LUKA 15
15
1 #
Luk 5.29,30. NA rĩrĩ, etia mbia cia igoti o na ehia nĩmaamũthengereire othe nĩ getha mamũigue. 2Nao Afarisai na aandĩki-marũa makĩng’ong’ora makĩĩranaga atĩrĩ, Mũndũ ũyũ nĩaamũkagĩra ehia akarĩanĩra nao.
3Nake akĩmera ngerekano ĩno, akiuga atĩrĩ, 4Nĩ mũndũ ũrĩkũ wanyu ũngĩkorũo arĩ na ng’ondu igana, na ĩmwe yacio yũre, githĩ ndangĩtiga icio ingĩ mĩrongo kenda na kenda o kũu werũ-inĩ, athiĩ agacarie ĩrĩa yũrĩte o nginya rĩrĩa arĩmĩona? 5Nake aarĩkia kũmĩona-rĩ, akamĩigĩrĩra ciande ciake akenete. 6Na aakinya gwake mũciĩ-rĩ, ageta arata ake na andũ a itũũra rĩao, akamera atĩrĩ, Ũkai, tũkene hamwe, nĩ gũkorũo nĩnyonete ng’ondu yakwa ĩrĩa ĩkũũrĩte. 7Ngũmwĩra atĩrĩ, atĩ ũguo noguo gũkagĩa gĩkeno Igũrũ nĩ ũndũ wa mũndũ ũmwe mwĩhia ũrĩa wĩrirĩte, gũkĩra gĩkeno kĩrĩa gĩgakenwo nĩ ũndũ wa andũ athingu mĩrongo kenda na kenda, arĩa matabatairio nĩ kwĩrira.
8Kana nĩ mũtumia ũrĩkũ ũngĩkorũo arĩ na ciringi ikũmi, na ĩmwe yacio yũre, githĩ ndangĩgwatia tawa ahaate nyũmba yake, akĩmĩcaragia na kĩyo o nginya rĩrĩa arĩmĩona? 9Na aamĩona-rĩ, akongania arata ake na andũ a itũũra rĩao, akamera atĩrĩ, Ũkai, tũkene hamwe, nĩ gũkorũo nĩnyonete ciringi ĩrĩa ĩkũũtĩte. 10Ngũmwĩra atĩrĩ, o ũguo noguo gũkagĩa na gĩkeno kũrĩ araika a Ngai, nĩ ũndũ wa mwĩhia ũmwe wĩrirĩte.
11Agĩcoka akiuga atĩrĩ, Mũndũ ũmwe aarĩ na ariũ erĩ: 12nake ũrĩa mũnyinyi akĩĩra ithe atĩrĩ, Awa, ngaĩra indo o iria ingĩgatuĩka ciakwa. Nake ithe akĩmagayania indo ciake ciothe. 13Na matukũ manyinyi maathira, mũriũ ũcio mũnyinyi akĩũngania indo ciake ciothe, akĩgwata njĩra, agĩthiĩ bũrũri warĩ kũraya; agĩitanga indo ciake ciothe kũu na mĩtũũrĩre ya ũmaramari. 14Nake aanina indo ciake ciothe, gũkĩgĩa ng’aragu nene mũno bũrũri ũcio; nake agĩitĩka kũhũta na gũthĩna. 15Agĩthiĩ, akĩĩiguithania na mũndũ wa bũrũri ũcio; nake mũndũ ũcio akĩmũrekia akarĩithie ngũrũe gĩthaka-inĩ gĩake. 16Nake nĩendaga mũno kwĩhũnia na makoro ma maciaro ma mũtĩ wa mũkarabi, marĩa maarĩagwo nĩ ngũrũe; na gũtirĩ mũndũ wamũheire kĩndũ. 17Na rĩrĩa ecokerire, akiuga atĩrĩ, Hĩ! Nĩ ndungata ciigana atĩa cia awa irĩ na irio cia gũciigana, na igatigara, na niĩ nĩngũkuĩra gũkũ nĩ ng’aragu! 18Nĩngũũkĩra ’thiĩ kũrĩ awa, ngamwĩre atĩrĩ, Awa, nĩnjĩhĩtie Igũrũ, o na ngakwĩhia wee: 19ndiagĩrĩirũo nĩ gũcoka gwĩtagwo mũrũguo: ndua ta ndungata ĩmwe yaku. 20Nake agĩũkĩra agĩthiĩ kũrĩ ithe. No rĩrĩ, hĩndĩ ĩrĩa aarĩ o haraya, ithe akĩmuona, akĩringwo nĩ tha, akĩhanyũka akĩmũhĩmbĩria ngingo, akĩmũmumunya mũno. 21Nake mũriũ akĩmwĩra atĩrĩ, Awa, nĩnjĩhĩtie Igũrũ, o na ngakwĩhia wee, na ndiagĩrĩirũo nĩ gũcoka gwĩtagwo mũrũguo. 22No ithe akĩĩra ngombo ciake atĩrĩ, Thiĩi narua, mũgĩre nguo ĩrĩa njega mũmũhumbe; na mũmwĩkĩre gĩcũhĩ kĩara na iratũ magũrũ: 23ningĩ mũcoke mũrehe njaũ ya gĩcegũ ĩrĩa noru mũmĩthĩnje, tũrĩe na tũcanjamũke: 24nĩ gũkorũo mũriũ ũyũ wakwa ararĩ mũkuũ, na nĩ mũriũku; ningĩ nĩarorĩte, na nĩacokete kuoneka. Nao magĩitĩka gũcanjamũka.
25Na rĩrĩ, mũriũ ũrĩa mũkũrũ aatindĩte mũgũnda: na rĩrĩa aainũkaga, aakuhĩhĩria nyũmba-rĩ, akĩigua mĩtũrirũ ĩkĩhuhwo, gũkĩinagwo rũĩmbo. 26Agĩgĩĩta ndungata ĩmwe ya mũciĩ, akĩmĩũria gĩtũmi kĩa maũndũ macio. 27Nayo ĩkĩmwĩra atĩrĩ, Mũrũ wa nyũkwa nĩokĩte; nake thoguo nĩathĩnjĩte njaũ ya gĩcegũ ĩrĩa noru, nĩ ũndũ nĩaamũcokerera arĩ mũgima. 28Nake akĩrakara, akĩrega gũtonya nyũmba: ĩndĩ ithe akiuma nja akĩmũthaitha atonye. 29Nowe agĩcokia akĩĩra ithe atĩrĩ, Rĩu-rĩ, ndanakũrutĩra wĩra mĩaka mĩingĩ, na ndirĩ ndagarara rĩathani rĩaku o rĩothe: no ndũrĩ wa’he o na kori tũthĩnje, tũcanjamũke na arata akwa: 30no rĩrĩ, mũrũguo oka, ũcio waninire indo ciaku ciothe na aka a maraya, nĩwamũthĩnjĩra njaũ ya gĩcegũ ĩrĩa noru. 31Nake ithe akĩmwĩra atĩrĩ, Mũrũ wakwa, wee nĩũtũuraga na niĩ hĩndĩ ciothe, nacio indo iria ciothe ndĩ nacio nĩ ciaku. 32No rĩrĩ, nĩkwagĩrĩire tũcanjamũke na tũkene; nĩ gũkorũo ũcio mũrũ wa nyũkwa ararĩ mũkuũ, na nĩ mũriũku; ningĩ nĩarorĩte, na nĩacokete kuoneka.
वर्तमान में चयनित:
LUKA 15: OGKBIBLE
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 2019
