Lukaas 18
18
Jarti Sinɔ Kiiɗɛ Baabuyk A Iɗit Sinɛ Pɛrɛdɛk Ŋɛɛwɛnŋɔŋk
1Tonuɓa Yeese nomtaanaka gɛɛna rɔmɛ sini kɛnɔ in ɗanɗama ɓɛɛnyɔwɛ gɛɛŋk baŋɛ a kat bɔɔla. 2Tonuɓa sɛɛga kɛ, "Lakɛɓa katamɛɛ omalte iɗit pirdiyoŋk sinɔ ŋɛɛwɛnŋɔŋk sinɔɓa ki tuɓur Waakoyo ɛ ki eemɛyɔɔn joopuk. 3Ɛɓa ɓɔrɛ lakɛ jarti om sinɔɓa kiiɗɛ baabuyk katamɛɛ sinaanɛk. Nɛɓa sɛŋk ɛnyɛnyɛ son lak iɗit sinɛk nɛ tongeeɗ kɛ, 'Taaki tin agut palamɛ sinɔ lakii a kaarin naakik.' 4Nɛɓa iɗit sinɛ ki tɛɛnan boŋiɗ kɛ many. Nɛ saadi baŋiya kɛ koɓu ɓayaay nɛɛkɛ kɛ, 'Kɛygun kaa tuɓur Waakoyoŋ ɛ kɛygun kaa eemɛyɔɔn joopuŋ, 5ma jarti sini kiiɗɛ baabuyk agut sinɔta palamɗiɗŋɔŋk pɛrɛdigiɗaakɔɔŋ. Ma ɔkɔn kɔɔ kiigidaŋ nɛkɔɔ weeweriiki nɛkɔɔtu ooɗɛŋ."
6Nɛɓa Suumii tonu kɛ, "In tiyɛɛ any sinɛkɔ tonu ɔɗɔwen sinɛ moko likik. 7Joop Waakoyotoŋk sigɛ duriyer sɛɛna kaay a waawuyk ki sɛɛg tɔkɔny? Beeɗ Waakoyot kɛ many? 8Tona kɔnaaŋ, kɔnyɛ sɛɛg a gorgorŋ. Mayakana saakoy mɛlkiɗ Tɔn Etoŋkuk laŋkoy ŋaadiyɛ joope ɗookoŋkuŋ yoo?"
Iɗit Paarisik A Iɗit Sinɔ Yayawu Worik
9Joop sigɔ ikomur ɛɛk nɛŋk a ŋaadir kɛ mentaana taamɛkɛ Waakoyotoŋk ma daraayɛr joop ɔgɔɔŋɔŋk, tonuɓa sɛɛga Yeese rɔmɛ sini kɛkar kɛ, 10"Kaarɓa joop a pɛɛy ɗanɗamɔɔna Godeya sinaana Geetitank. Egeɓa omaay iɗit Paarisik, ma omaay iɗit sinɔ yayawu worik. 11Nɛɓa iɗit sinɛ Paarisik ɛtɛ nɛ ɗanɗama agut ɛɛk nɛɛk kɛ, 'Iin Waakoyo, pɔɔsaniŋ agut sinɔ moko sɛŋk eet iɗit sinɔ weeweeliŋɔŋk, ɛ moko eet tikitan, ɛ moko eet iɗit sinɔ ibiɗiiŋɔŋk, ɛ moko ito eet iɗit sini yayawu worik. 12Sooma ɗoŋikɛ sigɔɔgɛ tula pɛɛyk agut pɛɛy, boŋka asiraat ant sinaanɛ laŋaakiŋ.'
13"Maɓa sɛŋk iɗit sinɛ yayawu worik ɛtɛ a yowɛɛɗiŋ. Nɛɓa aasi ki ɗɛyɛ a ɓɔŋgɔɔrɛ taamɛ gɛɛŋk rakaayaŋ, mayakanaɓa paaŋi kokom nɛɛk nɛ tonu kɛ, 'Iin Waakoyo, eet sini tikitank, maariyreetik!'
