Luka 24
24
A kuvuka ka Jesu.
1Hi siku go ranga ga viki, va lota xilahleni ni mpunzu, na va neha a makha laya va nga wa ma longisele. Mat. 28:1; Mar. 16:1; Joh. 20:1
2Va lo ta kuma a ribye na gi wumbulutilwe gi suswa nkeleni.
3Loku va enghenile a va kumangi a xirumbi xa Hosi Jesu. Mar. 16:5
4Ku te laha va nga wa ha kanganyiseka hi lexi, languta, a vavanuna vambiri va lo yima kusuhani navo, na va ambele a tinguwo ti hatimako. Joh. 20:12; Miti. 1:10
5Kota lezi va nga dzuka, va koramisa tinghohe tabye misaveni, a vavanuna vaku ngalo kabye: Hi yini mu lavako loyi a hanyako xikari ka vafileko ke?
6A nga kona laha, kanilezi i vukile. Alakanyani lezi a nga mu byela laha a nga wa ha hi le Galilea, Mat. 16:21; 17:23; Mar. 8:31
7aku: Nʼwana wa munhu i yimelwe hi ku nyikelwa mandleni ya vaonhi, a belelwa, hi siku ga manharu i ta tlhela a vuka.
8Zonake va lo alakanya a timhaka takwe,
9va suka xilahleni, va lo ya hlawutela zontlhe lezi ka vakhume ni munwe, ni ka vontlhe vanwani. Mat. 28:8; Mar. 16:10
10A vavasati lava va nga bikela a vapostoli lezi zilo hi Maria wa le Magdala, na Johana, na Maria a nyine wa Jakobe ni vanwani. Xip. 8:3
11Kanilezi a timhaka leti ti wa hi ku khwatsi mafenya ka vona; a va ti kholwangi. Mar. 16:11
12Kanilezi Pedro i lo suka, a tsutsuma aya xilahleni; na a yimile a hlomela lomu nzeni, i lo wona a tinguwo ntsena; zonake a tlhelela kaya na a kari a hlamala hi lezi zi mahekileko. Joh. 20:3, 6
Laha ndleleni ya kuya Emausi.
13Hi gwalego siku a vambiri va vona va waya le mutini wu vitwako Emausi, ku nga hi pfhuka wa khume ga tikilometro ku suka Jerusalema; Mar. 16:12
14Va wa kari va wulawula hi zontlhe lezi zi mahekileko.
15Ku te laha va nga wulawula va wutisana, Jesu wutsumbu gakwe i lo tshinela, a famba navo; Mat. 18:20
16kanilezi a mahlo yabye ma wa lutsumile va nga mu tivi. Joh. 20:14
17Yena aku ngalo kabye: Kaxana, mahungu muni laya mu wulawulako ha wona lezi mu fambako ke? Vona va lo yima na va tsuvile.
18A munwani a vitwako Kleopasi, i lo hlamula aku ngalo kakwe: Wena wova mupfhumba wo tshama wece lomu Jerusalema, u kohlwako hi lezi zi humeleleko hi laya masiku ke? Joh. 19:25
19Yena aku ngalo kabye: Zilo za kuyini ke? Vaku kakwe: Lezi za Jesu wa le Nazareta, loyi a nga wa hi muprofeti wa ntamu, hi mitiro ni kuwulawula mahlweni ka Nungungulu ni ka vanhu vontlhe; Mat. 21:11; Joh. 4:19; Miti. 2:22; 7:22
20ni lezi a vapristi va hombe ni vafumeli va hina va nga mu nyikela, lezaku a konelwa ku dawa, va mu belela. Xip. 23:1; Miti. 13:27, 28
21Kanilezi hina hi wa tsumbile lezaku hi yena a nga wa ta tirula Israeli; inyamutlha hi siku ga manharu na zi mahekile lezi zilo. Miti. 1:6
22Tlhatakumbiri, a vavasati vanwani va ka hina va hi hlamalisile; hakuva na va yile xilahleni ni mixo,
23a va kumangi a xirumbi xakwe; va lo wuya va taku va wonile a muwoniso wa tingelosi, leti ti ngaku ngalo wa hanya.
24Ni vanwani va nga hi na hina va loya xilahleni, va ya kuma kota lezi va nga wulile a vavasati; kanilezi yena a va mu wonangi.
25Yena aku ngalo kabye: Maphuphulu nzi nwina ya vanhu va mbilu yi nonokako ku kholwa zontlhe lezi zi kanelweko hi vaprofeti!
