LUKA 20

Lireevo khu Vunyali vwa Yesu

(Mat 21:23-27; Mk 11:27-33)

1Litukhu lindi, lwa Yesu yali nali mu lwanyi mwi Litempeli, niyechitsanga vandu khandi niyilwatsanga Ivanjeli, vasalisi vakali nende veechitsi va malako, halala na vasakhulu, vatukhaho 2nivamureeva, “Khuvoolele, nu vunyali shina vuli navwo vuchilanga nukhola vindu yivi? Ni viina wakhuha vunyali yuvu?”

3Yesu yavachipa, “Leshi nunundi mureeve lireevo lilala; mboleli, 4vunyali vwa Yohana khubatisa vwarula khu Nyasaye inoho khu vandu?” 5Varanga khureevana vene khuvene nivavoola, “Ni shina shia khunyala khuvoola? Niiva khunyala khuvoola, ‘Khurula khu Nyasaye,’ alareeva, ‘Shichila shina numuvula khusuuvila Yohana?’ 6Navutswa niiva khulavoola, ‘Khurula khu vandu,’ shituma shia vandu voosi vanyala khukhulesa na machina, shichila voosi vali ni lisuuvila ndi Yohana yali muprofeti.” 7Khulwa yako, vachipa Yesu, “Khwakorwa wi libatisa lia Yohana liarula.”

8Yesu yavavoolela, “Khali inzi shinyala khumuvoolela nu vunyali shina vuchilanga nikhola vindu yivi tawe.”

Lukanu lwa Vandu Vakoteshitswa Mulimi

(Mat 21:33-46; Mk 12:1-12)

9Yesu yavoolela vandu lukanu yulu: “Litukhu lindi, khwaliho nu mundu wali niyaraaka misabibu mu mulimi kwekwe, nakukoteshitsa khu valimi vakoteshitswa valala, natsia mu luchendo khumatukhu manyishi. 10Lwa matukhu kukhuchesa matunda ki misabibu kali nikamali khutukha, yaruma murumishi khu valimi vakoteshitswa, anyole khurula khuvo shitonye shieshie shi lichesa; navutswa valimi vakoteshitswa venavo vamushuta, nivamukhunga makhono mele. 11Khulwa yako, yaruma murumishi wundi; khali valimi vakoteshitswa venavo vamushuta khandi, nivamukholela tsisoni, nivamukhunga makhono mele. 12Yaruma murumishi wa khavaka; valimi vakoteshitswa vamusalilitsa nivamusiuva ilwanyi. 13Mwene mulimi kwi misabibu yireevana, ‘Ni shina shianyala khukhola? Nzitsanga khuruma mwana wanje wa nayaanza; haundi vanyala khumuhulishitsa.’ 14Navutswa lwa valimi vakoteshitswa vamulola, vavoolelana vene khuvene, ‘Uyu neye mwana wu mwene mulimi kwi misabibu; chendi khumwiiri, ma miandu chiechie chiliva chieru!’ 15Khulwa yako, vamusiuva ilwanyi wu mulimi kwi misabibu nivamwiira.”

Yesu yavareeva, “Musuuvilanga mwene mulimi kwi misabibu anyala khukhola shina? 16Aliitsa khwitsa yiiri valimi vakoteshitswa; khandi akoteshitsi mulimi kwi misabibu kwenoko khu valimi vandi.” Lwa vandu vahulila ndio, vavoola, “Yaka kavuli khwikholekha!”

17Navutswa Yesu yavaheenza nareeva, “Mahandiko Matakatifu yaka kavoolanga shina?

‘Lichina lia vumbashi vambakhana livula vukhonyi

lianyolekha khuva liu mukona khuvira machina kandi koosi.’

18Shia mundu wosi nakwa khu lichina lienelo, aliitsa khusionokhanamu khutukha akwi lukuushi; navutswa niiva lichina lienelo liliitsa khukwa khu mundu, liliitsa khumusionola akwi lukuushi.”

Lireevo khu Lirunga Vushuru

(Mat 22:15-22; Mk 12:13-17)

19Vechitsi va Malako nende vasalisi vakali vachelitsa khukumila Yesu hawenaho vwangu, shichila vali vamanyi ndi uvooli lukanu lwenolo khuvanyeka; navutswa varia vandu. 20Khulwa yako, vakhava vwiyangu vu khumunyola. Vaha vandu valala asoya khwikhola khuva vatoto; nivavaruma khutsia khureeka Yesu na mareevo, vamuhaane khu vimilili nende vi tsingulu tsia Gavana wa Varoma. 21Vavoolela Yesu, “Mwechitsi, khumanyi ndi ka ulomolomanga khandi ka wechitsanga ni ku vulunji. Khumanyi ndi shiuwihonelanga vandu tawe; navutswa wechitsanga kilikali khulondokhana khu lienya lia Nyasaye ali nalio khu vandu. 22Khuvoolele, malako keru kahuchililanga khurunga vushuru khu Mwami wa Roma inoho khulekha khurunga?”