14Tona kɔna kɛ sinɛɓa weeri nyaka nɛɛka a mentan taamɛkɛ Waakoyotoŋkuk, iɗit sinɛɓa yayawu worik, ma mokoɓa iɗit sinɛ Paarisik. Iɗit sinɔ ɓɔŋgɔɔrɛ ɛɛk nɛɛk rakaayak arkoy ɗook, ma iɗit sinɔ rikite ɛɛk nɛɛk ɗookak arkoy rakaay."
Geeti Yeese Tɔɔmɔk
(Maa. 19:13-15; Mar. 10:13-16)
15Ɗɔkarkiɓa joop tɔɔmɔk son lak Yeeseek kɛnɔ riiɓe sɛɛge ari raŋk. Nɛɓa nomtaanak gɛɛnɛ dɛnɛr joop sigɛ ɗɔkarki tɔɔmɔk gɛɛŋkik, nɛ koykoyɛr sɛɛgiŋ. 16Yakanaɓa Yeese riyki tɔɔmɔk gɛɛŋk son lak sɛɛnik nɛ tonu kɛ, "In kurak tɔɔmɔ son lak eetik. Kat ɓaarɗɛ sɛɛg agut sinɔ ege Burɛ Waakoyotoŋk joop sigɔ rikiter ɛɛk oko sinikik. 17Eekeer tona kɔnaaŋ, iɗit sinɔ ki boŋiɗ Burɛ Waakoyotoŋk okokɔ toomoŋk kikoy guugunyɔn saana adaktan."
Kɔɔniyɔn Iɗit Sinɔ Lak Worik
18Tonuɓa ɔɗɔwen Ayuuduk omaay Yeeseya kɛ, "Iin rɔɔriytan sini mentanŋɔŋk, dɔɔsta a araa jikon? Nɔkoy laŋiiɗa wɛɛŋa sigɛkoy nɔkoy nɔkoyk"
19Nɛɓa Yeese tonŋeeɗ kɛ, "Kɔɔniyinte any sinɔ mentanŋɔŋk agut jikon? Sinɛ mentank Waakoyo sinɛ omoŋɔŋk dakɛɗa. 20Ɗegerin sekiyɛ gɛɛŋkiŋ. Sɛɛg 'Kat ibiɗiikin, kat ɓokotɗikin, kat agalɗikin, kat waasin nyon, eemɛy ɓaaɓa a ŋaaŋa."'
21Nɛɓa iɗit sinɛ tongeeɗ kɛ, "Kooraaɓa sekiyɛ sigi baŋɛ a tukiɗi tɔɔnikent naakɛk."
22Saaɓa Yeese tiyɛɛɗ any sinik, nɛɓa tongeeɗ kɛ, "Ŋayɗiine sisɔ any a omoŋ. Ɓala ant sinaanɛ lakink baŋɛ, nɔ gaɓun sankaanaka, laŋinkoy gati nɛɛk dari. Nɛ saadi baŋiya, kusun nomkun eete."
23Yakana saaɓa iɗit sinɛ tiyɛɗ sinik, nɛɓa sanɗi jɛt agut sinɔɓa lakiɗ wori a obiiŋɔŋk. 24Nɛɓa Yeese mermen iɗit sinɛ nɛ tonu kɛ, "Morɛ ɓaŋkawu guugunyɔn burɛya Waakoyotoŋk joopa sigɔɔga latu worikiŋ! 25Ɔɔtɛ sinɔɔnɛ gun guugunyɗu iɗit sinɔ lak worik burɛya Waakoyotoŋkuk bala sinɔ guugunyɗu taga sinɔɔnɛ tool marpeyoŋkuk."
26Joop sigɛɓa tiyɛr sinik, tonurɓa kɛ, "Anɛkoy oolɛ a bɔdɛ wooɗ?"
27Nɛɓa Yeese tonu kɛ, "Any sinɔ ki gayɛ etaak gayɛ Waakoyotaŋ."
28Nɛɓa Petros tongeeɗ kɛ, "Ŋɔrkiikɔ any baŋɛ nɛ ne nomiiŋ."
