खास चेलन 2

पबित्र आत्मा के उतरब

1जब पिन्तेकुस्त#2:1 पिन्तेकुस्त नाम के तेउहार फसह नाम के तेउहार के बाद पचासमें दिन मनाबा जात रहा हय। तेउहार के दिन आबा, त ऊँ पंचे सगले जन एक जघा माहीं एकट्ठा रहे हँय। 2अउर एकाएक अकास से बड़ी आँधी कि नाईं सनसनाहट के बोल सुनान, अउर ओसे सगला घर जहाँ ऊँ पंचे बइठ रहे हँय, गूँजिगा। 3अउर उनहीं आगी कि नाईं जीभँय फटत देखाई दिहिन; अउर उनमा से हरेक जन के ऊपर आइके ठहर गईं। 4अउर ऊँ पंचे सगले जन पबित्र आत्मा से भरिगें, अउर आत्मा जउनमेर उनहीं बोलँइ के सामर्थ दिहिन, ऊँ पंचे अनजान भाँसा माहीं बोलँइ लागें।

5अउर अकास के नीचे के सगले देसन से आए यहूदी भक्त, यरूसलेम सहर माहीं रहत रहे हँय। 6जब उआ बोल सुनान त उहाँ भीड़ लगिगे, अउर सगले मनई घबराइगें, काहेकि हरेक जन काहीं इहय सुनाई देत रहा हय, कि ईं पंचे हमरेन भाँसा माहीं बोलि रहे हँय। 7अउर ऊँ पंचे सगले जन चउआइके अउर अचरज मानिके कहँइ लागें; देखा, “ईं पंचे जउन बोलि रहे हँय, का ईं सगले जन गलील प्रदेस के रहँइ बाले न होंहीं? 8त पुनि काहे हम पंचे हरेक जन अपने-अपने जनम भूमि के भाँसा सुनित हएन? 9हम पंचे जउन पारथी, अउर मेदी, अउर एलामी लोग, अउर मेसोपोटामिया, अउर यहूदिया, अउर कप्पदूकिया, अउर पुन्तुस, अउर आसिया। 10अउर फ्रूगिया, अउर पंफूलिया, अउर मिस्र, अउर लीबिया देस, जउन कुरेने सहर के लघे हय, ईं सगले देसन के रहँइ बाले, अउर रोम देस से आए मनई, का यहूदी, का यहूदी धरम धारन करँइ बाले, क्रेती अउर अरबी घलाय हें।” 11पय अपने-अपने भाँसा माहीं उनसे परमातिमा के बड़े-बड़े कामन के चरचा सुनित हएन। 12अउर ऊँ सगले सुनँइ बाले चउआइगें, अउर घबराइके एक दुसरे से कहँइ लागें, कि “इआ का होइ रहा हय?” 13पय कुछ जने यीसु मसीह के खास चेलन के हँसी उड़ाइके कहिन, “ईं सगने जन कुछ जादा नबा अंगूर के रस पी लिहिन हीं।”

पतरस के भाँसन

14तब पतरस उन गेरहँव के साथ ठाढ़ भें, अउर खुब चंडे से कहँइ लागें, “हे यहूदी लोगव, अउर यरूसलेम सहर के सगले रहँइ बाले मनइव! एखर मतलब हमहीं बतामँइ द्या, हमरे बातन काहीं बड़े ध्यान से सुना। 15ईं पंचे नसा माहीं नहिं आहीं, जइसा कि तूँ पंचे समझते हया, काहेकि अबे त सकार के नव बजा हय, काहेकि एतनीदार कोऊ नसा नहीं करय। 16बलकिन इआ उआ बात आय, जउने के बारे माहीं परमातिमा के सँदेस बतामँइ बाले योएल नबी कहिन रहा हय;

