YOHANA 17

1Lwa Yeso yaali ni yakamala kovora yaga, yahenza mwigulu navoora, “Baba, ing'inga iduuki! Ukuminyi Mwana woovo kunangwa Mwana aduuki kukukuminya ivi. 2Kigira waha Mwana woovo uvunyali ku avandu vosi aduuki kuhaana livamwoyo litahera mba ku yavo vosi vawamuha. 3Livamwoyo litahera mba liveeye kovora limanya ivi, Nyasaye wiligali yeng'ine, kandi kumanya Yeso Kristo, uwa ivi watuma. 4Inzi mali kumanyia uvukumi vuvwo mu lirova; mali kutwekiza miyinzi ja wamba ngole. 5Baba! Ombe vukumi imbiri woovo kalunu, vukumi vulala vwene vwa ndaali navwo harara niivi lirova nilikikiri kolombwa. 6Mali kokora ivi, umanyekane ku avandu yavo ava wamba kutura ku avumukivala. Yava vaali avandu vovo, na ivi wamba vave avange; navo vagumiyi likuva liilio; 7kalunu vamanyi ndi choosi icha wamba kitulaa ku ivi. 8Inzi mali kuvavoolera amakuva ga wambolera mbavoolere navo vagavugiliyi. Vamanya agiligali ndi inzi ndaatula ku Ivi, kandi vamali kusuuvira ndi ivi wanduma.

9“Inzi mbasaaliraa. Sisaaliraa avumukivala, navuzwa salira yavo avuwamba, kigira vaveeye avandu vovo. 10Viosi via inzi mbeeye navio ni vivio, navio vivio viveeye viange; kandi uvukumi vwange vololeki kuvitira mu yavo avuwamba. 11Kalunu inzi nziza ku ivi; Simbeeye kandi mu kivala mba, navuzwa yavo vaveeye mu kivala, Baba Mutakatifu! Uvalindi vulahi kunangwa vaduuki kuva kindu kilala kuli kunyi koveeye kindu kilala. 12Lwa ndaali navo ndavalinda vulahi kuzinguru zie lieta liilio, lieta lia wamba. Ndaavalinda, kandi avulaho kali mulala wagota ku yavo nataveeye oyo mwana wu vudivi, uwalagilwa kogota; kunangwa agang'odwa mu Mang'oda Matakatifu gaduuki kuduukizwa kuva agiligali. 13Kunangwa nziza ku ivi, na mali kovora vindu yivi lwa ngikiri mu kivala, kunangwa vaduuki kwizura uvusangari vwange mu mioyo jaavo. 14Inzi mali kuvaha likuva liilio kandi avumukivala vavadunyira kigira yavo sivaveeye avumukivala mba, kuli inzi simbeeye wumukivala mba.

15“Singoteevaa uvatulize mu kivala, navuzwa uvalindi ku mudamanu. 16Sivaveeye avumukivala, kuli inzi simbeeye wumukivala mba. 17Uvatakase mu agiligali; likuva liilio liveeye lie ligali. 18Kuli ivi wanduma kuzia mu kivala, nindio inzi kandi mbatumanga mu kivala; 19Kigira yavo inzi nzitakasaa ku ivi, kunangwa yavo vaduuki kwitakasa mu agiligali.

20“Si salira yava venyine; navuzwa salira kandi vosi avalisuuvira kuvitira mumakuva gaavo. 21Saalanga vosi vaduuki kuva kindu kilala. Baba! Saalaa vave mu kunyi kuli ivi oveeye mu inzi, nainzi mbeeye mu ivi. Saalaa vave kindu kilala, kunangwa avumukivala vaduuki kusuuvira ivi wanduma. 22Inzi mali kuvaha uvukumi vwa wamba, kunangwa vave kindu kilala kuli kunyi koveeye kindu kilala; 23inzi mbeeye muvo, na ivi oveeye mu inzi; kunangwa vaduuki kuva kindu kilala, kunangwa avumukivala vaduuki kumanya ndi ivi wanduma, kandi ivi wavayaanza kuli unyaanzaa.

24“Baba! Nyenya, yava avu wamba vave harara nainzi ahambeeye, ku valore uvukumi vwange vwa wamba; ku lwukuva wanyanza imbiri wi kivala kikiri kolombwa. 25O, Baba Mutakatifu! Avumukivala si vakumanyi mba, navuzwa inzi ngumanyi. Yava nivo avamanyi ndi ivi wanduma. 26Ndakokola umanyekane kuvo kandi ndazizagilira kokora ndio, kunangwa, uvuyanzi vwa oveeye navwo ku inzi vove muvo, nainzi mbe muvo.”

वर्तमान में चयनित:

YOHANA 17: LOGOOLI

हाइलाइट

कॉपी