Yowanis 7
7
Kɛɛ Yeese Yorsaleema Ba'aala Paapɛyoŋk
1Saadi baŋiya weeweriiɓa Yeese sinɔɔnɛ Gɛlilaak. Maɓa ki ɗɛyɛ a weeweri sinɔɔnɛ Yuudaakiŋ agut sinɔɓa ɔɗɔwer Ayuuduk ɗɛyɛrɗi ɓokotiitak. 2Wɔɔŋkuɓa Ba'aal Paapɛyoŋk. 3Agut sini wideetarɓa ɛɛk manyaakak Yeeseya son lak sɛɛnik nɛ tonurgeeɗ kɛ, "Kɛ nɔkɔɔ dɛnɛr nomtaanak goonɛ any sinɛ ijaagink ŋaari seedi nɔ kɛɛɗin ɗooka Yuudaak. 4Iɗit sinɔ ɗɛyɛ a ɗegerɛɛ sɛɛn kɛ ɗɔmk ki ijaagɛ ijaag nɛɛk dugeeɗ. Nɛ ɓɔrɛ saa ijaagiiɗin ola sigi baŋɛk, ɗɛyɛ a yaaŋin ɛɛk nook joopa ɗookoŋkuŋ." 5Nɔɓa tonurɗu sinik agut sinɔɓa aasi kirɗi sɛɛn ŋaadit manyaakak.
6Nɛɓa Yeese tonu sɛɛga kɛ, "In ki gayɛ ɔɔtɛ naakɛk sinɛ kɛɛɗaak, ma sɛŋk ɔɔtɛ noŋk yaa ɓɛɛnyɔwɛ gɛɛŋk baŋɛ. 7Joop ɗookoŋk kir oolɛ a ɓooyur iinakiŋ, ma sɛŋk ɓooyur eetiŋ agut sinɔ saak waasɛɗa ijaag nɛŋk kɛ tikiyɛɛk. 8In sɔɔk kɛɛɗɛɛ Ba'aala nɛɛka. Ma eet agut sinɔ ɔɔtɛ naakɛ sinɛ kɛɛɗaak, in kiiɗi gayɛɛk kaa deran Ba'aala sinaana." 9Tonuɓa sɛŋk sini, nɛ dakɛ Gɛlilaake.
10Yakana saaɓa manyaaka kaarɗi Ba'aala nɛɛkaakik baŋiya, nɛɓa sɛŋk kɛɛ Ba'aala nɛɛka dugeeɗ a mokoɓa kɛɛ a dɛnɛɛŋ. 11Nɛɓa warɛr joop Ayuuduk Ba'aale nɛɛkɛɛk kɛ, "Ar eet?" 12Joop sigɛ ɓɔɔkaak totoniiɓa yɛɛyɛgɛɛt agut sɛɛn. Tonurɓa ɔgɔɔk kɛ, "Ege sini iɗit sinɔ mentanŋɔŋk," ma ɔgɔɔk tonur kɛ, "Moko, iɗit sini ari joop a babadarŋ." 13Yakanaɓa ɓurer ɔɗɔweer Ayuuduk, nɛ kɛɛ iɗit sinɔɓa tonɗi agut sɛɛn a ɗegerɛɛŋɔŋk.
Rɔɔriya Yeese Ba'aale Paapɛyoŋk
14Ba'aale nɛɛkɛ kɔɔr kɛɛɓa Yeese Godeya sinaana Geetitank nɛ rɔɔriyaaŋ. 15Ɔɗɔweer Ayuuduk reemɗiɓa ɓayɛtun gɛŋk nɛ tonur kɛ, "Iɗit sini aɓa ki tamaarɛɛt nɛ ɗeger ola sigi baŋɛ ɛk?"
16Nɛɓa Yeese jumur sɛɛga kɛ, "Moko ar any sinɛ rɔɔriyaaɗaak sooy lak eetik, ma ar sooy lak Waakoyo sinɛkanti wosɛykik. 17Ɔkɔn lakɛ iɗit sinɔ ɗɛyɛ a ijaag any sinɛ ɗɛyɛ Waakoyotukuŋ, nɛ ɗeger kɛ laŋkɛɛɓa rɔɔriyɔn sini sooy lak Waakoyok maŋk kɛ tonɗiika eet dakɛɗa. 18Iɗit sinɔ tonɗi ɔɗɔwa nɛɛkaakik ɗɛyɛ eemɛyɔn ɔɗɔ nɛɛkik, ma iɗit sinɔ ɗɛyɛ eemɛyɔn iɗit sinɛkan sɛɛn wosɛykik eekerkan, kiiɗɛ nyon. 19Kiɓa kɔna Muuse gaamit higi? Nɛ yakana iinakɛ kɛɛ iɗit sinɔ ijaag higi nɛɛkik. Ɗɛyɛɛrti ɓokotiita agut jikon?"
