YOHANA 21
21
1Inyima wa yaga, Yeso yaloleka kandi ku aviigi veve ku lujinga lwi inyanza ya Tiberia. Yivuula mwene kuli ndi. 2Simoni Petero, Tomasi walangwa Malongo, Natanaeli kutura mu lidaala lia Kana mu Galilaya, avana vaviri va Zebedayo na aviigi veve vandi vaviri, vaali harara vosi. 3Simoni Petero yavavolera, “Nziza kuluva.”
Navo vamuvolera, “Nakunyi kulazia harara niivi.” Kunangwa vazia nivingira mu liato, navuzwa vudiku vwene yivwo vwosi sivanyoola ku kindu rnba. 4Lwa vwali nivuchezaa, Yeso yasingira ku lujinga lwi inyanza, navuzwa aviigi sivamanya yaali Yeso mba. 5Maku, Yeso yavateva, “Avana, mukagumiyi ku zisuzi ziosi naho?”
Vaamutivulira, “Awa.”
6Yeso yavavolera, “Viiki muluvu kolovega lwu mukono mulungi gwi liato na mulagumira zisuzi.” Kunangwa, vaviika muluvu munyanza, kandi sivali vanyara kung'usa muluvu mba kigira uvunyingi vwi zisuzi.
7Mwigizi wa Yeso yayanza, yavolera Petero, “Nu Mwami!” Lwa Simoni Petero yahulira ndi yaali Mwami, yiviika likoti lilie kigira yaali nakikiri kwivika, natuma mu mazi. 8Navuzwa aviigi vandi vaza mu liato ku lujinga nivang'usa muluvu, nigwizuyi zisuzi; sivali ihale kutura ku lujinga mba, navuzwa vaali ahaduka zimita imia ndala. 9Lwa vaduuka ku lujinga valora muliru gwa manda ni vaviiki ku zisuzi ni migadi.
10Yeso yavavolera, “Leeti hano zisuzi zia muluvi.”
11Kunangwa, Simoni Petero yazia mu liato, naang'usa muluvo kuduuka ku lujinga. Muluvu gwaali nigoveeye ni zisuzi zinene 153. Kali niiva zisuzi ziali zinyingi kuli ndio siziatandula muluvu mba.
12Yeso yavavolera, “Hambi mulie” Si yaali ho kali mulala kuvo uwaluvilira kumuteeva, “Ivi nivwaha mba?” Vamanya ndi yaali Mwami. 13Yeso yaza navugura mugadi navaha; yakola ndio kandi ni zisuzi.
14Yilu lwali lwa kavaga Yeso kololeka ku aviigi veve inyima wukusimuguka kutura mu vakuzu.
Yeso yamoloma na Petero
15Lwa vaali nivakamara kulia, Yeso yateeva Simoni petero, “Simoni, mwana wa Yohana! Unyaanzaa kuvita avandi yava?”
Petero yamutivulira, “Yee, Mwami; ivi wamanya ndakuyaanza.”
Yeso yamuvolera, “Lihiza avana va magondi gange.” 16Kunangwa Yeso yamuvolera lwa kaviri, “Simoni mwana wa Yohana! Unyaanzaa?”
Petero yamutivulira, “Yee, Mwami; ivi wamanya ndi ndaakuyaanza.”
Yeso yamuvolera, “Linda chayo cha magondi gange.”
17Yamuteeva lwa kavaga, “Simoni mwana wa Yohana, unyaanzaa?” Petero yavelera kigira Yeso yamuteeva haali kavaga; “Unyaanzaa” Petero yavoola, “Mwami, ivi wamanya vuli kindu, ivi wamanya ndi ndakuyaanza.”
Yeso yamuvolera, “Lihiza magondi gange!
18Ngovolera agiligali, nukikiri musoleri, waali nuwanala kwevoha musibi nukuzia hoosi aha wenyaa. Navuzwa lwa uliva musakulu ulakanyili makono googo, nu mundu wundi alakakovohe musibi nukukuhila aha utayaanzaa.” 19Yeso yavoola yaga kumanyia ndi ni likuzaki lia Petero alikuza kukuminya Nyasaye. Maku, Yeso yamuvolera, “Nonda.”
Yeso yamoloma ku mwigi wundi
20Ahene yaho Petero yikivuka, nalora mwigi wa Yeso yayanza, navalonda. Mwigi uyu niyie uwaali ku ing'inga yi chukulia cha hamugorova, wikala himbi ligali na Yeso namuteeva, “Mwami, nivwaha ulikuzaama?” 21Kunangwa, lwa Petero yamulola yateeva Yeso, “Mwami, nu mundu uyu aveeye ndi?”
22Yeso yamutivulira, “Niiva inzi nyenya ave mwoyo kuduuka lwa ndirana, gaveeye ki ku ivi? Ivi ononde.”
23Kunangwa, livoora yili lialanda ku valondi va Yeso ndi mwigi uyu sialakakuzi mba: navuzwa Yeso siyavola ndi mwigi uyu sialivula kukuza, nitali yavoola, “Niiva niyenyaa ave mwoyo kuduuka lwa ndirana, gaveeye ki ku ivi?”
24Uyu niyie mwigi walolekiza vindu yivi naaving'oda. Nakunyi kumanyi aga yavoola gaveeye agiligali.
Kumaliriza
25Koveeye ni vindu vinyingi via Yeso yakola. Niiva via kang'odeywi viosi, kilala sa kilala, ng'anagana kali kivala chene chaali cha kagehi ahukuviika vitabu viali viakang'odeywi.
वर्तमान में चयनित:
YOHANA 21: LOGOOLI
हाइलाइट
शेयर
कॉपी
Want to have your highlights saved across all your devices? Sign up or sign in
©Bible Society of Kenya, 2019
