Mateo 6
6
Nenea k'edea ne teai jarateada
1»Jĩrak'aua p'anat'ɨ awaraɨrã taade nepia oodai Tachi Ak'õre pae, ãchia ak'ɨdamẽrá. Mãɨya oosidara, mãra Ak'õre pajãne bɨpa mãrá nepia teaiwẽma. 2Pɨa nenea k'edea ne tearude seat'a Tachi Ak'õrene ĩjãapataade apataɨrãpa oopata jĩra oorãse. Ãchia ne teautade, mãɨ k'orea jarapatama judiorã ará pedeapataɨ tede mãɨnepa p'uurude pida jõmãɨrãpa ãchi k'orea pia pedeadamẽrá. Mɨa piarã jararuma: ẽpẽrarãpa ãchi k'orea pia pedeadait'a k'ɨ̃ria p'anɨ pẽra, mãɨ ãchi k'orea pedea pia pedeadada puru nepia uru p'anɨma. Mãɨt'u Tachi Ak'õrenepa mi ãpia pida nepia uru p'anɨwẽma. 3-4Pɨa nenea k'edea ne tearude waapẽarã taade jĩk'ua pedearãse. Mi ãpia pida abaɨa nepɨrɨrãse. Pɨa k'ĩup'ea nepia oo bɨt'a pɨ Ak'õrepa unuparima. Ichiapuru pɨá nepia teaipɨ.#6:3-4 Teaipɨ. Waapẽarã k'art'ade versículo 3-4, 6 mãɨnepa 18de mãɨ awara jara bɨma «waapẽarã taade teaipɨ».
Jesupa jarateada ɨt'aa chiidii k'orea
Luca 11:2-4
5»Pɨa Tachi Ak'õrea ɨt'aa chiidirude Tachi Ak'õrene ĩjãapataade apataɨrãpa oopataɨ jĩra oorãse. Ãchia judiorã ará pedeapataɨ tede mãɨnepa p'uurude bai nɨp'aneenak'ari Tachi Ak'õrea ɨt'aa chiidipatama ẽpẽrarãpa pia ununamẽrá. Mɨa piarã jararuma: ẽpẽrarãpa ãchi pia ununai k'ɨ̃ria p'anɨ pẽra mãɨ ãchi k'orea pedea pia pedeadada puru nepia uru p'anɨma. Mãɨt'u Tachi Ak'õrenepa mi ãpia pida nepia uru p'anɨwẽma. 6Pɨa Tachi Ak'õrea ɨt'aa chiidirude pɨchi tede eda wãse. Chi eda wãpataɨ jɨ̃at'ɨk'ari pɨchi tuaba pɨ Ak'õrea ɨt'aa chiidise. Pɨa k'ĩup'ea nepia oo bɨ Tachi Ak'õrepa unuparima. Ichiapuru pɨá nepia teaipɨ.
7-8»Pɨa Tachi Ak'õrea ɨt'aa chiidirude Tachi Ak'õrene ĩjãanak'apɨɨrãpa oopataɨ jĩra oorãse. Ãchia pedea bari k'ak'o minachia ɨ̃rɨ jarapatama k'ɨ̃risia p'anɨ pẽra tãaraa ɨt'aa chiidiutade, Tachi Ak'õrepa pia ũri bɨek'ãra adayá. Maamina mãra Ak'õrea ɨt'aa chiididai naena, ichia k'awa bɨma mãrapa k'ãre k'ɨ̃ria p'anɨ. 9Mãɨpuru Tachi Ak'õrea nãɨya ɨt'aa chiidit'ɨ:
“Tai Ak'õre pajãne bɨ, pɨ t'ɨ̃ waapẽarã t'ɨ̃ k'aepẽra piipará bɨma.
10Taipa k'ɨ̃ria p'anɨma tãaraawẽa bɨde pɨa pɨchidirã pɨ juade ua bait'a.
K'ɨ̃ria p'anɨma pɨa k'ɨ̃ria bɨ nãɨ ĩjũanepemarãpa oodait'a, pajãnepemarãpa oopata jĩra.
