Jenesesi 29
29
Fiya wa Jako ilambo ya Arani
1Jako ohovenyihanaga ulrendo waye adowaga pandi ya ilambo ya makumelo wa nzuwa, liye fiya wali anamurala a wewule. 2Evale againg'anne okala ha ule, ohoonaga isime imohi yafwanyeyaga mmundani. Eto makuru mararu a anavinyama kagali ogonatene wandamelana vaisimeni vale na anamakumbuza ewa. Tchoira anavinyama a wewule kaang'wihetcha evale. Eto isimele yohogudumeyiwa na nibwe nlukulu wanoni uwa. 3Anamakumbuza atene kaagumanihetcha evale anavinyama ewa, aliwa kumihawo nibwe nafungetchana atu vaisimeni vale, aliwa mala ang'wiha eto kamala enne kowelihedavo nibwe nne akoka.
4Evale Jako ohafuka anamakumbuzale eraga: <<Afwaga kodi nyo muli a waani?>> Aliwa kohomuwakula, aliwa ira: <<Hiyo nili akuda Arani.>> 5Liye ohafuka eraga: <<Nnga muhumuiziwa Labawu, muzula wa Nahori?>> Aliwa kohomuwakulaga, aliwa ira: <<He, nihimuiziwa.>> 6Jako ohafukave, liye ira: <<Kodi liye uli wapamene?>> Aliwa kohomuwakula, aliwa ira: <<He, uli wapamene. Eto mwanaye wa muhiyana Rakeli gwenne unaza vale na mabila.>>
7Evale Jako ohowongaga eraga: <<Kaing'anani nzuwa nihikalawove. Tempu yodowana mabila vande kinafiye. Mwaang'wihe, amala mudowe mwaadjiheve akoka.>> 8Aliwa kohomuwakula, aliwa ira: <<Hiyo kannabaranyeda ang'wiha. Nnadediha anamakumbuza amohiwa kaagumanihe anavinyama ewa. Era eno pinafuna hiyo kumihawo nibwe ni ira niwande ang'wiha mabila matene.>>
9Jako awongagave na aliwa, tchi tempu yafiyaga namwali Rakeli na mabila a babaye, voira liye gwali namakumbuza wa mabilale. 10Jako agamuonne Rakeli mwana Labawu, mmaye murongoliye eto agaonne mabila a Labawu ale, ohotamangelaga vaisimeni vale, dowa kumihavo nibwe nne, liye ang'wiha mabila a Labawu, mmaye murongoliye. 11Noira enne, Jako ohombejarigi Rakeli anlaga no hagalala. 12Evale Jako ohomuwandelaga Rakeli ira: <<Miyo dili wa muibalini mwa babawo Labawu. Mmaga gu Rebeka.>> Rakeli agavwile enne ohodowaga vande liye muwandela babaye.
13Labawu agavwile ira: <<Jako, mwana murongoliyo uhufiya>>, ohotamangaga amuharelaga. Aganfwanyile, ohomukumbarelaga, liye mbejari, nomala liye mudowagana waniwa. Evale Jako ohomuwandelaga Labawu jatene jamuireyele. 14Labawu ohowongaga eraga: <<Na ibaribari weyo uli mutu wa muibalini mmohive na miyo.>>#29:14 Na ibaribari weyo uli mutu wa muibalini mmohive na miyo. Owu hehi Na ibaribari weyo uli nikuva nokumela nikuvani waga eto munoku okumela munokuni waga. Kalaga nnga mazu anno awongile Adawu agamuonile muhiyanaye Eva. Evale Jako ohomala mwedi mmohi akalaga vande va Labawu.
Tela wa Jako
15Evale Labawu ohomuwandelaga Jako, liye ira: <<Masiki ulive mutu wa muibalini mwaga, kahi ira weyo udilabege vasayi. Kadiwandele kodi weyo yotambilra yawo unafuna ikale nni?>> 16Labawu ohakana anavihiyana ambinli, mulukuluwa aitaniwa Leya, ng'onong'onuwa aitaniwa Rakeli. 17Leya ali namwali olrenga meso. Mbwenye Rakeli ali namwali oriya kove, vamohi na maningo aye matene. 18Jako onfunetcha Rakeli. Mwa enne ohowakulaga, liye ira: <<Miyo nnoulabani fiyeda yaka tanu na mbinli ira dimutele Rakeli, mwaninyu wa ng'onong'ono.>> 19Evale Labawu ohomuwakula, liye ira: <<Ihikala pama. Tchapama muteliha mwanaga na weyo hiyaniha na mutu mmohiwa mutela. Weyo ukalege eva na miyo.>> 20Mwa enne Jako oholaba yaka tanu na mbinli ira amutele Rakeli. Voira liye ohomuziveliwa Rakeli, muwari mwa yaka tanu na mbinli dile, Jako aonne nnga malambo mang'onong'onove.
