Genesis 3
3
1Dai ïmo imidagai sai ami ïxikamiana dibia ïmo kooyi dai aatagidi go oki. Aidïpïrï bamioma saitudagakana go kooyi yaatagi bïïtarï xi bhai xi ïma maaxi oidigana ajiopadami ix makïdï idui Diuxi Gïr Nukadakami. Dai potïtïdai ïgai go oki,
—¿Buaboi xi ix gïn daidi Diuxi uxi ibhiadï ix makïdï ïxikamiana guka mïxi mai kukumiagi tomarhi ïmoko?— itïtïdai.
2Dai go oki potïtïdai,
—Cho— itïtïdai. —Kïïga bia aatïmï oigaragai xi ugiagi tomax makïdï uxi ibhiadï— itïtïdai. 3—Mosïka go ïxikami ïrana kïakïdï uxi gobai gia gïr aagidi Diuxi tïsai mai ugana. Ix mos taata aatïmï gobai saidi askoi aragai— itïtïdai.
4Dai go kooyi potïtïdai go oki aidï,
—Cho— itïtïdai —Maiti ïr buaboi. Xadïrï kona aapimï ugakai gobai— itïtïdai.
5Dai ka gïpiïrï buaja ïrhidi ïgai Diuxi dai yaatagidi go oki dai potïtïdai,
—Daiñi, Diuxi kïï maatï sai mos ugakai aapimï go uxi ibhiadï gobai sai ka ïpïan maaxkamu aapimï Diuxi maatï nïiditai aapimï ix tumaxi ïr kïïga dai ix tumaxi maiti ïr kïïga ïpï. Dai maiti ipïrhidi Diuxi xi ïpïan ïxi maatïkagi aapimï ix xïïxi maatï ïgai. Kaxkïdï maiti ipïrhidi ïgai sai ugiagi aapimï gobai— itïtïdai go kooyi go oki gïpiïrï buaja ïrhiditai ïgai Diuxi.
6Bhodïrï go oki kïïga gï tïgito nïidi go uxi dai kïï tiodikami tïï dai kïï bïïñiaka maaxi ibhiadï ïpï. Dai pobï ïrhi ïgai sai ïgaikïdï bhïi antaada gïdukami tïgibudagai dai bhïiyi ïmo ibhiadï dai gauu. Dai bhodïrï maa ïgai aduñdï bai ïgai uu ïpï. 7Dai mos ugakai ïgai go uxi ibhiadï sai amaxi máí ïgai naana maaxi dai ka ayi xaïraragai mai yukusukatai ïgai. Dai soo ïgai igoxi aagadï dai ïgaikïdï iiña tukugadï.
8Bhodïrï urunoko ka ïboitukai oidigi sai go kïïrhi ïmadï oñigadï kaï xi no ïxikamiana aimïradan kaiti Diuxi Gïr Nukadakami dai duduadimu ïgai dai dïgabuna boopoi dai gïn ïjïxto uxi saagida.
9Dai Diuxi Gïr Nukadakami báí go kïïrhi dai potïtïdai,
—¿Pako daja aapi kïïrhi?— itïtïdai.
10Dai go kïïrhi itïtïdai,
—Kaï aanï no aimïraitai aapi ïxikamiana antai duadimu mai yukusukatai dai gin ïxto— itïtïdai. 11—¿Borai gï aagidi pïxi mai yukusu? ¿Uu pïxi ïpï go uxi ibhiadï ix makïdï gï aagidi aanï pïsai mai ugana?— itïtïdai Diuxi.
12Dai go kïïrhi potïtïdai aidï,
—Go oki ix makïdï gin maa aapi gobai ïgai dai gin maa go ibhiadï go uxi antai gauu aanï— itïtïdai.
13Bhodïrï Diuxi Gïr Nukadakami bhagaimi go oki dai potïtïdai,
—Tuipïxi imaaxi idui— itïtïdai.
Dai go oki potïtïdai,
—Go kooyiaba ïgai daidi gin buirumagi antai gauu aanï go uxi ibhiadï— itïtïdai.