11Taiyá chik'o tease ewaricha k'odamẽrá.
12Taipa nemietá oodada k'ɨ̃risia atuase, waapẽarãpa nemietá oodada mãɨ taipa k'ɨ̃risia atuapataɨ jĩra.
13Tai nemietaade baepirãse mãɨnepa nemietaadepema k'aripase”.#6:13 Nemietaadepema. Mãɨ pedeapa ichiaba jara bɨma «tiore». [Pɨa jõmãɨrã p'ue bɨpɨ, pɨ chi chaarea bɨpɨ ichiaba ewaricha chi minachia k'awa bɨpɨ.]#6:13 Griego pedeade chok'ará k'art'ade pedea corchetede bɨ newẽma.
14»Waapẽarãpa mãra ne piawẽa oodada k'ɨ̃risia atuadaipɨra, mãrapa ne piawẽa oodada mãra Ak'õre pajãne bɨpa k'ɨ̃risia atuaipɨ. 15Maamina waapẽarãpa mãra ne piawẽa oodada k'ɨ̃risia atuadaepɨra, mãrapa ne piawẽa oodada mãra Ak'õre pajãne bɨpa k'ɨ̃risia atuaiwẽma.
Nek'odak'apɨ́ ewari ooda k'orea
16»Mãrapa Tachi Ak'õrene k'ɨ̃risiadayá nek'odak'apɨ́ ewaride ooutade k'ĩra piawẽa p'aneerãt'ɨ Tachi Ak'õrene ĩjãapataade apataɨrãpa oopataɨ jĩra. Ãchi mãɨya p'anapatama jõmãɨrãpa k'awadamẽrá Tachi Ak'õrene k'ɨ̃risiadayá nek'odak'apɨ́ ewaride oo p'anɨ. Mɨa piarã jararuma: ẽpẽrarãpa ãchi pia jaradai k'ɨ̃ria p'anɨ pẽra mãɨ ãchi k'orea pedea pia pedeadada puru nepia uru p'anɨma. Mãɨt'u Tachi Ak'õrenepa mi ãpia pida nepia uru p'anɨwẽma. 17Maamina pɨa Tachi Ak'õrene k'ɨ̃risiadayá nek'odak'apɨ́ ewaride oo bɨde pɨ porode k'era wease mãɨnepa k'ĩra sɨɨse. 18Mãɨyara ẽpẽrarãpa k'awadaiwẽma pɨa Tachi Ak'õrene k'ɨ̃risiadayá nek'odak'apɨ́ ewaride oo bɨt'a. Aba pɨ Ak'õrepuru k'awaipɨ. Pɨa k'ĩup'ea nepia oo bɨt'a pɨ Ak'õrepa unuparima. Ichiapuru pɨá nepia teaipɨ.
Nepia pajãne uru bai k'orea jarateada
Luca 12:33-34
19»Nãɨ ĩjũane nepia jɨrɨrãt'ɨ minachia uru p'ananai k'orea. Nãɨ ĩjũanepema mok'osiaparima, simiapa ãriparima ichiaba nechɨapataɨrã eda wãnak'ari nechɨapatama. 20-21Mãɨ k'aepẽra chi piipará bɨ machi sõnepa k'ɨ̃riapatama. Mãɨpuru Tachi Ak'õrepa k'ɨ̃ria bɨt'a mãra pida k'ɨ̃ria p'anat'ɨ ne aba pia bɨ pajãnepema uru p'ananai k'orea. Jãma simiapa ãrik'ama, nepia mok'osiak'ama ichiaba nechɨapataɨrã p'ue eda wãnak'ama.
Jesupa tachi tau k'orea jarateada
Luca 11:34-36
22»Tachi tau ĩpira jĩra bɨma. Mãɨpuru pɨ tau pia bɨpɨra ɨnaane nipaipɨ. 23Maamina pɨ tau mietá bɨpɨra, ne k'achiade wãrune p'ue unuwẽa baipɨ. Ara mãɨ jĩra pɨa nemietá oo bɨpɨra, nepia ooyade a jara bɨmina, pɨ piarã p'ãrione nima.