20Nɛɓa joop gɛɛnɛ tonurgeeɗ kɛ, "Lakinre setan. Ɗɛyɛni ɓokotiita wooɗ?"
21Nɛɓa Yeese jumur sɛɛga kɛ, "Ijaagaakɔ any a omoŋ sinɔ reemɗi ɓayɛk, nɛkɔ kɔnu reemɗi ɓayɛtun iinak baŋɛ. 22Agut sinɔɓa gaɓɛɛɗ kɔna Muuse higi yawɛɛɗoŋkuŋ, nɛ sɔɔk yawɛɛr sasalɛ waawuy Sambatɛyoŋk Ayuudukuŋ. Laŋkɛɛɓa higi sini sooy lak ɔrɛyakik, ma mokoɓa sooy lak Muuseek. 23Sisɔ kɛnɔ kat sɔɔkɛɛ higi Muuseek, ɔkɔn yawɛɛ sasalɛ waawuy Sambatɛyoŋkuŋ, anɛ agut sinɔ saak ebɔdɛɛɗa iɗit ɛɛk nɛɛk baŋɛ waawuy Sambatɛyoŋkuk, nɛti ɓooyiir agut jikon? 24In pɛrɛdɛɛ ete raŋk any sinɔ likik, ma kat pɛrɛdɛɛ any ete raŋk ma dɛnɛɛ taamɛ gɛɛŋk.
Ege Yeese Keresee
25Joope Yorsaleemuk a omoŋ omoŋ tonurɓa kɛ, "A mokokɔ ɗɛyɛr ɓokotiita iɗit sini Ayuuduk?" 26Tonɗi sɛŋk sisɔ a ɗegerɛɛŋ, nɛ sɛɛk kɛɛ any sinɔ tonurgeeɗik. Ɗegerar ɔɗɔwer eekeerɛ kɛ ege iɗit sini Kereseeŋ? 27Yakana seek ɗegerii kɛ kusɓa iɗit sini eetiŋ, ma sɛŋk Keresee saa mɛlkiɗik kɛɛ iɗit sinɔ ɗegeera kɛ kus eetik.
28Tonuɓa Yeese a ɗooruŋ saaɓa rɔɔriyaaɗ Godeey sinaanɛ Geetitank kɛ, "Ɗegerari eetiŋ ɛ ɗegerari kɛ kusaakan eetiŋ. Mayakana mokokan kusa ɓaŋkawukaat naakɛk. Eekerkan Waakoyo sinɛkanti wosɛykik kiir sɔɔk ɗegerɔɔn. 29Ma saak ɗegeraaŋ agut sinɔkan kusuɗa sooy lak sɛɛnik ɛ kanti wosɛyki sɛɛnik.
30Saaɓak ɗɛyɛrkɛɓa gaamita, yakana agut sinɔɓa kiiɗ gayɛɛ ɔɔtɛ nɛɛkɛkik nɛ kɛɛ iɗit sinɔɓa gaamɗiik. 31Joope gɛɛnɛ ŋaadirɓa sɛɛn a ɓɔɔkaaŋ, tonurɓa kɛ, "Saakoy mɛlkiɗ Kererseek ijaagkoy sɔɔriyɛ a kaalɛ sigi ijaag iɗit sinik?"
Wosɛyɛɛ Amaasiniyɛ Kɛnɔ Gaamur Yeesee
32Tiyɛrɓa joop Paarisik a totoni joop yɛɛyɛgɛɛt agut Yeesee, nɛɓa ɔɗɔwer tapa ŋaadiyɛɛkoŋk a joop Paarisik wosɛyɛr amaasiniyɛ kɛnɔ gaamur sɛɛn.
33Saaɓak tonuɓa sɛɛga Yeese kɛ, "Beeɗiikɔɔ eet a iinak a bala ɔɔtɛ nɛɛkɛɛŋ, makɔɔ saadi baŋiya ŋaara son lak Waakoyo sinɛkanti wosɛykik. 34Iinak warɛɛr kɔɔtuŋ, yakana kɔɔtu kiir laŋiiɗ kiirkɔɔ oolɛ mɛlɛɛtaarɔ saana arkiɗaak."
