यूहन्ना 21

तिबिरियास झील के किनारे चेलन काहीं यीसु देखाई दिहिन

1एखे बाद यीसु तिबिरियास नाम के झील के किनारे अपने-आप काहीं चेलन के आँगे प्रगट किहिन, अउर इआमेर से प्रगट किहिन। 2जब समौन पतरस अउर थोमा जउन दिदुमुस नाम से घलाय जाने जात रहे हँय, अउर गलील प्रदेस के काना गाँव के नतनएल अउर जब्दी के लड़िका, अउर उनखे चेलन म से दुइ जने अउर एकट्ठा रहे हँय। 3समौन पतरस उनसे कहिन, “हम मछरी पकड़ँइ जइत हएन”: तब ऊँ पंचे उनसे कहिन, “हमहूँ पंचे तोंहरे साथ चलब”: तब ऊँ पंचे उहाँ से निकरिके नाव माहीं चढ़िके गें, पय उआ रात माहीं एक्कवठे मछरी नहीं पकड़े पाइन।

4भिनसार होतय यीसु झील के किनारे आइके ठाढ़ भें; तऊ चेला लोग नहीं जाने पाइन, कि ऊँ यीसु आहीं। 5तब यीसु उनसे कहिन, “हे लड़िकव, का तोंहरे लघे कुछू खाँय क हय?” ऊँ पंचे जबाब दिहिन, “कुछू नहिं आय।” 6तब यीसु उनसे कहिन, “नाव के दहिने कइती जाल डारा, त मछरी पइहा”, तब ऊँ पंचे दहिने कइती जाल डारिन, अउर एतनी मछरी जाल माहीं आय गईं, कि ऊँ पंचे जाल काहीं खींच नहीं पाबत रहे आँय। 7एसे ऊँ चेला जिनसे यीसु जादा प्रेम करत रहे हँय, पतरस से कहिन, “ईं त प्रभू आहीं।” तब समौन पतरस इआ सुनिके, कि ऊँ प्रभू आहीं, करिहा माहीं अँगउछी काहीं बाँध लिहिन, काहेकि ऊँ निपरदा रहे हँय, अउर झील माहीं कूद परें। 8पय अउर चेला लोग नाव माहीं चढ़े मछरिन से भरी जाल काहीं खींचत-खींचत आएँ, काहेकि ऊँ पंचे किनारे से जादा दूरी नहीं, बलकिन दुइ सव हाँथ के करीब रहे हँय।

9जब ऊँ पंचे किनारे माहीं नाव से उतरें, त कोइला के आगी जलत देखिन, अउर ओहिन माहीं कुछ मछरी, अउर रोटी पकँइ के खातिर धरी देखिन। 10तब यीसु उनसे कहिन, “जउन मछरी तूँ पंचे अबे पकड़े हया, उनमा से कुछ लइ आबा।” 11तब समौन पतरस नाव माहीं चढ़िके एक सव तिरपन बड़ी-बड़ी मछरिन से भरा जाल, किनारे माहीं खींच लाएँ, अउर एतनी मछरी जाल माहीं रही, हईं तऊ जाल नहीं फाट। 12तब यीसु उनसे कहिन, “आबा खाना खा” अउर उन चेलन म से कोहू के हिम्मत नहीं परी कि उनसे पूँछय, कि “अपना को आहेन?” काहेकि ऊँ पंचे जानिगें तय, कि “ऊँ प्रभुअय आहीं।” 13तब यीसु उनखे लघे आएँ, अउर रोटी लइके उनहीं दिहिन, अउर उहयमेर मछरिव दिहिन। 14इआ तिसरइआ आय, जब यीसु मरेन म से जिन्दा होए के बाद, चेलन काहीं देखाई दिहिन।

