Jenesesi 30
30
1Rakeli vaonne liye ira: <<Miyo kannawanda mbala mwana na mamunaga>>, ohoromaga mukalela nrima mbalaye Leya. Mwa enne ohowonga na mamunaye Jako eraga: <<Udivahe garavida ira dimukayena mwana. Wahafune, miyo nnokwa.>> 2Evale Jako ohotakaleliwaga na mazu a Rakeli, liye ira: <<Weyo unaumbuwela ira miyo dili vamalroni va Mulugu? Mulugu guirilena ira wahabalege, hiya kala miyo.>>
3Evale Rakeli ohowonga na mamunaye Jako, liye ira: <<Miyo nnouvaha namalabaga Bila. Umutukule urome mugonana,#30:3 Miyo nnouvaha namalabaga Bila. Umutukule urome mugonana: Fwanyeya ira zelru dimohive dabure danna Sara mwadi Abarahamu, ti dedove danna Rakeli. Tchoira Rakeli na Jako kahakayena zelru domuroromela Mulugu, kogoirana nnga jaire Izaki na Rebeka. Tchoira Izaki agaonne ira: <<Muhiyanaga Rebeka kanabala>>, liye kanvendile muhiyana mmohiwa ira ambalena mwana. So liye ohonvepa Mulugu, evale Mulugu ohavaha ahimiwa. (Jenesesi 25:21) ahima anaabalege liye na weyo, kakalege anaga ira na miyene dikayena ahima muwari mwa liye.>> 4Mwa enne Rakeli ohonvaheda namalabaye Bila ira akale muhiyanaye, Jako liye roma mugonana. 5Noira enne, Bila ohokana vambani, liye mbala mwanapongwe na Jako. 6Evale Rakeli ohoira: <<Mulugu uhuditonga mwapama, uvwa yovepa yaga, uhudivaha mwana wa mwanapongwe.>> Mwa enne ohonvaha mwanole nzina na Dani [ku wonga tonga].
7Noira enne, Bila ohokana vambani akoka, liye mbalela Jako mwana mmohiwa wa mulombwana. 8Evale Rakeli ohowonga eraga: <<Dohokana wana undimuwa na mbalaga, mbwenye dihimugondjiha.>>#30:8 Dohokana wana undimuwa na mbalaga, mbwenye dihimugondjiha: Mazwala ananiwandela ira Rakeli ali mutu oummihiwa murima. Kada fendo nnavwa hiyo zela valanya mBibiliyani, nnovwa zela makatamiho na milandu pwi. Tchoira va nnovwa ira Rakeli na Leya kohokana gudulana agali kali mutu na dibiliye, babiwa mmohive, mmiwa mmohive. Mwa enne ohonvaha mwanole nzina na Nafitali [ku wonga wanawana].
9Eto Leya agaonne ira eniva dihigoma, kannawelela bala akoka, ohomutukula namalabaye Zilpa, liye nvaheda mamunaye Jako ira akale muhiyanaye. 10Evale Jako ohoromaga mugonana Zilpa, fiyeda kana vambani, liye mbala mwanapongwe. 11Evale Leya ohoiraga: <<Dihikana ngari.>> Mwa enne ohonvaha mwanole nzina na Gadi [ku wonga ngari].
12Noira eno, Zilpa namalaba wa Leya ule, ohombalela mulombwana Jako mwana mmohiwa wa mwanapongwe. 13Mwanole agabaliwile, Leya ohowonga eraga: <<Miyo dihikana hagalala. Eto ahiyana amohiwa kadiona, anoona ira dihikana hagalala.>> Mwa enne ohonvaha mwanole nzina na Azeri [ku wonga hagalala].
