VATUMWA 9

Lieganira lia Saolo

(Vik. 22:6-16; 26:12-18)

1Ing'inga yeyo Saolo yameda litihiza liile linene liu kwita avalondi vu Mwami. Yazia ku Musaalisi Munene, 2naasava ahevwe zibarwa ziu kwimanyia mu masinagogi ga Damasiko, ku nanyoora yo avasaza anoho avakali vava ni valonda amigizu gu Mwami Yeso, aduuki kuvagumira nu kuvaleeta Jerusalemi ni vavoheywi.

3Navuzwa lwa yaali naveeye ahimbi kuduuka Damasiko, nonoho uvulavu vwatula mwigulu nivong'ereng'ana kuye zimbega ziosi. 4Yagwa hasi naahulira mwoyo nigumuvoolera, “Saolo, Saolo! Kigira ki undambizaa?”

5Saolo yateeva, “Ivi nivwaha, Mwami?”

Naye yativura, “Inzi ni Yeso wa ivi udambiza.#9:5 Zibaibo zindala zimedanga ku, “Nivudinyu ku ivi kulasa luvasi ku kivambo”, henza 26:14. 6Navuzwa kalunu vuka, wingiri mu lidaala uwa umanya ovoolerwe amakuva aga udukana okole.” 7Avandu vaali na Saolo kologendo vasingira ho, nivakiring'ani; vahulira mwoyo yigwo, navuzwa si valora mundu mba. 8Saolo yavuka, navuzwa lwa yakunura zimoni zizie si yaali anyala kolola kindu mba; avandu vaali harara naye vamugumira mukono ni vamugendiza nukumuhira mu lidaala lia Damasiko. 9Saolo yamala madiku gavaga na atalolaa, natalizaa kandi natanwezaa.

10Mu Lidaala lia Damasiko yaali yo mwigizi mulala walangwa Anania. Mwami yamuvolera mu maloto, “Anania!”

Anania yahugira, “Mbeeye hano, Mwami.”

11Mwami yamuvolera, “Singira, uzie kunzira ilangwa Inzira Inungi, na munyumba ya Yuda, oteeve mundu mulala kutura Tariso, ulangwa Saolo. Kalunu ndi asaalaa; 12kandi amali kolola mu maloto mundu ulangwa Anania ni yingiraa kandi naviika amakono kuye kunangwa aduuki kolola kandi.”

13Navuzwa Anania yativura, “Mwami, ndaahulira amakuva gu mundu oyo ku avandu vanyingi. Ndaahulira vindu vidamanu via yakola ku avandu vovo mu Jerusalemi. 14Yaazi hano, na aveeye ni zinguru kutura ku vasaalisi vanene kovoha vosi avasigamiraa Ivi.”

15Navuzwa Mwami yamuvolera, “Zia vuzwa, kigira ndovoye uyu ave kiju change, yiilwaaze lieta liange ku zihiiri na avami vaavo, kandi ku avandu va Isiraeli. 16Inzi mwene ndamumanyia goosi agamuduukira kusalira kigira lieta liange.”

17Kunangwa Anania yazia niyingira munyumba mwa Saolo yaali. Yavika amakono geege ku Saolo namuvolera, “Amiitu Saolo, Mwami Yeso mwene uwaloleka ku ivi lwa waali kunzira kuuza hano, niyie undumi ku ivi uduuki kolola kandi, kandi uduuki kwizura Roho Mutakatifu.” 18Ahene yaho vindu vialoleka kuli makambaya gi zisuze viagwa hasi kutura mu zimoni zia Saolo, ma nalora kandi. Yasingira, kandi nabatizwa; 19lwa yamala kulia chukulia, yaali ni zinguru kandi.

Saolo yilwaza mu Damasiko

Saolo yamenya harara na vandu avasuuviraa vaali mu Damasiko ku amadiku makekeeke. 20Yaatanga kwilwaza mu masinagogi ndi Yeso aveeye Mwana wa Nyasaye.

21Avandu vosi avamuhulira vagenya ligali ni vavoola, “Mundu uyu siaveeye niyie witaa vandu avasigamiraa Yeso mu Jerusalemi? Siyaazi hano kandi ni kivuni chu kugumira avandu yavo kandi avahile ku avasaalisi vanene!”