यीसु अउर पतरस

15जब ऊँ पंचे खाना खाय चुके, तब यीसु समौन पतरस से कहिन, “हे समौन, यूहन्ना के लड़िका, का तूँ इनसे जादा हमसे प्रेम करते हया?” तब समौन उनसे कहिन, “हाँ प्रभू, अपना त जनतय हएन, कि हम अपना से प्रेम करित हएन”: इआ सुनिके यीसु उनसे कहिन, “हमरे मेम्नन काहीं चराबा।” 16तब यीसु समौन पतरस से दुसराय कहिन, “हे समौन, यूहन्ना के लड़िका, का तूँ हमसे प्रेम करते हया?” तब समौन उनसे कहिन, “हाँ प्रभू, अपना त जनतय हएन, कि हम अपना से प्रेम करित हएन”: इआ सुनिके यीसु उनसे कहिन, “हमरे गड़रन के रखबारी करा।” 17तब यीसु समौन पतरस से तिसराय कहिन, “हे समौन, यूहन्ना के लड़िका, का तूँ हमसे प्रेम करते हया?” तब पतरस उदास होइगें, कि यीसु तिसराय अइसन कहिन हीं; कि “का तूँ हमसे प्रेम करते हया?” तब समौन उनसे कहिन, “हे प्रभू, अपना त सबय जानित हएन, अउर इहव जानित हएन, कि हम अपना से प्रेम करित हएन”, इआ सुनिके यीसु उनसे कहिन, “हमरे गड़रन काहीं चराबा।” 18यीसु पुनि उनसे कहिन, “हम तोंहसे सही-सही कहित हएन, जब तूँ जमान रहे हया, त अपने से तइआर होइके जहाँ चाहत रहे हया, उहाँ चले जात रहे हया; पय जब तूँ बुढ़ाय जइहा, त अपने हाँथ काहीं फइलइहा, अउर दूसर तोंहईं तइआर कइके, जहाँ तूँ न जाँय चइहा, उहाँ तोंहईं लइ जई।” 19यीसु ईं बातन से बताय दिहिन, कि पतरस कइसन मउत से परमातिमा के बड़ाई करिहँय; अउर इआ कहे के बाद समौन से कहिन, “हमरे पीछे चलत रहा।”

यीसु अउर उनखर पियार चेला

20(तब पतरस मुड़िके उआ चेला काहीं पीछे आबत देखिके, जउने से यीसु जादा प्रेम करत रहे हँय, अउर जउन खाना खात माहीं यीसु के छाती कइती झुकिके पूँछिन रहा हय, कि “हे प्रभू अपना काहीं पकड़ामँइ बाला को आय?”) 21उनहीं देखिके पतरस यीसु से पूँछिन, “हे प्रभू, इनखर का हाल होई?” 22तब यीसु उनसे कहिन, “अगर हम चाही, कि ऊँ हमरे आमँइ तक इहाँ रुके रहँय, त तोंहईं एसे का लेन-देन हय? तूँ हमरे पीछे चलत रहा।” 23एसे भाइन माहीं इआ बात फइलगे, कि “ऊँ चेला न मरिहँय;” तऊ यीसु उनसे इआ नहीं कहिन तय, कि “ऊँ न मरिहँय, पय इआ, कि अगर हम चाही, कि ऊँ हमरे आमँइ तक रुके रहँय, त तोंहईं एसे का लेन-देन हय?”

उपसंहार

24ईं उँइन चेला आहीं, जउन ईं बातन के गबाही देत हें, अउर जउन ईं बातन काहीं लिखिन हीं, अउर हम पंचे जानित हएन, कि उनखर गबाही सच्ची हय। 25अउरव खुब काम हें, जउन यीसु किहिन रहा हय; अगर ऊँ सगले एक-एक कइके लिखे जातें, त हम समझित हएन, कि जउन किताबँय लिखी जातीं, ऊँ संसार माहीं न समातीं।

वर्तमान में चयनित:

यूहन्ना 21: bag

हाइलाइट

कॉपी