း ခူ ချှေႈအီးမေဲႈ ဂျိုးအုက်စာဂီုန်း နံင်လေဲပ်တံင်ကီုင်းစံဝ်ဖြား။”
26ဘိူန်ဇေဲန်း တပဲအန်းစံဝ်ကဲ ချဲန်းကဲဟည်အာမ်းဘိုး၊ ကဲစီ လည်ကအုပ်ႇကမိုန်ခနားကဲ ဒါ်ႈ “ဆာ်မိုႈဘာည်းဇေဲန်း ချှေႈမှေဲနံင်ကညားလာ် ချော်တ်လာည်း။”
27စံဝ်ယေဆု စီႎီးတိူဝ်ႈဘိုးကဲ စီဒါ်ႈ “ဇီုင်းလှေနီး တူအီးအာဝ်ဘယ်မလာ်ရေဲန်း၊ ဘည်ဘာည်းမာ် အန်းအာဝ်မိုႈမ စံဝ်ဖြား အာဝ်ဘယ်ရေဲန်း။ စံဝ်ဖြားမိုႈ အီးဘယ်ရေဲန်းဒို့ တော်န်းမျိုးတော်န်းလှေ။”
28ဘိူန်ဇေဲန်း ပေတရုစီႎီးဒါ်ႈ တာ့်အန်းစံဝ် “အီးမိုႈယေးမာ် ယေးဟည်ပ္လေႈႎီုန်ဒို့ပါ်ပည်မေဲႈ ဟည်တောႇဒေဲႈလဘာ်န်းမည်းစံဝ်။”
29အန်းစံဝ် စီႎီးဒါ်ႈ “အံဝ်းနံင်ဒါ်ႈ အီးမိုႈအီးမှာန်အန်း၊ ချှေႈမှေဲ့ဘူဒါ်ႈ ဂေါႇလီုင်အံဝ်း ကာည်း ဂေါႇလီုင်ခါဝ်ဆတာင်းအီးမှေဲမ်ခိုည်း၊ အီးမိုႈ ခလေဲပ်အန်း၊ ပီႎါးအန်းကဲ၊ ကူန်းမားအန်း၊ ကော်န်းႎါးအန်းကဲ၊ လိုင်းနားအန်းကဲ မျိုးမှေဲ့ဘူဒါ်ႈ ဆာ်အန်းပ္လေႈႎီုန်၊ 30ချှေႈဒီး တံင်စာတ်နီး အန်းစီနံင်ကတူႈကညားစံမ့် အီးလီလာဘာည်း၊ နံင်ဘိူန်းစံမ့်ဘိုး စာမ်အကျိုးအန်း အူပယာ်ႈတဒေဲပ် အီးမိုႈ ခလေဲပ်အန်းကဲ၊ ပီႎါးအန်းကဲ၊ မားအန်းကဲ၊ ကော်န်းႎါးအန်းကဲ၊ လိုင်းနားအန်းကဲ၊ စီနံင်ဘိူန်းဘိုး အဆာက်အီမ်းဆေ တံင်စာတ်ဘာ်န်းဟာ့်။ 31ဘည်ဘာည်းမာ် ချှေႈအီးဂေါ်ည်း ဒီးဇား စံင်နည်၊ နံင်ကတူႈဂေါ်ည်း ဒီဇေဲမ်း ႎါည်းနီး။ ချှေႈအီးဂေါ်ည်းဒီဇေဲမ်း စံင်နည် နံင်ကတူႈဂေါ်ည်း ဒီဇား ႎါည်းနီး#၁၀:၃၁ တီင်ဘေဲႇကျာမ်းဂရိအခည်း ဒါ်ႈဘာည်းညျေဲန်း “ချှေႈကဲအီးစာ်မ်းလအာည်ႇဒိူဝ်း နံင်ဇောႈလဘာ်န်း။ ချှေႈကဲအီးဇောႈလဘာ်န်းဒိူဝ်း နံင်စာ်မ်းလအာည်ႇ။”။”