14Tempu yorenda tirigu, siku nimohi Rubeni mwana Leya agadowile minda, ohoonaga yomela imohi yofuneya yaitaniwa mandaragora,#30:14 mandaragora: Afwase Rakeli aumbuwela ira: <<Dapata murombwe wenne, afwase nnoza dibale.>> Na iEberewu nzina na mandaragora nnatapulela funiwa. liye tukula dowa nvaha mmaye. Evale Rakeli agaonne enne, ohomuwongana Leya, liye ira: <<Nnouvepa ira udivahemo mandaragora uzilena mwanawo.>> 15Evale Leya ohomuwakula eraga: <<Kodi mamunaga udiwakile we ule kaukwakwanne? Eto unafuna udiwake mandaragora a mwanaga?>> Evale Rakeli ohomuwakula, liye ira: <<Udivahe mandaragora ayo, mahiyu anna Jako unoza agone na weyo.>>
16Tchiguwoni uwa Jako akumaga minda, Leya ohomuharela ndila, liye ira: <<Peno weyo uli waga tchoira dihimala ugula na mandaragora a mwanaga.>> Evale mahiyu anne Jako ohogona na Leya. 17Noira eno, Mulugu ohovwa lobela wa Leya, liye kana vambani, mbala mwanapongwe wanetanu na Jako. 18Leya agabanle, ohowonga eraga: <<Mwanola Mulugu gudivahile moditambilriha, voira mamunaga dihimuhiyeda namalabaga.>>#30:18 voira mamunaga dihimuhiyeda namalabaga: Leya anvahaga mamunaye namalabaye ira amugonena, aumbuwela ira unairana yengo yapama vamentoni va Mulugu. Mbwenye Mazu a Mulugu kinawonga ira yenno yali yengo yapama vamentoni va Mulugu. Tchoira Yesu ohowonga ira Mulugu ampandutchile mulombwana mmohi na muhiyana mmohi mwasiwa liye afuna telana wa hiyo atu ukale eno. (Matewuji 19:4) Mwa enne ohonvaha mwanole nzina na Isakari [ku wonga yotambilra].
19Noira enne, Leya ohokagana vambani akoka, liye mbala mwanapongwe wanetanu na mmohi na Jako. 20Agabanle ohowonga eraga: <<Mulugu uhudivaha yengo yapama. Eni mamunaga unerege diriheda mwasiwa dihimbalela anapongwe atanu na mmohi.>> Nomala enne, ohonvaha nzina na Zebuloni [ku wonga rihediwa]. 21Magomelo uwa Leya ohombala mwana wa muhiyana, liye nvaha nzina na Dina.
22Evale Mulugu ohomuumbuwela Rakeli eto ohovwa yolobela yaye. Mwa enne ohosakanya ira abale. 23Evale Rakeli ohokana vambani, liye mbala mwanapongwe. Agabanle ohoiraga: <<Mulugu uhukumihamo manyazo aga!>> 24Ohowonga eto ira: <<Nnafuna nnga Yehova adiwendjede mwana mmohiwa wa mwanapongwe!>> Mwa enne ohonvaha mwanole nzina na Joze [ku wonga wendjeda].
Labawu ohosakanya nipangano nixa na Jako
25Rakeli agambanle Joze, Jako ohomuwandela moyaye Labawu, liye ira: <<Nnafuna diwelele wanihu. 26Mudivahe ahiyanaga ambinlene anno daalabenle miyo vamohi na ahimaga daadowegena. Tchoira nyo muhumala iziwa makalelo apama dulabenleni miyo.>>
27Evale Labawu ohomuwakula eraga: <<Akala munodifwewela murima, dera mukalege wewuno vamohi na miyo. Tchoira makanga kohodiwandela ira Yehova uhudireliha na mwasa wa nyo kala vamohi na miyo. 28Mudiwandele yotambilra inafuna nyo, miyo nnerege utambilrihani yenno.>> 29Jako ohowakulaga, liye ira: <<Nyo muhumala iziwa makalelo apama dulabenleni miyo na makalelo diwendihile miyo anavinyama enyu. 30Miyo dahanaze, anavinyama mwanna nyo tchali anene. Mbwenye peno makalelo karelanne atu kahi a masika. Eto Yehova uhurelihani na mwasa wa mabasaga nnalaba miyo. Mbwenye peno miyo nnafuna didowe darome laba ja vande vaga.>>
