Mateo 7
7
Waapẽarã k'orea mietá pedeapataɨ
Luca 6:37-38; 6:41-42
1»Waapẽarãpa nemietá oodada k'orea pedearãt'ɨ, abaɨa mãrapa nemietá oodada ak'ɨpiemaapa. 2Mãrapa waapẽarãpa nemietá oodada ak'ɨpata jĩra, ara mãɨya Tachi Ak'õrepa mãra ak'ɨipɨ. Abaɨ pia bɨwẽane a jarapataɨ jĩra, ara mãɨya Tachi Ak'õrepa mãra pia bɨwẽane aipɨ.#7:2 Abaɨ pia bɨwẽane a jarapataɨ jĩra, ara mãɨya Tachi Ak'õrepa mãra pia bɨwẽane aipɨ. Griego pedeade nãɨya bɨ bɨma: Waapẽarã chaapataɨ jĩra, ara mãɨya mãra chaadaipɨ. 3¿K'ãre k'orea nejarra taujãne bɨ machi k'õp'ãeroné ak'ɨparima? ¿K'ãre k'orea pak'uru waibɨa bɨ pɨ taujãne bɨ ak'ɨk'ama? 4Pak'uru waibɨa machi taujãne bɨ ununawẽa p'anɨpɨra ¿sãmaasã́ waapẽarã́ nãɨya jaradaima: “Nejarra pɨ taujãne bɨ mɨa aubariipɨ”? 5¡Mãrapa jarapataɨ jĩra oodak'ama! Nãɨrã pak'uru waibɨa machi taujãne bɨ aubarit'ɨ. Mãɨya p'ue ununaipɨ nejarra waapẽarã taujãne bɨ aubaridai k'orea. Ara mãɨ jĩra pɨa nemietá oo bɨ itu bɨse. Mãɨyapuru waapẽarã p'ue k'aripaipɨ.
6»Tachi Ak'õre paepema usá tearãt'ɨ mãra k'aapiemaapa. Mãrapa chi neepɨa k'ede siná tearãt'ɨ mãɨ ɨ̃rɨ t'ɨapiemaapa.#7:6 Mãɨ nãɨya jara k'ɨ̃ria bɨma: «Waapẽarãpa Tachi Ak'õre pedea ũri k'ɨ̃rianak'apɨra, ãchiá waa jaratearãt'ɨ. Jarateadaipɨra mãra nemietá oodaima».
Jesupa jarateada Tachi Ak'õrea ɨt'aa chiididamẽrá
Luca 11:9-13; 6:31
7»Mãra newẽa p'anɨ Tachi Ak'õrea ɨt'aa chiidi p'anat'ɨ; mãɨne ichia mãrá teaipɨ. Jɨrɨ p'anat'ɨ; ichia unupiipɨ. Tede eda wãpataɨde t'ɨ̃t'ɨ; mãɨne chi eda wãpataɨ ewai jĩra, ichia teaipɨ. 8Chi ɨt'aa chiidi bɨpa jitaipɨ. Chi jɨrɨ bɨpa unuipɨ. Chi t'ɨ̃ bɨ pae tede eda wãpataɨ ewaipɨ ne teai k'orea. 9Warrapa p'ana idirude ¿chi ak'õrepa mawara teaik'ãra? 10Warrapa beta idirude ¿taama teaik'ãra? 11Mãra chi k'achia berãpa mãra warrarã́ nepia tea k'awa p'anɨpɨra, ¿mãra Ak'õre pajãne bɨpa chi idi p'anɨa nepia teaiwẽk'ãra? 12Mãrapa k'ɨ̃ria p'anɨma waapẽarãpa mãra pia oodait'a. Mãɨpuru, ara mãɨ jĩra mãrapa waapẽarã pia oot'ɨ, chi Moisepa bɨdade mãɨnepa Tachi Ak'õre pari pedeapataɨrãpa bɨdade jãɨya jara bɨẽra.
