VATUMWA 11

1Avatumwa na avasuuviri vi Ivuyuda, vahulira ndi avandu vi Zihiiri zindi kandi vamali kuvugura likuva lia Nyasaye. 2Lwa Petero yirana Jerusalemi, Avayuda vandu avasuuviri, avenyaa avandu vi Zihiiri kuduuka vakevwe, vamuhangaliza ni vavoola, 3“Kigira ki nuzia komenya na avandu vavura kokevwa, kali nuulia harara navo?” 4Hene yaho Petero yaatanga kuvivaalira vulahi amakuva gakolekaa kutura mu litanga:

5“Lidiku lilala lwa ndaali nisaara mu lidaala lia Jopa, ndaalora amalola; ndaalora kindu kuli isuuka enene ni yikizwa hasi kutura mwigulu, ni igumiliywi zikona ziayo zine, niviikwa ahimbi ninzi. 6Lwa nduumika nimbenzeriza ligali, ndaalora mu zinyama zie virenge vine, zinyama ziu mbulimu, zinyama zimolaa na manyonyi gu mbulimu. 7Ndahulira kandi umwoyo nigombolera, ‘Petero, singira witi ulie.’ 8Navuzwa inzi ndavoora, ‘Awa, Mwami, kindu choosi ikitali kinifu anoho kidamanu kikikiri kwingira ku mu munwa gwange mba.’

9“Umwoyo yigwo gwahulirika kandi haali kaviri kutura mwigulu, ‘Vindu via Nyasaye yatakasa, utavilanga vidamanu mba.’ 10Likuva yili liakoleka haali kavaga, ma inyima, viosi viranywa mwigulu. 11Ing'inga yene yeyo, avandu vavaga avaari nivatumiywi ku inzi kutura Kaisaria, vaduuka munyumba ya ndaali nemenyi mu. 12Roho yambolera nzie harara navo vugira kulindagilira. Avandu avasuuviraa sita yava vazia harara ninzi Kaisaria; ni kwingira yo munyumba ya Korinelio. 13Korinelio yakovolera kuli yalora engelosi nasingiyi munyumba yeeye, namuvolera, ‘Tuma mundu azie Jopa kulanga mundu mulala ulangwa Simoni, lieta lindi Petero. 14Uyu alakovolera amakuva gahonyia ivi harara na avinyumba yooyo vosi.’ 15Lwa ndatanga komoloma kuvo, Roho Mutakatifu yika kuvo kuli yika ku kunyi mulitanga. 16Maku ndizuliza amakuva gu Mwami yavoola: ‘Yohana yabatizaa na amazi, navuzwa munyi mulabatizwa mu Roho Mutakatifu.’ 17Niiva Nyasaye umali kuhaana ku avandu vi Zihiiri zindi kihanwa yicho cha yahaana ku kunyi lwa kwasuuvira ku Mwami Yeso Kristo, inzi nivwaha uhing'ana na Nyasaye?”

18Lwa vahulira yaga, valeka amahangari gaavo, ni vizominya Nyasaye, vavoola, “Nyasaye umali kuhaana ku vandu vi Zihiiri zindi vwiyangu vwu kwiganira no konyoora livamwoyo!”

Livugana lia Andiokia

19Kolondekana ku lidambizwa liatulira ing'inga ya Sitefano yitwa, vandu avasuuviraa avanyingi vasalanywa. Avalala vazia kuduuka kali Foenisia, Saipurasi na Andiokia, na vilwaza likuva ku Vayuda venyine. 20Navuzwa vandu avasuuviraa vandi vaza, avaatura Saipurasi na Kurene, vazia Andiokia nivilwaza Ivangeri yu Mwami Yeso Kristo. 21Zinguru ziu Mwami Nyasaye ziali harara navo, na avandu vanyingi vasuuvira nivagirung'ana kuzia ku Mwami Yeso.

22Amakuva gaavo gahulirika mu likanisa liali mu Jerusalemi. Kunangwa vatuma Baranaba azie Andiokia. 23Lwa yaduuka nalora kuli Nyasaye yaali nagasizi avandu yavo, yayanza; na aviganihizaa vosi vaye avasuuvirifu ku Mwami Yeso ni mioyo jaavo josi. 24Baranaba yaali mundu mulahi, wizura Roho Mutakatifu ni lisuuvira. Avandu vanyingi vasuuvira mu Mwami Yeso.

25Kunangwa Baranaba yazia Tariso kwenya Saolo. 26Lwa yamunyola, yamuleta Andiokia. Vosi vaviri vamenya harara ni likanisa ku muhiga mulala, nivigiza avandu vanyingi. Mu Andiokia yimwo nimwo mwa avalondi va Yeso vatanga kulangwa, “Avakristayo.”

27Ing'inga yene yeyo avaporofeti vaza Andiokia kutura Jerusalemi. 28Kunangwa mulala kuvo walangwa Agabo yasingira; na ku zinguru zia Roho, yalolekiza ndi inzara enene ilaaza mu lirova liosi. Inzara yeyo yaza maku ing'inga ya Kilaudia yaali niyamiha. 29Avandu avasuuviraa yavo vatovora kuhila kindu choosi cho vokonyi, sa mulala kuli anyala, ku avamwavo vamenya Ivuyuda. 30Kunangwa, vakora ndio nivahira via vavungiza ku avakulundu vi livugana mu makono ga Baranaba na Saolo.

Lidambizwa liameedeka mu likanisa

वर्तमान में चयनित:

VATUMWA 11: LOGOOLI

हाइलाइट

कॉपी