MATIU 13

Chisɔsi‑a tai tɛ, a si chin fen nyan duu gboo ma

(Maki 4:1-9; Duku 8:4-8)

1A tee dɔndɔ gbe chɛ a, Chisɔsi bɔ‑a a ni ka chenɛ min na, mbɛ a ta‑a Kadidi yii wa fɛ, a si‑a nɔ, mɔɛ n kan koe a. 2Mbɛ mɔ fanka wa a kan‑da wan a 'a tindanɛ, min‑na a ma, a ta‑a, mbɛ a si‑a dɛndɛ dɔndɔ ɔ. Mɔɛ chɛ n sin to‑a sɔ ɔ tindi ma. 3Mbɛ a bun‑da tai sɛsɛ tɛ‑a an tena.

A ɔ, “Tee dɔndɔ a, kamin dɔndɔ ta‑a wan a 'a sɛnɛ ɔ chin fen fasi tena. 4-8Ɛ a fasi chɛ an na, mbɛ dɔ bea‑a chia kuu a. Mbɛ dɔ n bɛɛ bea‑a faa gban duu gboo ma, dɔ n yɛ‑a an bea‑a wai duu gboo ma, mbɛ dɔ n sin bea‑a duu gboo chɛndɛ ma. Chin fen kuu miin bea‑a ka chia kuu a, konde n‑na an sogban sogban fan. Miin sin bea‑a ka faa gban duu gboo chɛ ma, an tana, an fɛn‑da wan bui chɛ wandi a, a mu min na, fii sima ni wan nɔ. Chɛɛ tee winɛ ma kun ni an dɔ, an gbaa‑a wan, koe min na mu, an suu nii ma yii ni chɛndɛ duu gboo ɔ. Miin sin bea‑a ka wai duu gboo chɛ ma, an bɛɛ fɛn‑da wan, a basan wai chɛ a dɔndɔ a, chɛɛ wai chɛ n koa‑a wan a ben chin fen chɛ n ma. Chɛ‑a chin fen fɛn chɛ n na kɔnya wan, mbɛ an gbaa‑a. Miin bea‑a ka duu gboo chɛndɛ chɛ ma, a danka a, an fii‑a wan wɔsɔkɔɔ. Dɔ n gbaa ni wan an kansanɛ ma chɛmɛ dɔndɔ, dɔ bi wɔdɔ, dɔ bi sawa.”

9Mbɛ Chisɔsi ɔ, “Wo wɛn too ɛ koe a min, wo chɛ a min.”

Chisɔsi 'a tai chɛ tɛen mu koe min ma

(Maki 4:10-12; Duku 8:9-10)

10Mbɛ Chisɔsi fɛ den chɛ n‑na an ma na a baima, mbɛ an dɔ, “Fen mu i toen mu mɔɛ n kan koe a tai ɔ?”

11Mbɛ Chisɔsi ɔ, “Mɔɛ gbɛɛ nii ma min dɔ sɔn tee a si Yataa 'a mansaya ma, a‑a an dɔ yian wo a. Chɛɛ a nunden fan mu mɔɛ tɔɛ n ma sanche wɛɛ. 12A mu min na, mɔɛ min gbɔsɔen mu Yataa 'a mansaya ɔ gbɛ koe a, a 'a yiimatɛ ma ɛ munda‑a wan, a sin, ɛ a ma sɔn‑da wan a chenama ɔ. Chɛɛ mɔɛ min gbɔsɔ ma Yataa 'a mansaya ɔ gbɛ koe a, ɛ fo‑a wan yiimatɛ ɛnden chɛ wɛɛ a, min mbe a ɔ. 13Chɛ an fɛ mu, n mbe koɔ an tena tai an dɔ. Chɛ ɛ a ma wan, an ya a kaenɛ ni ma an ni kaina fɛn, chɛɛ an mbe ee ko ɔ ko ɔ yen‑da. An too ma sɔenɛ ɛ ma wan, an ni a a min, chɛɛ an mbe ee ko ɔ ko ɔ gbɛ‑a. 14Aisaya na‑a min fɔ suun an ko a, an mbe ka bɔ‑a bi. A na‑a Yataa 'a gbonka chɛ wan, a ɔ,

‘Yataa ɔ te, a ɔ, wo e wo too ma sɔ‑a wan, wo ni koe a min, chɛɛ wo ee ko ɔ ko ɔ gbɛ‑a.

