Lukaas 22
22
Giiman Sinɛɓa Ijaagɛɛ Yeeseek
(Maa. 26:1-3; Mar. 14:1-2; Yow. 11:45-53)
1Saaɓak wɔɔŋkuɓa Ba'aal Nasiyoŋk sinɔ riyɛ kɛ ɗoyiɗoŋkuk. 2Nɛɓa ɔɗɔweer tapa ŋaadiyɛɛkoŋk a rɔɔriytaanak higi Muuseek warɛr Yeeseya gopan sinɔ ɓokoturɗu dugeeɗik, agut sinɔɓa ɓurerɗi joopuk.
Doomɛ Yuuda Gaɓɛ Yeeseek
(Maa. 26:14-16; Mar. 14:10-11)
3Saaɓak nomtaanakɛ sigaagɛ aarin a pɛɛyk a omoŋ, Askorotu Yuudaa guugunygeeɗɓa setan. 4Nɛɓa kɛɛ son lak ɔɗɔweer tapa ŋaadiyɛɛkoŋk a ɔɗɔweer koortaanak Gode sinɛ Geetitank nɛ kaar waasiɗiigeeɗ ɔɔtɛ sinɔ gaɓɛɛɗ sɛɛga Yeeseek. 5Nɛɓa sɛɛga yaa any sinɛ nɛ mɛyigeeɗ ɔɔtɛ sinɔ kɛnɔ gaɓɛrgeeɗ worik. 6Mɛyigeeɗɓa Yuuda a sɛɛg nɛ warɛ gopan sinɔ yaageeɗ kɛnɔ gaɓɛ Yeesee a kir joop sigɛ ɓɔɔkaak taanta.
Ɗama Ba'aal Ɗoyiɗoŋk
(Maa. 26:17-25; Mar. 14:12-21; Yow. 13:21-30)
7Saadi baŋiya gayɛɓa Ba'aal Nasiyoŋk sinɛɓa ŋɔɔlɛɛɗɛ jiŋkuy Ba'aal ɗoyiɗoŋkuk. 8Nɛɓa Yeese wosɛyɛ Petros a Yowanis kɛ, "In tina kɛɛɗɛ ragadɛ ɗama ajigeyoŋk Ba'aal Ɗoyiɗoŋk nɔkɔɔ ɗamii."
9Nɛɓa sɛɛk tonurgeeɗ kɛ, "Ɗɛyin ana kɛɛɗii ragadii eet?"
10Nɛɓa sɛŋk tonu sɛɛga kɛ, "Saakɔɔ mɛlɛrɗɔ katamɛyaak, nɛkɔɔ laŋirkɔɔ iɗit sinɔ lak kebet maawoŋk ŋoɗokuk. Nɛ in nomɛɛɗɛ mɛlɛɛɗa waa sinaana guugunygeɗik, 11nɛ in tonɛɛ ɗumaata waa kɛ, 'Tonuna rɔɔriytaan kɛ, Arnɔ eet gode konanoŋk sinɛkɔɔ ɗamiɗii Ba'aal Ɗoyiɗoŋk ajigeyoŋk eet a nomtaanak gaaŋk?' 12Yaaŋɛkɔɔ kɔna sɛŋk pook sinɔ bakaanyŋɔŋk sinɔkan ragadɛɛ a kan epatɛɛŋɔŋk. Nɛ in tina ragadɛ saadi.' "
13Nɛɓa sɛɛk kaar nɛ kaar laŋirki a ɓɛɛlɛ oko sinɛkɔ sɛɛga toniiɗ Yeeseek, nɛ ragadir ɗama ajigeyoŋk ɗoyiɗoŋk saadi.
