Matayo 4
4
Yesu arawa kyeesyon
(Mar 1:12-13; Luk 4:1-13)
1Nalyo Yesu kaorwa ni Mumuyo wa Iruva neende kulya kasa, nandeeswa-fo ni mmbishwa. 2Kamaa-fo mikonu makumi aana kio na nsanyiny nalakomba nta shoonga, elyi numa katirwa nshaa. 3Naasa mmbishwa kansheya kammbia, “Kwakooya mmbo kukee mwana wa Iruva ambaany mawe yaa nawe mikate.” 4Nawe kaallwa kaamba, “Kindo nndu akirya-u nakyo muu nshi shoonga tupu-fo, ni wo kirero kyauka efo kaniny ka Iruva.” 5Nalyo mmbishwa kamwiipoo kamfita kulya muriny mweele kanseleesa alya urorony lwa mmba ya Iruva. 6Kammbia, “Kwakooya mmbo kukee Mwana wa Iruva killyany si, shamashika kikee kireiye kikaambawa,
‘Ashevavasya vasu vakwe va iruveeu mashika afo yewe,
vashekukamaraa na mai, kulasheekapa nta urende lwafo iweny.’ ”
7Yesu kamwaallwa kammbia, “Nta kulaese Nndumi Iruva wafo!” 8Naasa mmbishwa kamwiipoo lyingyi, kamfita ando a ifumbuny yaasha kamoora ngyumangyi ta ulana toose na usuri lwa vayo. 9Kammbia, “Akati shikuniinga toose, kwakooya kwakutuula si neshoolokya ng'undeny.” 10Nalyo Yesu Kammbia, “Shuuka satana! Mmbo kikee kireiye kyeamba, ‘Ni Nndumi Iruva wafo mmbwe kushemoolokya nawe mmbwe muni kushemwiindyaa.’ ” 11Nalyo satana kanra-u, na vasu va Iruva vakansheya vakamfurukannya.
Yesu apooka mashora kulya Galilaya
(Mar 1:14-15; Luk 4:14-15)
12Naasa ekiita mbony ta Yohane sheelyi amfingwa, kookau keenda kulya Galilaya; 13Kasama kulya Nasareti kandekaa kulya Kapernaumu mbaambaa ya yeeve kulya myuungony ya Sabuloni na Naftali. 14Naambo kilya kikee kirere na kana ka nkisuku ulya Yesaya kikooye iinukya llya aleamba,
15“Yewe uruka lwa Sabuloni na Naftali
kundo kwiirye shia yeefika yeveny kulya kwa kulya ya Yordani,
efo Galilaya ya vandu va masanga.
16Wo ni vandu vakee ireeminy
vakawuya ilollya sa niini.
Ni vandu vakee urukeny lwa vafu
vakawuya ifummywa ni sa.”
17Naasa fyeeri filya llyo meendi Yesu alepooka ikapa weele na irera, “Kuryeny ngyulyamari tany, kimmba umangyi lwa Iruva lwammaafukya.”
Yesu avaanga vakiloshyony vaana
(Mar 1:16-20; Luk 5:1-11)
18Naasa eefo arua-ruaa kulya mbaambaa ya yeewe ilya ya Galilaya kalollya vana va nka vavii, ni Simion ulya avangwaa Petro, na mwanamaye we Andrea. Nawo veefo vashoolotaa mireiyo yaawo yeereiya makunga mashika vekee veereiya makunga. 19Nawe kavavia, “Ndifony mushilatye! Na yeny nshemwaallwa veereiya vandu.” 20Nawo llyo yeni vakatiiya-u mireiyo ilya yaawo vakallatya. 21Naasa alla na mbee kalollya vanavanka vengyi vavii ni Yakobo akee mwana wa Sebedayo na Yohane akee ni mwanamaye. Nawo vakee efo ngalaveny na nde-yaawo, we Sebedayo veefo vasongosya mireiyo ilya yaawo. Nawe kavavaanga. 22Nawo lyo yeni vakatiiya-u ngalava ilya na nde-yaawo, vakallatya.
Nndumi Yesu alosha na ishiisa vandu
(Luk 6:17-19)
23Nalyo kava mwisengetya kulya Galilaya koose eeloshaa efo mmba tawo teeterevya, na yoongoya vandu nrumi ya nsia, yeyo ya umangyi lwa Iruva. Kaveshiisa na wo ndwari na wo unana lwa efo vanduny. 24Nalyo nnduma wakwe ukaenda ikwaana kulya Siria koose. Na vandu vakamweengya yewo woose velwee ndwari shive na shive na yewo velyilyiswa kyuumu, na yewo vatirwa ni mimuyo mikasha, vasukwa na fitongororo malungo. Nawe kavakira. 25Vandu vakallatya matorito meengyi vauka kulya Galilaya na kulya muungo wa miri ikumi; na Yerusalemu na Yudaya, na kulya kwakulya ya Yordani.
वर्तमान में चयनित:
Matayo 4: MASNT00
हाइलाइट
शेयर
कॉपी
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.
