YOHANA 1

Ogochakera

1Agwo omochakano ndiarengeo Ring’ana, ne Ring’ana nigo riarenge amo na Nyasae, na rirorio Ring’ana nigo riarenge Nyasae. 2Oyio agwo omochakano nigo arenge amo na Nyasae. 3Bionsi bigakoreka ase oyio; gose onye tari ere, anga tigiakoregete kende gionsi egiakoregete. 4Ime yaye nao bwarenge obogima; na obogima obwo nigo bwarenge omobaso ase abanto. 5Noro omobaso obarire ase omosunte, erio omosunte toyorimia.

6Akaoroka omonto, otometwe korwa ase Nyasae, erieta riaye Yohana. 7Oyo nigo achete abe kirori, erinde aorokie omobaso, bonsi banyare kwegena goetera asere. 8Oyio tarenge omobaso oria, korende nigo achete aorokie omobaso.

9Omobaso bw’ekeene, oria okobarera kera omonto, ngocha orenge ase ense. 10Nao arenge ase ense ime, ense egatongwa goetera asere, na abanto b’ense tibamomanya. 11Agacha ase abaye, na barabwo abare abaye tibamwancha. 12Korende bonsi abamwanchete, akabaa okobua babe abana ba Nyasae, nabwo bariegenire erieta riaye. 13Abwo baiboirwe, tari korwa ase amanyinga a mwanyabanto, gose tari ase ogwancha kw’omobere, gose tari ase ogwancha kw’omonto, korende nigo baiboirwe na Nyasae.

14Na rirorio Ring’ana rigakoreka koba omobere, akamenya ase egati yaito. Tokarora obonene bwaye, obonene buna obw’Omwana omomoima orure ase Tata, oichire nobuya na ekeene. 15Yohana akamwatora, agaaka egeturi, akabora, “Oyo nere natebete igoro yaye ng’a: Oyorache nyuma yane nigo are omonene kombua, ekiagera nao arenge ritang’ani asende.” 16Na ase oboikeranu bwaye intwe twensi twanyorire obuya igoro ase obuya. 17Naki amachiko arwerete ase amaboko a Musa, obuya na ekeene nigo biachete goetera ase Yeso Kristo. 18Monto onde tari ororire Nyasae kero kende gionsi; Omwana omomoima ore ase egekuba gia Tata, nere omoorokirie.

Oborori bwa Yohana Omobatisi igoro ya Yeso

(Mat 3:1–12; Mar 1:7–8; Luk 3:15–17)

19Naende obo nabwo oborori bwa Yohana, ekero Abayahudi batomete abakuani na Abalawi korwa Yerusalemu bamoborie, “Aye naye ng’o?” 20Ere akaorokia, takana, agateba, “Inche tari Kristo.”

21Bakamoboria, “Naki rende? Naye Elija?” Akabora, “Inche tindi ere.” “Aye naye omobani oria?” Akairaneria, “Yaya.” 22Nabo bakamoboria, “Naye ng’o rende? Toe abatotomete okoiraneria. Naki ogweteba?” 23Akabora, “Inche neriogi ri’oyo ogoaka eriogi ase erooro: Rongeyia enchera y’Omonene, buna omobani Isaya atebete.”

24Na barabwo abatometwe nigo barwete ase Abafarisai. 25Bakaboria Yohana, “Naki rende okobatisa, onye aye tori Kristo, gose Elija, gose omobani oria?” 26Yohana akabairaneria, “Inche nigo nkobatisa ase amache, korende egati yaino nateneineo oyomotamanyeti inwe. 27Nere oyorache nyuma yane, inche tinyisaini nyesibore enuga y’egekoroto kiaye.”

28Aya nigo akoregete Bethania ng’umbu ya Yorodan, aase Yohana arenge kobatisera.

29Rituko ria kabere Yohana akarora Yeso ogocha asare, akabora, “Rora, Emanwa y’Eng’ondi ya Nyasae, oyokorusia ebibe bi’ense! 30Oyo nere naare goteba igoro yaye: Ngocha are omonto nyuma yane oyore omonene kombua, ekiagera nao arenge ritang’ani asende. 31Inche tinamomanyete; korende aorokigwe ase Abaisraeli, nabo ase ayio ngacha na kobatisa ase amache.”

32Naende Yohana akaorokia, “Narorire Omoika ogoika korwa igoro buna riruma, okobeera igoro asare. 33Na inche tinamomanya, korende ere oyontomete kobatisa ase amache, oyio nere ontebetie: Ere oyo oranyare korora Omoika ogoika na goikaransa igoro yaye, oyio nere okobatisa n’Omoika Omochenu. 34Na inche narorire, naende naorokirie ng’a oyo nere Omwana o Nyasae.”

Aborokigwa be ritang’ani

35Naende rituko ria kabere Yohana nigo arenge oteneine amo na babere b’aborokigwa baye. 36Akarigereria Yesu ogotaara, akabora, “Rora, Emanwa y’Eng’ondi ya Nyasae!”

37Aborokigwa baria babere bakamoigwa ogoteba aya, bagatunyana Yeso. 38Yeso akeonchora, akabarora bakomotunyana, akababoria, “Ninki mokorigia?” Bakamotebia, “Rabii” (okoonchorwa kwaye Omworokia), “nga’i omenyete?” 39Akabatebia, “Inchuo morore.” Bagacha, bakarora aase amenyete, bakaba nere rituko riria; nigo chiarenge ang’e chinsa ikomi. 40Anderea, momura omwabo Simion Petero, nigo arenge oyomo bwa baria babere baigwete Yohana, na gotunyana Yeso. 41Oyo akanyora ritang’ani Simion momura omwabo omonyene, akamotebia, “Twanyorire Masihi” (okoonchorwa kwaye Kristo). 42Akamoira ase Yeso. Yeso akamorigereria, akabora, “Aye Simion, omwana o Yohana, norokwe Kefa” (okoonchorwa kwaye Petero, gose egetare).

43Rituko ria kabere Yeso akarigia koimoka kogenda Galili. Akanyora Filipo, akamotebia, “Ntunyana.” 44Nere Filipo nigo arenge omonto o Bethisaida, omochie bw’Anderea na Petero. 45Filipo akanyora Natanaeli, akamotebia, “Twanyorire ere oyo amang’ana aye arigetwe na Musa ase amachiko, naende nababani, Yeso omwana o Yusufu, omonto o Nazareti.”

46Natanaeli akamoboria, “Egento ekiya nakenyare korwa Nazareti?” Filipo akamotebia, “Inchuo orore.” 47Yeso akarora Natanaeli ogocha asare, agakwana igoro yaye, “Rora oyo n’Omoisraeli ekeene, otari nobong’ainereria ime yaye!” 48Natanaeli akamoboria, “Ing’ai kwamanyera?” Yeso akamoiraneria, “Ritang’ani Filipo atarakorangeria, ekero kwarenge inse ase omoko, konya nakororire.” 49Natanaeli akamoiraneria, “Omworokia, aye n’Omwana o Nyasae, naye Omoruoti bw’Abaisraeli.”

50Yeso akamoiraneria, “Inee! Kwegenire ekiagera nagotebia ng’a nakoroche inse ase omoko? Norore amang’ana amanene kobua aya.” 51Abamotebia, “Ekeene, ekeene, nabatebirie: Inamorore igoro akoigoka, na abamalaika ba Nyasae bakoriina na goika igoro ase Omwana‐o‐mwanyabanto.”

वर्तमान में चयनित:

YOHANA 1: EKEGUSIIBBLE

हाइलाइट

कॉपी