A ɔ, wo ya a kaenɛ ɛ ma‑a wan, wo ni kaina fɛn, chɛɛ wo ee ko ɔ ko ɔ yen‑da.

15A ɔ, koe min na mu, mɔɛ mu wo a, wo ma ma bɛn ni ko ɔ ko ɔ yen koe a.

A ɔ, wo ma ma bɛn ni a ɔ gbɛ koe wɛɛ a,

a sin wo too ɔ gbɛ kaka.

A ɔ, ni chɛ ma, wo ni koe n dɔ yen‑da wan,

wo ni koe n dɔ gbɛ,

wo sin too ɔ nii gbɛ‑a ka.

A ɔ, chɛ ni a ma‑a wan, wo ni wo ya a mun a ma,

mbɛ a sin, a ni wo baun‑da wan.’ ”

16Mbɛ Chisɔsi ɔ a fɛ denɛ n ma, a ɔ, “Chɛɛ wo tana wo duaen mu, a mu min na, wo e koe ɔ yen, mbɛ a yɛ to, wo e a a min. 17N ni a ma din wo tena, mbɛ Yataa 'a gbonka chɛ mɔɛ sɛsɛ, a basan mɔɛ chɛ n na, miin tanden ni Yataa tena, an toen ni an ni koe chɛ n dɔ yen, wo‑a miin dɔ yen ka, chɛɛ an ma an dɔ yen ni. An toen ni to an ni an na min, wo‑a miin na min ka, chɛɛ an ma an na min ni.

Chisɔsi‑a tai chɛ fasai an tena

(Maki 4:13-20; Duku 8:11-15)

18“Wo wo too ma sɔ tai chɛ fasai ma, a si chin fen fasi mɔɛ chɛ ma. 19Mɔɛ dɔ n mbe wan yɔ chia kuu a duu gboo chɛ, chin fen kuu n bea‑a min ma. Ni an‑na Yataa 'a sakana bai a min, a si a 'a mansaya ma, an mbe ee a ɔ gbɛ chɛndɛ chɛ. Mbɛ an nyina yama chɛ, Sitana, a na‑a a ya kɔɔɛ a, a‑a bai chɛ bɔ an yiima ɔ. 20Mɔɛ dɔ n sin mbe wan yɔ faa gban duu gboo chɛ, chin fen kuu n bea‑a min ma. Ni an‑na sakana bai chɛ a min, an mbe an boo si wan a kɔɔ, buɔdia wandi gbu a, a ya kɔɔɛ a. 21Chɛɛ Yataa 'a bai chɛ ee si an yiima ɔ, tima ɔ yansama ko a. An mbe dan dechee a a tima kundu ɛnden fan ko a. Ni an‑na ko ma gbaaenɛ sa an ma dechee, sakana bai chɛ wako a, an mbe an boo bɔ wan a kɔɔ. 22Mɔɛ dɔ n sin mbe wan nɔ yɔ wai duu gboo chɛ, chin fen kuu chɛ n bea‑a ka min ma. An mbe sakana bai chɛndɛ chɛ a min fan, chɛɛ dunya chɛ ɔ faagbaa, a basan faagbaa a si an mbe ma buɛ min dɔ an ni nyan, ɛ a ma wan fanka ee ma to Yataa 'a sakana bai chɛ a an tena. 23Mɔɛ dɔ n sin mbe wan yɔ duu gboo chɛndɛ chɛ, chin fen kuu n bea‑a ka min ma. An gbɔ‑a wan wɔsɔkɔɔ. Dɔ n gbaa ni wan an kansanɛ ma chɛmɛ dɔndɔ, dɔ nu bi wɔdɔ, dɔ n sin ni bi sawa. Mɔɛ chɛ n bɛɛ ɛ ka wan, miin mbe sakana bai chɛndɛ chɛ a min, mbɛ an‑na a sa an faa ɔ chɛndɛ chɛ, mbɛ an‑na a ma, yɔ sakana bai chɛ‑a a fɔ buɛ min dɔ an ye, a ma koe a.”