Kiiwu A Tuu Sigɔ Geetitaanakik
(Maa. 26:26-30; Mar. 14:22-26; 1 Kor 11:23-25)
14Saaɓa gayɛɛɗ sayiti nɛɛkɛkik, nɛɓa Yeese beeɗir a nomtaanak gɛɛŋk nyon ɗamatoŋk agut omoŋ. 15Tonuɓa sɛɛga kɛ, "A in kiika laŋiiɗ rakatɛ ɗɛyakɔ jɛt a ɗamii ɗama sini ajigeyoŋk Ɗoyiɗoŋk a iinak agut omoŋ. 16Tona kɔnaaŋ, nɔkoy yaaŋɛɛɗɛ any sini dugaaŋɔŋk eekeer gɛɛŋk burɛɛ Waakoyotoŋkuk kaakoy ada kɛkar ɗama sini ajigeyoŋk Ɗoyiɗoŋk."
17Boŋuɓa Yeese tuu nɛɛk, nɛ pɔɔsɛ Waakoyo nɛ tonu sɛɛga kɛ, "Iyook any sini, in kaakasɛ nɔ utɛɛ. 18Tona kɔnaaŋ, a tukiɗi sisɔ mɛlɛɛɗa nɔkoy mɛlkiɗ burɛ Waakoyotoŋkuk kaakoy tuu kɛkar soortan taamɛ sigi wɛynik."
19Nɛɓa ɓɔŋgɔɔrɛ kiiwu nɛɛk, nɛ pɔɔsɛ Waakoyo, nɛ ŋapati, nɛ gaɓɛ sɛɛga nɛ tonu sɛɛga kɛ, "Ege sini buusɛ naak sinɔ gaɓɛɛ iinakaak. In kokoɓkuɗɛ eet." 20Nɛɓa ɓɔrɛ ɗamat sinaanɛ ajigeyoŋk baŋiya, ɓɔŋgɔɔrɛ tuu nɛɛk, nɛ tonu sɛɛga kɛ, "Tuu sini kuumeet sinɔ tɔɔnuk sinɔ dusanɛɛ agut yɛrom naak, sinɛkɔɔ gupatɗiik agut iinakik. 21Mayakana in dɛnɛɛko iɗit sinɛ kɔɔtu gaɓɛk ari nɛɛk ant ɗamatoŋk a eet agut omoŋ. 22Tɔɔn Etoŋk oko sinɛɓa toniiɗɛ jeemɛk ŋaarkɔɔ reta, mayakana duri kɔɔ eta sinaanakɔɔ gaɓɛ sɛɛnik." 23Nɛɓa sɛɛk nomtaanak gɛɛnɛ kɔniniyi ɛkanɛɛkɛ gɛŋk kɛ, "Eteŋkɛ kɔɔr wooɗ sinɛkɔɔ ijaag any sinik?"
Wooɗ Sinɛ Kaalɗi Joope Baŋɛk?
24Saadi tukerɓa sɛɛk palamɛ ɛkanɛɛkɛ gɛŋk kɛ, "Wooɗ sinɛ kaalɗi eteŋkɛ baŋɛk?" 25Nɛɓa Yeese tonu sɛɛga kɛ, "Suumiyɛ ɗoo sinik latu ɓaŋkawuka joope sigaagɛ ɓɔɔkaak raŋk. Suumiyɛ riyɛ sɛɛg kɛ joop sigɔ ijaagir any sinɔ mentanŋɔŋk joopa sigaaga ɓɔɔkaakik. 26Mayakana iinakɛ kɔɔr kat ɓɛɛlɛ oko sinik, ma iɗit sinɛ obi iinakɛk in ito tɛmŋ, ma iɗit sinɔ ɔɗɔwenk in dakɛ a ito ijaagen. 27Iɗit sinɔ beeɗ nyon ɗamatoŋkuk a iɗit sinɔ ijaagɗi ɛtɛɗɔɔgɛk kaalɗi wooɗ? Moko iɗit sinɛ beeɗ nyon ɗamatoŋkuk? Mayakana saak ɓɛɛla iinakɛ kɔɔr a ito eet ijaagen om. 28Rakatɛɛrkɔ sɔɔk a eet agut omoŋ rakatɛɛ naakɛ baŋɛ. 29Suumakoy kɔnu burɛɛ oko sinɛkanti suumeeɗ Baabɛɛk. 30Beeɗiirkoy burɛɛ nyon ɗamatoŋk nɛ ɗamikariŋ nɛ utiɗiikariŋ, beeɗiirkoy barsumatɔkɛ raŋk nɛ pɛrɛdɛɛr komoyeerɛ Israeelik sigaagɛ aarin a pɛɛyk."
