Lukaas 20

Kɔɔniyɔn Agut Ɓaŋkawuka Yeeseek

(Maa. 21:23-27; Mar. 11:27-33)

1Ɓeny omalte saaɓa Yeese rɔɔriyɗi joop sigɔ ɓɔɔkaaŋɔŋk Godeey sinaanɛ Geetitank, saaɓa waasɛɗ Pɛɛni sinɔ Ɓɛlkɛɛstank, nɛɓa tolɗi ɔɗɔweer tapa ŋaadiyɛɛkoŋk a rɔɔriytaanak higi Muuseek a gutarɛyɛ agut omoŋ nɛ kurak son lak sɛɛnik. 2Nɛɓa sɛɛk kɔɔniyar kɛ, "Ton tina! Ijaagin ola sigi baŋɛ ɓaŋkawukaat jikoŋk? Makanna gaɓi ɓaŋkawuka nɛɛk wooɗ?"

3Nɛɓa Yeese jumur sɛɛga kɛ, "Kɔɔniyaɓɔra kɔnu kɔɔniyɔɔn a omoŋ. Inta jumurɛɛko. 4Aadi sinɛɓa aadiɗiiɗ Yowanisik kusɓa Waakoyote, maŋk joope?"

5Nɛɓa sɛɛk tonɗi ɛkanɛɛkɛ gɛŋk kɛ, "Ɔkɔnkɔɔ tonii kɛ, 'Waakoyoteŋ,' nɛkɔɔ tina tonu kɛ, 'Nɛ kiir ŋaadiit sɛɛn agut jikon?' 6Maa ɔkɔnkɔɔ ɓɔrɛ tonii kɛ, 'Joopeŋ,' nɛkɔɔ tin joop sigɛ ɓɔɔkaak baabaalar giɗeekɛ, agut sinɔ joop baŋɛ ŋaadirɗi Yowanis kɛ iɗit pɛrkaakoŋkuk."

7Agut sini nɛɓa sɛɛk jumurargeeɗ kɛ, "Kii ɗegerɔɔn kɛ eetɓa."

8Nɛɓa Yeese tonu sɛɛga kɛ, "Kaa ɓɔra kɔna toniiɗ kɛ ijaaga ola sigi ɓaŋkawukaat jikoŋk."

Rɔmɛ Ijaageer Taamɛ Wɛynik

(Maa. 21:33-46; Mar. 12:1-12)

9Saadi baŋiya tonuɓa Yeese rɔmɛ sini joopa sigaaga ɓɔɔkaak kɛ, "Ijaagɓa iɗit omaay taawa wɛynik, nɛ gaɓɛ ijaageera kɛnɔkoy kaasiɗi, nɛ ŋaar ɗooka omalta, nɛ beeɗiir kɛ many. 10Saaɓa gayɛɗ ɔɔtɛ ɗootaanoŋkuk, nɛɓa wosɛyɛ ijaagen nɛɛk son lak ijaageer gɛɛŋk taawa wɛynik kɛnɔ kɛ boŋgeeɗ taamɛ sigɛ wɛynik gɛɛŋk. Yakanaɓa ijaager sigɛ taawa wɛynik ɗiŋer ijaagen nɛɛk, nɛ ɔɔyɛr a ɓɛɛlɛ arnɛ. 11Nɛ wosɛyɛ ijaagen nɛɛk om kɛkar, yakanaɓa ijaager sigɛ taawa wɛynik ɗiŋer, nɛ daraayɛr, nɛ ɔɔyɛr a ɓɛɛlɛ arnɛ. 12Nɛɓa wosɛyɛ ijaagen nɛɛk jiiteen nɛɛk kɛkar. Nɛ ijaager sigɛ taawa wɛynik ɗiŋer a lak doosoy nɛ oriitar walasa.

13"Nɛɓa ɗuma sinɛ taawa wɛynik tonu kɛ, 'Araa sisɔ jikon?' Wosɛya tɔɔn naak sinɛ poraak kaɗɛɛŋkɔɔ eemɛyar sɛɛniŋ.

14"Yakana saaɓa ijaager gɛɛnɛ sigɛ taawa wɛynik dɛnɛrɗi tɔɔn nɛɛkik, nɛɓa tonur ɛkanɛɛkɛ gɛŋk kɛ, 'Ege sini sinɛkɔɔ boŋu ɗoo nɛɛkik, in kusɛɛ nɔ kusii ɓokotii nɔkɔɔ boŋii ɗoo nɛɛk.' 15Nɛɓa boŋiitar taawoy sinaanɛ wɛynik walasa nɛ ɓokoturŋ.

