Yowanis 5
5
Ebɔdɛ Yeese Iɗit Om Sinɔ Nyɔŋtank Teel Beetɛ Jaataak
1Saadi baŋiya kɛɛɓa Yeese Yorsaleema agut sinɔɓa lakiɗɛ Ba'aal Ayuuduk. 2Lakɛɓa Yorsaleeme teel sinɔ riyɛ ad Ibiraystik kɛ Beetɛ Jaataak, Tugaat jiŋkuyɛɛkoŋk jɔk. Lakɛɓa saadi tugaateer a tuul sigɔ latu riik. 3Ɗuɗuŋarɓaɗe tugaateerɛ gɛɛnɛk gortaanak, a motak, a joop sigɔ jɔɔlɛytaanak eekeer gɛŋkik, a nyɔŋtaanak a ɓɔɔkaaŋ. [Kookorarɓa kɛnɔ yikiɗi maawu gɛɛnɛk. 4Agut sinɔ ɓɛɛnyɔwɛɛkɛ ɔgɔɔkɛ ɛnyɛnyɛkiɓa wosɛytan Suumiyoŋk teela nɛɛka nɛ yike maawu gɛɛŋk. Saa yikiɗiiɗ maawu gɛɛnɛkik baŋiya iɗit sinɛ gaɓɛɛr ɛɛk teela nɛɛka tukiik nɛɓa bɔduku goriɗakɛ sigaagɛ lakiŋ.] 5Lakɛɓa saadi iɗit om sinɔ mooyk sinɔɓa goru a emeyi ruumer iɗit a aarin a tula jiitik baŋɛk. 6Nɛɓa Yeese dɛnɛ iɗit sinɛ a ɗuɗuŋɗe saadi nɛ ɗeger kɛ goruɓa a jeeɗo ɔɔtɛ nɛɛkɛkiŋ, nɛ tongeeɗ kɛ, "Ɗɛyin bɔdɛɛŋ."
7Nɛɓa iɗit sinɛ gortank tongeeɗ kɛ, "Suumi naakɛ, saa yikiɗiiɗ maawu gɛɛnɛkik, nɛ kɛɛ iɗit sinɔtu boŋu nɔtu gaɓɛɛr teela nɛɛkaakik. Saa kɔrurkɛɛɗaak, nɛte ɗoyu iɗit om ɔɗɔɔkɛ."
8Nɛɓa Yeese tongeeɗ kɛ, "Ŋaar raŋana nɔ boŋun beeɗi nook nɔ ŋaarin."
9Nɛɓa iɗit sinɛ bɔdɛ sisa. Nɛɓa boŋu beeɗi nɛɛk nɛ ŋaarŋ. Ijaagɛɛɓa any sini waawuy Sambatɛyoŋk Ayuuduk. 10Agut sini tonurɓa ɔɗɔweer Ayuuduk eta sinaana kan bɔdukuk kɛ, "Ege ɓenyse waawuy Sambatɛyoŋk. Kina higii pɛgɛdɛɛt nɔ diilin beeɗi nook."
11Nɛɓa sɛŋk tonu sɛɛga kɛ, "Tonu kɔta iɗit sinɛ kɔtu ebɔdɛk kɛ, 'Boŋu beeɗi nook nɔ ŋaarin.' "
12Nɛ kɔɔniyar kɛ, "Wooɗ sinɛ kɔna tonu kɛ, 'Boŋu beeɗi nook nɔ ŋaarin'?"
13Yakanaɓa ki ɗegerɔɔn kɛ ebɔdɛkɔ sɛɛn wooɗ agut sinɔɓa Yeese wideeɗ ɛɛk nɛɓa gumerkiɗ joopa sigɔɔga ɓɔɔkaaŋɔŋk takanaak. 14Saadi baŋiya laŋkiɓa Yeese iɗit sinɛ Godeey sinaanɛ Geetitank nɛ tongeeɗ kɛ, "Bɔdukunkɔ sisɔŋ, nɛɓɔ kat ijaagin tikiyɛ a tukiɗi sisɔ kɛnɔ mokɔɔ laŋkin any sinɔ kaalɛ sinik." 15Nɛɓa iɗit sinɛ ŋaar nɛ kɛɛ tonu ɔɗɔweera Ayuuduk kɛ ebɔdɛkɔ sɛɛn Yeesee.