Chisɔsi‑a tai tɛ, a si binɛ ma, chin fenɛ ya a

24Mbɛ Chisɔsi‑a tai dɔ mende tɛ to an tena, a ɔ, “Yataa 'a mansaya maen fan mu yɔ min ma‑a tai chɛ ɔ. Kamin dɔndɔ na‑a sɛnɛ sa wan, mbɛ a‑a chin fen suu chɛndɛ fɛn a ma. 25Chɛɛ yɛɛ dɔndɔ ma, a ɛ kɛn sa ɔ chinɔɛ ɔ, an bɛ a 'a mɔɛ n na, a ko don ma nyɔɛ ta‑a wan sɛnɛ chɛ ɔ, mbɛ a‑a bin kuu fasi a ɔ, mbɛ a yɛ‑a yɛdɛn. 26Chin fen chɛ koa‑a wan dɔndɔ a, an fea bin chɛ a. Mɔ ma che ni an tɛ bɔɛ sɔn‑da aan chin fen chɛ bu ma‑a. 27Mbɛ kamin chɛ 'a sɛn dɔ kaminɛ n na‑a a tena, mbɛ an‑na a fɔ, an dɔ, ‘Kai, binɛ‑a sɛnɛ gbu ya. Mɔ ma a ɔ sɔn bin bonda chɛ ka‑a kaina, mmɔ‑a chin fen suu chɛ ya bɔ wan kɛn chɛndɛ chɛ mmɔ e na a fɛn.’ 28Mbɛ a‑a a fɔ, a ɔ, ‘N ko don ma nyɔɛ an‑na wai si ka.’ Mbɛ an dɔ, ‘Nn toen mu nn ni bin chɛ kuu bɔ chin fen chɛ ya a.’ 29Mbɛ a ɔ, ‘A an. Wo e ma‑a a bɔ‑a, ɛ basan‑da wan chin fen chɛ a, mbɛ chin fenɛ yayi‑a. 30Wo a to nɔ, aan chin fenɛ tɛ tima ni che. An tima chɛ a, n mbe a fɔ‑a wan chin fen tɛ mɔɛ n ye, an mbe e na to chin fenɛ tɛ‑a, an ni binɛ pɛn kuu bɔ, mbɛ an‑na a a chii, an‑na a minda. Mbɛ a danka a, an‑na n 'na chin fenɛ sin na sɛ bea a.’ ”

Chisɔsi‑a tai fea tɛ, a si Yataa 'a mansaya ma, a ɛ koa buɛ min dɔ

(Maki 4:30-34; Duku 13:18-21)

31Chisɔsi‑a tai dɔ mende tɛ wan to an tena, a ɔ, “Yataa 'a mansaya maen fan mu yɔ min ma‑a tai chɛ ɔ. Kamin dɔndɔ na‑a chin fen kuu dɔɔma ɛndenɛ ya wan, mbɛ a‑a a chin a 'a yadi ɔ. 32Chin fen kuu nii nɔ, min ni dɔɔ a ni ben an chin fen kuu chɛ ma. Chɛɛ a fɛn‑da kɛn, a koa‑a wan, mbɛ a pimbi bun‑da chin fenɛ tɔɛ n kun ma yadi chɛ ɔ. Konde n na‑a wan, an‑na an nyanɛ n sa a bonɛ n dɔ.”

33Chisɔsi‑a tai chɛ wɛɛ tɛ wan to an tena, a ɔ, “Yataa 'a mansaya maen fan mu yɔ min ma‑a tai chɛ ɔ. Musu dɔndɔ‑a yisin denɛ ya wan, mbɛ a‑a a chɛ feawa funku wa ɔ, konko pani ɔ biidi nyan koe a. Yisin chɛ kun‑da wan feawa funku chɛ gbɛɛ ɔ, mbɛ feawa chɛ sɛ‑a.”

