YOHANA 4

1Avafarisayo vahulira ndi Yeso yanyoora kandi yabatizaa aviigi avanyingi kuvita Yohana. 2Navuzwa mugiligali Yeso mwene siyabatizaa mba, nitali aviigi veve nivavabatizaa. 3Lwa Yeso yahulira amakuva ga avandu vavoola kuye, yatura Ivuyuda nazia Galilaya.

4Mu logendo lwene yilwo gamudukira avitiri Samaria. 5Musamaria, yaza mu lidaala lia Sikari, iliali ahimbi nu mulimi gwa Yakobo yaaha Josefu mwana weve. 6Kidaho cha Yakobo, chaali ahene yaho. Kigira Yeso yaali naluhi ku logendo lwilwe, yikala ku lujinga lwi kidaho zana. Yaali ahimbi saa sita zia mbasu.

7Mukali mulala Musamaria yaza kudaha amazi. Yeso yamuvolera, “Mbe ku amazi nwi.” 8Ing'inga yeyo, aviigi veve vaali nivaziiyi mu lidaala kugura viukulia.

9Mukali oyo yamutivulira, “Oveeye Muyuda, nainzi mbeeye mukali Musamaria; kunangwa unyala ndi kusava amazi?” Avayuda si vaveeye nuvuhambani na Vasamaria mba.

10Yeso yamutivulira, “Niiva wakamanyi kihanwa cha Nyasaye ahaanaa na nivwaha okoteeva, ‘Mbe ku amazi nwi,’ ngano wakamuteevi naye alakuha amazi gi livamwoyo.” 11Mukali oyo yamuvolera, “Mwami, ivi si oveeye ni chukudahira amazi, kandi kidaho keveeye musi ligali, nonyoole hayi amazi livamwoyo yago? 12Ivi wekolaa kuva munene ligali kuvita baba wiitu Yakobo? Oyo yakuha kidaho yiki, harara na avana veve, nimitugu jije vanwa amazi gi kidaho yiki.”

13Yeso yamutivulira, “Ku woosi unwa amazi yaga, alava nuvuluhu kandi. 14Navuzwa ku woosi unwa ku amazi ga mbana, sialava nuvuluhu kandi mba. Ligali amazi ga ndimuha galava muye kidaho cha amazi gi livamwoyo agasinukaa kumuha livamwoyo litahera mba.”

15Mukali oyo yamuvolera, “Mwami, mbe amazi yago mburi konyoora vuluhu kandi mba, kunangwa mburi kandi kuuza hano kudaha amazi.”

16Yeso yamuvolera, “Zia ulange musaza woovo ma wirane.”

17Mukali zana yamuvolera, “Inzi mbula musaza.”

Yeso yamuvolera, “Ivi ovooye agiligali lwa ovola ‘Simbeeye nu Musaza.’ 18Kigira waali na vasaza vatano, na uyu wa omenyi naye kalunu siaveeye musaza woovo mba. Yaho omboleeye agiligali.”

19Mukali yamuvolera, “Mwami, ndolaa ivi oveeye muporofeti. 20Avaguuga viitu vaasigamira Nyasaye mu kiguru yiki, navuzwa munyi muvooraa ndi gaduukanaa kusigamira Nyasaye mu Jerusalemi.”

21Yeso yamuvolera, “Mukali, usuuviri inzi; ing'inga yiza lwa avandu valivula kusigamira Baba mu Kiguru yiki anoho mu Jerusalemi. 22Munyi Avasamaria musigamiraa oyo wamutamanyi ligali navuzwa kunyi kumanyi uyu wakusigamiraa, kigira ovohonyi vutura ku Avayuda. 23Navuzwa ing'inga yiza kandi imali kuduuka, lwa vandu vasigamira; Baba mu Roho kandi mu agiligali yava nivo vandu va Baba yenya vamusigamiri. 24Nyasaye ni Roho, nayavo vamusigamira gavadukiraa vamusigamiri mu Roho nu mu agiligali.”

25Mukali oyo yamuvolera, “Manyi vulahi Mesia, ulangwa Kristo, yaazaa. Lwa aliiza alakakumanyie kindu choosi.”

26Yeso yamuvolera, “Inzi ovoolerana niivi, niyie.”

27Ahene yaho aviigi veve viirana. Vagenya ligali kolola namolomaa nu mukali oyo. Navuzwa si yaali ho nu mundu wamuteeva, “Wenyaa ki?” Anoho, “Kigira ki omoloma nu mukali uyu?”