Tonkun Yeese Ɔɗɔɔkɛ Kɛ Kaadɛkɔɔ Sɛɛn Petrosuŋ
(Maa. 26:31-35; Mar. 14:27-31; Yow. 13:36-38)
31Tonuɓa Yeese kɛkar kɛ, "Iin Simion, Simion, dɛnko, ɗɛyɛ kɔkɔnu setan peyana oko sini peyɗɛ sindeek. 32Yakana saak ɗanɗamaaka kɔna kɛnɔ kat badɛr ŋaadiyɛ goonɛk. Saakɔɔ weerikiɗin tikiyɛɛkɛ Waakoyotak baŋiya, ari masookoyak a in ɓaŋkaawurar."
33Nɛɓa Simion tongeeɗ kɛ, "Suumi naakɛ, ragadakɔ saak ɛɛk kɛnɔ kɛɛɗii eet a iin godeya korkoɗɔɔnoŋk ɛ kɛnɔ rɛɛra."
34Yakanaɓa Yeese tongeeɗ kɛ, "Iin Petros, tona naaŋ, ɓenyse a inkɔɔ ki ɗooran koogelees, kaadin kɔɔtu agut jiit kɛ, 'Kaa ɗegerɔɔn."
35Saadi baŋiya kɔɔniyɓa sɛɛg Yeese kɛ, "Saakan kɔnu wosɛyɛɛɗa a kɔne kɛɛ kosɛ, a wooj, a saamɛyɛk, lakɛ any sinɔkan kɔne bitakɗiiŋɔŋkuŋ?"
Nɛɓa sɛɛk jumurargeeɗ kɛ, "Kɛɛ any sinɔkan tine bitakɗiik."
36Nɛɓa sɛŋk tonu sɛɛga kɛ, "Sisɔ iɗit sinɔ lak kosɛk maŋk woojuk, in gaamuɗ. Iɗit sinɔ kiiɗɛ aarɛk, in ɓalɗi abiye nɛɛkɛ nɔ ɓali aarɛ. 37Tona kɔnaaŋ, ɗɛyɛ a dusanɛɛ eete any sinɛɓa taapɛɛ Wargatɛɛ Waakoyotoŋk kɛ, 'Ikomɛɛ a joop sigɔ tikitaanakik. Any sinɛɓa taapɛɛ agut eetik gayɛkɔ pedtan nɛɛkɛ eekeerɛ."
38Nɛɓa nomtaanak gɛɛnɛ tonurgeeɗ kɛ, "Suumi naakɛ, lakɛ seedi aarɛyɛ a pɛɛy.'
Nɛɓa sɛŋk tonu sɛɛga kɛ, "Gayɛrŋ."
Ɗanɗama Yeese Dɛbirɛ Jɛyte
(Maa. 26:36-46; Mar. 14:32-42)
39Ŋaarɓa Yeese oko sinɛɓa barɛɗik nɛ kɛɛ kurkuma Dɛbirɛ Jɛytik, nɛɓa nomtaanak gɛɛnɛ kaar a sɛɛn agut omoŋ. 40Saaɓa mɛlɛrɗi saanak, nɛɓa tonu sɛɛga kɛ "In ɗanɗamaakɛ kɛnɔ mokɔɔ guugunyari paariita." 41Nɛɓa sɛŋk sɛɛge wide ɛɛk a yowɛɛɗ a ito baalɗiiɗɛ giɗee, nɛ ɛtɛ korontunɛ nɛ ɗanɗamaaŋ. 42Ɗanɗamaaɓa kɛ, "Iin Baabɛɛ naak, ɔkɔn ɗɛyan nookuŋ, widite tuu sini rakatɛyoŋk. Mayakana in ɓɛɛlɛ oko ɗɛyan nook, ma kat ɓɛɛlɛ oko ɗɛyan naak." 43[Nɛɓa yaaŋageeɗ ɛɛk wosɛytaan rakaay nɛ ari sɛɛn a ɓaŋkaawurŋ. 44Ɓakɛyɗiɓa jɛt, nɛɓa ɗanɗama a ɓaŋkawuŋ, tamkuɓa tɔkiyan nɛɛkɛ ɗooka a ito yɛrom.]
