Johani 2
2
A muchado wa le Kana.
1Hi siku ga manharu, ku wa hi kona a muchado le Kana wa le Galilea; a nyine wa Jesu i wa hi kona;
2Jesu kambe ni vapizani vakwe va wa rambilwe muchadweni.
3A vinya gi lo mbhela, zonake a nyine wa Jesu aku ngalo kakwe: Va hava vinya.
4Jesu aku kakwe: Wasati, nzi na ni yini na wena ke? A xikhati xa mina a xi se nga chikela. Xip. 19:26
5A nyine wakwe aku ngalo ka malanza: Ni zihi lezi a ta nga mu byela, zi maheni.
6Ku wa hi ni ntlhanu wa tifuko ni yinwe ta maribye, ti nga tshamile kona hi kota ya mukhuwo wa vaJuda wa kuhlazeka; a fuko yinwe ni yinwani yi wa ringana a mabarerwana mambiri kutani manharu. Mar. 7:3
7Jesu aku ngalo kabye: Tatani tifuko hi mati. Va lo ti tatisa tiku hlafala.
8Aku kabye: Khanani makunu, mu yisa ka mukhomi wa mubuzo. Va lo ma yisa.
9A mukhomi wa mubuzo na a ma ringile a mati ma mahileko vinya, na a nga gi tivi laha gi tako ha kona, (zi tibyiwa ntsena hi malanza lawa ma nga khile mati,) a mukhomi wa mubuzo i lo vitana muteki, Xip. 4:46
10aku ngalo kakwe: A munhu munwe ni munwani i ranga hi ku humesa a vinya go nanziha; zonake loku vanhu va nwile, ku nehiwa legi go biha; kasike wena u vekile a vinya go nanziha kala makunu.
11Lexi hi kusangula ka ziwoniso zakwe, Jesu i lo xi maha le Kana wa le Galilea, a wonekelisa a wukulu gakwe; ni vapizani vakwe va lo kholwa ka yena. Xip. 1:14
12Anzhako ka lezo i lo relela aya Kapernaume, yena ni nyine wakwe, ni vanakulobye, ni vapizani vakwe; va tshama kona masiku ma tsongwani. Mat. 12:46
Jesu a basise tempeli.
13A Pasika ga vaJuda gi wa tshinele, zonake Jesu i lo kanziha aya Jerusalema. Ekso. 12:14; Deut. 16:1; Xip. 6:4
14I lo kuma le tempeleni lava va xavisako tihomu ni tiyivu ni matuva, ni vaxavisi va mali na va tshamile kona. Mat. 21:12; Mar. 11:15; Lu. 19:45
15I lo maha a tsilani ya tingoti, a va hlongola vontlhe tempeleni, zinwe ni tiyivu ni tihomu; a hangalasa a mali ya vaxavisi va mali, na a khubhunyeta timeza tabye.
16Aku ngalo ka lava va nga xavisa matuva: Susani lezi zilo laha; a yindlu ya Dadani mu nga yi mahi a yindlu ya mabhinzu. Lu. 2:49
17Zonake a vapizani vakwe va lo alakanya lezaku ku tsalilwe ku ngalo: A ku pangamela a yindlu ya wena ku ta nzi nwalala. Tis. 69:9
18Hikwalaho a vaJuda vaku ngalo kakwe: Xiwoniso muni lexi u hi kombisako ha xona, lezaku u na ni ntamu wa ku maha lezi zilo? Mat. 12:38; Xip. 6:30
19Jesu i lo hlamula aku ngalo kabye: Hahlulani tempeli leyi, mina nzi ta yi vuxa hi masiku manharu. Mat. 26:61; Mar. 14:58
20Zonake a vaJuda vaku ngalo: Leyi tempeli yi lo akiwa hi 46 wa malembe, wena u ta yi vuxa hi masiku manharu ke?
21Kanilezi yena i lo wulawula hi tempeli ya miri wakwe. Kol. 2:9; Maheb. 8:2
22Hikwalaho laha a nga vukile hi ka vafileko, a vapizani vakwe va lo alakanya lezaku i wa va byelile lezo; zonake va wa kholwa a mitsalo ni mhaka leyi Jesu a nga yi wula. Lu. 24:8
23Na a ha hi Jerusalema laha mubuzweni wa Pasika, a vanhu vanyingi va lo kholwa vitweni gakwe, loku va wona a ziwoniso lezi a nga zi maha.
24Kanilezi Jesu a nga va tsumbangi, hakuva i wa va tiva vontlhe,
25ku wa nga laveki lezaku a tiviswa nchumu hi za munhu; hakuva a wutsumbu gakwe i wa kari a zi tiva lezi zi nga nzeni ka munhu. 1 Sam. 16:7; 1 Kro. 28:9
वर्तमान में चयनित:
Johani 2: TSC72
हाइलाइट
शेयर
कॉपी
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
