TAUNET 3
3
Yomset ak kabutetab chito
1Ki ng’alindet ndaret kosiir tiony age tugul ne bo ng’ony ne kiga koyai Jehovah Kamuktaindet. Kilenji anyun kwondo, Tos, iman kimwa Kamuktaindet kole, Amat oam logoek che bo ketit age tugul ne bo mbaret? 2Ak kilenji kwondo ndaret, Kichamwech keam logoek che bo ketikab mbaret: 3ago kimwa Kamuktaindet kole, Amat oam logoek che bo ketit ne mi kwenutab mbaret, amat otwa, si mobegu. 4Kolenji ndaret kwondo, Iman, mobegu: 5amu ingen Kamuktaindet kole, eng’ betut ne koam che bo ketoto koyatogis konyekwok, ak ogergeitu ak Kamuktaindet, onai ne mie ak ne ya. 6Ak ye kingogeer kwondo kole mie ketoto eng’ amet, ak ko kararan eng’ konyek, ak ko ketit ne kichamei ne ing’omiti chi, kobut anyun logoekyik koam; ak kogochi manong’otiondennyi ne kimi tuwai koam agine. 7Koyatogis anyun konyekwak ichek tuwai, ak konai kole mi ach ngor; konabanab anyun sogekab mogoiywet, konapchigei ngoroik che kigermenegei.
8Ak kigas Jehovah Kamuktaindet kowendoti eng’ mbar ye kiga kogaititit koskoleny; koung’gei koistoegei ole mi Jehovah Kamuktaindet chichoto ak kwondanyi, eng’ ketik orit che mi mbar. 9Koguur anyun Jehovah Kamuktaindet chichoto, kolenji, Imi ano? 10Kowolji inendet, kolenji, Kagas kuting’ung’ eng’ mbar, ak kaiywei, amu ami acho ngor, kaung’ge anyun amu noto. 11Ak komwa kole, Ng’o ne kamwaun kole, Imi ach ngor? Keam che bo ketoto kiang’atin ale amat iam? 12Kolenji chito, Kwondo ne kiigona ketebi tuwai, inendet ne kagona che bo ketit, ak kaam. 13Kolenji Jehovah Kamuktaindet kwondo, Nee ni kaiyai? Kole kwondo, Kagoberbera ndaret ak kaam. 14Kolenji Jehovah Kamuktaindet ndaret, Amu kaiyai kii, kagichubin keistaenen tuga tugul, ak tiony age tugul ne bo ng’ony; ichuutegei moeng’ung’, ak iame ng’ung’unyek betusieguk tugul ko ta isobe; 15ak ande bunyondit kwenung’wong’ inye ndaret ak kwondo; ak kwenutab iyoteng’ung’ ak nenyi; ak kotui inendet meting’ung’, ak iguoten aginye kwariandennyi. 16Kolenji kwondo anyun, Atesun mising’ nyalildang’ung’ eng’ manageng’ung’; isiche lagok eng’ ng’wanindo; ak inyali manong’otiondeng’ung’ eng’ mageng’ung’, ak koboun. 17Kolenji anyun Adam, Amu kegas ng’alekab kwondang’ung’, ak kaiam che bo ketit ne kiang’atin, ale, Amat iam che bo ketoto: kagichub ng’ony agobo inye; iame che bo ng’ony eng’ nyalilda betusieguk tugul, kote isobe; 18iiun ng’ony katok ak katablelinik; ak iame ngwek alak tugul che bo emet; 19ak iame amigwogik eng’ kaotik che bo togeng’ung’, kot iweekyige ng’ony; amu kiginemunenen yoto; amu i ng’ung’unyek, ak iweekyige ng’ung’unyek. 20Ak kiguure Adam kwondanyi Awa; amu inendet kametab tugul che soptos. 21Ak kinapchi Jehovah Kamuktaindet Adam ak kwondanyi sumotik, ak kolaakyi.
22Ak kimwa Jehovah Kamuktaindet kole, Ogeero; kagogergeit chichi ak age eng’ achek, ne ingen ne mie ak ne ya; ak nguno anyun, ko si mata koyogoito eunnyi, ak kobut agine che bo ketitab sobondo, ak koam ak kosob koigeny: 23eng’ noto anyun, kimaanda Jehovah Kamuktaindet inendet eng’ mbaretab Eden, si kobiit kobat ng’ony ole kiginemune. 24Kion anyun chichoto komanda, ak konde Kerubik kotebe komostab kong’asis ne bo mbaretab Eden, ak rotwetab chok ne ilyeli ne tokyingei komosi ak komosi, koribe oret ne wendi oldab ketitab sobondo.
वर्तमान में चयनित:
TAUNET 3: BUKUIT
हाइलाइट
शेयर
कॉपी
Want to have your highlights saved across all your devices? Sign up or sign in
God's word open for all
©Bible Society of Kenya, 2020