17‘परमातिमा कहिन हीं, कि अन्त के दिनन माहीं अइसा होई, कि हम आपन आत्मा सगले मनइन के ऊपर उड़ेलब, अउर तोंहार लड़िका-बिटिया भबिस्सबानी करिहँय, अउर तोंहार नवजमान दरसन देखिहँय, अउर तोंहार बुढ़ान मनई सपन देखिहँय।

18बलकिन हम अपने सेबकन अउर सेबिकन के ऊपर घलाय आपन आत्मा उड़ेलब, अउर ऊँ पंचे भबिस्सबानी करिहँय।

19अउर हम ऊपर अकास माहीं अचरज के काम, अउर नीचे धरती माहीं चमत्कार देखाउब, अरथात खून, आगी अउर धुँआ के बदरी।

20प्रभू के महान अउर तेजोमय दिन के आमँइ से पहिले, सुरिज माहीं अँधिआर, अउर जोंधइआ खून कि नाईं होइ जई।’

21अउर जे कोऊ प्रभू के नाम लेई, उहय मुक्ती पाई।

22हे इजराइल देस के रहँइ बाले मनइव, ईं बातन काहीं सुना, कि यीसु नासरी एकठे मनई रहे हँय, जिनखर परमातिमा के तरफ से होंइ के सबूत, उन सामर्थ के कामन, अउर अचरज के कामन, अउर चमत्कारन से प्रगट हय, जउन परमातिमा तोंहरे बीच माहीं, यीसु द्वारा कइके देखाइन हीं, जिनहीं तूँ पंचे खुदय जनते हया। 23उनहिन काहीं, जब ऊँ परमातिमा के ठहराई योजना, अउर निस्चित पूर्ब ग्यान के मुताबिक, तोंहरे हबाले कइ दीनगें, त तूँ पंचे अधरमी मनइन के मदत से उनहीं क्रूस माहीं चढ़बाइके मारि डारे हया। 24पय उनहिन काहीं परमातिमा मउत के बन्धन से छोड़ाइके, पुनि जिआय दिहिन, काहेकि उनखे खातिर इआ सम्भव नहीं रहा, कि मउत उनहीं अपने काबू माहीं रख सकय। 25काहेकि राजा दाऊद उनखे बारे माहीं कहिन हीं, कि

‘हम प्रभू काहीं हमेसा#भज 16:8-11 अपने आँगे देखत रहेन हँय, काहेकि ऊँ हमरे दहिनी कइती हें, जउने हम गिरे न पाई।

26एसे हमार हिरदँय आनन्दित हय, अउर हमार जीभ मगन भे ही; बलकिन हमार देंह आसा माहीं जिअत रही।

27काहेकि अपना हमरे प्रान काहीं अधोलोक माहीं न छोंड़ब; अउर न अपने पबित्र जन काहीं सड़इन देब!

28अपना हमहीं जीबन के गइल बतायन हय; अपना हमहीं अपने दरसन के द्वारा आनन्द से भर देब’।

29हे हमार भाई-बहिनिव, हम ऊँ कुलपति राजा दाऊद के बारे माहीं, तोंहसे हिम्मत के साथ कहि सकित हएन, कि ऊँ मरिगें अउर गाड़ दीनगें, अउर उनखर कब्र आज तक हमरे इहाँ मवजूद ही। 30काहेकि ऊँ परमातिमा के सँदेस बतामँइ बाले रहे हँय, अउर जानत रहे हँय, कि परमातिमा कसम खाइके उनहीं बचन दिहिन हीं, कि उनखे बंस म से एक जने काहीं उनखे राजगद्दी माहीं बइठाउब। 31एसे आँगे होंइ बाली बातन काहीं, ऊँ पहिलेन से देखिके, मसीह के जिन्दा होंइ के बारे माहीं भबिस्सबानी किहिन, कि ‘न त उनखर प्रान अधोलोक माहीं छोंड़ा ग, अउर न उनखर देंह सड़ँय पाई’। 32ईंन यीसु काहीं परमातिमा पुनि जिन्दा कइ दिहिन, जेखर हम पंचे सगले जने गबाह हएन। 33इआमेर से परमातिमा के दहिने हाँथ से सगलेन से ऊँच पद पाइके, अउर पिता से उआ पबित्र आत्मा पाइके जेखर वादा कीन ग रहा हय, अउर ऊँ उहय पबित्र आत्मा उड़ेल दिहिन, जेही अब तूँ पंचे देखते अउर सुनते हया। 34काहेकि राजा दाऊद त स्वरग माहीं नहीं चढ़ें; पय ऊँ खुदय कहत हें, कि

