Matayo 7

Eminguanare lkulie

(Luka 6:37–38,41–42)

1<<Eminguanare lkulie, meiguanareki ntae. 2#Mrk 4:24Amu kore ana ninguanarere lkulie, naa nejia eikoni teneiguanareki ntae. Kore nkiguana nidung'oki likae, naa inia kidung'okini iyie.

3<<Aanyo payie idol somua natii nkong'u e lalache lino, nimidol leng'oti natii nino? 4Anaa aji inko tinijoki lalache lino, <Wou maaitai somua,> naa ng'ura, kore iyie ikitii leng'oti nkong'u. 5Iyie oitaakino, tang'asa ntai koon inia leng'oti nikiti nkong'u, payie itumoki atoduaa aitai inia somua natii nkong'u e lalache lino.

Entaa ng'eni!

6<<Emincho ldein ntoki nasinya, payie meiwuatuwuatakino aar ntae, niminang'akiki soit ogol nkinyang'a mbitiro, payie meroro tee nkejek.

Entoomonu, enteyiai, enkodkodo

(Luka 11:9–13)

7<<Entoomonu naa keichori ntae, enteyiai, naa itumtum, enkodkodo naa keboluni ntae. 8Amu kore pooki ng'ae oomonu, neng'amaa, kore ilo oyiaya naa ketum, kore ilo oikodkod nkutuk e nkaji neboluni.

9<<Ng'ae taa ntae aa kore teneomon ꞉nkerai enye mukate, neicho soit? 10Anaa teneomon sinkir, neicho lasurai? 11Amaa sa tiniyielolo ntae oaara torrok aaichoo nkera inchi nkichoorot supati, kebaa sa eitulusoo Papa linchi oti chumata aichoo lolo oomon ninye? 12#Luka 6:31Kore mbaa pooki niyieu nikintaas ꞉ltung'ana, ntaasa sii iyie ninche nejia, amu nejia ejo nkitanapat e Musa o nkiteng'ena ee loibonok le Nkai.

Ltim opirik o lalala

(Luka 13:24)

13<<Entijing te ltim opirik, amu kelala ltim, neidapach nkoitiei nalo mutai, naa inie eeim lkumo. 14Kake kepirik ilo tim, naa ronkai nkoitiei nalo nkichon, naa lkuni ootum.

Entodol ate te nkiteng'ena e sapare

15<<Entodol ate too loibonok le sapare, amu kepuonu nitii eichopito nkilani ee nkerra, kake kore atua ltauja lenche, naa suyiani oonyeicho. 16Naa taa lng'anayio lenche iyielouu ninche. Amaa, kebosu ꞉ltung'ana lmusabibu too lkeek loo lkuku, anaa lng'abolo too lpopong? 17Naaku kore lcheni pooki supat, nejing lng'anayio supati, kake kore lcheni pooki torno, nejing lng'anayio torrok. 18Mejing ꞉lcheni supat lng'anayio torrok, nemejing sii ꞉lcheni torno lng'anayio supati. 19#Mat 3:10; Luka 3:9Kore lcheni pooki lemejing lng'anayio supati, nedung'i, nenang'akini nkima. 20#Mat 12:33Naaku naa, taa lng'anayio lenche iyielouu ninche.

Mara pooki ng'ae ojing nkitoria e Nkai

(Luka 6:46, 13:26–27)

21<<Mara pooki ng'ae laaipot ajo, <Laitoriani, Laitoriani,> ojing nkitoria e chumata, kake ilo oas nayieu Papa lai oti chumata. 22Kaajoki kenya lkumo te inia parri e nkiguana, <Laitoriani, Laitoriani, amaa, ta nkarna ino, eitu apa kimbonicho, nikimiraa lairiruani, nikintoki aas mbaa kumo e nking'asia?> 23#SNk 6:8Naibalie ajoki ninche inia kata, <Mayielo nanu ntae, enchom entung'ayieeki lagilak loo nkitanapat.>

Lachetani ng'en o lomada

24<<Kore pooki ng'ae oning kulo omon lainien, neas, naa inji etuwuana ltung'ani ng'en otecheta nkaji enye te nkeper e ndadapoi. 25Necha nchan, nenang'unye nkariak, nekutunye lwuao kitok, nenang inia aji, kake eitu eurori, amu etuunieki lkitamanyunoto lenye nkeper e ndadapoi. 26Kake kore ltung'ani pooki oning kulo rerei lainien nemeas, naa inji etuwuana ltung'ani oamada otecheta nkaji enye te nkeper e sunyai. 27Necha nchan, nenang'unye nkariak, nekutunye lwuao, nenang inia aji, neurori, nemutmuta.>>

28 # Mrk 1:22; Luka 4:32 Kore payie eidip Yeso atejo kuna baa, neing'asia nkiteng'ena enye lturrurri, 29tankaraki eiteng'ena ana ilo oata nkitoria, namara tana laiteng'enak lenche loo nkitanapat.

वर्तमान में चयनित:

Matayo 7: saq

हाइलाइट

कॉपी