34Chisɔsi na‑a bai chɛ n gbɛɛ fɔ mɔ fanka chɛ n tena tai n fan dɔ. A sin tima ɔ tima gbɛ, a nii koɔ an tena gbama a, mɔɔ ni a‑a tai tɛ. 35Chɛ na‑a a ɔ yian fan, mbɛ Yataa da a kuiɛ bɔ‑a a a. A 'a gbonka chɛ mɔɛ na‑a a da a kuiɛ min na ben suun, a ɔ,

ɛ koɔ‑a an tena tai an dɔ.

An ma koe min dɔ sɔn tee, a ka dunya a dan tima ma, ɛ an dɔ yian‑da wan an na.

Chisɔsi‑a tai chɛ fasai, a si bin chɛ ma, chin fen chɛ ya a

36Mbɛ Chisɔsi‑a mɔ fanka chɛ n to baa ma, a don‑da chenɛ a. A fɛ denɛ n don‑da a kun ma, an dɔ, “Tai chɛ fasai wɛ nn ye, i‑a min tɛ ka a si bin chɛ ma chin fen chɛ ya a.”

37Mbɛ Chisɔsi ɔ, “Kamin chɛ min‑na chin fen suu chɛndɛ chɛ ya ka, mbɛ a‑a a fɛn a 'a sɛnɛ ɔ, a mu n fan na, Mɔ Gbu 'a Denɛ. 38Sɛnɛ chɛ mu dunya chɛ an na. Chin fen suu chɛndɛ chɛ mu mɔɛ n fan na, miin mbe Yataa 'a mansaya kɔɔ. Bin chɛ n mu mɔɛ chɛ n fan na, miin mbe an nyina yama Sitana fɛ. 39A sin fan mu n ko don ma nyɔɛ chɛ a, min‑na bin chɛ fasi chin fen chɛ ya a. Chin fen tɛ tima chɛ sin mu dunya danka an na, mbɛ a sin, chin fen tɛ mɔɛ chɛ n mu maeka n fan na. 40Tima min na dunya ɛ ban‑da, ɛ ma‑a wan yɔ an‑na bin chɛ a sɔn sɔn buɛ min dɔ, mbɛ an‑na a minda. 41N fan, Mɔ Gbu 'a Denɛ, n mbe n 'na maeka n na na wan mɔɛ chɛ n tɛ ɔ, miin mbe Yataa 'a mansaya kɔɔ. An mbe mɔɛ chɛ n gbɛɛ a sɔn sɔn‑da wan, mɔɛ miin mbe ko yama ma‑a, ni miin bɛɛ an bɔɛ n na dɛ‑a ko yama ɔ. 42Maeka chɛ n mbe an mɔɛ chɛ n na dɛ‑a wan ta wa chɛ ɔ, an mbe ma‑a kaina di chɛ‑a, a basan an nyinɛ a daunɛ a tɔɔya a. 43Chɛɛ mɔɛ miin tanden mu Yataa tena, an mbe man‑da wan taun, yɔ tee manɛ an Fa Yataa 'a mansaya kɔɔ. Chɛ an fɛ mu, wo wɛn too ɛ koe a min, wo chɛ a min.”

Chisɔsi‑a tai fea tɛ, a si nyan chɛndɛ ma

44Chisɔsi ɔ, “Yataa 'a mansaya maen fan mu yɔ min ma‑a tai chɛ ɔ. Mɔ dɔndɔ‑a a kɔnkɔn fan nyanɛ a fii ɔ. Chɛɛ a ma a ya ni, a‑a a kun ma bun fan to chɛndɛ chɛ. Mbɛ a ta‑a, buɔdia wandi a, mbɛ a‑a a boo fenɛ gbɛɛ ma tachɛ kaina chɛ gbu san koe a, nyan chɛ ɛ ka nun dɔ min dɔ.

45“Yataa 'a mansaya maen fan mu to yɔ min ma‑a tai chɛ ɔ. Kaminɛ ni wan, a ya a kan‑da sen dɔndɔ a, min baa a ni gbɛ yɔ dɛmunɛ. 46A‑a a nyima nyima yen kɛn, min baa gbanden ba ni, a ta‑a wan, mbɛ a‑a a boo fenɛ gbɛɛ ma tachɛ kɔpɔɛ a, mbɛ a na‑a, a‑a a san.”