45Nɛɓa ŋaarki ɗanɗamɔɔn nɛ kus son lak nomtaanak gɛɛŋkik, nɛɓa laŋki sɛɛg a ɗeegararŋ agut sinɔɓa sanɗiɗ a ɓaŋkawŋɔŋk. 46Nɛɓa tonu sɛɛga kɛ, "Ɗeegarari agut jikon? In ŋaarɛ raŋana nɔ ɗanɗamaakɛ kɛnɔ mokɔɔ guugunyari paariita."
Gaamur Yeesee Gumaaker Gɛɛnɛk
(Maa. 26:47-56; Mar. 14:43-50; Yow. 18:3-11)
47Saaɓa Yeese arkiɗ waasiyɛɛkɛk, nɛɓa mɛlɛrki joop a ɓɔɔkaaŋ, ɗɔkiikɓa sɛɛg Yuudaa, nomtaanakɛ sigaagɛɓa aarin a pɛɛyk om, nɛɓa wideer ɛɛk son lak Yeeseek kɛnɔ samɓoy. 48Yakanaɓa Yeese tongeeɗ kɛ, "Iin Yuudaa, gaɓun Tɔɔn Etoŋk samɓoyɔɔn?"
49Nomtaanak gɛɛŋk ɔgɔ sigɛɓa sɛɛg a Yeeseek mermenarɓa ɔɔtɛ nɛɛk, nɛ tonurgeeɗ kɛ, "Suumi naakɛ, kɛkɛtii sɛɛg aarɛyɛkɛɛŋ?" 50Nɛɓa sɛɛge iɗit omaay kɛtɛ nɛ yawuku weena ijaagen sinɛ ɔɗɔwen tapa ŋaadiyɛɛkoŋkuk gɔɔ sinɛ ɗiɗikik.
51Nɛɓa Yeese tonu kɛ, "Kat, kat ijaagɛ kɛkar oko sinik!" Nɛɓa kume weena sinɛ iɗit sinɛk nɛ ebɔdɛŋ.
52Saadi baŋiya ɔɗɔweer tapa ŋaadiyɛɛkoŋk a ɔɗɔweer Gode sinɛ Geetitank a gutarɛyɛ sigɛɓa kurak kɛnɔ gaamur Yeeseek tonuɓa sɛɛga kɛ, "Kurakɔɔ a aarɛyɛ a gumboyiik kɛnɔtu gaamiir a ito gaamɛ iɗit sinɔ sɔɔkɛ ɓɛɛlɛtik?" 53Saakan eet a iinak agut omoŋ ɓɛɛnyɔwɛ gɛɛŋk baŋɛ Godeey sinaanɛ Geetitank, nɛ kanti kiir ɓeesɛ. Yakanaɓɔ sisɔ ɔɔtɛ noŋk, a ɔɔtɛ ɓaŋkawuka nyuuguroŋk."
Kaadɛ Petros Yeesee
(Maa. 26:57-58,69-75; Mar. 14:53-54,66-72; Yow. 18:12-13,25-27)
54Saadi baŋiya gaamurɓa Yeesee nɛ diilerŋ nɛɓa kaar gaɓɛɛtar keera sinaana ɔɗɔwen tapa ŋaadiyɛɛkoŋk. Maɓa Petros nonomɗu baŋi a yowɛɛɗiŋ. 55Adirɓa joop gɛɛnɛ maɗ keer nɛɛkɛ tak nɛ beeɗir agut omoŋ, nɛɓa mɛlki Petros nɛ beeɗir agut omoŋ maɗ ad. 56Saaɓa Petros beeberɗi maɗ adik, nɛɓa dɛnɛɛr sɛɛn peet om sinɔ ijaagenk. Nɛɓa mermen nɛ tonu kɛ, "Iɗit sini sɛɛnkɔ a Yeesee."