14Daidi Diuxi Gïr Nukadakami potïtïdai go kooyi,
—Ka buirumagi aapi go oki. Kaxkïdï xibi gï abhana daituda iñagai gïgïbituldaragai. Daiñi, xibi aanï gï dumaltudamu dai xibi bhaitiakoga gï tïbaimu aimïradamu aapi dai kuadamu dïbïrai. Ïïgi taatamu aapi idi gïgïbituldaragai. Go gaa oidigana ajiopadami mai taata agai— itïtïdai. 15—Dai gïn bupuidïrï gïn surhitudamu aanï aapi kooyi ïmadï go oki dai modukai gïn maamara xi gïn kïïdada agai aapimï aipakoga. Ïmoko go oki maamaradï kïixora agai gï moo pai aapi kïimu tïkabodï— itïtïdai Diuxi go kooyi.
16Daidi bhodïrï potïtïdai Diuxi go oki,
—Aapi oki, gï maakimu aanï ïmo gïgïbidaragai aapi ïpï. Daiñi, xibi bhaitiakoga gïïpi bamioma kokoka agai pïx xudu duada agadagi aarhikïdï. Dïï bïïxkïrï apia dukai ipïldamu aapi xi abhana dakagi gï aduñi dai ïgai gï tïanïda agai— itïtïdai.
17Bhodïrï potïtïdai Diuxi go kïïrhi,
—Daiñi aapi kïïrhi, kaxi gï aagidi aanï pïsai mai ugana aapi go uxi ibhiadï dïï aapi bhaiyoma ïïgidi gï oñiga daidi gauu— itïtïdai. —Kaxkïdï aapi xibi ïr gï duñi sai ka xia duadamu aanï go dïbïrai. Xibi bhaitiakoga kabami aatabujidamu aapi dai bhai buadamu kuadagai abhiadïrï dïbïraiñdïrï— itïtïdai. 18—Dai abhiadïrï dïbïraiñdïrï bubuakimu ïpï naana maaxi basoi maaxi ix makïdï galduadamu ïxikami dai sïïxidakami ïpï dai biakamu aapi xi gaagadagi kuadagai ix makïdï bhai buayi uxi oidigana— itïtïdai Diuxi go kïïrhi. 19—Daiñi kïïrhi— itïtïdai —Xibi kabami bajuradamu aapi dai gamaitïmu ixtukïdï oidakagi asta xudu ka mukiagi dai dïbïrai gï naatoagi aapi ïpamu. Mos ïr dïbïraiñdïrï duñixikami aapi di dai dïbïrai gï naatomu aapi ïpamu pïx xudu mukiagi— itïtïdai.
20Daidi go kïïrhi Eba tïïtï go oki. Go oki ïr dïïdï bïïxi oidigi dama oidakami kaxkïdï potïïtï ïgai. 21Dai bhodïrï Diuxi Gïr Nukadakami koi buxtaki dai biuma dai ogidï yukuxtu go kïïrhi ïmadï go oki. 22Daidi itïi Diuxi Gïr Nukadakami aidï
—Xibi kaxi gïr ïpïamaaxi go kïïrhi. Kaxi gïr ïpïandukai bhïi gobai bïï sudakami tïgibudagai dai ka máí ïgai ixtumaxi ïr kïïga ïmadï ix makïdï maiti ïr kïïga ïpï. Xibi maiti gï agai xi ugiagi ïgai go uxi ibhiadï ixtukïdï tomax tuigako oidakagi ïmoko dai bhodïrï ka oidakagi tomax tuigako— itïi ïgai.
23Dai mos potïkai Diuxi Gïr Nukadakami sai bhodïrï busaitu ïgai go kïïrhi ïxikamiañdïrï sai mai ugiagi ïgai go uxi ibhiadï ixtukïdï tomax tuigako oidakagi ïgai. Dai no xibhïako aaduinturhi ïgai go kïïrhi sai ï gïbaaxi dïbïrai xajadïrï duñixikami ïgai sai ï gïbaaxi dïbïraikïdï aatabuadagi ïgai. 24Bhodïrï ka busaidakai go kïïrhi ïxikamiañdïrï sai bhobai xarhi apako tutu Diuxi goka nunukadakami. Tïtïañikarudï Diuxi go Nukadakami ïgai dai ajana ïgai bïï gokatai. Dai ami tïï Diuxi ïmo maxtai táí ïpï xi no xikorhi aimïrada ïgai bai mai bapakiagi tomarhi ïmadutai ami xako kïïka go uxi ixtukïdï tomax tuigako oidakagi odami.
वर्तमान में चयनित:
Genesis 3: NTP
हाइलाइट
शेयर
कॉपी
Want to have your highlights saved across all your devices? Sign up or sign in
Copyright: Ethnos360 Sanford, Florida