စံဝ်ယေဆု ကလာင်းဘည်ဘာည်းနံင်ယာ်မ်းအန်း ဟည်မိုႈအိုည်းဘော်က်
မတဲ ၂၀း၁၇-၁၉၊ လုကာ ၁၈း၃၁-၃၄
32စံဝ်ယေဆုကာည်း တပဲအန်းကဲ စီတံန်တောႇ ဟိုက်ဟာဝ်း ပါ့်လှံင်းယေရုဆလိင်၊ ဇိုဂီဟိုက်ဟာဝ်းကဲ စံဝ်ယေဆု စီဟာဝ်းလအာည်ႇ အောဟာဝ်းကဲ။ တပဲအန်းကဲမာ် စီအာမ်းဒို့ ဘည်ဘာည်းအန်းစံဝ်၊ ကဲအီးတောႇဒေဲႈ လဘာ်န်းအန်းစံဝ်မာ် ပါ်ယံဝ်းပါ်တောႇဟာဝ်း။ ဘိူန်ဇေဲန်း စံဝ်ယေဆု စီတေဲႇလိူည် တပဲအန်း အူကိူဝ်းလေႈအယ်ချှေႈကဲဒီး ကလာင်းနှဲလာ်တာ့်ကဲ ဘည်ဘာည်းနံင်ကညားဒေဲႈအန်းစံဝ်။ 33အန်းစံဝ် စီဒါ်ႈ “တညာဝ်းလာည်းနာ်ႏ၊ အဲတီုက်ဂီဟိုက်ဟာဝ်း ပါ့်လှံင်းယေရုဆလိင်။ ကော်န်းတူအီးနီး နံင်ကညားအာပ်တံင်တည်း တားစော်င်းဒါင်း ကဲ ကာည်း တာ့်ဆြာကံတ်ကျာမ်းကဲ ပါ့်လှံင်းယေရုဆလိင်ဒီး။ ကဲနံင်ဒဲႈဖာ်ႈတံမ်ယာ်မ်း တာ့်အန်း အီးစီနံင်ႎီးအာပ်ဒဲႈဘိုး အန်း တာ့်တူအီးမျိုးဟည်းကဲ။ 34တူအီးမျိုးဟည်းကဲ နံင်လီလာပျိူဝ့်ဒါ်ႈဖာ်ႈ စီဘတ်ဟပ်အေဲမ်းဘတ် တာ့်အန်း။ ကဲနံင်ကယာင်ငါ်ႈဖာ်ႈ ပယာ်မ်းႎီုန်အန်း။ ဘည်ဘာည်းမာ် ဆာ်ဘိူန်းအိုည်းဆငည်း၊ ကော်န်းတူအီးနီး နံင်ႎီးယာ်ည်ႇအီမ်းဒေဲႈဘိုး။”
ပံင်မှာန်း ရာကိုပ်ကာည်းယောဟာန် တာ့်စံဝ်ယေဆု
မတဲ ၂၀း၂၀-၂၈
35ႎါည်းဒီး ကော်န်းတားဆေဘေဒဲ အီးမိုႈရာကိုပ်ကာည်းယောဟာန် ကာည်းစီဒေဲႈဇူး ပါ့်စံဝ်ယေဆု စီဒါ်ႈ “အိူဝ် ဆြာ၊ ယာည်းဆီင်မှာန်း တာ့်မည်းအူမျိုး။”
36စံဝ်ယေဆု စီႎီးမှောႇ တာ့်ကာည်း ဒါ်ႈ “ဆီအံဝ်းနံင်လိုရေဲန်းဒဲႈ တာ့်ပါည်း။”
37ကာည်း စီႎီးဒါ်ႈ “ဘိူန်မိုႈတာ်မည်းစံဝ် ဒါးဖုင်းတာန်ခိုးမည်း တိူဝ်ႈမေန်း၊ ဒဲႈယာည်း ဘိူန်းဂေါ်ည်း ညျှာတည်းအေဲႈမည်း အူချှေႈ၊ ညျှာတည်းကမည်း အူချှေႈ။”