16Agut sinɔɓa Yeese ariiɗ any sini waawuy Sambatɛyoŋkuk, nɛɓa sɛɛn ɔɗɔweer Ayuuduk tuker epaayana. 17Yakanaɓa Yeese tonu sɛɛga kɛ, "Ijaagɗi Baabɛ ɓɛɛnyɔwɛ gɛɛŋk baŋɛ, maɓɔra ijaagɗikaaŋ." 18Waasiyɛ sigi moyurɓa ɔɗɔweer Ayuuduk a kaalɛŋ kɛnɔ ɓokotur Yeesee agut sinɔkan aalɛɛɗ waawuy Sambatɛyoŋkuk, ɛ agut sinɔɓa ariɗ ɛɛk nɛɛk a rɔma a Waakoyo a kaalɛŋɔŋk.
Ɓaŋkawuka Tɔɔn Waakoyotoŋkuk
19Jumurɓa sɛɛga Yeese kɛ, "Eekeer tona kɔnaaŋ, ki oolɛ Tɔn Waakoyotoŋk a ijaag any om ɔɗɔwa nɛɛkaakiŋ. Ijaag any sinɔkɔ dɛnɛ saa ijaagiiɗ Ɛpɛnaak dakɛɗa. Any sinɛ ijaag Ɛpɛnaak baŋɛ, ijaag ɓɔrɛ Tɔn nɛɛkɛɛŋ. 20Agut sinɔ poru Ɛpɛna Tɔɔn nɛɛkiŋ, yaaŋgeeɗ any sinɛ ijaagik baŋɛ. Yaaŋgeeɗkoy Ɛpɛna ola sigɔ kaalɛr sigik nɛkoy reemɗi ɓayɛtun goŋk. 21Oko sinɛ Ɛpɛna boŋkuɗ joop sigɛkan rɛrark nɛ sɛɛga gaɓɛ wɛɛŋak, nɛ ɓɔrɛ Tɔn nɛɛkɛ gaɓɛ wɛɛŋa eta sinaana ɗɛyɛk oko sinɛk. 22Kɛɛ iɗit sinɔ pɛrɛdɛɛɗ Ɛpɛnaak gaɓɛɓa ɓaŋkawuka pirdiyoŋk baŋɛ Tɔɔna nɛɛkaak, 23kɛnɔ joop baŋɛ eemɛyar Ɛpɛn ɛ kɛnɔ ɓɔrɛ eemɛyar Tɔɔn nɛɛk. Iɗit sinɔ ki eemɛyɔɔn Tɔɔn nɛɛkik ki eemɛyɔɔn Ɛpɛn sinɛkan wosɛyki Tɔɔn nɛɛkik.
24"Eekeer tona kɔnaaŋ, iɗit sinɔ tiyɛ pɛɛni naak nɔ ŋaadi Waakoyo sinɛ kanti wosɛykik lak wɛɛŋa sigɛkoy nɔkoy nɔkoyk. Kɛɛkoy sɛɛne pɛrɛdɛɛt ekaŋkikɔ sɛŋk ret bɔdɛɛɗa. 25Eekeer tona kɔnaaŋ, mɛlkikoy ɔɔtɛ sinɔkoy joop sigɛɓa rɛrark tiyɛrɗi koŋgoy Tɔɔn Waakoyotoŋkuŋ, ɔɔtɛ nɛɛk sɛɛn sini sisɔk. Joop sigɛ tiyɛrk baŋɛ beeɗirkoy wɛɛŋakɛ. 26Oko sinɛ ege Baabɛ naŋk ɔɗɔwa nɛɛka tuny wɛɛŋakoŋkuk, nɛɓa ɓɔrɛ ijaag Tɔɔn nɛɛk a tuny wɛɛŋakoŋk. 27Gagiɗɛɛɓa ɓaŋkawuka kɛnɔ pɛrɛdɛɗ agut sinɔ sɛɛn Tɔɔn Etoŋkuk. 28Kat ŋaatɛɛ agut any sini. Mɛlkikoy ɔɔtɛ sinɔkoy joop sigɛ atu piyakɔɔkɛ takik tiyɛrɗi koŋgoy nɛɛk nɔ ŋaararkiɗ ret walasakiŋ. 29Joop sigɛɓa ijaagir any sinɔ mentanŋɔŋkuk ŋaararkikoy ret walasa nɛ beeɗir wɛɛŋakɛ, ma joop sigɛɓa ijaagir any sinɔ ŋɛɛwɛnŋɔŋkuk ŋaararkikoy ret walasa nɛ pɛrɛdɛɛ sɛɛgeeŋ."