57Yakanaɓa sɛŋk Petros kaadɛ kɛ, "Iin jarti sini, kaa ɗegerɔɔn!"
58Nɛ a balaaŋ dɛnɛɛr sɛɛn iɗit om nɛ tongeeɗ kɛ, "Ege sɛɛge omaay iin."
Yakanaɓa Petros tonu kɛ, "Iin iɗit sini, moko eet!"
59Nɛ beeɗir a sayiti omoŋ nɛ iɗit omaay tonu a ɓaŋkawuŋ kɛ, "Ege sini iɗit Gɛlilaak. Sɛɛnkɔ a sɛɛn eekeerɛ."
60Yakanaɓa Petros kaadɛ kɛ, "Iin iɗit sini, kaa ɗegerɔɔn any sinɛ tonunk!" A inɓa ar toniiɗ any sinik, nɛ sisa ɗooru koogele. 61Nɛɓa Suumi Yeese kolɛɛnyɛ nɛ mermen Petros. Koɓukuɓa Petros sisa any sinɛkɔ tongeeɗ Suumi Yeese kɛ, "Ɓenyse a in ki ɗooran koogelees, kaadin kɔɔtu agut jiit." 62Nɛɓa ŋaariri walasa nɛ kuɗe jɛt.
63Joop sigɛɓa gaamur Yeeseek daraayɛrɓa sɛɛn nɛ bibitarŋ. 64Miinyerɓa taamɛ gɛɛŋk nɛ kɔɔniyar kɛ, "Waasitɔ pɛrka paaŋini wooɗ?" 65Nyɔɔnarɓa olaatɛ sigɔɔgɛ ɓɔɔkaaŋɔŋk.
Wideerɛɛ Yeesee Joopa Sigɔɔga Gaɓɛr Woorank
(Maa. 26:59-66; Mar. 14:55-64; Yow. 18:19-24)
66Saaɓa aayirkiɗik, tolɗiiɓa gutarɛyɛ joop sigɔ gaɓɛr woorank a ɔɗɔweer tapa ŋaadiyɛɛkoŋk a rɔɔriytaanak higi Muuseek agut omoŋ nɛɓa ɗɔkarki Yeesee taamɛka joop sigɔ gaɓɛr woorank. 67Nɛɓa tonurgeeɗ kɛ, "Ton tina. Iin Keresee?" Nɛɓa sɛŋk tonu sɛɛga kɛ, "Kɛygunkɔna tonkaayaaŋ, nɛti kiir ŋaaɗiit. 68Kɛygunkɔnu kɔɔniykaayaaŋ, nɛta kiir jumureet. 69Mayakana a tukiɗi sisɔ, Tɔɔn Etoŋk beeɗkɔɔ ɗiɗikakɛ Waakoyotoŋk nyon sinaanɛ lak ɓaŋkawukaak."
70Nɛɓa sɛɛg baŋɛ kɔɔniyar kɛ, "Anɛ iin Tɔɔn Waakoyotoŋk?"
Nɛɓa sɛŋk tonu sɛɛga kɛ, "Eet sɛɛn oko sinɛ tonurɗɔɔk."
71Nɛɓa sɛɛk tonur kɛ, "Ɗɛyɛ tina sisɔ waasiyɛ ɔgɔ kɛ jikonak? Tiyiikɔ pɛɛni sinɛkɔ tonu ad nɛɛkɛkiŋ."
वर्तमान में चयनित:
Lukaas 22: KSTM
हाइलाइट
शेयर
कॉपी
Want to have your highlights saved across all your devices? Sign up or sign in