38အန်းစံဝ် စီႎီးဒါ်ႈ “ပံင်မှာန်းပါည်းမာ် ပါည်းအာဝ်နာ်ႇမ။ ပါည်းနံင်ဘယ်လာ် စိုင်းအေဲမ်းကလော်က်ႏကီန်းဒည်း ပံင်နံင်စိုင်းအံဝ်း၊ ပါည်းနံင်ဘယ်လာ် ခံမ်လာည်းဘပ်တိစမ် ပံင်နံင်ခံမ်လာည်းအံဝ်း။”
39ကာည်း စီႎီးဒါ်ႈလာ် “ယာည်း နံင်ဘယ် အိူဝ်။”
အန်းစံဝ်စီဒါ်ႈ “အီးမိုႈအေဲမ်းကလော်က်ႏပံင်နံင်စိုင်းအံဝ်းမာ် ပါည်းနံင်ကတူႈစိုင်း၊ အာဝ်ႎါ်န်း အီးမိုႈ ဘပ်တိစမ်ပံင်နံင်ခံမ်လာည်းအံဝ်းမာ် ပါည်းနံင်ကတူႈခံမ်လာည်း။ 40ဘည်ဘာည်းမာ် အံဝ်းအာဝ်မိုႈမ ချှေႈအီးဒဲႈအခွါင်း စာနံင်ဘိူန်းအံက်ညျှာတည်းအေဲႈ၊ တည်းကအံဝ်း။ စာနံင်ဘိူန်းအံက် ကဆီုဝ်ကဲဒီး၊ အီးနံင်တင်ချင်ရောႈအန်း မိုႈလိူည်စံဝ်ဖြား။”
41ဘိူဝ်ယေဲဝ်းတညာဝ်း တပဲအန်းစံဝ်ကိူဝ်းချှေႈကဲဒီး၊ ကဲစီဆီင်ဇာဝ်းပေါႇ တာ့်ရာကိုပ်ကာည်းယောဟာန်။ 42ဘိူန်ဇေဲန်း စံဝ်ယေဆု စီတေဲႇလာ်တပဲအန်းကဲဒီး စီဒါ်ႈ “တောႇတာ်ဘည်ဘာည်းနာ်ႇပဲ တူအီးပံင်အီးတေဲႇဒါ်ႈတာ် ကဲမိုႈအီးတိူဝ်ႈမေန်း တေဲင်းတူအီးမျိုးဟည်းကဲ၊ ကဲကျင်းလာ်ဘယ်ဟိုမ်းတူအီးကီုင်းကဲ။ ကဲမာ် ဆမားလာ်ဒါး ကနေဲႈကဲ။ 43တီင်ခေဲင်းပဲကဲနီး အာဝ်ဘိူန်းမ ဘာည်းဇေဲန်း။ ချှေႈအီးဆီင်ပေန် အီးတိူဝ်ႈမေန်း တီင်ပဲကဲနီး၊ အန်းနံင်လိုပေန်ဆဲ ပံင်ဆူည်ႇအီး။ 44ချှေႈအီးဆီင်ပေန် တူအီးအောဒါင်း တီင်ပဲကဲနီး၊ အန်းနံင်လိုပေန်ဆဲ မှာည်းအီးဟာ့်။ 45ဆီမ်ဘာည်းဆံမ်ဒါ်ႈလာ်ဘာည်းဇေဲန်း ကော်န်းတူအီးနီး အန်းအာဝ်မိုႈမ ဒေဲႈစာနံင်ဆူည်ႇအီး။ အန်းမိုႈလိူည် ဒေဲႈ စာနံင်ပေန်တာ် ပံင်ဆူည်ႇအီး၊ စာနံင်ဒဲႈ အဆာက်အန်း စီကရောႈလာည်း အဆာက်တူအီးပါ်ပည်မေဲႈ။”
စံဝ်ယေဆု ဆားနှာမ်းဒဲႈ တူအီးငါည်းအာ်ႇ