35Ɔɗɔweer Ayuuduk totoniiɓa ɛkanɛɛkɛ gɛŋk kɛ, "Iɗit sini ŋaarkɔɔ etena nɔkɔɔ kiɗii laŋiiɗik? Kaɗɛɛŋkɔɔ kɛɛ son lak tekaaneer gaŋk sigɛɓa kɛɛtiɗi nɔ beeɗir sinɔɔnɛ Giriikik nɔ kɛɛ rɔɔriy joop Giriikik? 36Saa toniiɗ kɛ, 'Iinak warɛɛrkɔɔtuŋ, yakanakɔɔtu kiir laŋiiɗ. Kiirkɔɔ oolɛ a mɛlɛɛtaarɔ saana arkiɗaak' sinɔ kɛ ɛkik?"
Maawu Wɛɛŋakoŋk
37Ba'aale nɛɛkɛ pediya waawuy sinaanɛɓa obiik sɛɛge baŋɛk, ɛtɛɓa Yeese nɛ tonu a ɗooruŋ kɛ, "Ɔkɔn lakɛ iɗit sinɔ lak paar maawoŋkuŋ, in kus son lak eetik nɔ utiɗi. 38Iɗit sinɔ ŋaadiɗi eeteek gonarkiɗ tuny maawu wɛɛŋakoŋkuk oko sinɛɓa toniiɗ Wargatɛ Waakoyotoŋkuk." 39Tonuɓa sini agut sinɔkɔɔ boŋurɗu Wɛɛŋa sigɔ Geetitaanakik sigɛ ŋaadir sɛɛnŋɔŋk. Inɓa kɛɛ gaamit Wɛɛŋa sigɔ Geetitaanakik agut sinɔ inɓa kiiɗi gayɛ ɔɔtɛ sinɔ eemɛyɗɛɛ Yeeseek.
Lakɛ Pakakat Joope Kɔɔr
40Joope gɛɛnɛ a omoŋ omoŋ saaɓa tiyɛrɗi pɛɛni sinik, nɛɓa tonur kɛ, "Ege sini Iɗit Pɛrkaakoŋk eekeerɛ."
41Tonurɓa ɔgɔɔk kɛ, "Ege sini Keresee." Ma ɔgɔɔk tonur kɛ, "Kus Kerese Gɛlilaake? 42Moko ɓato taapɛɛ Wargatɛɛ Waakoyotoŋk kɛ ɓartɛɛkoynɔ Keresee komoy Daawitik, ɛkoynɔ kus katamɛɛ Daawitik Beeteleheeme?' " 43Nɛɓa lakɛ pakakat joope gɛɛnɛ kɔɔr agut sɛɛn. 44Joop a omoŋ omoŋ ɗɛyɛrkɛɓa gaamita, yakanaɓa kɛɛ iɗit sinɔ gaamɗiik.
Kir Ŋaadiɗiit Ɔɗɔwer Ayuuduk Yeesee
45Saadi baŋiya weeriikɓa amaasiniyɛɛk son lak ɔɗɔweer tapa ŋaadiyɛɛkoŋk a joop Paarisik, nɛɓa sɛɛk tonur sɛɛga kɛ, "Kirkɔɔkɔ diilɛ agut jikon?"
46Nɛɓa amaasiniyɛ gɛɛnɛ tonur kɛ, "Inɓa kɛɛ iɗit sinɔɓa tonɗi oko sini tonɗiiɗ iɗit sinik."
47Nɛɓa joop Paarisik tonur kɛ, "Ari ɓɔrɛ iinak a babadariŋ? 48Lakɛ sɛɛn ɔɗɔweerɛ maŋk joope Paarisik joop sigɔ ŋaadir sɛɛnikiŋ? 49Joop sigi kir ɗegerɔɔn higi Muuseek, koonykaanak eekeerɛ."
50Joope Paarisik om Nikodimoos sinɛɓa kɛɛ jeemɛ son lak Yeeseek tonuɓa sɛɛga kɛ, 51"Higii naŋk iɗit om a inkɔ kɛɛ weenta any sinɔkɔ daariyɗiiɗɛɛk, a in ki ɗegerɔɔn kɛ ijaagkɔ jikon nɛ pɛrɛdɛɗɛɛŋ?"
52Nɛɓa tonurgeeɗ kɛ, "Iin ɓɔrɛ iɗit Gɛlilaak? Mermeni nɔ ɗegerin kɛ kiikikoy ŋaarin iɗit pɛrkaakoŋk Gɛlilaake." 53[Nɛɓa ŋaaŋarar nyakika gɛŋk a omoŋ omoŋ.]
वर्तमान में चयनित:
Yowanis 7: KSTM
हाइलाइट
शेयर
कॉपी
Want to have your highlights saved across all your devices? Sign up or sign in
