YUHANA 10

Yãlɛkɔ̃ana kũ sãdãriio

1Yãpuran matɛn oárɛ, gbɛ̃ kũ àdi gɛ̃ sã karalɛnlo ama àdi vlɛ̃ karala gu pãnden, ade bi kpãnimɛ, kpãni wɛ́dewɛmɛ. 2Gbɛ̃ kũ àdi gɛ̃ karalɛn sɔ̃, aden sãdãri ũ. 3Kara dãkpãrii dì zɛ́ wɛ̃ adenɛ, sãnɔ sɔ̃ ò a kòto dɔ̃. Àdi a sãnɔ sísi ń baadi tɔ́a à bɔtɛ kũńwo. 4Tó à bɔ̀tɛ kũńwo, àdi dońnɛ arɛ òdigɔ̃ tɛ́i kũ ò a kòto dɔ̃ yãi. 5Òdi we ò tɛ́ gbɛ̃ pãndeiro. Òdi bàa lɛ́nɛ kũ ò gbɛ̃ pãnde kòto dɔ̃ro yãi. 6Yesu yã pìi lɛ̀kɔ̃ańnɛ, akũ odi dɔ̃ tó bɔ́ yãn àtɛn ońnɛro.

Yesu bi sãdãri manamɛ

7Abire yãi Yesu ɛ̀ra à pìńnɛ: Yãpuran matɛn oárɛ, makũmɛ karalɛ ũ sãnɔnɛ. 8Gbɛ̃ kũ ò dòmɛnɛ arɛnɔ bi kpãninɔmɛ, kpãni wɛ́dewɛnɔmɛ ń pínki, akũ sãnɔ dí ń yã maro. 9Makũmɛ karalɛ ũ. Gbɛ̃ kũ à gɛ̃̀ ma gũn ni aafia le. Anigɔ̃ gɛ̃ àgɔ̃ bo ani pɔ́bleki le. 10Kpãni'ona yãin kpãni dì su àdi pɔ́ dɛ àdi pɔ́ kakatɛ. Ma sumɛ, de gbɛ̃nɔ gɔ̃ wɛ̃̀ndi vĩ ògɔ̃ vĩ papana. 11Makũmɛ sãdãri mana ũ. Sãdãri mana dì gí a wɛ̃̀ndiii a sãnɔ yãi. 12Zamalinga bi sãdãri mananlo. Kũ sãnɔ de a pɔ́ ũro yãi, tó à è lɛwanna tɛn su, àdi sãnɔ tón à bàa lɛ́mɛ, akũ lɛwanna dì sí sãnɔ tɛ́ à ń fãkɔ̃a. 13Gbɛ̃ pìi bàkaa dìgɔ̃ kú kũ sãnɔoro, kũ à de zamalinga ũ yãi. 14Makũmɛ sãdãri mana ũ. Má a sãnɔ dɔ̃, ma sãnɔ sɔ̃ ò ma dɔ̃, 15lákũ De Luda ma dɔ̃ akũsɔ̃ má a dɔ̃ nà. Matɛn gi ma wɛ̃̀ndiii ń yãi. 16Má sã pãndenɔ vĩ kũ ò kú kara dí gũnlo. Séde mà su kũńwo se. Oni ma kòto ma, kpàsa ni gɔ̃ mɛ̀n do kũ dã̀riio mɛ̀n do. De Luda yemai 17kũ matɛn gi ma wɛ̃̀ndiii yãi, de mà ɛra mà sí dɔ. 18Gbɛ̃ke ni ma wɛ̃̀ndi símaro, mani gíi kũ ma zĩdaomɛ. Má a giina zɛ́ vĩ, má a sina zɛ́ vĩ dɔ. Yã kũ ma De dìtɛmɛnɛn gwe.

19Yã pì yãi Yuda gbãnadenɔ kɛ̃̀kɛ̃kɔ̃a dɔ. 20Ń tɛ́ gbɛ̃nɔ pì dasi: À tãna vĩmɛ, a mìi lìtɛ. Bɔ́yãin átɛn sã kpá a yãii? 21Ń gbɛ̃kenɔ pì: Tãnade yã'onaan gwero. Tãna ni fɔ̃ à vĩ̀na wɛ́ wɛ̃ yá?