မတဲ ၂၀း၂၉-၃၄၊ လုကာ ၁၈း၃၅-၄၃
46ႎါည်းဒီး စံဝ်ယေဆုကာည်းတပဲအန်းကဲ စီဒေဲႈစာ်မ်းဘိုး ပါ့်လှံင်းယေရိခေါ။ ကဲ ကာည်း တူအီးဂီုန်းကဲ လည်လေႈတံန်တောႇဟာဝ်း ဒလှံင်းဒီး၊ ဇိုဂီဟာဝ်းကဲ စီမေဲႈလာ် တူအီးငါည်းအာ်ႇ ချှေႈအီးဇီုဝ်ဘာတိမဲ အီးမိုႈကော်န်းတားတိမဲ ဂီအံက်မှာန်းဟိုမ်း တံင်ပါင်းအီုန်ဒါ်န်း။ 47ဘိူဝ်ယေဲဝ်းတညာဝ်းအန်းတာ် ယေဆု အီးမိုႈကော်န်းလှံင်းနာဆရတ် ဒေဲႈစာ်မ်းရီမ်းအန်း၊ အန်းစီအောင်းပါဝ်ဒါ်ႈ “အိူဝ်၊ ယေဆု ကော်န်းတားကညျားဒါင်းဒါႎေက်၊ ကႎါ်ည်းဟံင်းအံဝ်း။”
48နှာင်းအန်းဘူအောင်း တူအီးကဲ စီကဖာႇလာ် ဇာဝ်းတာ့်အန်း၊ ဘည်ဘာည်းမာ် ချဲန်းအန်းအာ်အောင်းပါဝ်ဒါင်းဒါင်း ဒါ်ႈ “ကော်န်းတားကညျားဒါင်းဒါႎေက် ကႎါ်ည်းဟံင်းအံဝ်း။”
49စံဝ်ယေဆုစီဇံင်းကီုတ် စီဒါ်ႈ “တေဲႇဒေဲႈချှေႈဒီး။”
ဘိူန်ဇေဲန်း တူအီးကဲမာ် စီတေဲႇ ဒါ်ႈတာ့်အန်း “မည်းခူနောႈဒဲ့၊ ယာ်ည်ႇလာ်၊ စံဝ်ယေဆုဟည်တေဲႇမည်း။”
50အန်းမာ် ပူည်ႇစေတ်ႎီုန် တဆီးရာ်ည်ႇချှေဲပ်အန်း စီယာ်ည်ႇဖာ်ႈ ဒေဲႈဇူးလာ် ပါ့်စံဝ်ယေဆု။
51ဘိူန်ဇေဲန်း စံဝ်ယေဆုစီမှောႇအန်း ဒါ်ႈ “ဆီမည်းဆီင်ဒဲႈ အံဝ်းရေဲန်းဒဲႈ တာ့်မည်း။”
ချှေႈငါည်းအာ်ႇဒီး စီႎီးဒါ်ႈ “ဆြာ အိူည်၊ ရေဲန်းဒဲႈဟံင်း နှာင်းငါည်းအံဝ်း ႎီးယေဲဝ်းတိူဝ်ႈနာ်ႏ။”
52စံဝ်ယေဆုစီဒါ်ႈ တာ့်အန်း “ယာ်ည်ႇ ဟာဝ်းလာ့်။ ဂေါႇမိုႈလီုင် ဘည်ဘာည်းညျှေဲမ်မည်းဒီး၊ မည်းဟည်ဂဲန်း။”
ချှေႈဒီးမာ် ဟည်ႎီးယေဲဝ်းတိူဝ်ႈ ပေါႇအူစာ်န်း၊ အန်းစီတောႇဟာဝ်းလဘာ်န်း စံဝ်ယေဆု ပါ့်အီုန်ဒါ်န်းဟာဝ်းကဲ။
वर्तमान में चयनित:
မာကု 10: RMT
हाइलाइट
शेयर
कॉपी
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
