Johani 6
6
Jesu a phamela 5,000 wo vanhu.
1Anzhako ka lezo Jesu i lo tlhatuka a Bimbi ga Galilea, legi gi nga bimbi ga Tiberia. Mat. 14:15; Mar. 6:35; Lu. 9:10
2A xidlemo xa hombe xi lo mu lanzela, hilezi va nga wona a ziwoniso lezi a nga zi maha ka lava va nga kari va babya:
3Jesu i lo kanziha xitsungeni, a ya tshama kona zinwe ni vapizani vakwe.
4Makunu a Pasika, a mubuzo wa vaJuda, gi wa hi kusuhani. Levi 23:5, 7; Deut. 16:1
5Jesu na a tlakusa mahlo yakwe, i lo wona xidlemo xa hombe na xita kakwe, aku ka Filipu: Hi ta xava kwihi zakuga, kasi vanhu lava va fela kuga ke? Mat. 14:14; Mar. 6:35; Lu. 9:12
6Makunu i lo wula lezo kasi ku mu doma; hakuva yena i wa zi tiva lezi a ta nga zi maha.
7Filipu i lo mu hlamula, aku: A 200 wa macheleni ma nga ta xava a zibaba zo enela, hambu loku munwe ni munwani a teka kutsongwani ntsena.
8Munwe wa vapizani vakwe, Andreu nakulobye wa Simoni Pedro, aku kakwe:
9I kona mufana laha, loyi a nga ni ntlhanu wa zibaba za sevada, ni zidluwani zimbiri; kanilezi zi taku yini lezi xikari ka vanyingi va kunghahi ke? 2 Tih. 4:43
10Jesu aku: Tshamisani vanhu. Ku wa hi ni byanyi go tala wutshanwini lego; zonake a vavanuna va lo tshama lahasi, va wa hi 5,000.
11Zonake Jesu i lo teka a zibaba, laha na a bongile, i lo avela ka lava va nga tshamile lahasi, zinghaho ni zidluwani, va kala va xura.
12Laha na va xurile, i te ngalo ka vapizani vakwe: Rolelani a matlhatlha ma seleko, kasi ku nga lahleki nchumu.
13Lezo va lo ma rolela, va tata khume ga zirunzu ni zimbiri hi matlhatlha ya ntlhanu wa zibaba za sevada, ma nga sala loku va gile.
14Hikwalaho vanhu na va wonile a xiwoniso lexi a nga xi mahile, vaku: Hakunene loyi muprofeti loyi a nga wa ta kuta lomu tikweni. Gen. 49:10; Deut. 18:15; Mat. 11:3
15Jesu na a zi tiva lezaku va lava ku mu kurumeta, va mu maha hosi, i lo nyemuka aya kambe xitsungeni na hi yece.
Jesu a famba hehla ka mati.
16Laha na gi hlwile a vapizani vakwe va lo relela vaya bimbini; Mat. 14:23; Mar. 6:47
17va enghena ngalaveni, va tlhatuka bimbi vaya Kapernaume. Gi lo phuma, na Jesu a nga se kuta ka vona.
18A bimbi gi wa vindluka hi kota ya mheho ya hombe yi nga bhubhutsa.
19Ku te loku va bonzile mune kutani ntlhanu wa tikilometro, va lo wo na Jesu na a famba hehla ka bimbi, a tshinela ngalaveni; va chava.
20Kanilezi i te ngalo kabye: Hi mina, mu nga chavi.
21Zonake va wa vumela ku mu amukela ngalaveni, zalezo a ngalava yi lo chikela tlhatuko lowu va ngaya ka wona.
Jesu a ti chula Xibaba xa wutomi.
22Hi manziko wa kona a xidlemo lexi xi nga sele le tlhatuko wa bimbi, xi lo wona lezaku ku wa nga hi na ngalava laho, saseka leyi a vapizani va nga enghena ka yona, ni lezaku Jesu a nga enghenangi navo, kanilezi a vapizani vakwe va fambile voce.
23Hambu lezi ku nga wa tile a tingalava hi le Tiberiasi, ti ta chika kusuhani ni wutshamu legi va ngaga zibaba, Hosi na yi bongile.
24Hikwalaho laha xidlemo na xi wonile lezaku Jesu ni vapizani vakwe va hi hava laho, va lo enghena tingalaveni, vaya Kapernaume va ya lava Jesu.
25Laha na va mu kumile le tlhatuko wa bimbi, vaku kakwe: Rabi, u tile rini laha ke?
