YOHANA 3
3
Yesu Yechitsa Nikodemo
1Khwaliho nu mulala khu vimilili va Vayahudi walaangwangwa Nikodemo; khandi yali mulala khu mukaanda kwa Vafarisayo. 2Litukhu lindi, Nikodemo yasimukha mu vutukhu natsia khulola Yesu, namuvoolela, “Rabbi, khwamanya ndi uli mwechitsi warula khu Nyasaye. Mundu avulakhuho unyala khukhola viloleshitsu via yivi wu kholanga, Nyasaye nakhavele naye.”
3Yesu yamuchipa, “Khuvoolelanga katoto ndi mundu nashili khwivulwa lwa khavili, shianyala khwinjila mu Vwami vwa Nyasaye tawe.”
4Nikodemo yamureeva, “Mundu yakhivulwa munjila shina niyahindila khale? Katoto shianyala khwinjila munda mwa mama wewe, nu khwivulwa lwa khavili tawe!”
5Yesu yamuchipa, “Khuvoolelanga kilikali ndi mundu nashili khwivulwa khuvirila khu matsi nende Roho, shianyala khwinjila mu Vwami vwa Nyasaye tawe. 6Mundu yivulwangwa nu mundu; khandi mundu wivulwi na Roho neye wa Roho. 7Muvuli khunjenyela lwa mbolanga munyi voosi mwivulwi khandi lwa khavili. 8Imbuutsa ihuutsanga havundu ha yenyi; unyala khuhulila khuli ihuutsanga; navutswa shiunyala khuvoola wa irulanga inoho wa itsitsanga tawe. Khulwa yako, nindio khandi kali kario khu mundu wivulwa na Roho.”
9Nikodemo yamureeva, “Kanyala khwikholekha munjila shina?”
10Yesu yamuchipa, “Uli mwechitsi mukali wa Israeli; navutswa wakorwa kambolanga yaka? 11Khuvoolelanga katoto ndi khulomolomanga makhuva ka khwamanya khandi khuhaananga vushiahidi khulondokhana khu ka khwalola; navutswa khali vandu vambakhane khuhuchilila likhuva lieru lia khuvoolanga. 12Niiva mbele nimuvoolele makhuva khulondokhana khu vindu vikholekhanga khulilova khunu, navutswa mwambakhane khusuuvila, munyala khusuuvila ndina niiva nyala khumuvoolela makhuva khulondokhana khu vindu viu mwikulu? 13Mundu avulakhuho watsiakhu mwikulu, nikakhali Mwana wu Mundu wonyene, warula mwikulu.”
14Khuli Musa yachinguula ikulu inzukha yu mukasa khu musala mu shiangalangwi, nindio khandi Mwana wu Mundu aliitsa khuchinguulwa, 15khu mundu usuuvila muye anyole vulamu vwi mihika ni mihika; 16shichila Nyasaye yayaanza vandu vu mu shivala nahaana Mwana wewe mutelwa, khu mundu usuuvila muye alivula khukhutsa, navutswa anyole vulamu vwi mihika ni mihika. 17Nyasaye shiyaruma Mwana wewe mu shivala khwitsa khukhalachila vandu tawe; navutswa khuvahonyinya khuvirila khuye.
18Mundu usuuvilanga mu Mwana shianyala khukhalachilwa tawe; navutswa mundu wambakhananga khusuuvila muye wamala khukhalachilwa khale, shichila wayambakhana khusuuvila mu Mwana wa Nyasaye mutelwa. 19Nindi likhalachilwa liliitsa khwikholekha, shichila vulavu vwamala khwitsa mu shivala, navutswa vandu vayaanza shisuundi khuvira vulavu, shichila vikholwa viavo ni vitamanu. 20Navutswa mundu wu kholanga vindu vitamanu wayambakhana vulavu, khandi shianyala khwitsa mu vulavu, shichila shiyenyi vikholwa vievie vimanyikhane havulavu tawe. 21Navutswa mundu wu kholanga katoto alolekhanga mu vulavu, khu kamanyikhane havulavu ndi vikholwa vievie vikholeshe khuhaana luyali khu Nyasaye.
Yohana Yalomoloma Khulondokhana khu Yesu
22Matukhu mati nikakhavira, Yesu nende veechi veve vasimukha nivatsia mu lusomo lwa Yudeya, ha yamenya navo khumatukhu mati, nabatisanga vandu. 23Yohana yali nabatisanga khandi vandu havundu halaangwangwa Aenoni, himbi mu litaala lia Salimu, shichila khwaliho na matsi manyishi. Vandu vatsitsanga khuye, navabatisa. ( 24Vindu vienevo vikholekha Yohana nashili khuvohwa mucheela.)
25Valala khu veechi va Yohana varaanga khuhingala mulilomoloma nu Muyahudi wundi khulondokhana khu mulukha ku khunihitswa. 26Khulwa yako, veechi venavo vasimukha nivatsia khu Yohana, nivamuvoolela, “Mwechitsi, mundu wali nivi khuluveka luli ivukwi wu Muchela kwa Yorodani, nali woyo wa wahaana vushiahidi khulondokhanakhu, abatisanga vandu nunundi; khandi vandu voosi vatsitsanga khuye!”
27Yohana yavoola, “Mundu avulakhuho unyala khunyolakhu shindu, Nyasaye nakhamuheele. 28Munyi vene muli vashiahidi vaanje lwa navoola, ‘Shindi Masiha tawe, navutswa narumwa khwitsa imbeli wewe.’ 29Musatsa uselelanga mwiiha neye mwene mwiiha; navutswa mulina wu musatsa uselelanga mwiiha asinjilaho ahulila ka avoolanga, khandi asangalanga lwa ahulilanga musatsa uselelanga mwiiha nalomoloma. Nindi khali inzi ndi nu vuyaanzi vunyishi vwatoto. 30Khutukha amanyikhane muno khuvira inzi.”
Woyo Uliitsa Khurula Mwikulu
31Woyo uliitsa khurula mwikulu ali nu vunyali khuvira shia shindu shiosi. Mundu wivulwa mu shivala nu wu mu shivala, khandi alomolomanga khulondokhana khu vindu viu mu shivala; navutswa woyo uliitsa khurula mwikulu, ali nu vunyali khuvira shia shindu shiosi. 32Ahaananga vushiahidi khulondokhana khu ka ye mwene yalola nikakholekhanga khandi nahulila. Navutswa mundu avulakhuho uhuchililanga makhuva keke. 33Mundu uhuchililanga vushiahidi vwevwe, amanyinyanga toto ndi Nyasaye nu watoto. 34Mundu wa Nyasaye mwene yaruma alomolomanga makhuva ka Nyasaye, shichila Nyasaye amuheetsanga mu vunyishi tsingulu tsia Roho. 35Tata wayaanza Mwana wewe, khandi wamuha vunyali khusinjilila shia shindu shiosi. 36Mundu usuuvilanga mu Mwana, ali nu vulamu vwi mihika ni mihika. Mundu wambakhananga khusuuvila mu Mwana, shialiitsa khunyola vulamu tawe; navutswa Nyasaye alatsililila khumulolela vurima.
वर्तमान में चयनित:
YOHANA 3: LLLCATHOLIC
हाइलाइट
शेयर
कॉपी
Want to have your highlights saved across all your devices? Sign up or sign in
© The Bible Society of Kenya, 2013