29Tonuɓa sɛɛga Yeese kɛ, "Eekeer tona kɔnaaŋ, iɗit sinɔ ŋɔr gode nɛɛk maŋk jarti nɛɛk maŋk manyaakak maŋk ɛpɛn a ɛmɛs maŋk tɔɔmɔk gɛɛŋk, agut burɛ Waakoyotoŋkuk, laŋikoy a kaalɛŋ, 30eme sineene boŋu a suɗaktaanak ɓɔɔkaaŋ, maɓɔrɛ eme sinaanɛkoy mɛlkik laŋkoy wɛɛŋa sigɛkoy nɔkoyk."
Tonu Yeese Ɔɔtɛ Rer Nɛɛkik Kɛkar
(Maa. 20:17-19; Mar. 10:32-34)
31Boŋuɓa Yeese nomtaanak gɛɛŋk sigɛ aarin a pɛɛyk mowan nɛ tonu sɛɛga kɛ, "Sisɔ ŋaarii Yorsaleema. Dusanɛɛkɔɔ any sinɛɓa taapɛr joop pɛrkaakoŋk agut Tɔɔn Etoŋkuk baŋɛ. 32Gaɓɛɛkɔɔ Tɔɔn Etoŋk joopa sigaaga moko Ayuuduk. Nɛkɔɔ rɛɛsɛrgeeɗiŋ, nyɔɔnarkoyŋ, topɛpɛyargeeɗkoyŋ, ɗiŋerkoyŋ, nɛ ɓokoturŋ. 33Nɛkɔɔ sɛŋk ŋaarki ɗoŋikɛ sigɔɔgɛ jiitik ret walasa."
34Yakanaɓa nomtaana gɛɛnɛ kir ɗegerɔɔn any sinɛ tonuk. Nɛɓa kɛɛ any sinɔ omoŋɔŋk mɛlɛ sɛɛga seedik, dugiɗiiɓa sɛɛge any sinɛ dugaŋɔŋk totonukuŋ.
Ebɔdɛ Yeese Mot Om Iyaarkowe
(Maa. 20:29-34; Mar. 10:46-52)
35Saaɓa Yeese wɔɔŋkuɗ Iyaarkowaak, nɛɓa mot omaay beeber gopɛ kɛntɛɛ a kalɛlɛyiiŋ. 36Nɛɓa iɗi sinɛ motuk tiyɛ joop sigɛ ɓɔɔkaak saa ŋawiiterɗik, nɛ kɔɔniya kɛ, "Ege sini jikon?" 37Nɛɓa sɛɛk tonurgeeɗ kɛ, "Ɗoyu sineene Yeesee kɔ Naajreetik."
38Nɛɓa ooyɛ kɛ, "Iin Yeesee, Tɔɔn Daawitik, maariytik!"
39Nɛɓa joop sigɛ ɗoyur ɔɗɔɔkɛk koykoyɛr sɛɛn kɛnɔ dakɛ kɛ many, nɛɓa sɛŋk ooyɛ a kaalɛŋ kɛ, "Iin Tɔɔn Daawitik, maariytik!"
40Nɛɓa Yeese ɛtɛ nɛ tonu kɛnɔ ɗɔkɛ iɗit sinɛ son lak sɛɛnik. Nɛ saaɓa mɛlkiɗ son lak sɛɛnik, 41nɛɓa kɔɔniy kɛ, "Ɗɛyin ana ara jikon?"
Nɛɓa iɗit sinɛ motuk tongeeɗ kɛ. "Suumi naakɛ, ɗɛyaree dɛnɛ."
42Nɛɓa Yeese tongeeɗ kɛ, "Dɛna. Ebɔdɛr kɔnu ŋaadiyɛ goonɛŋ."
43Nɛɓa iɗit sinɛ dɛnɗi sisa, nɛ nomɛ Yeesee a eemɛy Waakoyo. Saaɓa joop sigɛ ɓɔɔkaak baŋɛ dɛnɛrɗi any sinik, nɛɓa pɔɔsɛr Waakoyo.
वर्तमान में चयनित:
Lukaas 18: KSTM
हाइलाइट
शेयर
कॉपी
Want to have your highlights saved across all your devices? Sign up or sign in