26Jesu i lo va hlamula, aku: Hizinene nziku ka nwina: A mu nzi lavi hilezi mu nga wona ziwoniso, kanilezi hilezi mu ngaga zibaba, mu xura.
27Mu nga tireli a zakuga lezi zi mbhelako, kanilezi tirelani a zakuga lezi zi simamisako wutomini ga pinzukelwa, lezi a Nʼwana wa munhu a ta nga mu nyika zona; hakuva hi yena loyi a vekilweko xifungo hi Dadani, loyi a nga Nungungulu. Mat. 3:17; 17:5; Xip. 4:14
28Vaku ngalo kakwe: Hi fanele ku maha yini, kasi hi tira mitiro ya Nungungulu ke?
29Jesu i lo hlamula, aku kabye: A ntiro wa Nungungulu hi lowu, lezaku mu kholwa ka yena loyi a mu rumileko. 1 Joh. 3:23
30Vaku kakwe: Xiwoniso muni u xi mahako wena, kasi hi fela ku xi wona, hi ku kholwa? U tira yini ke? Mat. 12:38; 16:1; 1 Kor. 1:22
31A vakoko va hina va waga manna le xiwuleni, kota lezi ku tsalilweko ku ngalo: I lo va nyika zibaba zita hi le tilweni, a kuva vaga. Ekso. 16:15; Neh. 9:15; Tis. 78:25
32Jesu aku ngalo kabye: Hizinene nziku ka nwina: Ku wa nga hi Mosi a nga mu nyika xibaba xa le tilweni; kanilezi a Dadani wa mu nyika a xibaba leʼxi nene xi tako hi le tilweni.
33Hakuva a xibaba xa Nungungulu hi xona lexi xi relelako hi le tilweni, xi nyikako tiko wutomi.
34Vaku ngalo kakwe: Hosi, hi nyike xibaba lexo xontlhe xikhati.
35Jesu aku kabye: Mina nzi xibaba xa wutomi. Loyi a tako ka mina a nga tazwa ndlala, ni loyi a kholwako ka mina, cima a nga tazwa tora. Vesi 48, 58; Xip. 7:37
36Kanilezi, nzi sina nzi mu byelile lezaku, Mu nzi wonile, hambu lezo a mu kholwangi.
37Zontlhe lezi a nzi nyikako Dadani, zi tata ka mina; ni loyi a tako ka mina, cima nzi nga ta mu hlongola. Vesi 45; Xip. 10:28; 2 Tim. 2:19
38Hakuva nzi relele hi le tilweni, na ku nga hi lezaku nzi maha kuranza ka mina, kanilezi ku maha kuranza ka loyi a nzi rumileko. Mat. 26:39; Xip. 4:34; 5:30
39A kuranza ka loyi a nzi rumileko hi lezaku nzi nga lahli ni munwe wa vontlhe lava a nzi nyikileko, kanilezi nzi fela ku va vuxa hi siku go gumesa. Xip. 10:28; 17:12; 18:9
40Hakuva kuranza ka Dadani lezaku ni wihi loyi a cuwukako Nʼwana, a kholwa ka yena, i fela kuva ni wutomi ga pinzukelwa; ni lezaku nzi mu vuxa hi siku go gumesa. Xip. 3:15, 16; 4:14
41A vaJuda va lo tsanwa hi yena, hilezi a ngaku: Mina nzi xibaba xi releleko hi le tilweni.
42Vaku ngalo: Xana loyi, a hi yena Jesu, nʼwana Josefa, loyi a raru wakwe ni nyine hi va tivako ke? Makunu hikuyini a wulako, aku: Nzi relele hi le tilweni? Mat. 13:55; Mar. 6:3; Lu. 4:22
43Jesu i lo va hlamula, aku: Mu nga nʼununʼuteli timbilwini ta nwina.
44A ku na munhu a zi kotako kuta ka mina, loku a nga kokiwi hi Dadani loyi a nzi rumileko; zonake nzi ta mu vuxa hi siku go gumesa.
45Lomu bhukwini ga vaprofeti ku tsalilwe, ku ngalo: Vontlhe va ta gonziswa hi Nungungulu. Loyi a ingisileko Dadani, a gonza ka yena, wata ka mina. Isa. 54:13; Jer. 31:34; Mika 4:2
46A hi ku munhu i wonile Dadani, sine loyi a tileko hi ka Nungungulu, hi yena a mu wonileko Dadani. Mat. 11:27; Xip. 1:18
47Hizinene nziku ka nwina: Loyi a kholwako, i na ni wutomi ga pinzukelwa. Xip. 3:16, 18, 36
48Mina nzi xibaba xa wutomi.