"Sisɔ gayikɔna a ari ɗumaat sinɛ taawa wɛynik jikon? 16Mɛlki ɗuma sinɛ taawa wɛynik nɛ ɓokor ijaageer sigɛ taawa wɛynikiŋ nɛ gaɓɛ taawa nɛɛk ijaageera ɔgɔɔka." Saaɓa joop sigɛ ɓɔɔkaak tiyɛrɗi any sinik, nɛɓa tonur kɛ, "Katrɔ ɓɛɛlɛ any sinɔ ito sinik.

17Nɛɓa Yeese mermen sɛɛg nɛ tonu sɛɛga kɛ, "Anɛ sinɛɓa taapɛɛ Wargatɛɛ Waakoyotoŋk kɛ,

'Giɗee sinɛɓa daraayɛr joop sigɛ kɛnyar godeyik giɗeekɛk,

dakɛ a giɗee sinɛ obiik sɛɛnik,' nɛ yaaŋɛ jikon?

18Iɗit sinɔ ɗiiriri giɗeeta sineena raŋanaak ŋuuŋuliiŋ, ma iɗit sinɛ ɗiirirgeeɗ giɗee nɛɛkɛkik nɛ rɛɛmaŋ."

19Rɔɔriytaanak higi Muuseek a ɔɗɔweer tapa ŋaadiyɛɛkoŋk agut sinɔɓa ɗegerarɗi kɛ tonu Yeese rɔmɛ sini agut sɛɛgik, nɛɓa sayitii sinaanɛ ɗɛyɛr gaamita. Yakanaɓa ɓurer joop.

Kɔɔniyar Joop Paarisik Yeesee Agut Koyi Gibiriyoŋk

(Maa. 22:15-22; Mar. 12:13-17)

20Nɛɓa koorɛr ɔɔtɛ sinɔ yaa sɛɛga kɛnɔ gaamur Yeeseek. Warɛrɓa sɛɛne pɛɛnii sinaanɛ waasɛk pɛɛni sinɔ gayɛ sɛɛga kɛnɔ gaɓɛr suumiya kɛnɔ goopɛɛk. Nɛɓa wosɛyɛrgeeɗ joop ɗegeej a ito joop sigɔ mentaanaŋɔŋk. 21Nɛɓa joop gɛɛnɛ kɔɔniyar kɛ, "Rɔɔriytaano, ɗegerii kɛ tonɗiikin a rɔɔriyaaɗin eekeer, mermenin joop baŋɛ a koɓi omoŋ, rɔɔriyaaɗin gopan Waakoyotoŋk eekeerɛ. 22A ton tinako! ɗɛyɛ a koyɛɛ gibiri Keesaaraaŋ maŋk ki ɗɛyɛ?"

23Nɛɓa sɛŋk ɗeger koɓi nɛŋk sinɔ ŋɛɛwɛnŋɔŋk nɛ tonu sɛɛga kɛ, 24"Inta yaaŋɛɛ wori nɛɛk. Ege sini dɛnɛɛ worii sineene raŋk tipi wook? Ma sigɛɓa taapɛɛk tiriya wook?"

25Nɛɓa sɛɛk tonurgeeɗ kɛ, 'Keesaarik.'

Nɛɓa tonu sɛɛga kɛ, "Sisɔ in gaɓɛɛ Keesaarik Keesaara, ma Waakoyotoŋk Waakoyota."

26Agut sini kirɓa oolɛ a kaŋir ant sinaanɛ tonuk joope taamɛkɛ. Reemɗiɓa ɓayɛtun gɛŋk agut any sinɛ jumurk, nɛ dakɛr kɛ many.

