YOHANA 19

1Maku Pilato yavugula Yeso, avasikari vamukuyi nekevogo cho lokova. 2Navo Avasikari vanava itaji yamafa, nivamuviika ku mutwi gwigwe, nivamuviika iganza yi ligondo lie kizambarao. 3Vazia imbiri weve nivavoora, “ Mirembe, Umwami wa Avayuda!” Nivamwala zinzasaya.

4Pilato yatura ichova kandi navolera kiduma, “Heenzi, ndamuleeta ichova ku munyi, kunangwa muduuki kumanya ndi, inzi sindora kivuni choosi kuye chukumukalagira mba.” 5Kunangwa, Yeso yatura ichova niyiviiki itaji yamafa kandi iganza yi ligondo lie kizambarao. Pilato yavavolera, “Mundu zana nguyu!”

6Lwa avasaalisi vanene na vasikari vi Litembeli vamulola vahanzuka, “Muvambe! Muvambe!”

Pilato yavavolera, “Munyi mumuvuguli, ma mu muvambe aveene. Inzi sindora kivuni chu kumukalagira mba.”

7Avayuda vaamutivulira, “Kunyi koveeye ni Lilaga, na kolondekana ni Lilaga yili, gaduukanaa akuze, kigira yekolaa mwene kuva Mwana wa Nyasaye.”

8Lwa Pilato yahulira amakuva yaga, yaali nuvuti ligali. 9Yingira kandi munyumba yalangwa Puritorio, nateeva Yeso, “Ivi uturaa hayi?”

Navuzwa Yeso si yamutivulira kindu mba.

10Kunangwa Pilato yamuvolera, “Kigira ki ivi siunyala komoloma nainzi? Siumanyi inzi mbeeye nu vunyali kokovoholora, kandi kukuvaamba?”

11Yeso yamutivulira, “Ivi si wakaveeye nu vunyali vwosi ku inzi, nivutahaniywi ku ivi kutura mwigulu na Nyasaye. Mundu oleeti inzi ku ivi niyie oveeye nu uvwoni vonene kuvita ivi.”

12Lwa Pilato yahulira yaga, yenyeleriza inzira yu kumuvoholora. Navuzwa kiduma cha Avayuda vahanzuka nivavoora, “Niiva ivi ovoholola mundu uyu, ivi sioveeye mulina wa Kaisari#19:12 Kaisari: Liveeye kovora Mwami Munene wa Avarumi. mba; vuli mundu wekolaa kuva Mwami aveeye mwibaali ku Kaisari!”

13Lwa Pilato yahulira amakuva yaga, yaatuliza Yeso ichova, niyikara kondeve yi Likalaga havundu halangwa mu Luheburaina, Gabata#19:13 Gabata: Liveeye kovora vwali vwalombwa na magina..

14Yaali ahimbi saa sita zia mbasu, lidiku liu kwetegekera lisavo lie Lipasaka. Pilato yavolera Avayuda, “Uyu aveeye mwami winyu!”

15Navo vahanzuka, “Mu mwiti! Mu mwiti!”

Pilato yavateva “Inzi mbambe mwami winyu?”

Avasaalisi vanene vativura, “Kunyi sikoveeye nu mwami wundi natali Kaisari!”

16Kunangwa, Pilato yahaana Yeso mu makono gaavo vaduuki kumuvaamba.

Yeso Yavambwa

(Mat. 27:32-44; Mar. 15:21-32; Luk. 23:26-43)

Kunangwa avasikari vaavugura Yeso nivamuhila. 17Yeso yatura ichova wilidaala linene nagingi musalaba gwigwe kuzia havundu halangwa, “Ha kihanga.” Mu Luheburaina ha langwa Gologoza. 18Ahene yaho niho ha vamuvambira, kandi harara naye vavambwa avandu vandi vaviri; mulala ku mukono mulungi nu wundi ku mukono mumosi, Yeso naveeye hagati. 19Pilato yalaga vang'ode mang'oda ma vagaviiki ku Musalaba. Nago gasomeka kuli ndi: “YESO MUNAZARETI MWAMI WAVAYUDA.” 20Avandu vanyingi vasoma amang'oda yago kigira havundu ha Yeso yavambirwa haali ahimbi ni lidaala linene kandi gaali nigang'odeywe mu Luheburaina, Lulatini nu Luguriki.

21Avasaalisi vanene vavoolera Pilato, “Utang'oda: ‘Mwami wa Vayuda,’ kigira ‘Oyo yavoola, inzi mbeeye Mwami wa Avayuda.’ ”

22Pilato yativura, “Aga inzi mali kong'oda, mali kong'oda!”