‘प्रभू हमरे प्रभू’ से कहिन; ‘हमरे दहिने कइती बइठा,

35जब तक कि हम तोंहरे बइरिन काहीं तोंहरे गोड़े के नीचे रक्खँइ बाली चउकी कि नाईं न कइ देई।’

36एसे इजराइल के सगला घराना निस्चित जान लेय, कि परमातिमा उँइन यीसु काहीं, जिनहीं तूँ पंचे क्रूस माहीं चढ़ाया तय, प्रभू अउर मसीह दोनव ठहराइन हीं।”

37तब सगले सुनँय बाले ब्याकुल होइगें, अउर ऊँ पंचे पतरस अउर सगले खास चेलन से पूँछँइ लागें, “हे भाइव, हम पंचे का करी?” 38तब पतरस उनसे कहिन, “अपने-अपने मन काहीं बदला, अउर तोंहरे पंचन म से हरेक जन, अपने-अपने पापन के माफी के खातिर, यीसु मसीह के नाम से बपतिस्मा ल्या; त तूँ पंचे पबित्र आत्मा के दान पइहा। 39काहेकि इआ वादा तोंहरे, अउर तोंहरे सन्तानन, अउर ऊँ सगले दूरी-दूरी के लोगन के खातिर घलाय हय, जिनहीं हमार पंचन के प्रभू परमातिमा अपने लघे बोलइहँय।” 40ऊँ अउर खुब बातन से घलाय गबाही दइ-दइके समझाइन, कि अपने आप काहीं ईं कुटिल मनइन से बचाइके रक्खा। 41एसे जेतने जने उनखे बचन काहीं अपनाइन, ऊँ पंचे सगले जन बपतिस्मा लिहिन; अउर उहय दिन तीन हजार मनइन के करीब, यीसु मसीह के खास चेलन के दल माहीं सामिल होइगें। 42अउर ऊँ पंचे यीसु मसीह के खास चेलन से सिच्छा पामँइ, अउर संगति रक्खँइ माहीं, अउर रोटी टोरँइ माहीं, अउर प्राथना करँइ माहीं अपने-आप काहीं समरपित कइ दिहिन। 43अउर सगले लोगन के ऊपर भय छाइगा, काहेकि यीसु मसीह के खास चेलन के द्वारा, खुब अचरज के काम अउर अदभुत चिन्ह प्रगट होत रहे हँय। 44अउर ऊँ पंचे सगले बिसुआस करँइ बाले एकट्ठा रहत रहे हँय, अउर उनखर सगली चीजँय साझे माहीं रहत रही हँय। 45अउर ऊँ पंचे आपन-आपन धन-सम्पत, अउर समान बेंच-बेंचके जेखर जइसन जरूरत होत रही हय, बाँट देत रहे हँय। 46अउर ऊँ पंचे हरेक दिन एक मन होइके मन्दिर माहीं एकट्ठा होत रहे हँय, अउर घर-घर रोटी टोरत, सच्चे मन से आनन्द के साथ खाना खात रहे हँय। 47अउर परमातिमा के अराधना करत रहे हँय, अउर सगले जन उनसे खुसी रहे हँय, अउर जउन मनई मुक्ती पाबत रहे हँय, उनहीं प्रभू हरेक दिन उनखे दल माहीं मिलाय देत रहे हँय।

वर्तमान में चयनित:

खास चेलन 2: bag

हाइलाइट

कॉपी