Yesu a ludakɛna onnɛnaa

22Luda kpɛ́ sakɛna dikpɛ kà zaa Yurusalɛmu. Bunsirɛ gũmmɛ, 23akũ Yesu tɛn kure Luda ɔnn, zaa gu kũ òdi pi Sulemanu èdan. 24Akũ Yuda gbãnadenɔ lìkai, ò a là ò pì: Ĩni ó tó lokona ari bɔrɛɛ? Tó Arumasihumɛ n ũ, ǹ owɛrɛ swáswa. 25Akũ Yesu wèḿma à pì: Ma òárɛ, ádi síro. Yã kũ matɛn kɛ kũ ma De tɔ́oo pìnɔn a sèeda ũ. 26Ákɔ̃nɔ sɔ̃ ádi síro, kũ á de ma sãnɔ ũro yãimɛ. 27Ma sãnɔ dì ma kòto ma. Má ń dɔ̃, akũ òdigɔ̃ tɛ́mai. 28Madì wɛ̃̀ndi kũ àdi lákaro kpáḿma, oni ga zikiro. Gbɛ̃ke ni fɔ̃ à ń bo ma ɔĩro. 29Ma De kũ à ń kpáma de gbɛ̃ sĩnda pínkila. Gbɛ̃ke ni fɔ̃ à ń bo a ɔĩro. 30Makũ kũ ma Deo ó dokɔ̃nɔmɛ.

31Gbãnade pìnɔ gbɛ̀ɛ sɛ̀sɛ dɔ de ò a pápao ò a dɛ. 32Akũ Yesu pìńnɛ: Ma yã mana kũ ma De dàmɛnɛnɔ kɛ̀árɛ dasi. Yã mana kpate yãimɛ á ye à ma pápa kũ gbɛ̀ɛoo? 33Akũ gbãnade pìnɔ wèa ò pì: Ó ye ò n pápa kũ gbɛ̀ɛo yã mana kũ n kɛ̀ yãinlo. Kũ n dɔkɛ̀ kũ Ludao yãimɛ. Bisãsirimɛ n ũ, akũ n n zĩda sɛ̀ Luda ũ. 34Akũ Yesu wèḿma à pì: Luda ò á doka takadan à pì Ludanɔmɛ ń ũ. 35Luda dí gbɛ̃ kũ àtɛn yã ońnɛ pìnɔ sísi ludanɔroo? A yã gogona vĩ sɔ̃ro. 36Makũ kũ ma De ma ditɛ adona à ma zĩ andunia gũn sɔ̃, kũ ma pì Luda Nɛ́n ma ũ, bɔ́yãi a pì ma dɔkɛ̀ kũ Ludaoo? 37Tó matɛni ma De yãkɛna kɛro, àsun ma yã síro. 38Tó matɛn kɛ sɔ̃, bee tó ádi ma yã síro, à ma náani kɛ ma yãkɛnanɔ yãi, de àgɔ̃ dɔ̃ sãnsãn kũ De Luda kú ma gũn, akũ má kú a gũn sɔ̃. 39Akũ ò ɛ̀ra òtɛn zɛ́ wɛtɛ ò a kũ, akũ à pìtiḿma.

40Akũ à ɛ̀ra à gɛ̀ɛ Yoda bara dire, gu kũ Yahaya gbɛ̃nɔ da'itɛ kɛ̀n káaku. À gɔrɔ pla kɛ̀ gwe, 41akũ ò sù a kĩnaa dasidasi ò pì: Bee kũ Yahaya dí daboyã ke kɛro, yã kũ à ò gbɛ̃ díkĩna musu pínki bi yãpuramɛ. 42Akũ wà a náani kɛ̀ gwe dasi.

वर्तमान में चयनित:

YUHANA 10: BB2005

हाइलाइट

कॉपी