21Agakwakwanihile yaka dedile, Jako ohomuwongana Labawu, liye ira: <<Mudivahede muhiyanaga ira dimutele, mwasiwa tempu napanganne hiyo ihikwakwana.>> 22Evale Labawu ohaitanihaga amwandamanaye atene, aliwa za dja pwando ya matelo a mwanaye. 23-24Mbwenye unde wagadibile, vamalroni va Rakeli, Labawu anvahile Jako mwanaye Leya. Eto ohomutukula namalabaye wa muhiyana eriwa Zilpa, liye nvaha mwanaye Leya ira amulabege. Evale Jako agavahiwe Leya, ohomugonana ahaiziwaga ira gu Leya.
25So mbwenye unde wagatchile, Jako paonne liye ira kanvahile Leya. Evale ohovenya, liye dowa nfuka Labawu ira: <<Kodi mudiirele nyo ji nni? Miyo dalabela ira mudivahe Rakeli. Mudinyengele nni?>> 26Labawu ohomuwakula, liye ira: <<Tchoira ilambwihu ila, kanilemenle muteliha mwana wa ng'onong'ono, mulukuluwa ahanateliwe! 27So niire eni. Weyo urome mala sumana imohi na muhiyana wenna, amala nnouvaha Rakeli wanfuna we. Malringana urumele ira dauvaha Rakeli, weyo unolaba yaka dimohi diwa tanu na mbinli.>>
28Evale Jako ohorumela. Sumana yenne ohogona na Leya fiyeda mala. Noira enne, Labawu ohomutukulaga mwanaye Rakeli liye nvaha, Jako liye mutela. 29Eto Labawu ohomutukula namalabaye wa muhiyana aitaniwa Bila, liye nvaheda mwanaye Rakeli ira akale namalabaye. 30Evale Jako ohoroma gona na Rakeli. Eto liye asimbwetcha muziveliwa Rakeli, hiyaniha na Leya. Evale ohoroma mulaba Labawu yaka dimohi diwa tanu na mbinli.
Ahima a Jako
31Yehova agamuonne Leya aidiwaga, ohosakanya ira Leya abalege, mbwenye Rakeli kabala. 32Mwa enne Leya ohokana vambani, liye mbala mwanapongwe. Agambalile, ohowonga eraga: <<Yehova uhuona sanyeya waga. Eni mamunaga unerege diziveliwa.>> Mwa enne ohonvaha nzina na Rubeni [ku wonga ona]. 33Leya ohowelela kana vambani akoka, liye mbala mwana mmohiwa wa mwanapongwe. Agambalile, ohowonga eraga: <<Yehova ohovwa ira miyo doidiwa. Nona uhudivaha mwana mmohiwa ula.>> Mwa enne ohonvaha nzina na Simeyawu [ku wonga vwa]. 34Evale Leya ohokana vambani akoka, liye mbala mwana mmohiwa wa mwanapongwe. Agambalile, ohowonga eraga: <<Kuma peno eni, mamunaga unamangeya na miyo, mwasiwa dihimbalela ahima araru, anapongwe ve.>> Mwa enne ohonvaha nzina na Levi [ku wonga mangeya]. 35Noira eno, ohowelelave kana vambani akoka, liye mbala mwanapongwe mmohiwa. Agambalile, ohowonga eraga: <<Peno mbwenye nnomutamalela Yehova.>> Mwa enne ohonvaha mwanole nzina na Juda [ku wonga tamalela]. Evale liye ohoroma miyala bala.
वर्तमान में चयनित:
Jenesesi 29: iLolo
हाइलाइट
शेयर
कॉपी
Want to have your highlights saved across all your devices? Sign up or sign in
© 2018 Visão Integral