Palamɗi Joop Saaduukuk A Yeesee Agut Ŋaarin Ret Walsak

27Widerkiɓa ɛɛk joop Saaduukuk a omoŋ omoŋ son lak Yeeseek. Ŋaadir joop Saaduukuk kɛ kɛɛ iɗit sinɔkoy ŋaarki ret walasak. 28Nɛɓa kɔɔniyar Yeesee kɛ, "Rɔɔriytaano, tonuɓa tina Muuse kɛ, 'Ɔkɔn iɗit omaay rɛr, makan jarti nɛɛkɛ kiigeeɗ ɓartɛɛt tɔɔnuŋ, nɛ in manya boŋu jarti iɗit sinɛkɔ rɛrk nɔ tuuke komoy nɛɛk. 29Lakɛɓa masiikeenak a tula pɛɛy. Nɛɓa sinɛ bɔɔlɔŋk boŋu jarti nɛ rɛr, makan kiigiɗɛ ɓartɛɛt tɔɔn. 30Maɓɔrɛ pɛɛyeen nɛɛk oko sinɛk. 31Nɛ ɓɔrɛ jiiteen nɛɛkɛ boŋuŋ, boŋurɓa a getu tula pɛɛy momogunɛɛkɛ nɛ rɛrɛrar, ma sɛɛga kɛɛ ɓartɛɛt tɔɔmɔk. 32Nɛ pediya nɛɛka rɛr iɗit sinɛ jartik. 33Sisɔ agut sinɔkan boŋurɗu joop sigɛ tula pɛɛyk baŋɛ, saakoy ŋaarkiɗɛ ret walasak jartikoy wook?' "

34Nɛɓa Yeese jumur sɛɛga kɛ, "Joop ɗoo sinik boŋɗiiŋ waawurŋ. 35Ma joop sigɛ ɗɛyɛ sɛɛga a koy ŋaararki ret walasa nɛkoy beeɗiir ɗook sinaanɛkoy mɛlkik, kirkoy boŋɗiit kirkoy waawan. 36Kirkoy rerin kɛkar agut sinɔkoy ɓɛɛlɛrɗi oko wosɛytaanak Waakoyotoŋk. Agut sinɔkɔ ŋaararkiɗ ret walasak, sɛɛg tɔɔmɔk Waakoyotoŋk. 37Agut ŋaarin ret walsak yaaŋɛɓa Muuse waasiyɛɛkɛ sigaagɛɓa waasɛ sɛɛg agut maɗ sinɛɓa ar ɗuk sinaanɛk. Waasiyɛɛkɛ sigeege tak riyɓa Muuse Waakoyo kɛ Waakoyo Abrahamuk, Waakoyo Isiyaakik, Waakoyo Yaykoobuk. 38Agut sini ege Waakoyot Suumi bɔdtaanakoŋk, ma moko reteeroŋk. Beeɗirkoy sɛɛg baŋɛ wɛɛŋakɛ sɛɛna."

39Rɔɔriytaanak higi Muuseek a omoŋ omoŋ tonurgeeɗɓa kɛ, "Rɔɔriytaano, jumurunkɔ any sinɔ likik." 40Nɛɓa saadi baŋiya aasi kɛɛ iɗit sinɔ paari kɔɔniyɔɔnak.

Kɔɔniy Yeese Joop Paarisik

(Maa. 22:41-46; Mar. 12:35-37)

41Saadi baŋiya tonuɓa sɛɛga kɛ, "Tonur joop Keresee kɛ tɔɔn Daawitik ɛk? 42Agut sinɔ Daawit ɔɗɔwa nɛɛka tonuɓa Iiliyakɛ gɛɛnɛk kɛ,

'Tonuɓa Waakoyot Suumiya naaka kɛ,

Beeɗi ɗiɗikakɛ gaanɛk

43mɛlɛɛɗa nɔkoyna ariiɗa gumaakeer gooŋk

a atu derakɛ goonɛ goyse ɗeekik'

44Sisɔ ɔkɔn Daawit riy kɛ, 'Suumi naakiŋ', anɛ dakgeeɗ a tɔɔn nɛɛk ɛk?"

45Saaɓa joop sigɛ ɓɔɔkaak atukuɗ geleewɛɛ sɛɛnak, nɛɓa tonu nomtaanaka gɛɛna kɛ, 46"In koorɛ ɛɛk rɔɔriytaanakɛ higi Muuseek. Sɛɛg kadir abiyak sigɔ jeeɗuwatuŋɔŋk ɗɛyɛr weeweer gɔɔtaase kɛ gɔɔtaase sinɔɔnɛ gabiyeyoŋk, a boŋur digoy eemɛyɔɔnoŋk. Ɗɛyɛr barsum eemɛyɔɔnoŋk godeey tolɛɛɗoŋk. 47Sɛɛg arir godeyik jartiyatɔk sigɔɓa rɛrar babuy gɛŋkŋɔŋk, a ɓɛɛlɛr sɔkɔn. Ijaagir ɗanɗamɔn sinɔ jeeɗoŋɔŋk. Agut sini mɛlkikoy sɛɛga goopan sinɔ kaalɛŋɔŋk."

वर्तमान में चयनित:

Lukaas 20: KSTM

हाइलाइट

कॉपी