K'ait'a tachi chipari
Luca 16:13
24»Ẽpẽra abaɨ pida p'ue mimiaiwẽma ichi chipari ume p'anɨ pae. Ume uru bɨpɨra aba atepe pia k'ɨ̃ria baipɨ. Mãɨ ome nipaipɨ mãɨne chi abaɨ itu bɨipɨ. Ara mãɨ jĩra chi ne minachia uru ba k'ɨ̃ria bɨpa Tachi Ak'õre ome p'ue nipaiwẽma.
Tachi Ak'õrepa ichidirã ak'ɨparima
Luca 12:22-31
25»Mãɨpuru mɨa jararuma: mãra sãmaasã́ p'ananait'a minachia k'ɨ̃risiarãt'ɨ nek'odai k'orea, netodai k'orea ichiaba ne jɨ̃nai k'orea. ¿Tachi chok'ae bait'a chik'o k'aepẽra atepe piipará bɨwẽk'ãra? ¿Tachi k'ak'ua neet'á k'aepẽra atepe piipará bɨwẽk'ãra? 26Ak'ɨt'ɨ, ĩpana ne uudak'ama, ne baadak'ama ichiaba ne yaadak'ama. Maamina Tachi Ak'õre pajãne bɨpa ãchiá nek'opiparima. ¿Mãra ĩpana k'aepẽra atepe pia p'anɨwẽk'ãra? 27¿K'ai mãranepema, ichi k'ak'ua k'orea minachia k'ɨ̃risia bɨpa tãaraa chok'ae baima?#6:27 Mãɨ ichiaba jara bɨma «¿K'ai mãranepemapa minachia k'ɨ̃risia bɨpa atepe teesoa warima?» 28¿K'ãre k'orea mãrapa neet'á k'orea minachia k'ɨ̃risiapatama? Ak'ɨt'ɨ nep'ono sãmaasã́ wariparit'a. Nep'ono mimiak'ama ichiaba p'aru k'osak'ama. 29Maamina mɨa jararuma: tachi chõarãenapema poro jũra jɨ̃parí jɨ̃ bɨ Salomón ne minachia uru badamina nep'ono jĩra k'ĩrawãrea jɨ̃k'a pasima.#6:29 Salomón. 1 Reye 10:4-7; 10:23-25. 30Chi idiapae p'ũajãra tachia mẽa unupataɨ mãɨ norema paapatamina Tachi Ak'õrepa wapida mãɨ t'õpiparima. Mãɨ k'aepẽra ¿ichia mãrá ne piipará jɨ̃namẽrá teaiwẽk'ãra? ¿K'ãre k'orea mãɨne p'ue ĩjãanawẽma?
31»Mãɨpuru minachia k'ɨ̃risiarãt'ɨ nek'odai k'orea, netodai k'orea mãɨnepa ne jɨ̃nai k'orea. 32Tachi Ak'õrene ĩjãanak'apɨɨrãpa ãarea mãɨ jɨrɨpatama, maamina mãra Ak'õre pajãne bɨpa k'awa bɨma mãrapa k'ãre uru p'ananai p'anɨt'a. 33Mãɨpuru k'ɨ̃riat'ɨ Tachi Ak'õrepa machi ichi juade ua bai ichidirã ome. Jĩrak'aua p'anat'ɨ ichia oopi bɨ oodai k'orea. Mãɨya mãra ne newẽa p'anɨ ichia ãarea teaipɨ. 34Ne nũpema minachia k'ɨ̃risiarãt'ɨ, nũ pida Tachi Ak'õrepa mãra ak'ɨ bai pẽra. Ewaricha nepɨra minachia baipɨ.
वर्तमान में चयनित:
Mateo 6: tdc
हाइलाइट
शेयर
कॉपी
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.