28Kunangwa mukali oyo yaleka isiongo yeeye nazia mu lidaala kovoolera avandu, 29“Hambi mulole mundu omboleeye vindu viosi via ndaakola. Anyala kuva niye Mesia?” 30Avandu vaatura mu lidaala nivazia ku Yeso.

31Ing'inga yene yeyo, aviigi veve vaali nivagoonyaa Yeso; “Mwigizi, ulie chukulia.”

32Navuzwa Yeso yavavolera, “Inzi mbeeye nichukulia cha munyi mutamanyi.”

33Aviigi veve vateevana, “Koveeye ho nu mundu umuleteeye chukulia?”

34Yeso yavavolera, “Chukulia change ni kokora uvulariri vwa uyu uwanduma yenya, kandi kumala miyinzi jije. 35Munyi muvooraa ‘Jikiri mieli jine vuzwa, ma ing'inga yokogesa iduuki!’ Navuzwa inzi muvooleraa, heenzi vulahi ku milimi; viamo viajo viilavi kandi vietegeki kogeswa. 36Mugesi anyoora madanyi geege, ma avungiza viamo kigira livamwoyo litahera mba, kunangwa mundu utagaa nogesaa vasangala harara. 37Kigira yaga livoora yili nilieligali: ‘Mulala amiizaa nu wundi agesaa.’ 38Inzi mutumaa mugese iviamo via mwavura kutulira ku logeli; valala vaakora miyinzi, navuzwa munyi munyoora viukala kuturana nologeli lwavo.”

39Avanyingi ku Avasamaria mu lidaala yilio vasuuvira mu Yeso kigira amakuva gu mukali oyo yaali navooye, “Amboleeye vindu viosi via ndaakola.” 40Avasamaria vazia ku Yeso nivamuteeva amenye navo; naye yamenya ho madiku gaviri.

41Avandu vanyingi vasuuvira kigira livoora lilie. 42Vavoolera mukali oyo, “Kunyi sikusuuviraa vuzwa kigira amakuva googo, navuzwa kunyi aveene kumali kumuhulira kandi kumanyi ligali uyu niyie Muhonyi wi lirova.”

Yeso Yahonyia muyaayi wu munene mulala

43Inyima wa madiku gaviri, Yeso yatura ahene yaho nazia Galilaya. 44Kigira Yeso mwene yaali navooye havulavu ndi, “Muporofeti siahevwa lizominywa mu kivala chiche mba.” 45Lwa yaduuka mu Galilaya, avandu uwene yeyo vamwingiriza. Kigira vaali nivaloli vindu viosi via Yeso yakola Jerusalemi ing'inga ya vaali nivaziiyi yo mu Lisavo lie Lipasaka.

46Maku Yeso yirana mu lidaala lia Kana mu Galilaya, uwa yaali naagirung'anyi amazi kugwa iwaini. Munene mulala wu vwamihi yaali yo uwu muyaayi weve yaali mulwaye mu Kaperinaumi. 47Lwu Munene oyo yahulira ndi Yeso yaazi kutura Ivuyuda kuduuka Galilaya, yazia kuye namugoonya azie Kaperinaumi kohonyia muyaayi weve uwaali naveeye ahimbi kukuza. 48Yeso yamuvolera, “Munyi nimutaloli vilolekizu ni viokogenyia, simunyala kusuuvira mba.”

49Munene oyo yamuvolera, “Mwami, nuyanza hamba kuzie niivi muyaayi wange nakikiri kukuza.”

50Yeso yamuvolera, “Zia vuzwa muyaayi woovo alahona.” Mundu oyo yasuuvira likuva lia Yeso yamuvolera ma nazia. 51Lwa yaali nakiri kunzira, nasulungutaa, avatumikiri veve vavugana naye, nivamuvoolera, “Muyaayi woovo aveeye mwoyo.”

52Naye yavateva ng'ingaki yanyooye lisosa. Vamuvolera, “Mugolova, saa saba zia mbasu, nilwo lwa yahona.” 53Maku baba oyo yizuliza isa yene yeyo niyio ya Yeso yamuvolera, “Muyaayi woovo ohoni.” Kunangwa avinyumba yeeye harara naye vasuuvira.

54Yiki chaali kelolekizu cha kaviri cha Yeso yaa kola lwa yaali yaka kutura Ivuyuda kuzia Galilaya.

Yeso Yahonyia mundu ahimbi ni lidavalia

वर्तमान में चयनित:

YOHANA 4: LOGOOLI

हाइलाइट

कॉपी