22Navuzwa lilwaza lia Saolo lialoleka kuva ni zinguru ligali, kandi lilolekiza lilie ndi Yeso niyie Mesia, liali lieligali ku Avayuda vamenya Damasiko ma kali sivali vanyara kutivula kindu mba. 23Lwa madiku manyingi gaavita, Avayuda vavugana nivalohiza zing'anagani ziu kwita Saolo. 24Navuzwa Saolo yanyoora amakuva gi zing'anagani ziavo. Mbasu nu vudiku valinda virivwa vingira mu lidaala kunangwa vaduuki kumwita. 25Navuzwa mu ing'inga yu vudiku aviigi veve vamuvugura ni vamuvitilizira kwidigi, ni vamwikizira mu kihinda.

Saolo yirana Jerusalemi

26Lwa Saolo yirana Jerusalemi yageriza kuhambana na aviigi. Navuzwa vosi vaamutia, kandi si vasuuvira ndi umali kuva mulondi wa Yeso mba. 27Kunangwa Baranaba yaza navugura Saolo, naamuhira ku vatumwa, naviivalira kuli Saolo yalora Mwami kunzira, kandi kuli Mwami yavolerana naye. Yavavolera kuli yalora Saolo niyilwaza nuvuluviliri mu Damasiko. 28Maku Saolo yamenya harara navo, na avodong'anaa mu Jerusalemi mwosi ni yilwaza likuva liu Mwami vugira uvuti. 29Yavolerana kandi nahangalizana na Vayuda vamoloma Luguriki; navuzwa vageriza kumwita. 30Lwa vandu avasuuviraa vamanya amakuva yago, vavugura Saolo, nivamuhila Kaisaria, ni vamuleka azie Tariso.

31Ing'inga yeyo likanisa liali ni mirembe hoosi mu Vuyuda, Galilaya, na Samaria. Liumbakwa niliviruka mu liitia Mwami, nilimedeka koleminywa mwoyo kuvitira mu Roho Mutakatifu.

Ayineya yahonywa

32Lwa Petero yavodong'ana havundu hoosi, yaduuka kandi ku vatakatifu avamenyaa Liida. 33Yanyoora yo mundu mulala walangwa Aineya, uwaali ni yagona ku kidali mihiga munane kigira yaali niyafogoya. 34Petero yamuvolera, “Aineya, Yeso Kristo akohonyie. Vuka, olohizi vogono vuvwo.” Aineya yavuka vwangu. 35Vosi avamenya mu Liida nu mu Saroni valora Aineya, navo vosi vagirung'ana nivazia ku Mwami.

Petero yahonyia Torokasi

36Yaali ho mukali mulala mu lidaala lia Jopa walangwa Tabita. Mu Luguriki ni Torokasi, ligirung'anyia lialio ni kisusu. Mukali uyu yakola miyinzi milahi jokokoonya avadaka kazozo. 37Mu madiku yago yamanya nalwala, ma nakuza. Avandu vasiinga muviri gwigwe, nivagwaliriza mu keng'oze igulu. 38Jopa si liali ihale ligali na Liida mba; kulwayago, lwa vandu vasuuvira vahulira ndi Petero aveeye Liida, vatuma avandu vaviri kuye kumugoonya, “Hamba kuzie wiitu vwangu niganyalika.”

39Kunangwa Petero yetegeka nazia navo. Lwa yaduuka yahilwa mu keng'oze igulu. Avakunzakali vanyingi vakumbiriza Petero nivalira ni vamumanyia amakooti ni zinguvu zia Tabita yanavaa lwa yaali nakikili mwoyo.

40Petero yavatuliza ichova vosi, nasigama, nasaara. Yagirung'ana kohenza mukuzu, navoora, “Tabita, vuka!” Naye yakunura zimoni zizie; lwa yalora Petero, yikala. 41Petero yamugumira mukono namukoonya kusingira; yalanga avandu vatakatifu navakunzakali, namuhaana kuvo naveeye mwoyo. 42Amakuva ge kekolwa yiki galanda hoosi mu Jopa, na avandu vanyingi vasuuvira Mwami. 43Petero yamenya mu Jopa amadiku manyingi, munyumba yu mundu mulala uwalangwa Simoni, musiza wi visero.

Petero na Korinelio

वर्तमान में चयनित:

VATUMWA 9: LOGOOLI

हाइलाइट

कॉपी