Jenesis 15
15
Nuarin tas alupas 15.
1 Et tas upene ehele Ebram a Atua. 2 Et asan tas ehti a Ebram mika et ti inhal o un. 4 Et ika a Atua yi eteuc a inhal imi yin, inyi lep ahinag a ilpu mapon. 6 Er ika et atoh nedo o Ebram va nimiisjis ninveijec o un. 7 Et aketo a Atua um ika eri ohuun inpece Kenan a ilpu mapon, um lep ago aktit intas inig va nitai asjaaicnaig, 12 im nitai ahuumtidec.
1IS ti pan itac nitai iji igki ja is ehcohos pan a Ihova ehele Ebram an nahuumtidec vaig o un, um ika, Ak Ebram, namu jim imtitaig aiek: ekpu imiatamaig euc ainyak, um aru alupas imi euc.
2Is ika a Ebram, Ak Ihova Atua unyak, napualupai nyak inhe aiek? et ti tah inhal unyak, et lep aheca esjilid unyak a Eliiser nup u Tamaskus?
3Is ika a Ebram, As eti alupai nyak inhal unyak aiek: etpu idim isjeupigmoig nyak tah eris apos yin an nimnim unyak.
4Is tas ehelen a Ihova, um ika, Inyi eti isjeupigmoig euc aien; ja etpu isjeupigmoig euc a inhal unyum.
5Is imiapan itac yin aien, um ika, Namu iasji pan aiek an nohatag um esvi moijeuv, el et emda aiek par esvi: is lep ika ehelen aien, Erupu idim uco a ilpu mapom.
6Is ateuc an tas o Ihova a Ebram; va nitai inigki is ika aien is atoh nedo o un.
7Is ika ehelen aien, Ek Ihova ainyak, kis atipagki euc Ur ainyak an pece Kaltia, par alupai euc inpece inigki mika an ohuun aiek.
8Is ika aien, Ak Atua Natimarid unyak, ekpu ehvato ainyak mika ki ohuun ainyak?
9Is ika ehelen aien, Namu leh kurimatau atahig inyi ethi aiek is dri inmesese iran, im nanin atahig inyi ethi is dri inmesese iran, im siip atamaig inyi ethi is dri inmesese iran, im nucip inyi ethi, im nalaupa inyi ethi, um ahlap iran vai nyak.
10Is lucsei nitai iji igki asega aien, um ahtakoai, um atetwan nahaijin im lep nahaijin: jam eti ahtakoai inman.
11Eris aese inman u itai iji igki, ja is ahre ra a Ebram.
12Is wat ete nagesega, is umjeg asega a Ebram; is ehioehio alupas inliinmopon aien, is esjilid napat iran.
13Is ika ehele Ebram aien, Et idim inveijec inig mika, erupu tak atimi a ilpu mapom an pece yi ethi eri eti ohuun ara, um aheca ura; erupu ehcerucai ra ara irai mesese inyi for huntret;
14ekpu lep aru nedo has u nup uran pece iyehki ainyak erupu aheca ura ara: ja erupu ahes eahki ara um lucsei padiaig inyi ahinag.
15Ja napu tup eklim apau ehele ilpu retpom aiek, ja uhpu atelmoi euc an nopan nefatimi unyum.
16Ja etu wit ti pan itac inmesese inyi for huntret, erupu lep ham igcaki a ilpu mapom: era pam eti ago ehni nedo has ura a nup Emor an nopan inig.
17Is wat ete nagesega um apat, is atga an niblai uari itai iji ehki nadran cap im namilan cap.
18Is lep asan tas etipup a Ihova ehele Ebram, um ika, Ek mun alupai ilpu mapom ainyak inpece inigki, et ahes u nofowai Ijipt, um yetpan u nofowai alupas Yufretes:
19inpece u nup u Kinai, im nup u Kinis, im nup u Katmon,
20im nup u Hed, im nup u Piris, im nup u Rifa,
21im nup Emor, im nup u Kenan, im nup u Circas, im nup u Jibus.
वर्तमान में चयनित:
Jenesis 15: VAO63
हाइलाइट
शेयर
कॉपी
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