Chisɔsi‑a tai tɛ, a si nyɛ gbain yaa ma

47Chisɔsi ɔ te to, “Yataa 'a mansaya maen fan mu to yɔ min ma‑a tai chɛ ɔ. Nyɛ gbain yaa, ɛ nyɛ n kondo wan yii wa ɔ, mbɛ a na‑a an na tindi ma. Nyɛ kan kɔ kan mbe ma wan a ɔ. 48Ni yaa chɛ sa‑a, mbɛ nyɛ n fa‑a a a, nyɛ gbain mɔɛ n mbe a sawan fan tindi ma. Mbɛ an si‑a, an bun‑da nyɛ chɛ n ya bɔ‑a. Nyɛ miin nyin ka a daun koe a, an mbe an chɛ wan samba ɔ. Chɛɛ nyɛ miin ma nyin ka a daun koe a, an mbe an nɛnɛ n na dɛ wan. 49Ɛ ma‑a ka wan dunya danka wɛɛ a. Maeka n mbe na‑a wan dunya ɔ, mbɛ an‑na mɔ yama n ya bɔ mɔ tandenɛ n na Yataa tena, 50mbɛ an‑na mɔ yama chɛ n na dɛ ta wa ɔ, an mbe ma‑a kaina di chɛ‑a, a basan an nyinɛ a daunɛ a tɔɔya a.”

51Mbɛ Chisɔsi‑a a fɛ denɛ n dɔ tisa, ni an‑na tai chɛ n dɔ gbɛ wan. Mbɛ an dɔ, “Mm.”

52Mbɛ a ɔ, “Chɛ ma yau. Koe min na mu, ni mɔ ɔ mɔ‑a Yataa 'a sawa sɔn, ni mɔ ɔ mɔ‑a n 'na kanɛ sɔn, a si Yataa 'a mansaya ma, ɛ wan yɔ chen ti. Ni a boo fenɛ ma gbɔsɔɛ‑a a bia, ɛ a bɔ wan a ka a sa tena ɔ bɛn tena, a boo fenɛ kɔma basan a nama a.”

An tɛ‑a Chisɔsi ɔ, a waa Nasaɛti duu ɔ

(Maki 6:1-6; Duku 4:16-30)

53Mbɛ Chisɔsi ban‑da kɛn mɔɛ n kan‑da tai chɛ n na, a ka‑a wan an kaina chɛ. 54Mbɛ a yɛ‑a a waa duu ɔ. A yɛ‑a kɛn, a bun‑da mɔɛ n kan‑da an 'na samun chɛ chenɛ a. A 'a kan chɛ buɛ‑a mɔɛ n da a fa wan. Mbɛ an bun‑da a fɔ‑a, an dɔ, “Kamin chɛ ɛ ka kamaya ko bonda miin ma‑a, a basan yiimatɛ bonda chɛ a ɔ, kɔndɔfii mu a a. 55N‑na a ɔ sɔn fan a mu nyɔn na. Chen sɔ mɔɛ chɛ 'a denɛ an nɛ, a 'a musu Mɛi‑a min suun. Nyɔn ma a dɔɛ n sɔn? Chimisi ni ma, ni Chosɛfi, ni Saimɔn, a basan Chudasi a. 56Mmɔ bɛ an mbe sɛ mmɔ ɛ yii mmɔ bɛ a tensa n na. Ɛ ma ka ma a ni ma ka?” 57Chɛ‑a a ma wan, a ben buɛ ni don fan an ma.

Chɛɛ Chisɔsi‑a a fɔ an ye, a ɔ, “Mɔɛ n mbe basɔmaya be wan Yataa 'a gbonka chɛ mɔɛ ma kaina dɔ mende nu, chɛɛ basɔmaya ee a ma a ta suun duu ɔ, a suun chenɛ wandi gbu da a.” 58A nii ma kamaya ko sɛsɛ ma ni nɔ an ko a, a mu min na, an nii ma dan ni a a.

वर्तमान में चयनित:

MATIU 13: KONONT

हाइलाइट

कॉपी