Any Sinɛɓa Tonɛɛ Agut Yeeseek
30"Kɛɛ any sinɔ oola a ijaaga ɓaŋkawukaat naakɛkik. Ijaaga any sinɛkan tiyka sooy lak Baabɛɛk. Moko ijaaga koɓi naak, ma ijaaga koɓi Waakoyo sinɛkanti wosɛykik, nɛ ege pirdi naakɛ liki.
31"Ɔkɔn waasa ɔɔtɛ naakiŋ, nɛ moko waasiyɛ gaanɛ eekeer. 32Mayakana ɓɛɛlɛ iɗit omaay sinɔ waasiɗi agut eetikiŋ. Nɛ ɗegera kɛ eekeer any sinɛ tonu agut eetik. 33Wosɛyɛɛrɓa sɔɔk joop son lak Yowanisikiŋ, nɛɓa sɛŋk waasiɗi agut eekeer. 34Nɔ toniiɗa sinik moko agut sinɔta ɗɛyɛɛɗ waasiyɛ etoŋkuk, ma kɛnɔ bɔdɛɛriɗ. 35Yowanis itoɓa ɗaawan sinɔ lowu a ɗaawuŋɔŋk. Nɛɓa ɗɛyɛɛr kɛnɔ kɔna yaa pɛɗɛrkaat nɛɛkɛɛk ɔɔtɛya sinɔɔna balaaŋɔŋk. 36Mayakana laka saak waasiyɛ sigɔ kaalɛr waasiyɛ Yowanisik. Waasiyɛ gaaŋk ijaag sinɛɓata gaɓɛ Baabɛ kɛnɔ ijaagaak. Ijaag sini ijaagaak yaaŋɛti kɛ wosɛykikanti Baabɛɛ. 37Baabɛɛ sinɛkanti wosɛykik ɔɗɔwa nɛɛka waasɛkan ɔɔtɛ naakiŋ. Kiirkan sɔɔk weenta koŋgoy nɛɛk adaktan kiirkan taanta taamɛ gɛɛŋk adaktan, 38nɛ agut sinɔ kirɗɔ ŋaadit Sɛɛn sinɛkanti wosɛykik, nɛ ki beeɗit pɛɛni nɛɛkɛ sooy lak iinakik.
39"Mermenari sɔɔk Wargatɛɛ Waakoyotoŋk a koɓiir kɛ laŋiirkoy sɛɛge wɛɛŋa sigɛkoy nɔkoy nɔkoyk, ma Wargatɛɛ Waakoyotoŋk sigɛ waasɛr ɔɔtɛ naakik. 40Mayakana sɔɔk kirkɔ ɗɛyɛ ɛnyɛ son lak eetik kɛnɔ laŋiir wɛɛŋa.
41"Kaa saak ɗɛyɛ eemɛyɔn ete. 42Degera kɛ kɛɛ iinakɛ mɛyin Waakoyotoŋk. 43Kusaakan saak ɓaŋkawukaat Baabɛɛk, yakana kanti kiir boŋiiɗ. Ma ɔkɔn kus iɗit omaay ɓaŋkawukaat nɛɛkɛkiŋ, nɛ boŋiir sɛɛniŋ. 44Iinak sigi ɗɛyɛɛr ɛkanɛɛkɛ goŋk eemɛyɔn etek, ma kiir ɗɛyɛ eemɛyɔn sinɔ laŋɛɛ Waakoyote sinɔɔnɛ omoŋɔŋkuk, oolɛɛr a ŋaadiɗiikari eete ɛk?
45"Kat koɓiir kɛ daariyɗika kɔna taamɛkɛ Baabɛɛkiŋ. Daariyɗi kɔna Muusee sinɛ latukuɗɔ ŋaadiyɛ sigɛ kookorarik. 46Ɔkɔnɓa ŋaadiir Muuseeŋ, nɛ gunkan ɓɔrɛ ŋaadiir eetiŋ agut sinɔ taapɛɓa ɔɔtɛ naakiŋ. 47Ma ɔkɔn kiir ŋaadit any sinɛɓa taapɛkiŋ, nɛ ŋaadiir pɛɛni naak ɛk?"
वर्तमान में चयनित:
Yowanis 5: KSTM
हाइलाइट
शेयर
कॉपी
Want to have your highlights saved across all your devices? Sign up or sign in
