Jenesis 13
13
Nuarin tas alupas 13.
1 Erau ahes an pece Ijipt a Ebram im Lot um adumoij pam. 7 Nehtauo, et udei Ebram a Lot. 10 Et apan an pece Sotom a Lot. 14 Et aketo a Atua um asan tas upyi asaig ehele Ebram. 18 Et apan an pece Hibron aien, um actaig natau eahki.
1IS ahes Ijipt a Ebram, im ehgan, im ilpu aheca asega o un, im lep Lot, um yetpan an nuarin inig et ahes nuritoga iran.
2Is atimi ikni itai a Ebram, is ahinag kurimatau o un, im silver, im colt.
3Is ahes eahki aien um yetpan Bedel, an nuarin iyehki is upyi amen neom atga o un iran, juju an niblan pece Bedel im Eai;
4an nuarin iyehki is upyi actaig natau iran aien: is arohwai nidai Ihova eahki a Ebram.
5Is ahced Ebram a Lot, is lep ahinag siip o un, im kurimatau o un, im niji eom atga o un.
6Is haklin inpece iyehki vai rau: is idim ahinag niji itai urau, is ehka vai rau namen vaig an nuarin is ethi.
7Eris ehtauo jipe a ilpu atimi asgi kurimatau u Ebram, im ilpu atimi asgi kurimatau u Lot: eris lep amen an pece a nup u Kenan im nup u Piris an nopan iyehki.
8Is ika a Ebram ehele Lot, Intumu jim ehtauo jipe akaijau, erumu jim lep ehtauo jipe a ilpu atimi asgi kurimatau unyak im ilpu atimi asgi kurimatau unyum; intau idim raimu akaijau.
9Et eteuc inpece asega an nuhup unyum; namu aipujaig nyak aiek: el et apan an mauuk aiek, ekpu apan an matak ainyak; ja el et apan an matak aiek, ekpu apan an mauuk ainyak.
10Is easpan a Lot um almoi nuarin marara asega Jortan, ubutpotet pan Soar, is amen inwai irai iji uarin asega, is idim idivaig nokoro o Ihova, um lep idivaig inpece Ijipt, ja is pam eti auahas Sotom im Comora a Ihova an nopan iyehki.
11Is anvi nuarin marara asega Jortan imi yin a Lot; is aijujai a Lot: erus aipujaig arau.
12Is amen a Ebram an pece Kenan, ja is amen a Lot irai iji maliyum an marara iyehki, um ago neom o un ubutpotet pan Sotom.
13Ja eris ilpu atimi auatatimi a nup u Sotom, um ago nedo has esjilid an nuhup u Ihova.
14Is udei Ebram a Lot, ja is par ika a Ihova ehele Ebram, Namu easpan aiek, um almoi inpece asega pahaiko, im poko, im suko, im jeko:
15ekpu alupai euc im ilpu mapom inpece asega inig ainyak na almoi aiek, erupu ohuun ara irai iji mesese.
16Ekpu ika ainyak eri ahinag a ilpu mapom, um idivaig inmah an nobohtan: el et emda tah natimi par esvi inmah an nobohtan, etpu emda aien par lep esvi ilpu mapom.
17Namu atidai aiek, um atga an pece asega um arehed mihtag; ekpu idim alupai euc ainyak.
18Is atipagki neom o un a Ebram, um apan um amen an nuarin marara Mamri, ubutpotet pan Hibron, is lep actaig natau eahki aien vai Ihova.
वर्तमान में चयनित:
Jenesis 13: VAO63
हाइलाइट
शेयर
कॉपी
Want to have your highlights saved across all your devices? Sign up or sign in
Vanuatu Bible (Intas Etipup) © United Bible Societies, 1863, 2019.