49A vakoko va nwina va waga manna xiwuleni, kanilezi va file;
50kanilezi a xibaba xi relelako hi le tilweni, loku munhu a xiga, a ngafi. Mavesi 51, 58
51Mina nzi xibaba lexi xi hanyako, lexi xi nga relela hi le tilweni; loku munhu aga xibaba lexi, i ta hanya kala kupinzuka. Ni xibaba lexi nzi ta nga nyika xona, hi nyama ya mina, yi nyikilweko kasi tiko ga hanya. Xip. 3:13; Maheb. 10:5, 10
52A vaJuda va lo kanetana vaku: A munhu loyi i ta hi nyikisa kuyini a nyama yakwe a kuva hi yiga ke?
53Jesu aku ngalo kabye: Hizinene nziku ka nwina: Loku mu ngagi a nyama ya Nʼwana wa munhu, munwa a nkhata wakwe, a mu na wutomi nzeni ka nwina. Mat. 26:26, 28
54Loyi a gako a nyama ya mina, anwa a nkhata wa mina, i na ni wutomi ga pinzukelwa; nzi ta mu vuxa hi siku go gumesa.
55Hakuva a nyama ya mina hi kuga hakunene, ni nkhata wa mina hi kunwa hakunene.
56Loyi a gako a nyama ya mina, anwa a nkhata wa mina, i tshama nzeni ka mina, na mina nzeni kakwe. 1 Joh. 3:24; 4:15, 16
57Kota lezi a Dadani loyi a hanyako a nga nzi ruma, na mina nza hanya hi kota ya Dadani; hizalezo loyi a nzi gako, i ta hanya hi kota ya mina.
58Hi xona xibaba xi nga relela hi le tilweni; xi nga koti lexi a vakokwani va nga xiga, vafa; loyi a gako lexi xibaba, i ta hanya kala kupinzuka.
59A timhaka leti Jesu i lo ti kanela laha a nga gonzisa sinagogeni le Kapernaume.
60A vanyingi va vapizani vakwe na va zi zwile, vaku: A mhaka leyi ya nonoha, himani a ta nga yi ingisa ke? Mat. 11:6
61Kanilezi Jesu na a zi tivile nzeni kakwe, lezaku a vapizani vakwe va tsanwa hi yona, aku ngalo kabye: Xana a mhaka leyi ya mu khunguvanyisa ke?
62Zonake mu taku yini loku mu wona Nʼwana wa munhu na a kanziha laha a nga hi kona hi kusanguleni ke? Mar. 16:19; Miti. 1:9; Efe. 4:8
63A moya hi wona wu hanyisako, a nyama a yi vuni nchumu. A timhaka leti nzi mu byelileko tona, hi moya ni wutomi. 2 Kor. 3:6
64Kanilezi va kona vanwani xikari ka nwina lava va nga kholwiko. Hakuva Jesu i wa zi tiva hi le kusanguleni lezaku vamani lava va nga kholwiko niku himani a to mu tokometa. Xip. 2:24, 25; 13:11
65Aku ngalo: Hi kota ya lexi nzi wa te ngalo ka nwina: A ku na munhu a zi kotako kuta ka mina, loku a nga nyikiwi hi Dadani. Mavesi 44, 45
66Hi kota ya mhaka leyi a vanyingi va vapizani vakwe va lo tlhelela nzhako, a va ha fambangi naye.
A wukustumunyu ga Pedro.
67Zonake Jesu i te ngalo ka vakhume ni vambiri: Nwinawu mu lava ku suka ke?
68Simoni Pedro i lo mu hlamula, aku: Hosi, hi taya ka mani ke? Wena u na ni timhaka ta wutomi ga pinzukelwa. Miti. 5:20
69Hi kholilwe, ha zi tiva lezaku wena u Loyi wa Kubasa wa Nungungulu. Mat. 16:16; Mar. 8:29; Lu. 9:20
70Jesu i lo va hlamula, aku: Xana a nzi mu hlawulangi, nwina vakhume ni vambiri ke? Hambu zi hi tano a munwe wa nwina i dimoni. Lu. 6:13; Xip. 13:27
71I lo wula hi Judasi Iskarioti, nʼwana Simoni, hakuva ku wa hi yena a ta nga mu tokometa, na a hi munwe wa vakhume ni vambiri.
वर्तमान में चयनित:
Johani 6: TSC72
हाइलाइट
शेयर
कॉपी
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