23Navutswa Yesu yalola vupele vwavo navareeva, 24“Manyinyikhu isenti. Likoondo nende lira lili khu isenti yili nilia viina?” Vamuchipa, “Ni liu Mwami wa Roma.”

25Khulwa yako, Yesu yavavoolela, “Nu vulahi, runji khu Mwami wa Roma viu Mwami wa Roma, ma murunji khu Nyasaye via Nyasaye.”

26Vakhaywa khukumila Yesu vandu voosi nivaliho, khulondokhana khu ka yali navooli; navutswa lwa vachenyinywa ni lichipu lielie vahonjela.

Lireevo khu Lisimushitswa Khurula mu Likhutsa

(Mat 22:23-33; Mk 12:18-27)

27Vasadukayo valala, vavoolanga ndi lisimukha lia vandu vakhutsa khurula mu likhutsa livulaho, vatsia khu Yesu, 28nivavoola, “Mwechitsi, Musa yakhuhandichila lilako: ‘Niiva mundu aliitsa khukhutsa nu khulekha mukhali navutswa vuchila vaana; amwavo wewe aliitsa khuhila mukhutsakhali nu khwivula khuye vaana va amwavo wewe yali wivula.’ 29Litukhu lindi, khwaliho na vamwavo saba; wu khuraanga yahila mukhali, nakhutsa vuchila khwivulakhu mwana wosi; 30wa khavili yahila mukhutsakhali mwenoyo; 31khandi wa khavaka nahila mukhutsakhali mwenoyo. Vamwavo voosi saba vahila mukhali mwenoyo, navo nivakhutsa vuchila khwivulakhu vaana. 32Lukhumalilikha lwene, mukhutsakhali mwenoyo yakhutsa. 33Khulwa yako, khulitukhu lia vandu valiitsa khwisimukha khurula mu likhutsa, aliitsa khuva mukhali wa viina? Shichila vamwavo voosi saba vali vamuhila khuli mukhali wavo.”

34Yesu yavachipa, “Vandu vasatsa nende vakhali va matukhu kanu vahilananga; 35navutswa vandu vatushili khwisimukha khurula mu likhutsa khandi valiitsa khuva mwoyo mumatukhu kaliitsa khuvaho valiitsa khuvula khuhilana. 36Valiitsa khuva khuli tsinjelosi; khandi valiitsa khuvula khukhutsa. Ni vaana va Nyasaye, shichila vayisimushitswa khurula mu likhutsa. 37Navutswa khulondokhana khu shisakha shiakhanga mulilu, khali Musa yamanyinya ndi vandu vakhutsa visimukhanga khurula mu likhutsa; shichila alaanganga Mwami Nyasaye, ‘Nyasaye wa Aburahamu, Nyasaye wa Isaka, khandi Nyasaye wa Yakobo.’ 38Ni Nyasaye wa yavo vali mwoyo, navutswa wa vandu vakhutsa tawe, shichila vandu voosi vali mwoyo shichila ye.”

39Valala khu veechitsi va Malako vavoola, “Mwechitsi, uvooli lichipu lilahi.” 40Mundu avulakhuho wachelitsa khandi khureeva Yesu mareevo.

Lireevo Shichila Masiha

(Mat 22:41-46; Mk 12:35-37)

41Navutswa Yesu yavareeva, “Vanyala ndina khuvoola Masiha aliitsa khuva mwitsukhulu wa Daudi? 42Daudi mwene avoolanga mu Shitabu shi Tsitsabuli,

‘Mwami Nyasaye yavoolela Mwami wanje:

Yikhala hanu khuluveka lu mukhono kwanje musatsa,

43khutukha lwa khukuurila vatsiku vovo.’

44Daudi yamulaanga ‘Mwami’; Masiha anyala khuva ndina mwitsukhulu wa Daudi?”

Lichelihitswa khu Vechitsi va Malako

(Mat 23:1-36; Mk 12:38-40)

45Lwa vandu voosi vali ni vamuhulishitsanga, Yesu yavoolela veechi veve, 46“Muve vacheli shichila veechitsi va Malako, vayaanza khuchenda chenda nivifwali tsikaanzu tsiavo tsindaambi, nu khuheelwa milembe chiu luyali musokoni; khandi varovolanga visoko viu luyali mu masinagogi nende havundu halahi mu milukha; 47vihonelanga vakhutsakhali, ni vavanuula vindu mu tsingo tsiavo; khandi vikhola vasaalanga lisaala liraambi! Valiitsa khusalilitswa vululu muno!”

वर्तमान में चयनित:

LUKA 20: LLLCATHOLIC

हाइलाइट

कॉपी