Embandizo 28

1Isaka ayeta Yakobo amuha omugisha mara amutanga namuragira ati, “Otalishwera Mukanaanikazi. 2Ogende Padaniaramu omwa Betueli shwenkuru kizara nyoko, obe nimwo oihya omukazi, omuli bahara ba Labani nyokoromi. 3Ruhanga Rushoborabyona akuhe omugisha, akuhe oruzaro n'abaijukuru bangi, obe nteko y'amahanga. 4Akuhe omugisha gwa Aburahamu iwe na baijukuru bawe, olye ensi egi ey'ofurukiiremu eyo yahaire Aburahamu!” 5Kityo Isaka ataishura Yakobo, agenda Padaniaramu owa Labani mutabani wa Betueli Omuaramea munyanya Rebeka, Rebeka nyina Yakobo na Esau.

Esau nashwera omukazi ondijo

6Esau abona okwo Isaka yahaire Yakobo omugisha, mara akamutaishura kugya Padaniaramu kwihyayo omukazi. Aijuka n'okwo orwo yabaire namuha omugisha akamuragira ati, “Otalishwera Mukanaanikazi;” 7n'okwo Yakobo yahuliire ishe na nyina, akagenda Padaniaramu. 8Aho Esau kayaboine okwo Abakanaani batalikushemelera Isaka ishe, 9agenda owa Ishimaeli eya Aburahamu, amuhangiira omuhara Mahalati, munyanya Nebayoti. Amwongera aha bakazi abo yabaire ainabo.

Ekiroto kya Yakobo

10Yakobo aruga Bersheba agenda bwolekera Harani. 11Agoba aha mwanya gumoiho araraho, kuba kir'ekyo eizoba likaba lyatobeire. Akwata eibare honene halinya alyeshagura kuba eizoba likaba lyatobeire. 12Arota haliho orukubiro rwemeleire ahansi, enshonga yarwo egobire omw'iguru; abamalaika ba Ruhanga nibarukubiraho nibarusongokeraho. 13Abona Omukama ayemeleire eiguru yarwo nagamba ati, “Inye mba Mukama Ruhanga wa Aburahamu sho, mba Ruhanga wa Isaka. Ensi ey'obyamireho ndigikuha iwe na baijukuru bawe. 14Baijukuru bawe baliba bangi nk'eitaka, orande ogobe oburugaizoba n'obugwaizoba, bikara na kasi. Omuli iwe n'omuli baijukuru bawe, nimwo enganda zona z'ensi ziliherwa omugisha. 15Inye ndakwemera, kandi ndakulindaga ah'oragyaga hona. Mara ndikugarura omu nsi egi, aha rw'okuba tindikusiga wenkai kuhika orwo ndikora ekyo nakugambira.” 16Yakobo asisiimuka aruga omu turo, atekeleza ati, “Mazimakwo Omukama asingiire omu mwanya ogu, mara mbaire ntalikukimanya.” 17Atina! Atekeleza ati, “Omwanya ogu tigulikutinisa pai! Hanu ti kindi shana nju ya Ruhanga mara nyarulembo y'eiguru.”

18Aho aimuka bwankya karai, akwata eibare elyo yabaire ayeshagwire, alisimba nk'enyomyo, alisheshaho amajuta eiguru. 19Omwanya ogwo agweta eibara Beteli; kyonkai obubere eibara ly'ekigo likaba lili Luzi. 20Aho Yakobo aragana ati, “Waitu Ruhanga k'oranyemera, okandinda omu rugendo rwange oru, okampa omukate nkalya, n'omwendo nkajwara, 21nkagaruka omwaitu n'emilembe, aho oraba Ruhanga wange, 22n'aha mbali nasimba eibare nk'enyomyo haliba nju yawe. Kandi ahali byona eby'olintunga, ndikuha ekichweka kya ikumi.”

वर्तमान में चयनित:

Embandizo 28: RHAY01

हाइलाइट

कॉपी