31Evale Labawu ohonfuka, liye ira: <<Munafuna ira dutambilriheni avi?>> Jako ohomurumela, liye ira: <<Kamuditambilrihe yengo. So mbwenye miyo nnerege adjihave anavinyama enyu, malringana mwarumela yengo nnafuna miyo wonga veva. 32Miyo peno nnafuna didowe kolrani wenyu ule, dasakulrelre mabila a maganga na a donga donga na ana mabila odiba vamohi na mbuzi da donga donga na da maganga. Anavinyama anno banafuna kala yotambilra yaga. 33Era eno nyo vasogolro mwaza mufuna ira muone yotambilra yaga, munofwanya dagamanle asakulrelra anavinyama atene, pa evo vanafuna nyo kana ibaribari ira miyo kannaudjelrani. Mbwenye muwari mwa anavinyama nnafuna miyo atukula, mwaza mufwanyamo mbuzi dohokana maganga na da donga donga nari ana mabila ohokala odiba, munoiziwa ira jejo dire ubelani.>>
34Evale Labawu ohowakula eraga: <<Tabo, jihikala pama. Jikale nnga mwemo munawongela nyo.>> 35Mbwenye siku nimohive nenne mulombwana Jako ahanadowe ira arome asakulrelra anavinyama ale, Labawu ohosakulrelragamo mbuzi da alombwana dokana malremba na da donga donga na mbuzi datene da ahiyana da maganga na da donga donga, nari mwanainyama uli watene okana maganga otchena nari mabila mang'onong'ono odiba. Labawu ohatukula anavinyama atene anne aasakunlremo liye ale, avaheda ahimaye. 36Evale oharumaga ahimaye ale eraga: <<Anavinyama anna, mudowe mwaadjihege olapela wene na wewo unadjiha mulombwana Jako eto lapela uwa ukale ofiyeda malambo mararu muwendaga.>>#30:36 Anavinyama anna, mudowe mwaadjihege olapela wene: Labawu atawihaga jifuwo jaye dodiba na da maganga, abalra ira: <<Nnafuna anavinyama a maganga ala kadowe karelege umohi uwa wene. Mwasiwa kera karelege vamohi na jifuwo ja mulombwana Jako, voira ahimiwa anakala a maganga, atene anakalege a mulombwana Jako. Mbwenye dairana eni mulombwana Jako kanakana anavinyama adjindji mwasiwa a maganga na odiba kinabaliwege.>> Ku wonga Labawu afuna amudjelre Jako. Jako ohalaga akumbuzaga anavinyama atene ohala a Labawu.
Makalelo asakanyile Jako ira awande akana anavinyama adjindji
37Evale Jako ohotukula tambi dititi da mitengo miraru dohiyana,#30:37 mitengo miraru dohiyana: Na izugu mitengo nnawongiwa va nnaitaniwa álamo, aveleira e plátano. Eto muwari mwa vizugu dimohi diwa vinokala hiyana. liye tuwa marisku tembe na unde nne, jotchena ja muwari ja imirile fiyedaga oneya unde. 38Jimiri jile liye ohotimbela sogolro wa nimburo neno nang'wetcha atu. Liye airelena eno mwasiwa anavinyama ale kagumanetcha nimburo nenne tempu yong'wa. 39Muwari mogumana mule, kagumana kaing'anaga jimiri jile. Mwa enne ahima kaabala atu kakala a malremba na a maganga na a donga donga.
40Evale Jako ohakumihamo anahima anno kabaliwa ale. Eto anavinyama a ahiyana a Labawu aye, Jako oaing'aniha anavinyama a malremba nari odiba. Jako eto ohadowiha anavinyama aye vewa vene ira kahagumane na anavinyama a Labawu aye. 41Evale anavinyama a alombwana ale kagumanaga na anavinyama a ahiyana apama a kopolo, Jako otukula jimiri jile, liye reya sogolro wa anavinyama ale,#30:41 Jako otukula jimiri jile, liye reya sogolro wa anavinyama ale: Jako airilena eno ira anavinyama anno kafuna baliwaga kakalege aye. Eto fwanyeya ira ilukuluwa ali Mulugu amukamihedile, hiya ira zelru daye dile dolaba yengo okave. (Jenesesi 31:9-12) mmamburoni mwemo mwang'wela atu. Evale kagumana kaing'anaga jimiri jile. 42Mbwenye anavinyama ovuta, liye jimiri jile kaareyela. Na mwasa wenne, anavinyama apama karela, ahimiwa atene kakala aye. Eto anavinyama ovuta ale karela, kakala a Labawu.
43Mwa enne Jako ohosimbwa rayela, liye fiyeda akana anavinyama adjindji, vamohi na anamalaba a alombwana na ahiyana vamohi na akamelo na aburu.
वर्तमान में चयनित:
Jenesesi 30: iLolo
हाइलाइट
शेयर
कॉपी
Want to have your highlights saved across all your devices? Sign up or sign in
© 2018 Visão Integral