Eda wãpataɨ p'isua bɨ
Luca 13:24
13-14»Mãra chi eda wãpataɨ p'isua bɨde wãt'ɨ. Chi mietade eda wãpataɨ jet'ea bɨma. Chi o sida jet'ea bɨẽra mãma chok'ará eda wãpatama. Maamina Tachi Ak'õre ome ewaricha chok'ae bai k'orea eda wãpataɨ p'isua bɨma. Chi ode p'isua bɨẽra chaarea bɨma wãi k'orea. Mãɨ o chok'araɨrãpa ununak'ama.
Pak'uru k'awapatama chi nejõnepa
Luca 6:43-44
15»Jĩrak'aua p'anat'ɨ sea Tachi Ak'õre pari pedeapataɨrãane apataɨrã paara. Ãchia piarã jĩra jarateapatama maamina mãɨya p'anɨma ẽpẽrarãpa Tachi Ak'õre pedea ĩjãapidaemaapa. 16-17Ãchia oo p'anɨnepa mãrapa k'awadaipɨ piarã wa piarãwẽt'a. Pak'uru piapa nejõ pia chauparima maamina pak'uru mietapa nejõ mietá chauparima. ¿Ɨɨrɨ bɨɨrɨpa uva chauparima? ¿Wa jõjõek'apa higo chauparima? 18Pak'uru piapa nejõ mietá chauk'ama ichiaba pak'uru mietapa nejõ pia chauk'ama. 19Pak'uru bɨɨrɨ pia chauwẽpɨra, t'ut'aadak'ari paapatama. 20Ara mãɨ jĩra mãrapa Tachi Ak'õre pari pedeapataɨrã k'awadaipɨ sãɨ piarãpẽa wa sãɨ seaparí, ãchia oo p'anɨnepa.
Jesú t'ɨ̃ne ne oo p'anɨ
Luca 13:25-27
21»Ẽpẽrarãpa mɨ ãchi chipariade apatamina jõmãɨrã ãarea Tachi Ak'õre juade ua bɨde p'ananaiwẽma. Abapuru mɨ Ak'õre pajãne bɨpa k'ɨ̃ria bɨ oo berãt'a ichi p'uurude p'ananaipɨ. 22Ichia ɨtɨai ewaride chok'araɨrãpa mɨá jaradaipɨ: “Tai Chipari, tai Chipari, tai pɨ t'ɨ̃ k'orea pedeasidama, pɨ t'ɨ̃ne jaore mietaarã ãyá jeret'aasidama mãɨnepa pɨ t'ɨ̃ne ẽpẽrarãpa ne oodak'apɨ́ oosidama”. 23Mãɨne mɨa piarã jararuma: “Mietá oopataɨrã, ãyá wãt'ɨ. Mɨa mãra unuk'ama”.
Te ume p'anɨ k'orea jarateada
Marco 1:22; Luca 6:47-49
24»Mãɨ k'orea abaɨpa mɨ pedea ũrik'ari, ooipɨra, nãɨ jĩra baipɨ: ẽpẽra k'ɨ̃risia k'awa bɨpa ichi te mawara ɨ̃rɨ oosima. 25Mãɨne k'oe che nɨbeesima, nãu ɨbɨa p'õat'ɨ nɨbeesima mãɨnepa to che nɨbeek'oasima; maamina ichi te t'erawãé pasima mawara ɨ̃rɨ ooda pẽra. 26Maamina chi mɨ pedea ũrik'ari ooepɨra, nãɨ jĩra baipɨ: ẽpẽra k'ɨ̃risia newẽa bɨpa ichi te ipude oosima. 27Mãɨne k'oe che nɨbeesima, nãu ɨbɨa p'õat'ɨ nɨbeesima mãɨnepa to che nɨbeek'oasima. Mãɨpa ichi te t'erap'et'ak'ari abaeda ãarea ãrisima».
28Jesupa jõma jarateak'ari ẽpẽrarãpa k'awa k'ɨ̃risiadaé pasima. 29Jesupa Moisepa bɨda jarateapataɨrã jĩra jarateak'a pasima. Mãɨpari minachia k'awa bɨdepa pia jaratea basima.
वर्तमान में चयनित:
Mateo 7: tdc
हाइलाइट
शेयर
कॉपी
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.