23Lwa Avasikari vaali ni vakavamba Yeso, vaavugura zinguvu zizie nivazigavulanyia mu vidonye vine, vuli musikari kedonye kilala. Vaavugura kandi iganza yeeye yaali niyanavwa mu kedonye kilala, kutura igulu kuduuka ku virenge. 24Avasikari yavo vavolerana aveene, “Kutagitandula mba, navuzwa kukubi ikura kolole ilava ya vwaha.” Yaga gekoleka ku gave agiligali kuli gang'odwa mu Mang'oda Matakatifu:

“Vagavulana zinguvu ziange,

kandi vakuba ikura ku iganza yange.”

Kandi nindio avasikari yavo vakora.

25Navuzwa mama weve, na amwavo mama weve Maria mukali wa Kiliopa, na Maria Magadalena vasingira ahimbi ha musalaba gwa Yeso. 26Lwa Yeso yalora mama weve, kandi, ahimbi naye, nasingiyi mwigizi wa yayanza, yavolera mama weve, “Mama uyu nu Mwana woovo.” 27Maku yavolera Yohana mwigizi oyo, “Uyu ni mama woovo.” Kutura ing'inga yeyo mwigizi oyo yamuvugula amenye yengo weve mwene.

Likuza lia Yeso

(Mat. 27:45-56; Mar. 15:33-41; Luk. 23:44-49)

28Lwa Yeso yamanya ndi ivindu viosi vidukiziywi kandi kolomba Amang'oda Matakatifu kuva agiligali, yavoola, “Mbeeye nuvuluhu.” 29Haali ho nu luju lwi inyingu nilwizuyi isiki. Kunangwa viina kikaminyu mu isiki, nivaviika kuludanga lwi kidundu nivamusundira hamunwa gwigwe. 30Lwa Yeso yamala kuzunzuna isiki yeyo, yavoola “Gafeye!” Maku yinaminya mutwi gwigwe nakuza.

Yeso Yatumitwa mu Zimbalu ni Litimu

31Lwali Mulwakatano, lidiku liu kwetegekera Lisabato, avanene va Avayuda sivenyaa imiviri jive ku misalaba lidiku lie Lisabato mba, kigira Lisabato liali lidiku litakatifu, kunangwa avanene va Avayuda vateva Pilato, “Ukuvugiliri kuvunanyie virenge via avavambiywi, ma kutulizi miviri ku misalaba.” 32Kunangwa avasikari vazia nivavunanyia virenge viu mundu wukutanga kandi viu mundu wundi uwaali navambiywi harara na Yeso. 33Navuzwa lwa vaduuka ku Yeso, vanyoola namali kukuza. Kunangwa si vavuna nyia virenge vivie mba. 34Navuzwa mulala ku avasikari yatooza mu zimbalu zia Yeso ni litimu, nonoho amasahi kandi amazi viasunduka. 35Oyo walola yaga, yalolekiza kugo ndi munyi kandi muduuki kusuuvira. Lilolekiza lia yavoola liveeye lia agiligali, kandi amanya avoora agiligali. 36Yaga gaakolwa kolomba Mang'oda Matakatifu gaduuki kuva agiligali, “Kigumba chiche kali kilala, si kilivunanywa mba.” 37Mang'oda Matakatifu gandi gavoora, “Avandu valahenza ku uyu wa vaatumita ni litimu.”

Liyavirwa lia Yeso

(Mat. 27:57-61; Mar. 15:42-47; Luk. 23:50-56)

38Inyima wa yaga, Josefu, uwatulaa mu lidaala lia Arimazia, yateeva Pilato niiva anyala kuvugura muviri gwa Yeso nu kuguyavira mu kilindwa. Josefu yaali mwigizi wa Yeso, mu vuvisi, kigira yatia avanene va Avayuda. Pilato yamuvugilira. Josefu yazia, navugura muviri gwa Yeso. 39Nikodemo uwaazia kolola Yeso vudiku ulwambiri, yazia harara na Josefu. Vavugura vindu viazuganywa manemane ni subiri ividuuka zikilo salasini. 40Kunangwa, vavugura muviri gwa Yeso, nivagovohera mu zinguvu zie katani, harara nivindu viafunya mwayu kolondekana ni miima ja Avayuda ju kwetegekiza muviri kuyavirwa. 41Havundu ha Yeso yavambirwa, gwaliho mulimi, na mu mulimi yimwo mwaali mu nikilindwa kihia, ichaali nikikiri kuyavirwa mu mundu woosi. 42Kigira lietegekera lie lidiku lie Lisabato, na kuli kilindwa yicho chaali ahimbi, vaata Yeso mwene yimwo.

वर्तमान में चयनित:

YOHANA 19: LOGOOLI

हाइलाइट

कॉपी