26Xana zi wa nga faneli lezaku Kristu a xaniseka kota lezi, a enghena kungangameleni kakwe ke? Miti. 17:3; 1 Ped. 1:1
27Zonake i lo sangula hi ka Mosi, ni vaprofeti vontlhe, a va tlhamusela hi ka mitsalo yontlhe a timhaka leti ti kuengetilweko yena. Vesi 45; Gen. 3:16; Isa. 7:14
28Vona va lo tshinela mutini lowu va ngaya ka wona; kanilezi Jesu i lo maha ku khwatsi hi loku a lava ku hunza.
29Va lo mu khongotela, vaku: Xwana na hina, hakuva gi hlwile, a wusiku gi tshinele. Yena i lo enghena a ku ya tshama navo. Miti. 16:15
30Ku te laha a nga wa tshamile navo kugeni, i lo teka xibaba, a xi katekisa, a xi khema, a nyika kabye. Mat. 14:19
31Ni mahlo yabye ma lo ambuluka, va mu tiva; kanilezi yena i lo nyamalala mahlweni kabye.
32Zonake va lo byelana vaku: Kasi a timbilu ta hina ti wa nga vuri nzeni ka hina, laha a nga kanela ka hina ndleleni, a hi vululela mitsalo ke?
33Va lo suka zalezo, va tlhelela Jerusalema, va ta kuma a vakhume ni munwe na va tsombene zinwe ni vapizani vanwani, lava va ngaku:
34Kunene a Hosi yi vukile, yi wonekile ka Simoni. 1 Kor. 15:5
35Na vona va lo hlawutela lezi zi nga humelela ndleleni, ni lezaku va mu tivisile kuyini laha a nga khema xibaba.
Jesu a woneka ka vapizani vakwe.
36Kota lezi va nga ha wulawula lezo, Jesu wutsumbu i lo yima xikari kabye, aku ngalo ka vona: A kurula a kuve ka nwina. Mar. 16:14
37Kanilezi va lo dzuka va chava, na va alakanya lezaku xiruti va xi wonako. Mar. 6:49
38Yena aku ngalo kabye: Hi yini mu nga ni hlenekera ke, ni kukanakana ku vuka hikuyini timbilwini ta nwina ke?
39Wonani a mandla ya mina, ni mikonzo ya mina, lezaku hi mina wutsumbu; nzi tseveteleni, mu wona; hakuva a xiruti a xi na nyama ni marambu, kota lezi mu wonako nzi hi nazo. Joh. 20:27
40Laha a nga wa wulile lezo, i lo va kombeta a mandla yakwe ni mikonzo yakwe.
41Kota lezi va nga ha kanakana hi kota ya kutsaka ni kuhlamala, i te ngalo kabye: Mu na ni zakuga laha ke? Gen. 45:26; Joh. 21:5
42Va lo mu nyika a xipanze xa xidluwani xo katingwa.
43Yena i lo xi teka, aga mahlweni ka vona. Miti. 10:41
44Aku ngalo kabye: Hi tona timhaka leti nzi nga ti kanela ka nwina, laha nzi nga wa ha hi na nwina, nziku: Timhaka tontlhe leti ti tsalilweko ha mina nayweni wa Mosi, ni ka vaprofeti, ni lomu ka Tisimu, ti fanele ku tatiseka. Mat. 16:21; Mar. 8:31
45Zonake i lo vulula a kupima kabye, lezaku kasi va fela ku pima mitsalo; Miti. 16:14
46aku ngalo kabye: Ku tsalilwe lezaku Kristu i ta xaniseka, a tlhela a vuka hi ka vafileko hi siku ga manharu; Tis. 22; Isa. 53:2; Miti. 17:3
47ni lezaku a kuhunzuluka ni kutsetselelwa ka zionho ku ta kanetwa vitweni gakwe xikari ka matiko wontihe, ku sangula hi le Jerusalema. Gen. 12:3; Isa. 49:6; Dan. 9:24; Mika 4:2; Mal. 1:11; Miti. 13:38
48Nwina mu vakustumunyu va timhaka leti. Miti. 1:8, 22
49Langutani, nzi ta mu rumela lexi Dadani a xi tsumbisileko; kanilezi tshamani laha mutini, mu kala mu ambexwa hi ntamu wa le hehla. Isa. 44:3; Joeli 2:28; Miti. 1:4
Jesu a tlakukela tilweni.
50Zonake i lo va yisa lahandle ka muti, va kala va chikela laha ku cuwukeneko ni Betania; yena i lo tlakusa mandla yakwe, a va katekisa. Miti. 1:12
51Ku te na a ha va katekisa, a su hambana navo, a tlakuselwa le tilweni. Mar. 16:19; Miti. 1:9
52Vona va lo mu khizamela, va tlhelela Jerusalema na va hi ni kutsaka ka hombe. Mat. 28:9
53Zonake va suya simamisa tempeleni, na va dumisa Nungungulu. Miti. 2:46
वर्तमान में चयनित:
Luka 24: TSC72
हाइलाइट
शेयर
कॉपी
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
